Yunanlara Azərbaycan dilini öyrədən tələbə

- Sizin Samirə Mirzəliyeva: “Tələbələrimin qismən də olsa, Azərbaycan dilində danışması mənim üçün böyük qürur hissi idi”

Xaricdə təhsil alan azərbaycanlı gənclərin fərqləndirici cəhəti onların yaşadıqları ölkələrdə Azərbaycan həqiqətlərinin yayılması işində daha fəal olmalarıdır. Digər fərqləndirici məqamsa, onların bir çoxunun öz sahələri üzrə işləmələridir. Elə müsahibimiz Samirə Mirzəliyeva da belə gənclərimizdəndir. O, artıq 6 ildir ki, Yunanıstanın Afina şəhərində həm təhsil alır, həm də işləyir. Qeyd edək ki, Samirə Mirzəliyeva 1985-ci il Füzuli rayonunda doğulub. Yunanıstana getməmişdən əvvəl Bakıda

yaşayıb.

əsas ixtisasınız nədir?

-Mən 2003-cü ildə Bakı Slavyan Universitetinin Yunan dili - tərcümə fakültəsinə daxil olmuşam və 2007 -ci ildə adı gedən universiteti bitirmişəm. Yunan dilini öyrənmək çox maraqlı idi. Yunan dili, mədəniyyəti, tarixi, ədəbiyyatı həmişə məndə maraq yaradıb. Sonra Yunanıstana getmək qərarına gəldim. Əvvəl 8 aylıq yunan dili kurslarında iştirak etdim. Yunanıstanı çox bəyəndim və yenidən universitet oxumaq qərarına gəldim. Beləliklə, 2010 -cu ildən Afina Dövlət Universitetində Hüquq fakültəsində təhsil alıram. Bu il məzun olacam. Əsas ixtisasım yunan-Azərbaycan və Azərbaycan-yunan dilləri üzrə tərcüməçilikdir. Məhz bu sahədə işləyirəm. Artıq 8 ildir tərcümə sahəsində azdan-çoxdan işlər görürəm. Yunan dili kimi nadir bir dildə danışa bilmək mənə qürur verir.

Gələcəkdə hüquq sahəsində də işləmək istərdim. Hüquq, əsas da beynəlxalq hüquq mənim üçün çox maraqlıdır.

-Sizdə bu sahəyə maraq haradandır?

-Yunan dili tərcümə fakültəsinə yunan miflərinə olan marağımdan daxil oldum. Əslində, ailəm bu fakültədə oxumağımı bir elə də istəmirdi. Amma mənə maraqlı gəlirdi. Məhz Yunan dili fakültəsini seçdiyimə görə çox şadam. Deyə bilərəm ki, bu dil mənim gələcək həyatımı dəyişdi.

Çox maraqlı təhsil dövrü keçirdim. Maraqlı məlumatlar öyrəndim, maraqlı insanlarla tanış oldum. Bu dövr özümü dərk etməyimdə və hardasa böyüməyimdə mənə kömək oldu. Dostlar qazandım. Dostlar mənim üçün vacibdir.

Hüquq isə mənə həmişə maraqlı gəlirdi. Artıq kifayət qədər böyük yaşda Hüquq fakültəsində oxumaq qərarına gəldim. Bu, mənim üçün vacib addım idi. Hüquq da öz növbəsində çox maraqlıdır.

- Azərbaycanın Yunanıstanda təbliği istiqamətində hansı işlər görürsüz?

-Mən bu sahədə Azərbaycan Respublikasının Yunanıstandakı səfirliyi ilə əlimdən gələn əməkdaşlıq edirəm. Səfirlik tez-tez tədbirlər keçirir. Keçən il biz Azərbaycan dili kursları təşkil etdik. Mən bu kurslarda təmənnasız olaraq yunan tələbələrinə Azərbaycan dili dərsi keçirdim. Çox maraqlı idi. Yunan tələbələri Azərbaycan dilini böyük maraqla öyrənirdilər. Tələbələrimin qismən də olsa Azərbaycan dilində danışması mənim üçün böyük qürur hissi idi .

Eyni zamanda bəzi tədbirlər çərçivəsində səfirliyimizə köməklik edirəm. Səfirliyimizin əməkdaşları ilə çox yaxşı münasibətimiz var. Onlar həmişə məni və Yunanıstanda təhsil alan bütün azərbaycanlı tələbələri dəstəkləyirlər və mən də öz növbəmdə əlimdən gələni əsirgəmirəm. Onlarla isti, dost münasibətimiz var. Mənim üçün səfirliyimiz və əməkdaşları böyük əhəmiyyət daşıyır. Mən Yunanıstanda təkəm. Onları hardasa ailəm olaraq görürəm. Biz, yəni, Yunanıstanda yaşayan azərbaycanlılar digər Avropa ölkələrinə baxanda çox azlıq təşkil edirik. Bu, bəzən bizim əleyhimizədir.

-Hazırkı Yunanıstanın hansı cəhəti qədim yunanları xatırladır?

-Tarixi yerlərdə olanda və əgər tarixi bilirsinizsə, qədim yunanların həyatını göz önündə canlandırmaq çətin deyil. Amma əgər Yunanıstana gəlmək fikriniz varsa bunu qədim Yunanıstanı unudaraq etmək lazımdır. Əks halda, 7 il əvvəl mənim yaşadığım kimi, böyük məyusluq yaşayacaqsınız. Yunanıstan digər, yəni, mərkəzi və şimalı Avropa ölkələrindən çox fərqlənir. Yunanıstan daha çirklidir, daha çox immiqrant var, qanunlar daha pis işləyir, amma bütün bu mənfi cəhətlərə baxmayaraq, Yunanıstanda yaşayıb, onu sevməmək mümkün deyil. Yunanıstanda insanı ona bağlayan bir sehr var. Bunu insan yaşayaraq görür.

Bildirmək istərdim ki, yunan xalqı öz tarixi ilə qürur duyur və tarixini göz bəbəyi kimi qoruyur. Bunu Yunanıstanın hər yerində görmək olar. Müasir yunanlar ilkin mədəniyyətin əsasını qoyanların varisləri olmaqları ilə fəxr edir və bunu hər fürsətdə vurğulamaqdan çəkinmirlər. Bu, onların qürur qaynağıdır. O ki, qaldı müasir yunanların qədim yunanları hansı sahədə xatırlatmalarına, mənim fikrimcə, heç bir sahədə. Mən 7 il ərzində bir oxşarlıq görmədim. Qədim yunanlar yaratmağı sevən insanlar olublar. Bunu onların tarixindən görmək olar. Müasir yunanlar isə belə deyillər. Onlar mənfi mənada avropalılaşıblar.

-Bir çox elmlərin banisi qədim yunan alimləridir. Bəs, müasir Yunanıstanda elmin inkişafı hansı səviyyədədir. Yəni yunanlar qədim alim bablarına nə dərəcədə sadiqdirlər?

-Bəli, bu bir həqiqətdir ki, yunan alimləri, filosofları, tarixçiləri dünya irsi üçün böyük miras qoyublar. Bu mirasdan bütün dünya istifadə edir. Və gələcəkdə də istifadə etməyə davam edəcək.

İqtisadi böhrana qədər təhsilin vəziyyəti yaxşı idi. Təbii olaraq böhran öz əksini təhsil sahəsində də göstərir. Yunanıstanda orta və ali təhsil dövlət tərəfindən mailiyyələşdirilir. Dövlət eyni zamanda tələbə və şagirdləri gərəkən dərs ləvazimatları ilə də təmin edir. Eyni zamanda özəl məktəb və universitetlər də mövcuddur. Yunanlar ali təhsil almağa meyillidirlər. Yəni, universitet diplomu müasir yunanlı üçün çox vacibdir. Hətta bu barədə lətifə də var. Demək, müasir yunanlı, dostu və balaca oğlu ilə gəzməyə gedir. Yunan ata, oğlundan təyyarəni göstərərək soruşur:- Bu nədir? Uşaq cavab verir:- Təyyarə. Kişi dostuna üzünü tutaraq “Belə agıllı uşaq necə universitet diplomu almasın. Oxutduracam”.

Bu sahədə yunanlarla bir-birimizə oxşayırıq. Şimalı Avropada isə bu belə deyil. Onlar təhsildən daha çox peşə sahibi olmağa üstünlük verirlər.

-Yunanıstanda istədiyiniz kimi lazımi elmi biliklərə yiyələnə bilirsizmi?

-Mən universitetimdən və professorlardan çox razıyam. Xarici tələbə olmağıma baxmayaraq daima onların dəstəyini görürəm. Hesab edirəm ki, onlar bu çətin dövrdə belə, öz tələbələrindən heç bir köməyi əsirgəmirlər. Mən şadam ki, bu ölkədə təhsil alıram. Əlbətdə bəzi çətinliklər mövcuddur, amma mən aldığım təhsildən razıyam.

-Bu müflis Avropa ölkəsində təhsil almaq və işləmək sizə nə dərəcədə maraqlıdır?

-Yunanıstan, ümumiyyətlə, maraqlı ölkədir. Bu ölkədə böhrana baxmayaraq, yaşamaq maraqlıdır. İqlim, həyat tərzi, yayda dəniz əvəzedilməzdir. Yunan adaları insanı valeh edir. Onların gözəlliyi əvəzedilməzdir. İnsanları isə istiqanlı və mehribandır. Mənim işim ölkəmlə bağlı olduğuna görə böhranın mənim işimə bir təsiri yoxdur. Yəqin bu məni adi yunanlıdan fərqləndirir. Adi yunanlının sabah böhran səbəbi ilə işini itirmək qorxusu varsa, mənim işim üçün belə bir təhlükə mövcud deyil.

Təhsil sahəsində isə böhranın izlərini görməmək mümkün deyil. Təəssüf hissi ilə deyə blərəm ki, böhran təhsil sahəsinə böyük ziyan verir. Əgər bir tələbənin valideynləri işlərini itirirsə, ölkənin çətin vəziyyəti tələbələrin psixologiyasına təsir edir. Müəllimlərin maaşı əvvəlki illərə nisbətdə azaldılıb.

Ölkədə mövcud olan bu səbəbdən bəzi gənclər Avropanın digər ölkələrinə axışırlar. Amma mən əminəm ki, yunan xalqı bu çətin günlərin öhdəsindən gələcək və öz təhsil səviyyəsini əvvəlki illərdəki səviyyəyə qaldıracaq.

Fuad Hüseynzadə

Palitra.-2015.-28 avqust.-S.11.