Beynəlxalq musiqi müsabiqələri yeniyetmələrin mənəvi inkişafında böyük rol oynayır

Tofiq Quliyevin adına 12 saylı Uşaq musiqi məktəbi yeniyetmələrin, gənclərin mənəvi inkişafı, musiqi sahəsində yüksək təhsil alması istiqamətində bir sıra yeniliklər tətbiq edir

Layihə çərçivəsində yazımız Tofiq Quliyev adına 12 saylı Uşaq musiqi məktəbi ilə bağlıdır. Məktəbdən qəzetimizə bildiriblər ki, 1929-cu ildə yaradılan 12 saylı Uşaq musiqi məktəbi 2005- ci ildən Xalq artisti Tofiq Quliyevin adını daşıyır. Vaxtı ilə görkəmli musiqiçi və bəstəkar Adil Gəray, Zülfi Adıgözəlov, Ağabacı Rzayeva, Nəriman Əliyev bu məktəbdə dərs deyiblər.

Məktəbin şagirdləri respublika səviyyəli müsabiqələr, baxışlar, festival və olimpiadalarda çıxış edirlər. 12 saylı Uşaq musiqi məktəbinin yetirmələri arasında Xalq artisti, professor Ağaverdi Paşayev, bəstəkar Azər Dadaşov, Xalq yazıçısı Çingiz Abdullayev, Heydər Əliyev Sarayının baş rejissoru Gülnarə Şəfiyeva, “İnci” qanunçalanlar ansamblının rəhbəri, respublikanın Əməkdar artisti Təranə Əliyeva, Əməkdar artist, pianoçu Rəşad Haşımov və digərlərinin adlarını çəkə bilərəm. Məktəbin bir çox yetirməsi bu gün öz doğma məktəblərində gənc nəsli tərbiyəsi ilə məşğul olurlar. Fəaliyyət göstərdiyi illər ərzində məktəbin şagirdləri hər zaman müxtəlif səpkili müsabiqə və festivallarda çıxışlar edərək yüksək nailiyyətlər əldə ediblər. Məktəbin şagirdləri respublika səviyyəli yarışlarda, müsabiqələrdə uğurla təmsil olunurlar. 2006-cı ildə Bakı Musiqi Akademiyasının nəzdində fəaliyyət göstərən məktəb studiyanın 25 illik yubileyinə həsr olunmuş uşaq musiqi festivalında məktəbimizin şagirdləri Tükəzban Dadaşova və Zülalə Abduləzizova müxtəlif dərəcəli dimlomlarla təltif olunublar. Məktəbdə tədrisin gücləndirilməsi, şagirdlərin hərtərəfli estetik inkişafı üçün rəngarəng tədbirlərin, müxtəlif səpkili konsertlərin, müsabiqələrin, viktorinaların keçirilməsi ənənəyə çevrilib. Məktəbin daxili həyatını canlandıran bu tədbirlərlə yanaşı, respublika və Bakı şəhəri üzrə keçirilən müxtəlif festival və müsabiqələrdə, dövlət səviyyəli tədbirlərdə şagirdlərimiz fəal iştirak edirlər. Son illər ərzində məktəbdə 7 laureat təhsil alıb. Məktəbin yetirməsi Günel Sadıxova isə ilk Prezident təqaüdçülərindəndir. Məktəbin şagirdləri respublikanın ictimai həyatında da fəal iştirak edirlər. Məsələn, şagirdlər Heydər Əliyev Fondunun təsis etdiyi “Heydər Əliyev” nişanının təqdim olunma mərasimində, Beynəlxalq Qadınlar Fondunun təşkil etdiyi xeyriyyə konsertlərində, Bəstəkarlar İttifaqının 60 illik yubileyi ilə əlaqədar keçirilən konsertdə, Xalq şairi Rəsul Rzanın 100 illik yubileyi ilə əlaqədar keçirilmiş dövlət tədbirində, xarici ölkə səfirlərinin respublikamızda keçirdiyi dəyirmi masalarda, “Bakı İslam Paytaxtı” çərçivəsində keçirilən dünya din xadimlərinin forumuna həsr olunmuş tədbirlərdə solo və ya Q.Qarayev adına dövlət kamera orkestrinin müşayiəti ilə çıxış ediblər. Ötən il Estoniyanın Narva şəhərində İ.S.Bax adına VI Beynəlxalq festivalda məktəbin Fortepiano şöbəsinin IV sinif şagirdi Ayan Məmmədli Baxın əsərlərinin ifasına görə I dərəcəli festivalda iştirak etdiyinə görə III dərəcəli diplomla təltif olunub. 2013-cü ilin may ayında Türkiyənin İstanbul şəhərində keçirilən VIII Pera Beynəlxalq piano festivalında Fortepiano şöbəsinin IV sinif şagirdi Ayan Aslanova III dərəcəli diploma nail olaraq "Laureat" adını qazanıb. Həmin ilin avqust ayında İtaliyanın Rimini şəhərində Rimini-star müsabiqəsində Ayan Məmmədli I dərəcəli diploma layiq görülüb. Ayan Məmmədli bu ilin fevral ayında isə Maltada keçirilən fortepiano müsabiqəsində III dərəcəli diplom qazanıb. Bu ilin fevral ayında Serbiyanın Belqrad şəhərində keçirilən Davorin Yenko adına Beynəlxalq müsabiqədə Ayan Aslanova I yerə layiq görülüb. May ayında İstanbulda keçirilən IX Pera Beynəlxalq piano müsabiqəsində məktəbin III sinif şagirdi Ayla Həsənova III dərəcəli diploma layiq görülüb, Nəzrin İsayeva isə festivalda uğurla çıxış edərək sertifikat qazanıb. Belə beynəlxalq musiqi müsabiqələri yeniyetmə və gənclərin mənəvi inkişafında böyük rol oynayır. Musiqi məktəbinin Vokal şöbəsinin şagirdlərindən Yasin Həsənov özünün bəstələdiyi bir çox mahnılarla yanaşı, görkəmli bəstəkarlar Tofiq Quliyev, Eldar Mansurov, Faiq Sücəddinovun və başqalarının mahnılarına dönə-dönə müraciət edir. "Vətənim", "Dostuma məktub", "Ana", "Bakım", "Azərbaycanım", "Mənim dünyam", "Sülh mesajı", "Bakı", "Dostlar" və s.adlı mahnılardır. Yasinin 20 mahnıdan ibarət olan 2 albomu və "Vətənim" adlı klipi işıq üzü görüb. Musiqi sahəsində bir çox uğurlara imza atan Y.Həsənov 2007-ci ildə Xətai Rayon Gənclər və İdman İdarəsi tərəfindən peşəkar mahnı ifaçılığına, həmçinin Gənclər və İdman Nazirliyi tərəfindən ümummilli lider Heydər Əliyevin doğum gününə həsr olunmuş tədbirdə uğurlu çıxışına görə diplomlarla təltif olunub. Bundan başqa, Təhsil Nazirliyi tərəfindən keçirilən yarışda da I yeri tutduğuna görə diplom alıb. 2011-ci ildə Heydər Əliyev Sarayında keçirilən konsertdə canlı korifey Robertino Loretti ilə duet şəklində "Camayka" mahnısını ifa edib. Həmin ildə Belarusun Mozır şəhərində beynəlxalq vokal müsabiqəsində 25 ölkədən olan 500-600 nəfər iştirakçı arasında "Qran-pri" mükafatına layiq görülüb və Azərbaycan bayrağını ucaldıb. Bu müsabiqədə sözləri Nəbi Xəzrinin, musiqisi isə Müslüm Maqomayevin olan "Azərbaycan" mahnısı böyük alqışlarla qarşılanıb. Yasin Həsənov Ukraynanın Krım şəhərində "Artek"də keçirilən 4 mərhələdən ibarət olan "Novaya volna" Junor adlı V Beynəlxalq Uşaq müsabiqəsinin təşkilat komitəsi tərəfindən və münsiflər heyətinin rəyi ilə 700 iştirakçı arasında finala vəsiqə qazanıb. Prezidentin müvafiq sərəncamına əsasən Yasin Həsənovun adı Azərbaycanın gənc istedadlarının "Qızıl kitab"ına yazılaraq Prezident təqaüdünə layiq görülüb. Skripkaçı Emin Hüseynovun da adı “Qızıl kitab”da qeyd olunaraq, Prezident təqaüdünə layiq görülüb. Məktəbin kollektivi respublikamızın müxtəlif regionlarında yerləşən musiqi və incəsənət məktəbləri ilə sıx əlaqə yaradıb. Belə ki, kollektiv Zaqatala, Şəki, Şamaxı, Quba rayonlarında səfərdə olub. Müəllimlər bu musiqi məktəblərində ustad dərslər verib, şagirdlərimiz rəngarəng konsert proqramı ilə çıxış ediblər. Ötən tədris ilində Şamaxı, Şəki, Quba musiqi məktəblərinin müəllimləri məktəbdə olub, müəllimlərin dərslərində iştirak edib, yeni əsərlərlə tanış olub, metodiki məsləhətlər alıblar. Ötən tədris ilində xalq çalğı alətləri üzrə keçirilən müxtəlif müsabiqə və festivallarda məktəbin şagirdləri Fidan Əliyeva, Leyla Fərəcova (kamança), Rafiq Fərəcova (tar), Ləman Əliyeva (qanun) uğurla çıxış edərək qalib adını qazanıblar. 2011-ci ildə məktəb “İlin ən yaxşı məktəbi” nominasiyasına layiq görülərək diplomla təltif olunub. Məktəbdən bildirdilər ki, Tofiq Quliyevin adına 12 saylı Uşaq musiqi məktəbi yeniyetmələrin, gənclərin mənəvi inkişafı, musiqi sahəsində yüksək təhsil alması istiqamətində bir sıra yeniliklər tətbiq edir. Bu yeniliklər məktəb şagirdlərinin əldə etdiyi uğurlu nəticələrlə özünü təsdiqləyir.

Anar Miriyev

Palitra.-2014.-11 iyun.-S.11.