“Dövlətin gənclərə qayğısı çox səmərəli bəhrəsini verəcək”

Hüseyn Cavadzadə: “Biz istəyirik ki, gənclər bu gün bizim üçün qurulan yeni Azərbaycan naminə doğru yolda addımlasınlar”

Gənclərin hər bir düşünülmüş addımı onların fiziki, mənəvi, intellektual inkişafına xidmət edir. Elə, “Addım” Gənclər Təşkilatı da ətrafına məhz belə düşüncəli gəncləri toplayıb. Qeyd edək ki, “Addım” Gənclər Təşkilatı 2013-cü ildə Hüseyn Cavadzadə, Ülkər Qasımova və Eldar Qasımov tərəfindən təsis olunub. Ölkənin ən aktual gənclər qurumlarından biri sayılan “Addım”ın siyasi bitərəfliyi ona daha çox gəncləri cəlb edir. “Addım”ın sədri Hüseyn Cavadzadə isə 1986-cı ildə Bakı şəhərində ziyalı ailəsində anadan olub. İlk olaraq Azərbaycan Dövlət Mədəniyyət və İncəsənət Universitetində, daha sonra İFASC-da təhsil alıb. 2003-cü ildən BMT-nin "Gənclik və Sülh Forumu”nda 1-ci yerə layiq görülüb. 2009-cu ildən Azərbaycan Dövlət Mədəniyyət və İncəsənət Universitetində müəllim kimi çalışır. WAF - beynəlxalq mədəniyyət təşkilatının Azərbaycan nümayəndəsidir. Sənətşünaslıq elmləri namizədidir.

-Doğru yolda olan gəncləri nə dərəcədə öz ətrafınıza yığa bilibsiz?

- Ən birincisi, gənc olaraq kiçik də olsa nələrsə edə bilərik. Milyonlarla kilometr yol bir addımdan başlayır. Hər addım atdıqca bu yol daha da qısalır.

Bu gün bizim gənclərin həyatı təkcə əyləncə və təhsil deyil. Bir çox fərqli istiqamətlər var. Bu yaxınlarda hörmətli akademik Ramiz Mehdiyev gənclərin təhsil səviyyəsi ilə bağlı fikir və narahatçılığını bildirdi. Mən onun fikirlərini çox önəmli sayıram. Hesab edirəm ki, gənclik üçün təhsil, vətənpərvərlik çox əhəmiyyətlidir. Məncə, bu gün Azərbaycan gəncliyi bir neçə hissəyə bölünüb. Onların arasında çox bacarıqlı, çalışqan və işgüzar gənclər var. Eyni zamanda vaxtını səmərəli istifadə etməyən gənclər də var. Bundan başqa müəyyən yad təsirlər altına düşən gənclərə də rast gəlinir. Biz də istəmirik ki, gənclərimiz kənar və mənfi təsirlərə məruz qalsınlar. Biz istəyirik ki, onlar bu gün bizim üçün qurulan yeni Azərbaycan naminə doğru yolda addımlasınlar. Mənə elə gəlir ki, “Addım” bu gün Azərbaycanda yeganə təşkilatdır ki, bu gün o gəncləri bir bayraq, bir xəritə, bir konsepsiya üzrə çalışmağa, istiqamətlənməyə sövq edir. Gənclik insanın ən məsuliyyətli və emosional dönəmidir. Hələ ötən əsrin əvvəllərində “Füyuzat” jurnalında yazılırdı ki, gənclər istənilən xalqın ictimai missiyasını öz üzərinə götürən xalq qəhrəmanlarıdır. Yəni bir çox kreativ addımları gənclər atırlar. Cəmiyyətin sabahı sırf gənclərə bağlıdır. Hesab edirəm ki, Azərbaycanın çox sağlam gəncliyi var. Azərbaycan Respublikasının onlar üçün yaratdığı sərhədsiz inkişaf yolları var.

- Gənclərimiz vaxtdan nə dərəcədə səmərəli istifadə edirlər?

- Azərbaycan özü respublika olaraq gəncdir. Bir çox ictimai məsələlər var ki, hələ formalaşır. Bu gün gənclərimiz beynəlxalq forum və konfranslarda iştirak edir, Azərbaycan həqiqətlərini dünyaya çatdırırlar. Dövlətin gənclərə qayğısı çox səmərəli bəhrəsini verəcək.

- Ümumiyyətlə, “Addım”ın rəhbəri olaraq necə düşünürsüz, gənclər səmərəli addım atmağa meyillidirmi?

- Təbii ki, bəli. Bütün dünyada “atalar və oğullar” problemi var. Mən baxmayaraq ki, oğul yaşındayam, amma erkən iş təcrübəm hər iki tərəfi başa düşməyə imkan verir. Gəncləri düzgün yolda addımlamağa sövq etmək vacibdir. Gənclərlə mübarizə aparmaq, onları əzmək lazım deyil. Sadəcə onlara yol göstərmək və meydan vermək lazımdır. Dünyanın heç bir yerində 18 yaşında gəncə qrant vermirlər ki, gedib ideyasını həyata keçirsin. Amma bu gün Azərbaycanda Prezident yanında Gənclər Fondu fərdi qrant müsabiqəsi də elan edir. Bu, gənclər üçün çox böyük şansdır. Bu gün Azərbaycanda Gənclər və İdman Nazirliyi gənclər üçün saysız-hesabsız işlər görür. Dövlətə və cəmiyyətə faydalı olan hər hansı layihəni keçirmək istəyən gənclərin üz tutası ünvanı var. Sadəcə yaxşı mütaliə etmək lazımdır. Özümüzlə bərabər, Azərbaycan üçün də çalışmalıyıq. Çünki biz onun bir parçasıyıq.

- “Addım” olaraq gənclərin mənəvi inkişafı istiqamətində hansı layihələr həyata keçirirsiz?

- İstənilən layihənin pasportunda onun məqsəd və vəzifələri yazılır. Mən hər bir layihəyə start verəndə birinci özümə sual verirəm ki, bu layihədən gənclər necə yararlanacaqlar. Gənclərin həm dünyəvi baxışlarının, həm ictimai fəaliyyətlərinin, həm gələcək karyeralarının inkişafı üçün müxtəlif aspektlərdə layihələrimiz olur. 4-5 festival keçirmişik. Saysız-hesabsız sərgi, treninq və təlimlərimiz olub. “Addım”, eləcə də Azərbaycan mədəniyyətini ölkə hüdudlarından kənarda təmsil olunması missiyasını öz üzərinə götürüb. Belə ki, məhz “Addım”ın dəstəyi ilə ölkəmiz 30-a yaxın beynəlxalq festival və forumlarda təmsil olunub və qalibiyyət qazanıb. Hesab edirəm ki, bunların hamısı gənclərin səmərəli məşğuliyyətini özündə birləşdirib. Çünki orta statistik məlumatlara görə bu layihələrə 100-150 min gənc cəlb olunub. Hər dəfə də bu say artır. Biz o gənclərə öz fəaliyyətimizlə səmərəli olmağa çalışırıq. Ən maraqlı tərəfi odur ki, “Addım”a gənclər sadəcə vaxtlarını boş keçirməyə və ya əyləncə naminə gəlmirlər. Mən çox əminliklə bunu deyirəm. Hətta xaricdən bizə qoşulanlar var. “Addım”a hər gələn yeni üzvlə özüm ilkin söhbət edirəm. Sözün əsl mənasında mən beyinlər görürəm. Çox sevinirəm və özümüzü çox güclü hiss edirik.

-9 Noyabr-Dövlət Bayrağı Günü ilə bağlı çox fərqli bir müsabiqə elan etmişdiniz. Bu müsabiqənin nəticəsi necə oldu?

- Bəli, “Addım”ın təşkilatçılığı ilə ölkəmizdə ilk dəfə olaraq “Walpaper”lər (elektron divar kağızları) müsabiqəsi gerçəkləşdi. Qeyd etdiyim kimi biz fəaliyyətimiz dövründə saysız bundan da böyük, regional, beynəlxalq və s. layihələr etmişik. Amma bu layihəni mən xüsusi əhəmiyyətli sayıram. Çünki istənilən dövlət bayramlarında insanların internetdə əldə etdikləri bayraq fotolarının sayı barmaqla sayılacaq qədər idi. İndiki elektronika tərəqqisi dövründə isə bu çox vacibdir. Bizə təqdim olunan 100-ə yaxın işdən ən yaxşı 22-sini müsabiqəyə daxil edib yayımladıq və indi istifadəçilərin 22 yeni “walpaper”i var. Bu bizim üçün əhəmiyyətlidir. Xatırladım ki, Dövlət Bayrağı Günü qaliblərin təntənəli mükafatlandırma mərasimini keçirdik. Tədbirdə gənclərin və ulduzların iştirakı ilə sürpriz aksiyalar da oldu.

- Bu istiqamətdə gələcəkdə hansı layihələr keçirməyi düşünürsüz?

- Biz Azərbaycanda, ümumiyyətlə, dünyada ilk olaraq tütün əleyhinə “No smoking” film festivalını etmişik. Bu il festival beynəlxalq çərçivəyə keçməlidir. Buna çox ciddi hazırlıqlarımız gedir. Ötən il “Sağlam həyat” festivalı təşkil etdik. Bu il “Ekologika” adlı çox böyük bir layihəyə start veriləcək. Bu, adından da görünür ki, ekologiya deyil, ekologikadır. Yəni logik bir işdir. Ekologiya ilə bağlı bir çox işlər var ki, onu dövlət təşkilatları həyata keçirməlidir. Amma elə işlər var ki, hər birimiz edə bilərik. Məsələn, biz ekoloji tərbiyəni insanlara aşılamaq istəyirik. Təmizlik də elə mənəvi tərbiyədən irəli gəlir.

Daha sonra Xocalı faciəsi ilə bağlı çox böyük layihəmiz var. Bildiyimiz kimi BMT hər il noyabrın son həftəsini yol qəzalarına həsr edir. Bizim bununla bağlı “Road safetly” layihəmiz var. Nəqliyyatın İntellektual İdarəetmə Mərkəzi, “ASAN xidmət” və “Addım”ın birgə layihəsidir. Dekabr ayında Əlillər Günü ilə bağlı layihəmiz olacaq. Gənc Tamaşaçılar Teatrında “Antinarkomaniya” tamaşamız səhnəyə qoyulacaq. Noyabrın 23-də “Azərbaycanlı istedadlı gənclərə dəstək” layihəsi çərçivəsində Norveçdə yaşayan həmvətənimiz Şervin Nəcəfpurun “Atropatena” adlı moda sərgisini təşkil edəcəyik. Yəni, qrafik kifayət qədər doludur. Bundan da başqa dekabr ayında gənclərin səmərəli məşğuliyyəti üçün “Addım klub” fəaliyyətə başlayacaq. Bu klub həftənin bütün günləri gənclərin üzünə açıq olacaq. Tam olaraq ödənişsiz burda onlar xarici dil kursları, film nümayişləri, ictimai xadimlərlə görüşlər, təlimlər və s. təşkil olunacaq. Hesab edirəm ki, bu çox yaxşıdır. Əgər sən “Addım”ın üzvüsənsə və boş vaxtını səmərəli keçirmək istəyirsənsə, bizim klubdan yararlanmaq olar.

-Sizə könüllü fəaliyyət göstərmək istəyən gənclər qoşulurmu?

- Biz layihələrimizdə heç vaxt könüllü gənclərlə bağlı narahatçılıq çəkməmişik. Hətta könüllü mövsümü seçimlərimiz də olub. Bu da təşkilata olan maraqdan irəli gəlir. Çünki “Addım”ın öz konsepsiyasından doğan ictimai üslubu, gənclərlə işləmə mexanizmi var. Biz gənclərlə görüşlər keçiririk, qeydiyyat günlərində onlarla söhbətlərimiz olur. Artıq onları ictimai fəal kimi yetişdirmişik. Hamı eyni dildə danışır. Özümüzün bir növ danışıq kodumuz var. Artıq bu qısa müddət ərzində “Addım”çılar formalaşıb. Bu gün QHT sektorunda müasirliyi və innovativliyi ilə seçilən “Addım” gənclərin inandığı bir brendə çevrilib. Ümumiyyətlə, istənilən istiqamətə insanı addım aparır. Ona görə də sağlam addım atmaq lazımdır. Hər kəsə uğurlu addımlar arzu edirəm.

Fuad Hüseynzadə

Palitra.-2014.-19 noyabr.-s.11.