“Gənclər təşkilatları gənclərimizin mənəvi cəhətdən inkişafında stimul rolunu oynayır”

Gənclər hər bir ölkənin ictimai-siyasi, sosial-iqtisadi, elmi-mədəni və humanitar həyatında böyük rola malik olan potensial qüvvə kimi öncül sahələrdən birini tutur. Bu gün ölkədə yeni nəslin və ölkənin inkişaf maraqlarını təmin etmək məqsədilə dövlət gənclər siyasəti formalaşdırılıb. “2013-2023-cü illərdə Azərbaycan gənclərinin İnkişaf Strategiyası” da gənclərimizin potensialının dünyada mövcud olan çağırışlara uyğun inkişafını təmin edərək həmin potensialın Azərbaycanın milli mənafelərinə uyğun istifadə etməkdən ibarətdir. Gənclərin təşkilatlanması üçün zəruri iqtisadi, hüquqi və təşkilati imkanlar yaradılıb. Əhalinin üçdən bir hissəsini təşkil edən gənclər ölkənin əsas innovativ potensialı və əmək resursudur. Azərbaycan gəncliyi öhdəsinə düşən vəzifələri layiqincə yerinə yetirir, ölkədə gedən proseslərin daim önündə olub. Minlərlə gəncimiz beynəlxalq miqyaslı tədbirlərdə ölkəmizi layiqincə təmsil edib, idmançıların, yaradıcı gənclərin uğurları nəticəsində Azərbaycanın bayrağı xarici dövlətlərdə yüksəlib. Gənclər mədəniyyətlərarsı dialoqun aparılmasında, beynəlxalq əməkdaşlığın inkişafında fəal olublar. Son illər gənclərin ən böyük təşkilatlanmış kütləsi olan tələbə gənclərlə iş yeni səviyyəyə qaldırılıb, onların ictimai təşəbbüskarlığı və sosial həyatda iştirakı artıb. Ölkədə fəaliyyət göstərən gənclər, o cümlədən tələbə təşkilatlarının gənclərin mənəvi inkişafında mühüm rolu var. Bu gün öz fəaliyyəti ilə seçilən gənclərimiz var ki, onlardan biri də Azərbaycan Dövlət Neft Akademiyasının tələbəsi, ATGTİ-nin Tarix İşci Qrupunun rəhbəri, Qarabağ Mərkəzinin sədr müavini Mahmud Sadıqovdur:

- Çağdaş əsrimizdə tək, kitab oxumaqla inkişaf etmək və qloballaşan dünyamızda mövqe tutmaq olduqca çətin bir prosesdir. Bunun üçün əlavə biliklər və buna uyğun şəkildə qabiliyyət də lazımdır. Hər bir gəncimiz bu sahədə öz üzərində işləməli və ətrafdakı imkanlardan maksimum şəkildə yararlanmağa çalışmalıdır. Bu imkanlardan biri də gənclər təşkilatlarıdır. Qeyd etmək istərdim ki, ölkəmizdə rəsmi qeydiyyatdan keçmiş 200-dən, qeyri-rəsmi şəkildə isə 400-dən çox gənclər təşkilatları fəaliyyət göstərir. Bu, çox sevindirici və qürurverici bir haldır. Bu gün Azərbaycan gəncliyi ölkəmizin ictimai-siyasi həyatında yaxından iştirak edir. Gənclər təşkilatları gənclərimizin mənəvi cəhətdən inkişafında stimul rolunu oynayır. Onlar öz bilik, bacarıqlarını ictimai sektorda tətbiq edərək təcrübə əldə edirlər, özlərinin fəaliyyətlərini təkmilləşdirirlər və ölkəmizin ictimai həyatında fəal iştirak edirlər. Hər bir gənclər təşkilatlarında güclü tələbə birlikləri formalaşıb. Həmin tələbələr bizlərin gələcək insan potensialımızı, ən əsası da insan kapitalını təşkil edirlər. Fəaliyyət göstərdiyim Azərbaycan Tələbə Gənclər Təşkilatları İttifaqı ölkəmizin və Cənubi Qafqazın ən böyük tələbə ordusuna malikdir. Bu isə tələbələr arasında əlaqələrin qurulmasına, birgə fəaliyyətə, ünsiyyətə gətirib çıxarır. Qürur hissi ilə deyə bilərəm ki, ölkə başçısı İlham Əliyevin sərəncamı ilə yaradılmış Gənclər Fondu hər bir gəncin arzusunun və ideyalarının formalaşmasının bir təkanverici amilidir. Bu kontekstdən gənclər siyasətinə geniş nəzər yetirdikdə gənclər təşkilatlarının gənclərimizin mənəvi inkişafına verdiyi töhfələrə müsbət baxıram. Yeni düşünən gənclərin mənəvi inkişafının bir məkanı da məhz bu gənclər təşkilatlarıdır. İnsanın formalaşmasında cəmiyyətin və cəmiyyətdəki müsbət ab - havanın rolu danılmazdır. İnsanların(xüsusilə də gənclərin) yüksək elmi, mənəvi-əxlaq əsasında yetişməsində ictimai mühitin də rolu mühüm əhəmiyyət kəsb edir. Bu baxımdan dövlətin həyata keçirdiyi gənclər siyasətinin prioritet istiqamətlərindən biri də gənclər arasında müsbət ab-havanı formalaşdırmaqla onları yüksək keyfiyyətli cəmiyyət üzvinə çevirməkdir. Bu cür şəraitin dövlətimiz tərəfindən formallaşdırılması gənclər arasında mənəvi keyfiyyətlərin artırılmasına kömək olur. Gənclərimizin mənəvi keyfiyyətdə və əxlaqda tərbiyə əsasında böyüdülməsi gələcəyimizin etibarlı əllərdə olacağının bariz nümunəsidir. Çünki gənclər gələcək deməkdir. Gələcəyimizin təminatı həmin gənclərdir. Gənclər yeni tükənməz enerjidir. Bu enerjini məqsədə uyğun sahələrə yönəldilməsi hər bir dövlətin, toplumun ən ali məqsədidir. Ölkəmizdə yaradılmış gənclər təşkilatları bu cür mənəvi keyfiyyətlərin yüksəldilməsində əvəzolunmaz tədbirlər həyata keçirirlər. Dövlətin gənclər sektorundakı əsas siyasətini məhz bu təşkilatlar həyata keçirməkdədirlər.

Gənclər sektorunda dövlətin fundamental əsasını gənclər təşkilatları təşkil edir. Respublikamız öz müstəqilliyini əldə etdikdən sonra, spesifik şəkildə çoxlu gənclər təşkilatları yaradıldı. Hər bir gənclər təşkilatının ətrafında formalaşan gənclərimiz gələcəyimizin təminatlarıdır. Onların ictimai iş mühitində tərbiyə olunmaqla böyüdülməsi də, olduqca təqdirəlayiq bir haldır. Belə ki, təşkilatçılıq, idarəçilik və s. kimi biliklərə praktiki cəhətdən yiyələnmələrində bu təşkilatların rolu danılmazdır. Özlərinin layihələrinin həyata keçirilməsində, geniş intellektual mühitə adaptasiya olunmasında, regionlarımıza və müxtəlif ölkələrə səfərlərdə bu təşkilatlar gənclərə dəstək olan ən yaxın qurumlardır. Bu nöqteyi-nəzərdən gənclər təşkilatlarının gənclərin mənəvi inkişafında rollarını müsbət qiymətləndirirəm.

- Hazırda ölkədə fəaliyyət göstərən bu təşkilatlar gənclər üçün daha hansı imkanlar yaradır?

- Çağdaş əsrimizdə təşkilatlar gənclərin həyatında əvəzolunmaz imkanlar açır. Təsəvvür edin ki, televiziyada gördüyümüz və printer məhsullarında oxuduğumuz layihələr, konfranslar, seminarlar, simpoziumlar adətən dövlət tərəfindən həyata keçirilirdi. Ancaq sevindirici haldır ki, bu gün belə təşkilatların köməyi ilə yaradıcı, düşüncəli, qabiliyyətli gənclər yüksək səviyyəli tədbirləri özləri də keçirirlər. Bu, gənclər üçün yaradılmış ən böyük imkanlardan biridir. Həmçinin bu, gənclərin ən böyük inkişaf perspektivlərindəndir. Gənclər təşkilatları, gənclərimiz üçün dünyaya açılan qapı rolunu oynayır. Xarici ölkələrdəki tədbirlərə gedən gənclərin sayı ildən- ilə yox, gündən-günə artmaqdadır. Bu isə olduqca sevindirici haldır. Artıq Azərbaycan gəncliyi dedikdə, müasir elmi biliklərə yiyələnmiş, təşkilatçı, yaradıcı, düşüncəli, perspektivli bir gənc başa düşülür.

-Üzvü olduğunuz ATGTİ-nin hazırda bir gənclər təşkilatı kimi rolunu necə dəyərləndirirsiniz?

- Azərbaycan və Qafqazın ən böyük tələbə təşkilatı Azərbaycan Tələbə Gənclər Təşkilatları İttifaqıdır (ATGTİ). ATGTİ öz ətrafında böyük bir tələbə ordusu cəmləşdirib. Bu təşkilatın yaradılmasını gənclər sektorunda II inqilab kimi qiymətləndirirəm. Çünki bu təşkilat mütəmadi olaraq tədbirlər həyata keçirir və tələbələri mütəmadi olaraq öz ətrafında birləşdirir. Çox təəssüflər olsun ki, ATGTİ 2009-cu ildə, müstəqilliyimizdən 19 il sonra yaradılıb. ATGTİ respublikanın ən nəhəng təşkilatı olması ilə yanaşı, böyük layihələrə imza atmaqda davam edir. Qısa bir zaman kəsiyində ATGTİ böyük bir idarəetmə strukturu formalaşdırmaqla özünün “ATGTİ ailəsi”ni yaradıb. “ATGTİ ailəsi” ətrafında cəmləşmiş yüksək biliyə, təşkilati və idarəetmə qabiliyyətinə yiyələnmiş və mənəvi-əxlaqi, vətənpərvər gəncləri cəmləşdirib. Hər bir gənc üçün böyük imkanlar formalaşdırıb. ATGTİ yarandığı andan bu günə kimi yüksək mənəvi-əxlaqi keyfiyyətlərə yiyələnmiş Prezident mükafatçısı Şahin İsmayılov rəhbərlik edir. Dövlətimizin gənclərə qayğısı və Şahin müəllimin rəhbərliyi ilə ATGTİ-yə yarandığı andan bu günə kimi 500-dən çox layihə həyata keçirib. ATGTİ yerli tədbirlərlə yanaşı, beynəlxalq tədbirlərin keçirilməsində də öz töhfələrini verib. Tələbələrin xarici tədbirlərə cəlb olunmasında ATGTİ-nin rolu danılmaz bir faktdır. Təşkilatın hər bir təhsil ocaqlarında Tələbə Gənclər Təşkilatı(TGT) fəaliyyət göstərir. Təhsil ocaqlarında TGT-lərin fəaliyyəti olduqca təqdirəlayiq bir haldır. Belə ki, TGT-lərin ətrafında gənclər cəmləşməklə “ATGTİ ailə”sini yaradırlar. ATGTİ hər bir gəncin arzusunun, ideyasının reallaşması məkanıdır. Bu təşkilatda fəaliyyət göstərdiyim müddətdə bir sıra tədbirlər həyata keçirmişik. Belə ki, 2013-cü ilin iyunun 8-də “OPEK ölkələrinin dünya iqtisadiyyatında rolu və yeri” mövzusunda konfrans, 2013-cü ilin 4 oktyabr tarixində “Menecmetnin müasir meyilləri” mövzusunda seminar, 13 noyabr 2013-cü ildə ADPU-nin akt zalında “İnsan kapitalının formalaşdırılmasının fəlsəfi-pisxoloji mexanizmləri” mövzusunda ikinci konfransımız, 1 mart 2014-cü il tarixində ATGTİ-nin Tarix İşci Qrupunun təşkilatçılığı ilə tanınmış yazar Varis Yolçuyevlə ATGTİ-nin akt zalında görüş, 11 mart 2014-cü ildə, “Üzeyir Hacıbəyovun həyat və yaradıcılığı” mövzusunda seminar, 18 mart 2014-cü il tarixində, tanınmış dramaturq Əli Əmirli və şair, publisist və iqtisadçı alim Ağasəf İmranla görüş, 24 oktyabr 2014-cü il tarixində “Neft strategiyasının sosial-iqtisadi nəticələri və insan kapitalının formalaşması” mövzusunda konfrans və s. kimi tədbirlərimiz baş tutub. Göründüyü kimi ATGTİ-nin fəaliyyətini yüksək qiymətləndirirəm və fürsətdən istifadə edərək hər bir gənci birgə fəaliyyətə çağırıram.

Nigar Abdullayeva

Palitra.-2014.-20 noyabr.-S.11.