Xava Dolev: “Azərbaycan musiqisi Şərq musiqisinin anasıdır”

İsrailli müğənni Xava xanım Dolev ölkəmizdə qonaqdır. Xava xanım İsraildə Azərbaycan dilində oxuyan yeganə tanınmış müğənnidir. O, Azərbaycan dilini bilmir. Amma Azərbaycanca oxuyanda elə bilirsən ki, azərbaycanlıdır. Qeyd edək ki, X. Dolev Dərbənddə doğulub. 17 yaşında İsrailə köçüb və elə bu ölkədə də musiqi təhsili alıb. Hazırda, İsraildə populyar müğənnilərdən biridir. Bu günə kimi 7 albomu işıq üzü görüb. Azərbaycan mədəniyyətini tanıdır.

- Necə oldu ki, siz Azərbaycan mahnılarını oxumağa başladınız?

- Bizim ailədə hamı incəsənət adamıdır. Mənim babam Avdalimov Abraam Dağıstanın Xalq artistidir. Babam da Azərbaycanca mahnılar oxuyub. O, Azərbaycanı çox sevirdi. Sanki Azərbaycan mədəniyyəti ilə yaşayırdı. Mən balaca olanda babamın Azərbaycan dilində oxuduğu mahnıları dinləyirdim. Demək olar ki, bu mahnılarla böyümüşəm. Buna görə də uşaqlıqdan Azərbaycanın korifey müğənnilərinə və onların oxuduğu mahnılara sevgim olub. Onlar bu mahnıları necə oxuyubsa, mən də dinlədikdən sonra eləcə ifa edirdim. O mahnılar sanki mənim canıma, qanıma hopub. Mən Azərbaycanı və Azərbaycan musiqilərini çox sevirəm. Mən babamın Azərbaycan mədəniyyətinə olan bu sevgisini davam etdirirəm. İsraildə Azərbaycan mədəniyyətini tanıdıram.

- Ən çox sevdiyiniz Azərbaycan mahnısı hansıdır?

- Mənim üçün Azərbaycanın bütün mahnıları gözəldir. Amma onların arasında ən çox oxuduğum “Girdim yarın bağçasına” mahnısıdır (Mahnıdan bir parça ifa edir ). Bundan başqa “Tut ağacı”, “Sevəcəyəm” və s. adını çəkmək olar.

- Azərbaycanca albomunuz varmı?

- Azərbaycanca albom çıxarmağı planlaşdırırıq. Elə Bakıya da bu məqsədlə gəlmişəm. Müğənni Nazim Pişiyari (Faytonçu Nazim) ilə birgə albom üzərində işləyirik. Bu albomda dağ yəhudiləri və Azərbaycan musiqiləri yer alacaq. Fürsətdən istifadə edib Nazim müəllimə təşəkkür edirəm.

- İsraildə Azərbaycan mahnılarına maraq necədir?

- İsraildə keçirilən konsertlərdə, bayramlarda və s. tədbirlərdə Azərbaycan musiqilərini də ifa edirəm. İsraillilər, xüsusən də Dağıstan və Azərbaycandan köçən yəhudilər Azərbaycan mahnılarını böyük maraqla dinləyirlər. Mən bu mahnıları ürəkdən, məhəbbətlə oxuyuram. Azərbaycan musiqisi Şərq musiqisinin anasıdır. Ən böyük arzum budur ki, Azərbaycanda nəinki məni tanısınlar, həm də sevsinlər. Bir daha deyirəm, mən Azərbaycanı çox sevirəm.

Fuad Hüseynzadə

Palitra.-2014.-23 may.-S.6.