“Bakı beynəlxalq teatr konfransı dünyada tanınan sənət adamlarının diqqət mərkəzindədir”

“Yarandığı gündən xalqımızın milli-mədəni dəyərlərini qoruyan, təbliğ edən, mütərəqqi ideyalar aşılayan Azərbaycan teatrı son on ildə özünün yeni inkişaf dövrünü yaşayır. Azərbaycan Prezidentinin sərəncamı ilə təsdiq edilmiş “Azərbaycan teatrı 2009-2019-cu illərdə” Dövlət Proqramı teatrlarımızın inkişafı yolunda atılmış mühüm bir addımdır. Sözügedən proqrama uyğun olaraq, paytaxtımızda üçüncü dəfədir ki, müasir dövrün teatr problemlərinə həsr olunmuş beynəlxalq konfransa hazırlaşır”. Bu sözləri Azərbaycan Teatr Xadimləri İttifaqının sədri, Xalq artisti Azərpaşa Nemətov bildirib. O, bildirib ki, Bakı beynəlxalq teatr konfransı bütün dünyada tanınan sənət adamlarının diqqət mərkəzindədir. İndiyədək keçirilmiş birinci və ikinci konfransa dünyanın müxtəlif ölkələrindən sənətkarlar gəlib. Bu il keçiriləcək Üçüncü Bakı Beynəlxalq Teatr Konfransının iştirakçıları isə ölkələrin və nümayəndələrin sayı baxımından əvvəlkilərdən daha çoxdur.

Qeyd edib ki, builki konfransın iştirakçılarından bəziləri ölkəmizlə artıq tanışdırlar, digərləri isə Bakıda ilk dəfə olacaqlar. Şübhəsiz ki, onlar paytaxtımızı gəzəcək, teatrlara gedəcək, tamaşalara baxacaqlar. Konfransda təkcə bugünkü dünya teatrının taleyi deyil, onun gələcək inkişaf yolları da alimlər, böyük rejissorlar, prodüserlər, teatr mütəxəssisləri tərəfindən müzakirə ediləcək. Onların sırasında bu möhtəşəm tədbirə ev sahibliyi edəcək Azərbaycanın nümayəndələri də olacaq. Hesab edirəm ki, konfransda müzakirə ediləcək məsələlər dünya, eləcə də Azərbaycan teatrı üçün çox əhəmiyyətli olacaq.

Palitra.-2014.-29 oktyabr.-S.13.