“Gənclərin xaricdə təhsil alması dövlətimizin inkişafını daha da sürətləndirəcək”

Aygün Məmmədova: “Azərbaycan gəncliyi bütün dövrlərdə savadı, fəhmi, istedadı ilə seçilib”

Layihə çərçivəsində Şimali Kiprin Doğu Akdeniz Universitetinin tələbəsi Aygün Məmmədova ilə müsahibəni təqdim edirik. Xatırladaq ki, A.Məmmədova 1990 - cı ildə Gəncədə anadan olub. 1997- ci ildə Gəncədə bir saylı orta məktəbə daxil olub. 2008 - ci ildə Göygöl rayonu Ərşad Məmmədov adına məktəbin 11 - ci sinfini bitirib. Elə həmin ildə də Azərbaycan Kooperasiya Universitetinin Beynəlxalq iqtisadi münasibətlər fakültəsinə daxil olub. 2013 -cü ildə isə Doğu Akdeniz Universitetinin magistr pilləsi üzrə ingiliscə Biznesin idarə olunması və təşkili fakültəsinə qəbul olunub. Hal-hazırda təhsilini davam etdirir.

- Doğu Akdeniz Universitetinin təhsil proqramından razısızmı?

-İlk olaraq qeyd edim ki, Doğu Akdeniz Universiteti Şimali Kiprin yeganə dövlət universitetidir. Burada 70-ə yaxın ölkədən 17 000 - ə yaxın tələbə təhsil alır. Bu göstərici hər il artmaqdadır. Təhsil proqramının çətinliyi tələbələrin daha savadlı kadr kimi yetişməsinə xidmət etməklə yanaşı, onlara gələcəkdə dünyanın hər bir yerində işləyə bilmə bacarıqlarını aşılayır. Bu baxımdan burdakı təhsil proqramından çox razıyam.

-Gənclərin xaricdə təhsil alması ölkəmiz üçün hansı perspektivi vəd edir?

-Bir sıra ölkələrdə olduğu kimi, Azərbaycanda da gənclər və digər şəxslər xaricdə təhsil almağa can atır. Ümumilikdə xaricdə təhsil almaq istəyənlərin əsasını gənclər təşkil edir. Sevindirici haldır ki, Azərbaycan gəncliyi dünyaya inteqrasiya edir. Gəncliyin normal formalaşması, intellektual təbəqənin yaranması, dünyagörüşünün formalaşması üçün xaricdə təhsil alması vacib məsələlərdən biridir.

Azərbaycan günü-gündən inkişaf edir, dünyada gedən bütün texnoloji yeniliklərlə ölkənin hərtərəfli inkişafına zəmin yaradır. Bu da daha savadlı kadrların çalışması, onların gedən bu proseslərin güclü izləyicisi olub, yeniliklərə ayaq aça bilmə, ölkənin iqtisadi, sosial, müdafiə və s. digər sahələrində lazımınca bilik, bacarıq, qabiliyyət göstərməsi və artan bu inkişafın ən böyük xidmətçisi olmağı tələb edir. Bu baxımdan yalnız ölkə daxilində deyil, eyni zamanda ölkədən kənarda təhsil almaq istəyi dövlətin əsas prinsiplərindən birini təşkil edir ki, hər il dövlətimiz tərəfindən 100-lərlə tələbə dövlət xətti proqramı üzrə müxtəlif ixtisaslarda xarici ölkələrdə təhsil almaq üçün göndərilir. Düşünürəm ki, bu, dövlətimizin gələcək inkişafını daha da sürətləndirəcək. Ancaq kompüter, atom texnikası, kosmik tədqiqatlar, elektronika ilə bağlı elə sahələr var ki, həmin ixtisaslar üzrə gənclərin xarici ölkələrin məşhur ali məktəblərində təhsil almasına ehtiyac var. Bütün bunlarla yanaşı, bir şeyi də unutmaq olmaz ki, xaricdə oxumaq istəyən gənclər arasında ciddi seçim olmalıdır. Elə gənclər olmalıdır ki, gedib xaricdəki dəbdəbəli həyata meyil göstərib, onu təhsildən üstün tutmasın. Eyni zamanda vətəndaşlıq hissini unutmasınlar. Onlar yaddan çıxarmasınlar ki, azərbaycanlıdırlar. Unutmasınlar ki, ölkənin gələcəyi üçün onların fəaliyyətinə böyük ehtiyac var.

-Dövlətin inkişafında təhsilin nə kimi rolu var?

-Hər bir dövlətin gücü onun ilk olaraq təhsili ilə əlaqədardır. Çünki, insanın formalaşmasında təhsil və təhsil işçilərinin rolu böyükdür. Buna əsaslanaraq onu bildirmək istəyirəm ki, təhsil dövlətin, millətin ən böyük qalxanıdır. Bildiyimiz kimi, gənclərin hərtərəfli şəxsiyyət kimi yetişməsində, cəmiyyətdə özünə layiqli yer tutmasında keyfiyyətli təhsilin rolu həlledicidir. Məhz dövlət başçısının təhsilə diqqət və qayğısının nəticəsi olaraq, Azərbaycanda təhsil infrastrukturunun müasir tələblərə uyğun qurulması, təhsilin məzmununun yenilənməsi, yeni dərslik siyasətinin reallaşdırılması, təhsil alanların nailiyyətlərinin qiymətləndirilməsi üzrə yeni model və mexanizmlərin tətbiqi və s. uğurlar əldə olunub.

-Ölkədən kənarda təhsil almağın hansı müsbət tərəfləri var?

-Bunun bir çox özəlliyi var. Məsələn, fərqli mədəniyyətə sahib insanların bir arada olduğu geniş ortamda ünsiyyət qurmaq bacarığı və öz ölkən ilə digər ölkə insanlarının etik, estetik və s. digər mədəniyyətlərini müqayisə etmə imkanı, başqa bir ölkədə adaptasiya ola bilmə bacarıqlarını inkişaf etdirmək, fərqli ölkələrdən gələn tələbələrin ən çox hansı ixtisasları seçməkləri və bunun səbəbi ilə maraqlanıb fikir mübadiləsi aparmaq imkanı, daha çox tələbələrlə bağlı təşkil olunmuş elmi konfranslarda iştirak edib dünyanın bir çox universitetlərindən gələn professor-müəllimlərin seminarlarında ola bilmək və s. Xaricdə təhsil alan gənclərin həmrəyliyi onların ölkəmizin təbliği istiqamətində vacib amildir. Xaricdə təhsil alan gənc ilk növbədə öz ölkəsini təbliğ etməyi bacarmalıdır. Əsil təhsildən danışırıqsa, məncə, xaricdə təhsil almaq çox fərq etmir. Çalışıb oxuyan insan dünyanın hansısa tərəfində olursa olsun oxuyacaq, lazım olan biliyə sahib olacaq.

Azərbaycan gəncləri çox istedadlıdır. Gənclərimiz yarışlarda iştirak edib çox- çox birinci yerlərə layiq görülürlər. Xaricdə təhsilin özəlliklərindən biri odur ki, Vətənimizin inkişafını xarici ölkədə təbliğ etmək imkanı əldə edirik. Bir çox Azərbaycan tələbələri xaricdə təhsil almaq istədikdə çox uzaqlarda yox, elə məhz doğma qardaş Türkiyə və Şimali Kiprə müraciət edirlər. Azərbaycan tələbələrinin Şimali Kiprə üz tutmasının bir neçə səbəbi var. Bunlarda ən başlıca səbəb qonşu Türkiyə və Şimali Kipr dövlətlərinin Azərbaycanla qardaş ölkə olmasıdır. Ulu öndər Heydər Əliyevin “bir millət, iki dövlət” kəlamı ilə çıxış edərək deyə bilərəm ki, Şimali Kiprdə təhsil almaq mənim üçün çox şərəflidir. Məhz bir millət, üç dövlət- Azərbaycan, Türkiyə və Şimali Kipr arasında münasibətləri xarakterizə etmək üçün istifadə edilən milli konsepsiyanı özümə şüar etmişəm.

-Dövlət tərəfindən təhsilin inkişafı üçün lazımi diqqət göstərilirmi?

-Xaricdə təhsil alan tələbə kimi onu qeyd etmək istərdim ki, ölkəmizdə təhsilin inkişafı üçün Prezident İlham Əliyev tərəfindən çox böyük diqqət göstərilir. Amma buna baxmayaraq təhsilimizdə bəzi geriliklərin də müqayisə zamanı fərqinə varmamaq mümkün deyil. Bu gün Şimali Kipr dövləti təhsil adası kimi gəlirlərini və iqtisadiyyatını təhsil üzərindən irəlilədir. Burada olan 12 universitet nəinki müəssisə daxilində, həm də məsafədən təhsil ilə uğurlu nəticələr əldə etməkdədir. Universitetlərin dünyanın bir çox böyük universitetləri ilə əlaqələrinin geniş olması, qlobal təhsil proqramlarını yaxından izləyib onların imkanlarından maksimum inkişaf etdirmək istəyinə nail olub, bunu öz müəssisələrində uğurlu bir formada tətbiq edə bilmələri yetişən kadrlar üçün geniş qapılar açır. Hər birimizə də bəllidir ki, universitet tələbə məzun etmək ilə deyil, məzun etdiyi tələbələrin gələcəkdə hansı böyük mövqedə çalışmağı ilə ucalır, qürurlanır.

- Yəqin ki, təhsilinizi bitirdikdən sonra ölkəmizə qayıdıb əmək fəaliyyətinə başlayacaqsınız...

- Təbii ki, məqsədim burada öyrəndiklərimi gələcəkdə öz ölkəmdə tətbiq etməkdir. Oxuduğum ixtisas mənə bir çox imkanlar qazandırır ki, xarici ölkələr ilə ticarət əlaqələrini qurum. Bu əlaqələrdən ölkəmə böyük gəlirlər qazandırmaq mənin ixtisasımdan və əldə etdiyim biliklərdən qaynaqlanan bir xəyaldır. Xəyallar bizim ən böyük dostumuzdur. Hər bir iş ilk olaraq xəyal edilər, sonrası bizim istəyimiz və təcrübəmizdən asılıdır. Hər zaman yeniləşən və modernləşən ölkəmizdə işləmək, Vətənimdə xidmət etmək mənim ən böyük arzumdur.

-Yerli gənclərlə hansı layihələr həyata keçiribsiniz?

-Doğu Akdeniz Universitetində 500 - ə yaxın azərbaycanlı tələbə təhsil alır. Burda olan azərbaycanlı tələbələr bir çox klublarda fəaliyyət göstərib istər ölkəmizin mədəniyyətini tanıtmaq, istərsə də qardaş ölkələrin, yəni Türkiyə və Şimali Kipr dövlətlərinin tələbələrinin bir çox tədbirlərində yaxından iştirak etməklə "Biz bir millət, üç dövlətik" şüarı altında layihələr həyata keçiririk.

- Azərbaycanlı tələbələr öz istedad və savadı ilə seçilirmi?

- Sözsüz ki, savadlı, bilikli gənclik xalqa və dövlətə daha məsuliyyətlə, daha vicdanla xidmət edər. Savadlı insan hər şeyi ağlının süzgəcindən keçirib icra edir. Azərbaycan gəncliyi bütün dövrlərdə savadı, fəhmi, istedadı ilə seçilib. Hələ qədim zamanlarda məntiqə söykənən bilik, bilməcə yarışları keçirilib. Ağıllı gənclər öz biliyinə və hissiyyatına arxalanaraq ən çətin suallara cavab tapıb. Elm və texnika inkişaf etdikcə, gənclərin bilik və bacarığını təkmilləşdirən meyillər də meydana çıxıb. Gənclərin daha savadlı olması üçün onların intellekt oyunlarına cəlb edilməsi çox uğurlu bir addımdır. Hesab edirik ki, bunun uğurlu nəticələri daha çox olacaq. Azərbaycan intellektləri zaman-zaman özünü göstərib və hətta beynəlxalq bilik yarışlarından qalib ayrılıb.

-Gözlənilən hansı tədbirləriniz var?

-Mən xaricdə təhsil alan bir tələbə kimi çalışacam ki, qarşıdan gələn 8 Mart Beynəlxalq qadınlar bayramı ilə bağlı gözəl tədbir keçirilsin. Onun ardınca Novruz bayramı tədbiri keçiriləcək. Xalqımızın gözəl adət-ənənəsi olan Novruz bayramını, yazın gəlişini, gözəl bayramımızı təbliğ edəcəyik. Biz xaricdə təhsil alan Azərbaycan gəncləri burda təhsil alan başqa ölkələrin gəncləri ilə çalışacağıq ki, həmrəy olaraq Xocalı soyqırımını bütün dünyaya tanıtdıraq və böyük aksiya keçirək. Davamlı olaraq müxtəlif layihələrə dəvət olunuruq. Sevə-sevə bu dəvətləri qəbul edib, iştirak edirəm. Təcrübə üçün Avropa ölkələrinin birində olacağam və gələcəkdə doktoranturanı da xaricdə davam etdirmək planlarım var.

Fuad Hüseynzadə

Palitra. - 2015.- 10 fevral.- S. 11.