Mürvət İsmayılov: “Ukraynadakı gənclərimiz idmana çox üstünlük verirlər”

Azərbaycan gənclərinin xaricdəki uğurları təkcə elmi kəşfləri ilə bitmir. Xaricdəki gənclərimiz eyni zamanda idman sahəsində də uğurlar əldə edərək Azərbaycan bayrağını yüksəklərə qaldırırlar. Bu baxımdan son zamanlar Ukraynadakı gənclərimiz də bir sıra nailiyyətlər qazanıblar. Müsahibimiz Mürvət İsmayılov da Ukraynada idman sahəsində bir sıra uğurlara imza atıb. Qeyd edək ki, M .İsmayılov Xaçmaz şəhərində anadan olub. Ukraynada politologiya üzrə təhsil alıb. Uşaqlıqdan karate, boks, cüdo idman növləri ilə məşğul olub.

- Ukraynadakı gənclərimiz əsasən hansı sahədə təhsil alırlar?

- Ukraynada gənclərimiz ən çox hüquq və iqtisadiyyat sahəsində təhsil alırlar. Bu baxımdan biz Ukraynaya gələn və gəlmək istəyən gənclərimizə təhsil haqqında anlayış veririk. Qeyd edim ki, bu baxımdan bir çox problemlər də var. Bura təhsil almaq üçün gələn bir sıra gənclərimiz bəzi işbazlar tərəfindən aldadılaraq özəl universitetlərə yönəldilirlər və nəticədə də savadsız kadrlar yetişir.

Ancaq Yeni Nəfəs Hərəkatı Ukraynada formalaşdırılarkən əsas məqsədin gənclərin idman, təhsil və mədəniyyətimizə töhfə verməsi olub.

Şəxsən mən təhsil və idman üzrə qanuni təşkilat yaratdım və Ukraynada dövlət qeydiyyatından keçirərək təhsil müəssisələri və idman klubları ilə əlaqələr qurdum. Universitet dekanları ilə şəxsən təşkilatımız adından danışaraq Azərbaycandan gələn tələbələrə xüsusi nəzarət yetirmələrini xahiş edirəm. Bizim nəinki Ukraynada, eyni zamanda Polşa, Türkiyədəki universitetlərlə də dövlət səviyyəsində yaxın əlaqələrimiz var.

Burada təhsil almaq istəyində olan gənclərə hər zaman dəstək göstərə bilərik. Çünki Vətənimiz üçün savadlı gənclik lazımdır.

-Ukraynadakı gənclərin idmana marağı hansı səviyyədədir?

- Bizim gənclərimizin idmana marağı həmişə olub. Təkcə Azərbaycandan Ukraynaya təhsil almağa gələn yox, burada doğulan və yaşayan gəclərimiz də idmana çox üstünlük verirlər. Ona görə ki, açıq desək, Ukrayna həyatında idman daha populyardır. Bizə gəldikdə isə azərbaycanlı gənclər ən çox futbola və fərdi döyüş növlərinə maraq göstərirlər. Ancaq burada fəaliyyət göstərən bəzi formal təşkilatlar əsasən professional olmayan tələbələri idman departamenti yaratmaq bahasına təhsildən aralayaraq öz məqsədləri üçün istifadə edirlər. Onlar da hər hansı bir turnirdə iştirak edərkən ilk döyüşdəcə uduzur və Azərbaycanın adını qaldırmaq bir yana, hətta Vətənimizin mənfi təbliğini aparırlar.

Biz isə idmana marağı olan, əsasən burada yaşayan və eyni ilə tələbələri də komandamıza, əsasən də departamentimizə cəlb edərək onlarla peşəkarcasına işləyirik. Ancaq bir az çətinliklər də var. Gənclərimizi də bir yerə toplamaq asan iş deyil və ya onlarla əlaqə saxlamaq da vaxt və tələbkarlıq istəyir.

Bu vaxta kimi mənim yanımda yaxın dostum Fəxrəddin İskəndərov və başqa azərbaycanlı idmançılar, eləcə də çeçen və ukraynalı məşqçilər olub. Yeni Nəfəs Hərəkatı Ukrayna (YNH) Nümayəndəliyinin İdman və Təhsil departamentini də birlikdə formalaşdırırıq. Bir yerdə fəaliyyət göstəririk. Bizim kollektivdə sözün əsl mənasında səmimi dostluq var. F.İskəndərovu Azərbaycanda yəqin ki, bir çox idman mütəxəssisləri gözəl tanıyır. O, Bədən Tərbiyəsi və İdman Akademiyasında təhsil alıb və kik-boksinq üzrə dünya çempionu olub. Üç ildir ki, Kiyevdə yaşayır. Bu yaxınlarda Fəxrəddin iki yarışda iştirak etdi. Hər iki döyüşü qələbə ilə başa vurdu. Mən onda özümü dünyanın sahibi sanırdım. Bayrağımızı yüksəklərə qaldırdı. Bu belə uğurlarımız qarşıda hələ çox olacaq.

Bu yaxınlarda biz özümüz istəyirik ki, Kiyevdə gənclərimiz üçün idman zalı acaq. Bura bizimlə dostluq edən ukraynalı gəncləri də dəvət edəcəyik. Azərbaycanı idman sahəsində də yüksək səviyyədə təmsil etmək, düşmənlərimizə gücümüzü göstərmək, bayrağımızı həmişə yüksəkdə dalğalandırmaq istəyirik.

-Sizdə idmana maraq haradandır?

- Mənim dayılarım güləş üzrə bir neçə dəfə çempion olublar. Vaxtilə SSRİ-də tanınırdılar. Yaxşı idmançı olduqlarına görə indiyəcən Azərbaycanda çox hörmətləri qalıb. İdmançı olmağımda dayılarımın böyük rolu olub. Mən hətta yorulub dayananda çox qoymazdılar məşqi buraxım. Deyərdilər ki, əsl güc idmançının son gücündə olur. Hazırda mən Ukraynada da peşəkarcasına məşq edirəm. Balaca vaxtdan həmişə arzum olub ki, Azərbaycanı həm təhsil, həm də idman sahəsində xarici ölkələrdə təmsil edim. Demək olar ki, arzularıma çatıram.

- Bu vaxta kimi Ukraynada idman sahəsində hansı uğurlarınız olub?

- Bu vaxtda kimi mən idman üzrə Azərbaycanı Ukraynada bir neçə dəfə təmsil etmişəm. Özüm boksla ciddi məşqə başlamışdım. Bir neçə il Ukraynanın Dnepropetrovsk şəhərində dayımın yanında qalmışam. Orada “Tayson” adına kluba gedirdim. İndi o klub “Dnipro” adlanır. Çox tanınmış bir zaldır. Orada demək olar ki, bütün professional boksçular olub. Müəllimlərim də Ukrayna çempionu olublar. Mən Dnepropetrovsk üzrə bir neçə dəfə yerlər almışam.

Bəlkə də daha çox nailiyyətlərim olardı, ancaq mən heç nədən narazı deyiləm. Mənim atam ikinci qrup Çernobl əlilidir. Ailəmin yanında olmuşam, atamın müalicəsinə vaxtımı sərf etmişəm. Amma özümün edə bilmədiyimi başqa gənclərimizdə görmək istəyirəm. Axı niyə də olmasın. Vətənimiz buna qadirdir. İstedadlı gənclər də var.

Mən gənclərimizə demək istərdim ki, ilk gündən “bu gün məşq edim, sabah çempion olub nailiyyət qazanım” fikrinə düşməsinlər. Bunun üçün çox çalışmaq lazımdır. Bir məqsədə gəldikdə birdən-birə on addım atmaq olmaz.

Tədricən biz də bütün dünyada istəyimizə nail olacağıq. Biz yeniyik, amma etdiyimiz işlər və uğurlarımız bizə sevinməyə imkan verir. Mən buna həmişə əmin olmuşam və olacağam da!

-Azərbaycanın təbliği işində idmandan nə kimi istifadə edirsiniz?

- Bizim bir çox planlarımız var. Hazırda Ukraynada stabil həyat höküm sürür. Biz Ukrayna və digər Avropa ölkələri təşkilatları ilə əlaqə yaratmışıq. Bugünlərdə Birləşmiş Ukrayna Azərbaycanlıları Diasporunun maliyyə dəstəyi ilə Ukrayna Tələbə Gənclər Birliyi ilə birgə futbolla bağlı Kiyevdə dostluq turniri təşkil etmişdik.

Fəxrəddinlə birgə bir çox idman növləri üzrə Ukraynada turnirlər keçirəcəyik. Hazırda idmanla bağlı planlar, layihələr fikirləşirik. Gələcəkdə şahmat, futbol və əlbəyaxa döyüş idman növləri üzrə turnirlər keçirmək fikrimiz var. Bu baxımdan mən ukraynalı və türk dostlarımıza öz minnətdarlığımı bildirirəm.

Başda Türkiyənin Ukraynadakı səfirliyi, Ukrayna dövlət orqanları olmaqla onlar da həmişə bizə dəstək olub. Bir də Birləşmiş Ukrayna Azərbaycanlıları Diasporuna, əsasən də təşkilatın sədri Hikmət Cavadova öz minnətdarlığımı bildirirəm. Bizə yüksək dərəcədə dəstək verir. Gələcəkdə bu təşkilatla da birlikdə layihələrimiz olacaq.

-Bir idmançı olaraq Azərbaycan bayrağını və adını xaricdə ucaldarkən hansı hisslər keçirirsiniz?

- Birinci növbədə mən həmişə fəxr edirəm ki, azərbaycanlıyam. Həmişə arzum budur ki, bayrağımız yüksəklərdə olsun. Azərbaycan onsuz da öz elmi, iqtisadi və siyasi nailiyyətləri ilə bayrağımızı dünyanın söz sahibi olan ölkələrinin bayraqlarının yanında dalğalandırır.

Prezidentimiz İlham Əliyev Azərbaycan gənclərinə hər zaman diqqət göstərir. Düzdür, mən aktiv siyasətçi olmasam da, bu ixtisas üzrə təhsil almışam. Dövlət başçısının hər zaman açıqcasına türk dövlətlərinin haqlarını dəstəkləməsi məni qürurlandırır. Bu yaxınlarda Praqa şəhərində keçirilən sammitdə cənab Prezidentin çıxış edərək Ermənistan prezidenti Serj Sərkisiyana verdiyi cavab türk qardaşlarımız qədər məni də sevindirdi.

Bayrağımız, torpaqlarımız işğaldan azad olunandan sonra daha da fəxrlə dalğalanacaq. Amma biz də Vətəndən uzaqda bayrağımızı dalğalandırmağa hazırıq.

Fuad Hüseynzadə

Palitra.-2014.-6 iyun.-S.11.