Gənc nəslin inkişafına xidmət edən Milli Strategiya

Bədən tərbiyəsi və idman ölkə vətəndaşlarının fiziki-mənəvi inkişafında, vətənpərvərlik ruhunda tərbiyəsində, beynəlxalq yarışlarda qələbə qazanmasında mühüm rol oynayır

Layihə çərçivəsində təqdim etdiyimiz yazı gənc nəslin fiziki-mənəvi inkişafında böyük rol oynayan bədən tərbiyəsi və idmanın inkişafı üzrə 2013-2020-ci illəri əhatə edən Milli Strategiya ilə bağlıdır. Ölkəmizdə idmanın inkişafı istiqamətində həyata keçirilən genişmiqyaslı işlər Azərbaycan idmanının dünyadakı nüfuzunu xeyli artırıb. Bu həm idmançılarımızın dünya arenalarında qazandığı qələbələrdə, həm də ölkəmizdə keçirilən yüksək ranqlı yarışların sayında özünü açıq şəkildə göstərir. Bu isə təbii ki, dövlətin bu sahənin inkişafında nə qədər maraqlı olmasının bariz nümunəsidir. Azərbaycan dövləti idmanın həm gənc nəslin sağlam böyüməsi, həm də ölkəmizin beynəlxalq nüfuzu baxımından böyük əhəmiyyət daşıması amilini həmişə ön planda tutaraq siyasətini buna uyğun şəkildə qurur.

Dövlətin bu sahəyə göstərdiyi diqqətin nəticəsidir ki, Azərbaycan müasir idman infrastrukturu ilə öyünə bilər. Bu amil ölkəmizin beynəlxalq idman federasiyaları və təşkilatları yanındakı nüfuzuna da müsbət mənada təsir göstərib. Dövlət başçısı İlham Əliyevin idman sahəsində həyata keçirdiyi siyasət Azərbaycanın idman ölkəsi kimi nüfuzunu xeyli artırmaqla yanaşı beynəlxalq federasiyaların seçim edərkən ölkəmizə üstünlük verməsini təmin edib. Dövlət başçısının idman sahəsində həyata keçirdiyi siyasət ardıcıl olaraq davam etdirilir və bu sahədə yaradılan müasir bazaya yeniləri əvəz olunur. Bu isə Azərbaycanın dünyada idman ölkəsi imicini möhkəmləndirir. Artıq vəziyyət elə həddə çatıb ki, ölkəmiz bir il içində, hətta eyni vaxtda bir neçə beynəlxalq yarışa yüksək səviyyədə ev sahibliyi edir.

Bu gün bədən tərbiyəsi və idman sosial inkişafın ən vacib və özünəməxsus bir sahəsinə çevrilərək sosial siyasətlə bilavasitə və sıx əlaqədədir. Məhz bu səbəbdəndir ki, sosioloqlar idmana cəmiyyəti vahid milli ideya ətrafında birləşdirən, insanda qələbəyə, yeni-yeni uğurlara can atmaq hissini oyadan vasitə kimi baxırlar. Son illərin idman sosiologiyası istiqamətindəki araşdırmaları da sübut edir ki, bugünkü həyatımız “İdman və gənclik”, “İdman və tərəqqi”, ”İdman və humanizm”, “İdman və şəxsiyyətin hərtərəfli inkişafı”, “İdman və mədəniyyət”, “İdman və ekologiya”, “İdman və qadın” kimi sosial məsələlərin qarşılıqlı vəhdətidir. Məlum olduğu kimi bədən tərbiyəsi və idmanın inkişafı ölkənin hərtərəfli inkişafına xidmət edir. İdman ümummilli dəyərdir. İnsanların fiziki cəhətdən sağlam və güclü olması dövlətin müdafiəsi və iqtisadiyyatının yüksəlməsində xüsusi rol oynayır. Buna görə də hər bir dövlətin əsas məqsəd və vəzifələrindən biri ölkədəki mövcud idman ənənələrini qoruyub inkişaf etdirməkdir. 1993-cü ildən ulu öndər Heydər Əliyevin Azərbaycana rəhbərliyə qayıdışından sonra bu sahəyə dövlət tərəfindən ən yüksək səviyyədə diqqət və qayğı göstərilməyə başlandı. Ulu öndərin siyasət və fəaliyyətinin davamçısı İlham Əliyevin 1997-ci ildən Azərbaycan Olimpiya hərəkatına rəhbərlik etməsi dövlətin idman siyasətinə yeni istiqamətlər və mərhələ gətirdi. 2003-cü ildən Azərbaycan Respublikasının Prezidenti vəzifəsinə seçilmiş Milli Olimpiya Komitəsinin lideri ölkədə bədən tərbiyəsi və idmanın daha geniş və sürətlə inkişafı, idman vasitəsilə Azərbaycanın dünya və Avropaya inteqrasiyası, beynəlxalq idman aləmində Azərbaycan idmanının nüfuzunun daha da artırılması məsələlərini dövlət siyasətinin önəmli istiqamətlərindən biri kimi dəyərləndirdi. Məhz bunun nəticəsidir ki, bu gün bədən tərbiyəsi və idman ölkə vətəndaşlarının fiziki, eləcədə mənəvi cəhətdən inkişafında, sosial və maddi rifahlı olmalarında, Vətənin müdafiəsində yüksək səviyyədə iştirak etmələrində, vətənpərvərlik ruhunda tərbiyəsində və beynəlxalq yarışlarda qələbə uğrunda əzm və qətiyyətlə mübarizə aparmalarında mühüm rol oynayır. Bədən tərbiyəsi və idmanın ölkənin sosial - iqtisadi inkişafındakı roluna, əhalinin, xüsusən böyüməkdə olan gənc nəslin sağlamlığı və tərbiyəsində ən vacib amillərdən biri olmasına ictimai fikir və dövlət münasibəti nəzərə çarpacaq dərəcədə dəyişib. Son illərdə ölkəmizdə bədən tərbiyəsi və idman hərəkatı üçün yaranmış imkanlar, həyata keçirilən konkret tədbirlər bu sahədə istər ölkə daxilində, istərsədə beynəlxalq aləmdə qazanılan uğurlar və əldə olunmuş nailiyyətlər bədən tərbiyəsi və idmanı dövlət siyasətinin prioritetlərindən birinə çevirib.

Azərbaycanda bədən tərbiyəsi və idmanın inkişafı üzrə 2013-2020-ci illəri əhatə edən Milli Strategiya bədən tərbiyəsi və idman haqqında qanunun müvafiq maddələrinə uyğun olaraq və “Azərbaycan 2020: Gələcəyə baxış” İnkişaf konsepsiyasının təsdiq edilməsi haqqında Prezidentin fərmanından irəli gələn vəzifələrin icrası ilə bağlı ölkənin bədən tərbiyəsi və idman hərəkatında ilk dəfə olaraq bədən tərbiyəsi və idmanın uzun müddətə inkişafını planlaşdıran və həyata keçirilməsini təmin edəcək fəaliyyət istiqamətlərini müəyyən edən dövlət səviyyəli sənəddir.

İnkişaf etmiş ölkələrin uğurlu təcrübəsi göstərir ki, bədən tərbiyəsi və idmanın tələb olunan səviyyədə inkişaf etdirilməsinin optimal yolu məsələyə kompleks yanaşmanı tələb edir. Yalnız belə bir yanaşmanın nəticəsində vətəndaşların və ölkənin ümumi inkişafına nail olmaq mümkündür.

Bədən tərbiyəsi və idmanın inkişafı üzrə Milli Strategiya ölkədə bədən tərbiyəsi-sağlamlıq və idman sahəsində dövlətin uzun müddətli siyasətini, əsas məqsəd və vəzifələrini əks etdirir. Bu sənəd Azərbaycanı 2020-ci ilədək dünyada fəal və uğurlu idman dövlətinə çevirmək öhdəliyinin yerinə yetirilməsi üçün ölkə ərazisində fəaliyyət göstərən bütün təşkilatların idman fəaliyyətini bir tam halda birləşdirən strateji istiqamətləri və siyasət prioritetlərini müəyyən edir. Milli Strategiyanın əsas məqsədi - fiziki, əqli və maddi imkanlarından asılı olmayaraq ölkədə əhalinin bütün təbəqələri üçün öz bilik və bacarıqlarını reallaşdıra bilmələrinə, bununla da həyatlarına müsbət təsir göstərəcək sahələrdə, o cümlədən təhsil və sağlamlıqlarında, hərtərəfli uğurlu inkişafa nail olmalarına şərait və imkanlar yaratmaqdan ibarətdir. Eyni zamanda Milli Strategiyanın məqsədi insan haqları, həmçinin idmana dair beynəlxalq və milli qanunvericiliyi, cəmiyyətin bütün təbəqələrini, qabaqcıl dünya təcrübəsini nəzərə alaraq, cəmiyyətin hərtərəfli inkişafına, demokratik ölkə quruculuğuna, Azərbaycanın dünyaya və Avropaya inteqrasiya olunmasının sürətləndirilməsinə, həmçinin onun beynəlxalq nüfuzunun yüksəldilməsinə xidmət etməkdir. Milli Strategiyanın uzunmüddətli məqsədi - 2020-ci ilədək idmanı ölkədə və ölkəni idmanda lider etməkdir. Azərbaycanda insanların bədən tərbiyəsi və idmanla məşğulluğa istəyini, marağını, eləcədə bu istəklərin reallığa çevrilmə imkanlarını bir sıra faktlar əyani nümayiş etdirir. Belə ki, dövlət ölkədə bədən tərbiyəsi və idmanı daha geniş formada kütləvi şəkildə inkişaf etdirməkdə qərarlıdır. Ölkədə bədən tərbiyəsi və idmanın bütün sahələr və ayrı-ayrı təbəqələr, həmçinin yaş qrupları üzrə inkişafının təmin edilməsi sistemi yaradılıb, bu sahənin idarəedilməsi üzrə müvafiq struktur müəyyən edilib. Regionların sosial-iqtisadi inkişaf proqramlarına uyğun olaraq bütün şəhər və rayonlarda yeni idman obyektlərinin, qurğularının, Olimpiya komplekslərinin inşası gənc nəslin fiziki-mənəvi inkişafında müstəsna rol oynayır.

Anar Miriyev

Palitra.-2014.-16 may.-S.11.