Uşaq-yeniyetmə futbol məktəbləri şəbəkəsi yaradılır

Dövlət proqramına əsasən, gənc nəslin fiziki-mənəvi inkişafı, pis vərdişlərdən uzaqlaşması və idmana, futbola yönəlməsi istiqamətində xeyli iş görülüb

Azərbaycan Respublikasında ən kütləvi və ən çox sevilən idman növü olan futbolun zəngin tarixi və ənənələri var. Bakının "Neftçi", Gəncənin "Dinamo" komandalarının qazandığı uğurlar futbol tariximizin şanlı səhifələridir. XX əsrdə Azərbaycanda dünya səviyyəli futbolçular, məşqçilər və hakimlər yetişib. Amma 1992-ci ildən etibarən Dünya və Avropa çempionatlarının seçmə mərhələlərində Azərbaycan milli yığma komandası öz qrupunda sonuncu yerlərlə kifayətlənirdi.

Yeniyetmələrdən və gənclərdən ibarət yığma komandalarımız da beynəlxalq turnirlərdə ölkəmizi layiqincə təmsil edə bilmirdilər. Futbol bazalarının vəziyyəti, respublika uşaq-yeniyetmə futbol məktəblərinin maddi-texniki bazalarının aşağı səviyyədə olması, yüksək ixtisaslı məşqçi və müəllimlərin çatışmazlığı əhalinin, xüsusilə yeniyetmə və uşaqların futbol ilə məşğul olmağa artan tələbatınödəməyə imkan vermirdi. Futbolçu ehtiyatı hazırlığı üçün beynəlxalq standartlara cavab verən mərkəzlərin olmaması, süni örtüklü meydançaların yetərsizliyi, futbolla bağlı xüsusi metodik ədəbiyyatın çatışmazlığı ölkədə futbolun inkişafına və futbolçu ehtiyatı hazırlanmasına mənfi təsir göstərirdi. Ümumiyyətlə, respublikada futbolun bu vəziyyəti idmanın bu növünün kütləvi inkişafı üçün təxirəsalınmaz və konkret tədbirlərin görülməsini, uşaq-yeniyetmə və gənclər arasında işin canlandırılmasını, futbol infrastrukturunun inkişafını, beynəlxalq səviyyəli futbolçuların hazırlanmasını zəruri edirdi. Bu mənada Azərbaycan Respublikasında futbolun inkişafı dövlət proqramı (2005-2015-ci illər) - ölkədə futbolun inkişafına və beynəlxalq yarışlarda uğurlar əldə etməyə xidmət edir. Layihə çərçivəsində təqdim etdiyimiz yazıda dövlət proqramında nəzərdə tutulan tədbirlərin uşaq və yeniyetmələrin fiziki-mənəvi inkişafında oynadığı rola toxunacağıq. Qeyd edək ki, futbolun inkişafı dövlət proqramının əsas məqsədi "Bədən tərbiyəsi və idman haqqında" qanununa, habelə bədən tərbiyəsi və idmana aid digər normativ hüquqi aktlara uyğun olaraq futbol sahəsində dövlət siyasətinin həyata keçirilməsini, ölkədə futbolun və onun infrastrukturunun inkişaf etdirilməsini, futbol ilə məşğul olmaq üçün müvafiq şəraitin yaradılmasını, köhnə stadionların bərpasını, yenilərinin layihələşdirilməsini və tikintisini, beynəlxalq səviyyəli futbolçuların, məşqçilərin, hakimlərin və digər futbol mütəxəssislərinin hazırlanmasını təmin etməkdən ibarətdir. Proqramın əsas vəzifələri sırasında uşaq-yeniyetmə futbol məktəbləri şəbəkəsini inkişaf etdirmək, futbolda xüsusi istedadı olan uşaqlar üçün ixtisaslaşdırılmış futbol internat məktəblərini, ehtiyat futbolçu hazırlığı üçün bölgə və respublika mərkəzlərini yaratmaq da var. Gənc nəslin fiziki-mənəvi inkişafı, pis vərdişlərdən uzaqlaşması və idmana, futbola yönəlməsi istiqamətində xeyli iş görülüb. Təhsil müəssisələrində, əhalinin yaşayış yerlərində futbol infrastrukturunun yaradılması, təhsil müəssisələri üçün futbol üzrə tədris proqramlarının işlənib hazırlanması, ümumtəhsil, orta ixtisas və ali məktəblərdə futbol bölmələrinin açılması, məhəllə komandaları arasında futbol üzrə yarışların keçirilməsi, mövcud və yeni açılacaq uşaq-gənclər idman və internat məktəblərində qadın futbolu üzrə tədris qruplarının yaradılması, ölkənin bütün bölgələrində istedadlı uşaqlar üçün futbol üzrə ixtisaslaşdırılmış internat məktəblərinin yaradılması nəzərdə tutulub. Ümumi təhsil, orta ixtisas və ali təhsil müəssisələrində yeniyetmə və gənclərin idmanla məşğul olması üçün əlverişli şərait yaradılıb, futbolun inkişaf etdirilməsi istiqamətində həyata keçirilən tədbirlər nəticəsində şagird və tələbələr arasında idmanın bu növünə maraq xeyli artıb. Uşaq, yeniyetmə və gənclər arasında futbol idman növünü təbliğ etmək, onların ustalıqlarını artırmaq, perspektivli futbolçuları üzə çıxarmaq məqsədilə il ərzində uşaq-gənclər idman məktəbləri, ümumtəhsil, texniki peşə, orta ixtisas və ali təhsil müəssisələrinin şagird və tələbələri arasında mütəmadi olaraq müxtəlif yaş qrupları üzrə məktəbdaxili, rayon, şəhər və respublika səviyyəli yarış, birincilik və çempionatlar keçirilir. Dövlət Proqramından irəli gələn vəzifələri yerinə yetirmək məqsədilə universitet tələbələri arasında futbol üzrə respublika çempionatı, uşaq-gənclər idman məktəblərinin 13-14 yaşlı futbolçulardan ibarət komandaları arasında respublika turniri keçirilib. Eyni zamanda təqvim planına uyğun olaraq uşaq, yeniyetmə və gənclər arasında il ərzində futbol idman növü üzrə müxtəlif səviyyəli yarış, birincilik və çempionatlar keçirilir. Futbolun inkişafına dair Dövlət Proqramının icrası ilə əlaqədar yeni idman meydançalarının salınması, futbolun yeniyetmələr və gənclər arasında kütləviliyinə nail olunması, onların ustalıqlarının artırılması istiqamətində işlər davam etdirilir. Gəncə şəhər 1 nömrəli əsas internat məktəbinin bazasında futbol təmayüllü internat tipli gimnaziya yaradılıb. “Təhsil” Respublika İdman Mərkəzinin Bakı filialının bazasında uşaq-gənclər futbol məktəbinin yaradılması ilə bağlı aidiyyəti dövlət qurumlarına rəsmi müraciət edilib. Təhsil Nazirliyi və AFFA-nın birgə təşkilatçılığı ilə Bakı şəhəri ümumtəhsil məktəblərinin qabaqcıl fiziki tərbiyə müəllimləri üçün seminarlar keçirilib. Bakı şəhərinin 51, 171, 237, 239, 136 nömrəli orta, Makarenko adına internat, Füzuli rayonu 27 nömrəli orta məktəblərində və “Təhsil” Respublika İdman Mərkəzinin Bakı filialında yeni süni örtüklü futbol meydançaları yaradılıb. Qeyd olunan ümumtəhsil məktəblərində AFFA-nın mütəxəssislərini iştirakı ilə futbol dərsləri tədris olunur. Dövlət Proqramına uyğun olaraq, yeniyetmə və gənc futbolçuların peşəkarlığının artırılması məqsədilə Bakı şəhəri, Tovuz, İmişli rayonlarının ümumtəhsil məktəblərində təhsil alan 19 nəfər məktəbli futbolçu seçilərək Türkiyənin İstanbul şəhərində, “Fənərbağça” klubunun bazasında hazırlıq keçmələri təmin edilib. Həmin tədbirlərdən biri də Yaşar Məmmədzadə adına Mingəçevir şəhər stadionunda baş tutub. FIFA-nın bayrağı altında AFFA-nın təşkilatçılığı ilə qadın futbolunun kütləviliyinin artırılması, qızların futbola cəlb olunması, onların bu idman növü ilə mütəmadi şəkildə məşğul olmasına zəmin yaradılması məqsədilə “Live Your Goals” (“Öz məqsədlərini yaşat”) tədbiri keçirilib. Tədbirdə AFFA-nın baş katibinin müavini Sərxan Hacıyev, Şimal-Qərb Futbol Federasiyasının prezidenti Rövşən Əhmədov, Mingəçevir Şəhər Gənclər və İdman İdarəsinin rəisi Kamal Nəcəfli, futbol veteranı Rüstəm Rəhimov, Azərbaycan milli komandasının məşqçisi Mahmud Qurbanov, 19 yaşadək qızlardan ibarət Azərbaycan yığmasının baş məşqçisi Patrisiya Gonzales və 17 yaşadək qızlardan ibarət yığmamızın baş məşqçisi Siyasət Əsgərov, U-17 qızlar yığmasının üzvləri Firəngiz Teymurova və Manə Mollayeva iştirak ediblər. Xatırladaq ki, “Live Your Goals” (“Öz məqsədlərini yaşat”) silsilə tədbirləri daha əvvəl 2012-ci il martın 12-də "Dalğa Arena"da, aprelin 30-da Zaqatala, iyunun 8-də Quba, iyulun 28-də Şəki, avqustun 30-da Masallı şəhərlərində, həmçinin sentyabrın 18-də Bayıl stadionunda müvəffəqiyyətlə keçirilib. Bu tədbirlərdə beynəlxalq futbol qurumlarının nümayəndələri ilə yanaşı, tanınmış qadın futbol veteranları Şirli Kruz və Şteffi Cons iştirak ediblər.

Anar Miriyev

Palitra.-2014.-23 iyul.-S.11.