İdmanla məşğul olmaq insana həm fiziki, həm mənəvi güc və əminlik verir

Azərbaycan Prezidenti:

“Bizdə gənc nəsil yetişir, tələbə idmançılar, uşaqlar. İndi mən mütəmadi qaydada müxtəlif bölgələrdə olarkən görürəm ki, uşaqlar, balaca uşaqlar idmanla necə həvəslə məşğul olurlar”

Ölkəmizdə idmanın inkişafı istiqamətində həyata keçirilən siyasətin nəticəsi olaraq qarşıya qoyulan hədəflərin miqyası bir qədər də genişlənib. Əgər bir müddət əvvəl əsas məqsəd idmanı dirçəltmək, bu sahəyə daha çox insanı cəlb etmək və infrastruktur yaratmaq idisə, artıq bu gün məqsədimiz dünyanın ən böyük idman yarışı olan Olimpiya Oyunlarını qəbul etməkdir. Layihə çərçivəsində təqdim etdiyimiz yazı da bu məsələlərin uşaq və gənclərin fiziki-mənəvi inkişafında oynadığı rola həsr olunub.

Ölkə daxilində idmanın inkişafı ilə bağlı dövlətin həyata keçirdiyi siyasət böyük uğurların əldə edilməsinə səbəb olub. Yəni, bu gün idman sahəsində böyük yeniyetmə və gənclər ordusu cəmləşib ki, bu, dövlətin həyata keçirdiyi idman siyasətinin ana xəttini təşkil edir. Dövlət başçısı, Milli Olimpiya Komitəsinin rəhbəri olan İlham Əliyevin idman sahəsində həyata keçirdiyi siyasətdə sağlam nəsil yetişdirmək, yeniyetmələri, gəncləri pis vərdişlərdən uzaqlaşdırmaq, onları idmana cəlb etmək çox mühüm yer tutur. Planlı şəkildə həyata keçirilmiş, düşünülmüş idman siyasətinin hədəfinə çatması bu sahədə böyük işlərin həyata keçirilməsi ilə mümkün olub. Dövlət başçısının idman sahəsində həyata keçirdiyi siyasət o qədər dəqiqliklə hesablanıb ki, bir hədəfin daxilində bir çox məqsədlərə çatılması nəzərdə tutulub və biz indi bunu daha yaxşı başa düşürük. Sağlam nəsil yetişdirmək, gələcək üçün sağlam, pis vərdişlərdən uzaq olan Azərbaycan vətəndaşı formalaşdırmaq hədəfi ölkə daxilində böyük infrastrukturun yaradılmasını təmin edib. Bu gün ölkəmizin hər bir bölgəsi idman və digər infrastrukturla təmin olunub. Yəni, idmanı inkişaf etdirmək əslində bölgələrin inkişafını təmin edib. Kompleks şəkildə həyata keçirilən və bir-biri ilə sıx bağlı olan işləri bütövlükdə ölkəmizin inkişafını təmin edib. Hər hansı bir bölgəmizdə beynəlxalq idman yarışını keçirmək üçün lazım olan müasir idman arenası, otel, yol-nəqliyyat infrastrukturu yaradılıb. Digər tərəfdən idmanın inkişafı ölkənin nüfuzu, beynəlxalq aləmdə tanınmasıdır. Azərbaycan idmançıları qazandıqları nailiyyətlərlə ölkəmizin dünyada idman ölkəsi kimi mövqelərini bir qədər də möhkəmləndirir. Dövlət idmanın inkişafı üçün lazım olan bütün tədbirləri həyata keçirərək ölkədə sağlam həyat tərzinin təbliğinə çalışır. Bunun üçün bütün mümkün vasitələrdən istifadə edilir. Şübhəsiz ki, bu uğurların arxasında Azərbaycanda dövlət başçısının rəhbərliyi altında həyata keçirilən idman siyasəti dayanır. Hansı ki, həmin siyasət həm ölkəmizin idman ölkəsi kimi tanınmasını təmin edib, həm də ölkədə idman ətrafında böyük gənclik ordusu toplayıb. Bu məsələdə bölgələrdə inşa edilərək yerli sakinlərin istifadəsinə verilən müasir Olimpiya Kompleksləri böyük rol oynayır. Dünyada az belə ölkə tapıla bilər ki, qısa müddət ərzində demək olar ki, bütün bölgələrini müasir idman qurğuları ilə təmin edə bilsin. Azərbaycada dövlət başçısının həyata keçirdiyi siyasətin əsas özəlliklərindən biri də ondan ibarətdir ki, müasir idman qurğuları inşa edilərkən kompleks şəkildə işlər həyata keçirilərək müasir infrastruktur yaradılır. Bu amillər isə yeniyetmə və gəncləri idmana istiqamətləndirir. Azərbaycan Prezdentinin qeyd etdiyi kimi ölkəmizdə güclü nəsil yetişib: “İdman hər bir cəmiyyətin ümumi inkişafını göstərir. Bir daha demək istəyirəm ki, idman arenalarında ən böyük uğurları inkişaf etmiş ölkələr qazanır. Bu da təbiidir. Çünki bu ölkələrdə idmana diqqət daha da yüksək səviyyədədir, həm maddi-texniki baza möhkəmdir, həm investisiyalar qoyulur. Baxmayaraq ki, Azərbaycan gənc müstəqil dövlətdir, biz də öz gücümüzü artırırıq və idmana olan dövlət dəstəyi hesab edirəm ki, bu uğurların əldə edilməsində öz rolunu oynamışdır. Əlbəttə ki, məşqçilərin, idman mütəxəssislərinin çox peşəkar fəaliyyəti və idmançıların fədakarlığı bu ümumi inkişafa öz töhfəsini vermişdir. Azərbaycanda idman ümummilli məsələdir. İdman cəmiyyətimizin ayrılmaz hissəsidir. Mən idmanla bağlı olan bütün tədbirlərdə qeyd edirəm ki, hər bir insan, xüsusilə, hər bir gənc mütləq idmanla məşğul olmalıdır. Lap idmançı olmasa belə, idmanla məşğul olmaq insana həm fiziki, həm mənəvi güc və əminlik verir. İdman mədəniyyətdir. Hesab edirəm ki, dövlət tərəfindən aparılan siyasət bu istiqamətdə müsbət nəticələrə gətirib çıxarmışdır. Eyni zamanda, gənc idmançıların yetişdirilməsi üçün əlavə hansı tədbir görülməlidir, bunu da biz daim diqqətdə saxlayırıq. İdmanın uğurlu və ardıcıl şəkildə inkişafı artıq təmin edilibdir. Bizdə gənc nəsil yetişir, tələbə idmançılar, uşaqlar. İndi mən mütəmadi qaydada müxtəlif bölgələrdə olarkən görürəm ki, uşaqlar, balaca uşaqlar idmanla necə həvəslə məşğul olurlar. Onu da qeyd etməliyəm ki, cəmiyyətdə artıq idmançıların uğurlarına bir vərdiş yaranıbdır. Yəni, sanki bu, belə də olmalıdır. Əvvəlki illərdə hər bir qələbə böyük bir rezonansa səbəb olurdu. Ancaq bu da təbiidir. Çünki qələbələrin sayı artdıqca insanlar buna öyrəşir və elə gəlir ki, bu qələbələri əldə etmək çox asandır. Siz idmançılar və idmanla məşğul olanlar yaxşı bilirsiniz ki, bütün bu nailiyyətlər nə qədər böyük zəhmət hesabına əldə edilir. İdmançılar nəyin bahasına öz dövlətini ləyaqətlə təmsil edirlər, zədələnirlər, xəsarət alırlar, yorulurlar. Bütün bu işlər, necə deyərlər, diqqətdən bir qədər kənarda qalır. Ancaq bunu hamı bilməlidir. Çünki belə mötəbər yarışlarda böyük qələbəni əldə etmək üçün mütləq çox böyük fədakarlıq, peşəkarlıq və Vətənə sevgi lazımdır. Bizim gənclər vətənpərvərlik ruhunda tərbiyə alırlar, Vətənə, xalqa bağlıdırlar. Onların ən böyük mükafatı xalqın sevgisi və qiymətidir”. Bu gün Azərbaycan ulu öndərin gənclər və idman siyasətinin davamı olaraq istənilən səviyyəli dünya miqyaslı beynəlxalq yarışlara ev sahibliyi edə bilir. Bunun üçün ölkəmiz ayrı-ayrı beynəlxalq federasiyalar, Olimpiya komitələri, Avropa Olimpiya Komitəsi ilə çox sıx əməkdaşılq edir. Bunun məntiqi nəticəsidir ki, Azərbaycan 2015-ci il şahmat üzrə dünya çempionatına, 2016-cı il şahmat üzrə Olimpiya oyunlarına, 2015-ci il Birinci Avropa İdman Oyunlarına, 2017-ci il İslam Həmrəyliyi oyunlarına ev sahibliyi edəcək. Bunlar hamısı ölkə Prezidentinin, Milli Olimpiya Komitəsinin prezidenti İlham Əliyevin daim idmana olan qayğısının nəticəsidir. İnfrastrukturu güclü, insan potensialı zəngin olan, maliyyə resursları daim artan, maddi-texniki bazası beynəlxalq standartlara cavab verən, hakim, məşqçi və idmançı kateqoriyasını yetişdirən dövlət yalnız bunu edə bilər. Respublikamızda keçiriləcək Birinci Avropa İdman Oyunlarına hazırlığın gedişinə baxış üçün gələn beynəlxalq ekspertlərin və mütəxəssislərin verdikləri rəy bir daha onu göstərir ki, qısa zaman kəsiyində ölkəmizdə idman sahəsində əldə olunmuş nailiyyətlər onilliklərə bərabərdir. İdmanda hər zaman uğurlar qazanılıb. Amma bugünkü nəticələr həm kəmiyyət, keyfiyyət, həm də idman növlərinin coğrafiyası baxımından əvvəlkilərdən köklü surətdə fərqlənir. Ona nail olmuşuq ki, Azərbaycan medalların sayına və əyarına görə dünyanın aparıcı idman dövlətləri ilə rəqabət aparır. Şübhəsiz ki, ölkəmizdə idmanın belə inkişafı gənc nəslin, uşaq və yeniyetmələrin idmana olan həvəsini artırmaqla onları bədən tərbiyəsi və idmana istiqamətləndirir. Bu amil isə gələcəyimiz üçün vacib olan gənc nəslin fiziki və mənəvi baxımdan sağlam yetişməsində müstəsna rol oynayır.

Anar Miriyev

Palitra.-2014.-26 iyun.-S.11.