SABAH qrupu tələbələrinin 2-ci Forumu başa çatdı

Fərqlənən tələbələrə müxtəlif nominasiyalar üzrə sertifikatlar təqdim olunub

Ali təhsildə tədrisin keyfiyyətinin yüksəldilməsi, ali təhsil sistemində yeni və fərqli bir mühitin yaradılması, savadlı, bacarıqlı və hazırlıqlı tələbə yetişdirilməsi, əmək bazarının artan tələblərinə müvafiq olaraq kadr hazırlığının təmin edilməsi məqsədilə yaradılan SABAH qrupları yaradılıb. Artıq bir müddətdir ki, fəaliyyət göstərən SABAH qrupuna tələbələrin böyük marağı var.

SABAH-ın üstünlükləri hansılardır?

Bugünlərdə Təhsil Nazirliyinin təşkilatçılığı ilə 2-ci SABAH Forumu keçirilib. İki gün davam edən foruma ali təhsil müəssisələrinin SABAH qruplarında təhsil alan tələbələr qatılıb. Forumun əsas məqsədi SABAH qruplarında təhsil alan tələbələrlə birgə müzakirələrin aparılması, onların intellektual və yaradıcılıq potensialının inkişafına dəstək, tələbələr arasında fəal dialoq mühitinin yaradılmasıdır.

Forumun açılış mərasimində çıxış edən təhsil naziri Mikayıl Cabbarov qeyd edib ki, ölkəmizin regional və qlobal rəqabətdə üstünlük qazanması üçün ali təhsildə keyfiyyətin artırılması vacibdir. Ölkə rəhbərliyinin təhsilin inkişafına göstərdiyi xüsusi diqqət və qayğı bu sahədə islahatlar üçün mühüm zəmin yaradır. Təhsil naziri ali təhsil sahəsində islahatların yeni mərhələsinin başlandığını qeyd edərək bildirib ki, müasir çağırışlara cavab verən, rəqabətəqabil kadr hazırlığı baxımından SABAH qruplarından gözləntilər çox böyükdür. Nazir ali təhsil məkanında mövcud potensialı səfərbər etməyə imkan verən innovasiya mühitinin yaradılmasının önəminə diqqət çəkib. Çıxışının sonunda Mikayıl Cabbarov SABAH qruplarında təhsil alan tələbələrin yaxın gələcəkdə ölkəmizin inkişafına layiqli töhfələr verəcəyinə ümidvar olduğunu bildirib.

Tədbirdə SABAH qruplarında təhsil alan 3-cü kurs tələbələri çıxış edib, 1-ci SABAH Forumu ilə bağlı videoxronika nümayiş olunub.

Qeyd edək ki, SABAH qrupları 5 ixtisas qrupuna (təhsil, humanitar, iqtisadiyyat, texniki, təbiət) daxil olan 34 ixtisas üzrə respublikanın 34 ali təhsil müəssisəsinin bakalavr səviyyəsinin I kursunu müvəffəqiyyətlə bitirmiş tələbələrdən müsabiqə yolu ilə seçim aparmaqla formalaşdırılıb. Müsabiqədə uğurlu nəticə göstərməklə SABAH qruplarına seçilmiş 755 tələbə 2014/2015-ci tədris ilini sentyabr ayından elmi-pedaqoji potensialı, tədris-laboratoriya və maddi-texniki bazası yüksək olan 7 ali təhsil müəssisəsində II kursdan təhsillərini davam etdiriblər.

2015/2016-cı tədris ili üçün SABAH qruplarına aparılmış qəbul nəticəsində 881 tələbə qəbul olunub və bununla SABAH tələbələrinin ümumi sayı 1636 nəfər olub. 2014/2015-ci tədris ili ilə müqayisədə Mədəniyyət və incəsənət ixtisas qrupunun da əlavə olunması ilə baza ali təhsil müəssisələrinin sayı 7-dən 11-ə, ixtisasların sayı isə 34-dən 45-ə çatdırılıb. Yeni tədris ili üçün yenilənmiş SABAH yataqxanasında 300-dən artıq tələbənin yerləşdirilməsi üçün şərait yaradılıb.

SABAH qrupları tələbələrə əlavə təqaüd, bölgələrdə qeydiyyatda olanlar üçün gündə 3 dəfə qidalanma daxil olmaqla ödənişsiz yataqxana xidməti, xarici mübadilə proqramları, müasir təşkilat və müəssisələrdə tədris və istehsalat təcrübələri, əmək bazarında daha cazibədar namizədlərə çevrilmə kimi üstün imkanlar təklif edir. SABAH qruplarına qəbul 3 mərhələdən ibarət olmaqla müsabiqə yolu ilə aparılır. Müsabiqədə respublikanın istənilən ali təhsil müəssisəsində yalnız tələb olunan ixtisaslar üzrə bakalavr pilləsinin I kursunda əyani əsaslarla təhsil alan və orta akademik göstəricisi 61-dən yuxarı olan tələbələr iştirak edə bilərlər. Bundan başqa, test imtahanı keçirilir ki, burada məntiq üzrə və ingilis dili üzrə nümunə suallar təqdim olunur. Daha sonra isə müsahibə aparılır ki, bu mərhələdə hər bir tələbə müvafiq ixtisas qrupları üzrə yaradılmış komissiyalar tərəfindən müəyyən edilmiş kriteriyalar əsasında qiymətləndirilir.

Ötən müddət ərzində SABAH qrupları bir sıra tədbirlərin, seminarların iştirakçısı olublar. Belə ki, Rusiya Federasiyasının təhsil və elm naziri Dmitri Livanovun SABAH tələbələri ilə görüşü təşkil olunub. Həmçinin Bakı Dövlət Universiteti, Azərbaycan Dövlət Neft və Sənaye Universiteti və Azərbaycan Dövlət İqtisad Universitetində SABAH qruplarının yeni tədris auditoriyalarının təqdimatı olub. Bundan başqa, SABAH qrupları və “Caspian Energy jurnalı” MMC arasında memorandum imzalanıb. Memorandumun predmeti SABAH tələbələri üçün “Caspian Energy jurnalı” MMC-də təcrübə proqramının təşkilidir.

SABAH qruplarında tədrisi aparan professor-müəllim heyətinin müasir tədris metodikaları üzrə peşəkarlıq səviyyəsinin və kvalifikasiyasının artırılması məqsədilə Paris Sorbon Universitetinin mütəxəssisləri tərəfindən keçirilmiş “Ünsiyyət və beynəlmiləlləşmə” adlı təlimin təltifetmə mərasimi keçirilib. Mərasimdə Fransanın Azərbaycandakı Səfiri Paskal Mönye, Bakı Dövlət Universitetinin rektoru Abel Məhərrəmov və SABAH qruplarının İcra Komitəsinin rəhbəri Elçin Ağakişiyev iştirak ediblər.

“SABAH-ın Könüllüsü” nədir?

Proqram SABAH qrupları tələbələrinin akademik təhsildən ayrılmadan, könüllü fəaliyyətə cəlb olunmaqla sosial aktivliyini artırmaq və alınmış biliklərin praktikada tətbiq edilməsini, eləcə də tələbələrin idarəçilik bacarıqlarının və liderlik potensialının inkişaf etdirilməsini təmin etmək məqsədi ilə yaradılıb.

“SABAH-ın Könüllüsü”nün fəaliyyət növləri hansılardır? Buraya komanda quruculuğu, görüşlər və şəbəkələşmə, ATM daxili aksiyalar və tədbirlər, komandalar arası yarış və müsabiqələr, ölkə səviyyəli və beynəlxalq tədbirlərdə iştirak şansı daxildir. Kimlər “SABAH-ın Könüllüsü” ola bilər? SABAH qruplarının mövcud olduğu 7 ali təhsil müəssisəsi - Bakı Dövlət Universiteti, Azərbaycan Memarlıq və İnşaat Universiteti, Azərbaycan Texniki Universiteti, Azərbaycan Dövlət İqtisad Universiteti, Azərbaycan Dövlət Neft Akademiyası, Azərbaycan Dövlət Pedaqoji Universiteti və Azərbaycan Dillər Universitetinin SABAH qruplarında təhsil alan tələbələr “SABAH-ın Könüllüsü” ola bilərlər.

SABAH və rəqabətəqabil kadr

2-ci SABAH Forumunun ikinci günü tələbələr üçün “Karyera inkişafı”, “Vaxtına sahib çıx”, “İnformasiya texnologiyaları gündəlik həyatda” və “Sən də bir brendsən” mövzularında "ustad dərsləri" təşkil olunub. "Ustad dərsləri”ndə karyera inkişafı, informasiya texnologiyaları və vaxtın idarə olunması ilə bağlı tələbələrlə interaktiv dialoq yaradılıb. Sonra panel müzakirələrə başlanılıb. Müzakirələrdə təhsil naziri Mikayıl Cabbarov, Dövlət Neft Fondunun icraçı direktoru Şahmar Mövsümov, millət vəkili, Milli Məclisin Gənclər və idman komitəsinin sədri Fuad Muradov, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov, R.İ.S.K Elmi İstehsalat Şirkətinin Müşahidə Şurasının həmsədri, biznesin inkişafı üzrə direktor Anar Əligülov iştirak edib. Müasir əmək bazarı şəraitində təhsil və karyera inkişafı mövzusunda keçirilən panel müzakirələrdə uğurlu karyeranın qurulması, SABAH qruplarında təhsil alan tələbələrin müasir dünyanın çağırışlarına cavab verən, rəqabətəqabil kadr kimi formalaşması istiqamətində fikir mübadiləsi aparılıb. Tələbələrlə fəal dialoq mühiti yaradılıb, onları maraqlandıran suallar cavablandırılıb.

Forum daha sonra intellektual oyunlarla davam etdirilib.

Forumun bağlanış mərasimində fərqlənən tələbələrə müxtəlif nominasiyalar üzrə sertifikatlar təqdim olunub, eləcə də ikigünlük foruma dair videosüjet nümayiş etdirilib.

Qeyd edək ki, SABAH qrupları 45 ixtisas üzrə elmi-pedaqoji potensialı, tədris laboratoriyası və maddi-texniki bazası yüksək olan 11 ali məktəbdə fəaliyyət göstərir. 1629 tələbənin təhsil aldığı bu qruplarda 500-dək müəllim dərs deyir. SABAH qruplarında tədris fərqli proqram əsasında keçirilir və tələbələrə xüsusi təqaüd verilir, eyni zamanda aztəminatlı ailələrdən olan tələbələr yataqxana ilə təmin olunurlar.

Nigar Abdullayeva

Palitra.-2015.-8 dekabr.-S.11.