ATİ-də “20 Yanvar-24” adlı dəyirmi masa keçirilib

Azərbaycan Turizm İnstitutunda xalqımızın müstəqillik tarixində qızıl hərflərlə əbədiləşən 20 Yanvar faciəsinin 24-cü ildönümünə həsr olunan dəyirmi masa keçirilib. ATİ-nin rektoru, tarix elmləri doktoru, professor Cəfər Cəfərov çıxışında bildirib ki, yanvarın 19-dan 20-sinə keçən gecəni öz qanları ilə şanlı tarixə çevirən müqəddəs vətən övladlarını unutmağa – unutdurmağa haqqımız yoxdur. Rektor XX əsrin 90-cı illərini imperiyanın çöküşü, 60-cı illərdə dünyada müstəmləkəçilik zəncirinin qırıldığını detallı faktlarla isbatladı. 1990-cı il yanvarın 19-dan 20-sinə keçən gecəni 72 il əvvəl -1918-ci il mayın 28-də Azərbaycanı coğrafi deyil, siyasi məkan kimi dünyaya tanıdan böyük şəxsiyyətlərin haqq işinin yenidən başlanğıcı olduğunu bildirdi. O gecə məhz müstəqil Azərbaycan dövlətini qurub-yaratmaq arzusunun gerçəkləşdiyini diqqətə çatdırdı. Azərbaycanın müstəqil dövlət olaraq ərazi bütövlüyünü bərpa edib saxlamaq naminə onlarla vətən övladının yanvar gecəsini qanları ilə yazdıqlarını xüsusi vurğuladı. Yanvar şəhidləri o gecə işğala yox deyib, azadlıq, müstəqillik istəyini qanları ilə pöhrələndirdilər. Statistik rəqəmlərə görə 24 il əvvəl şəhid vətən övladlarının sayı təxminən 132 nəfərdi. Amma o gecə əslində bütün Azərbaycan şəhid idi. C.Cəfərov dəyirmi masa iştirakçıları olan tələbələrə bildirdi ki, “sizlər o gecənin şahidi deyilsiniz, hətta bir çoxunuz 90-cı ildən sonra doğulmusunuz. İnstitutun ATİ Mediasında həftə boyu yayımlanan video çarxda o günlərin dəhşətini, xalqımızın öz şəhidlərinə sonsuz ehtiramını, sevgisini izləyə bilirsiniz. Onların ön böyük günahı bilirsiniz nə idi? Cavab isə belədir: günahsızlıqları, Vətəni canlarından çox sevdikləri...”

“Qara Yanvar – 24” adlı dəyirmi masada ATİ-nin İctimai fənlər kafedrasının dosenti Məhərrəm Zülfiqarlı, Beynəlxalq münasibətlər kafedrasının müəllimləri Vidadi Rzayev, Sahib Səfiyev öz çıxışlarında 20 Yanvar faciəsinə gedən yol, eyni zamanda bu faciəyə hüquqi və siyasi qiymətin verilməsində Heydər Əliyevin tarixi xidmətlərini xüsusi qeyd etdilər.

Nigar