“Fəlsəfədə milli
düşüncə milli məfkurəli
intellektual cəmiyyətin qurulmasına
yardım etməlidir”
Faiq Xudanlı: “Fəlsəfənin
cəmiyyətin tərəqqisində rolu
haqqında nə qədər yazılsa da,
hələ də istənilən nəticəni
ala bilməmişik”
Hər bir sivilizasiyanın, eləcə də hər bir cəmiyyətin inkişafında fəlsəfi
düşüncənin, azad fikir yaradıcılığının önəmli
rolunu nəzərə alaraq,
layihə çərçivəsində Azərbaycanda fəlsəfə
və bu sahədəki kadrların fəaliyyəti
məsələlərinə
toxunmağı lazım bildik. Qeyd etmək lazımdır ki,
vacib ictimai elmlərdən
biri olan fəlsəfəyə
göstərilən hazırkı münasibət və maraq, əslində, düşündürücüdür.
Eyni zamanda ictimai elmlər və konkret
olaraq fəlsəfə sahəsində
lazımi kriteriyalara cavab
verə biləcək savadlı kadrların, peşəkar elm adamlarının formalaşması
baxımından bu mövzunu
müzakirə etməyə dəyər.
Qeyd edək ki,
sözügedən mövzu ilə
bağlı olaraq sosial
fəlsəfə üzrə aspirant, gənc
tədqiqatçı Faiq Xudanlı bizə
fikirlərini bildirdi. F.Xudanlı öncə
fəlsəfə ilə bağlı keçirilən tədbirlərlə
bağlı fikirlərini bölüşdü:
“Ölkəmizdə də fəlsəfə günü
ilə bağlı müxtəlif tədbirlər, konfranslar təşkil olunur.
Son dövrlərdə, ümumiyyətlə,
ictimai elmlərə maraq
nəzərəçarpacaq dərəcədə
artmaqdadır. Buna görə də
dövlət və nüfuzlu elm təşkilatları səviyyəsində
fəlsəfə ilə bağlı beynəlxalq elmi konfranslar keçirilir. Ancaq təəssüflə
onu da bildirirəm ki, fəlsəfənin önəmi, cəmiyyətin
tərəqqisində rolu haqqında nə
qədər yazılsa da, deyilsə də,
hələki istənilən nəticəni ala
bilməmişik. Azərbaycan gündən-günə inkişaf edir, bütün sahələrdə irəliləyiş
göz qabağındadır. Lakin bütün bunlarla yanaşı, cəmiyyətimizdə bəzən
bazar iqtisadiyyatının özündə
daşıdığı neqativ
xüsusiyyətlər daha qabarıq
gözə çarpır. Hər şeyi
bazar münasibətləri ilə
ölçmək o qədər də effektli deyil, əksinə,
bazar münasibətlərinin qurulması
zamanı ilkin kapitalizmdə olduğu kimi onun bəsit formada tətbiqi
heç də cəmiyyətə fayda verə bilməz. Məhz bu
mənada ictimai elmlərin, fəlsəfənin
üzərinə böyük yük düşür. Prezident İlham Əliyev keçid
dövrünün ölkəmizdə başa çatdığını elan etdikdən sonra
düşüncə tərzimizdə də köklü
dəyişikliklər zamanının
çatdığını hesab etmək
olar. İndi
qarşımızda ən böyük əngəl
məhz budur. İqtisadi
və sosial sahələrdə köklü dəyişikliklər etməyə
çalışsaq da, idarəetmə
formalarını, rəhbərlik üsulunu
yeniləşdirməyə təşəbbüs göstərsək
də, çox vaxt bütün bunların tam
reallaşmasında və bununla bağlı
təşəbbüslərdə müəyyən çətinliklərlə
üzləşmiş oluruq, bəzən
isə hətta əks-effektlərlə də
qarşılaşırıq. Professor Səlahəddin
Xəlilovun qeyd etdiyi kimi, bunun əsas səbəbi
məhz düşüncə tərzindədir. Belə ki, sağlam
düşüncə tərzini formalaşdırmaq vəzifəsi
isə fəlsəfəyə, əsl filosoflara
məxsusdur. Cəmiyyət bu müdrik insanların arxasınca getməli,
eynilə fəlsəfə gediləcək yolu,
yeni düşüncə tərzini, vaxtilə
ümummilli liderimizin miras qoyduğu azərbaycançılıq
ideologiyasının mahiyyətini cəmiyyətə təqdim
etməlidir”.
F.Xudanlı inkar etmir ki,
Azərbaycanda fəlsəfə sahəsi dünya
fəlsəfi prosesləri ilə əlaqədədir: “Dediyim kimi, etiraf
olunmalıdır ki, son
zamanlar Azərbaycan fəlsəfi
mühitində, ictimai həyatında bir canlanma, bir
oyanış hiss olunmaqdadır. Sözsüz, dünya fəlsəfi
fikrinin, Qərb sosial-fəlsəfi cərəyanlarının
ölkəmizdə yayılması Azərbaycan fəlsəfi
fikrinə, ədəbiyyatına təsirsiz ötüşmür.
Bəzi hallarda bayağı ideyaların,
təhrif olunmuş, sonacan
dərk edilməmiş Qərb fəlsəfi cərəyanlarının
bir cox hallarda
milli-mənəvi dəyərlərimizi tapdalayaraq
önə çıxması, şüurumuza
calanan dəyərlər adekvat
reaksiya doğurur. Burada fəlsəfə,
onun mahiyyəti və sair
haqqında geniş danışmaq niyyətim
yoxdur, lakin indiki zamanda fəlsəfəni
sanki bir qədər
ucuzlaşdırıb yeri gəldi-gəlmədi,
fəlsəfə sözünü ortaya ataraq guya
hansısa öz yeni fəlsəfi
ideyalarını irəli sürürlər. Bəzən
isə onu reallığa bağlayaraq
buxovlamaq cəhdləri sezilməkdədir.
Ancaq unutmaq olmaz ki, əsl fəlsəfə
həmişə indi
anladığımız reallıqdan uzaq olacaq - bunu istəsək də,
istəməsək də. Bu, bir həqiqətdir. Eyni zamanda fəlsəfəni əlçatmaz zirvəyə
qoymaq da olmaz. Belə ki,
fəlsəfə özü, özü üçün
mövcud ola bilməz
o, məhz insana, onun daxili aləminə, cəmiyyətə,
onun daha mükəmməl,
daha sağlam inkişaf etməsinə xidmət etməlidir.
İnsan, cəmiyyət, Dostoyevskinin
dili ilə desək, “Ən çox nədən qorxur?...
insanlar ən çox
atacaqları yeni addımdan, söyləyəcəkləri
yeni sözdən qorxurlar”.
Filosoflar isə o
insanlardandır ki, yeni
addımları atmaqdan, yeni
söz deməkdən çəkinmirlər.
Onların ideyaları bəşəriyyəti irəliyə
aparır, cəmiyyəti onu gözləyən
təhlükələrdən xəbərdar edir,
yeni sual, yeni fikir ortaya
qoyur. Bu mənada
hamının ardınca behiştə getməkdənsə,
hamının qabağında cəhənnəmə getməyi
üstün tuturlar”.
Gənc tədqiqatçı
daha sonra belə düşünür: “İndi
cəmiyyətimizdə Qərb mədəniyyətinin,
düşüncə tərzinin bayağı, köhnə kapitalist meyillərin sosial
həyatın bütün sferalarına yeri gəldi-gəlmədi sirayət etməsi
və hər şeyin qarşısına
“post” atmaqla məsuliyyəti azaltmaq, guya “yeni cəmiyyət”də
hər şeyə icazə verilə biləcəyinə
işarə etmək ən azı mənəvi korluqdur. Aydındır ki, yeni cəmiyyət
qurmaqdayıq, cəmiyyətimiz yeniləşir, ancaq bu yeniləşmə
qloballaşma, inteqrasiya
adı altında milli-mənəvi dəyərlərimiz, əsrlərin
süzgəcindən çıxmış etik-əxlaqi
prinsiplərin dəyişilməsi hesabına ola
bilməz. Bunu fəlsəfə
adı altında etmək isə daha təhlükəlidir.
Heç
bir zaman fəlsəfə
xalqların adət-ənənəsinə, onun
milli şüuruna əks
mövqedə dayanmayıb, tam əksinə,
fəlsəfə məhz millətlərin əxlaqi dəyərləri,
adət-ənənələri ilə vəhdət təşkil
edib, ondan
yararlanıb. Fəlsəfə xalqların, millətlərin
düşüncə tərzində,
dünyagörüşündə, həyatında mühüm rol oynayır,
lakin onu adi şüura endirmək
olmaz. Eyni zamanda qondarma,
real həyatı özündə əks
etdirməyən, özündə heç
bir fəlsəfi yük
daşımayan müxtəlif istiqamətləri fəlsəfi
cərəyan kimi cəmiyyətə
sırımaq da yaramaz.
Əbülhəsən Abbasovun sözləri
ilə desək, gerçəkliyin kəsərli idraki, silahı rolunu
daşımayan, uydurma sxolastik
mülahizələrin, yersiz stereotiplərin
şərhi ilə səsləşən “fəlsəfə”
yeniləşən cəmiyyətin həyat fəlsəfəsi
ola bilməz. Bunun üçün
yeni cəmiyyətin qurulmasında fəlsəfənin
rolundan danışarkən hörmətli
akademik R.Mehdiyevin qeyd etdiyi kimi,
biz daim irəliyə,
gələcəyə baxmalıyıq, insani,
maddi və mənəvi
resurslarımızı səfərbər etməliyik. R.Mehdiyev qeyd edir: “Millətin tarixi keçmişi onun gələcəyə
doğru uğurla
addımlaması üçün həm
zəmin, həm də ibrət dərsidir. Yeni
inkişaf yolunu müəyyən
edən strategiyada, sözsüz
ki, varisliklə novatorluq
vəhdət təşkil etməlidir”. Yeni
söz demək xatirinə söz
demək, mülahizə yürütmək heç
də novatorluq deyil.
Bayağı, bəzən də milli-mənəvi dəyərlərimizə
zidd olan
yazıları adi məişət dilində
sanki yeni bir söz deyirmiş
kimi təqdim etmək təqdirəlayiq hal deyil. Yaxud
keçmiş, bəzən elə Avropanın,
Qərb intellektualları tərəfindən rədd edilən,
cəmiyyətin harmoniyasının pozulmasına bir növ xidmət edən
“dəyərlərin” yayılmasını arzuolunan
hal kimi qiymətləndirmək
olmaz.
İctimai rəydə bəzən belə bir fikir
formalaşdırılmağa çalışılır ki, hansısa bir ədəbiyyat
oxunaqlıdırsa və ya hansısa bir proqram
baxımlıdırsa, deməli, bu cür ədəbiyyat və proqramların yaşamağa haqqı var. Düzdür, belə
ədəbiyyat mövcud olub
və olacaq. Lakin belə
ədəbiyyatın fəlsəfi fikrin
daşıyıcısı kimi təqdim
edilməsi absurddur. Belə ki, kütlə hər zaman
yüngül, adi şüur səviyyəsində ədəbiyyata
daha çox üstünlük verir. Çünki kütlə qeyri-etik
situasiyalara daha çox meyillidir. Bu kimi meyilləri fəlsəfi
fikir kimi təqdim etmək
ən azı qəbahətdir. Fəlsəfə kütləvilik
xatirinə adi şüur
səviyyəsinə enməməli, əksinə, kütləni
öz arxası ilə aparmalıdır. Fəlsəfə
müdrik olmalı və cəmiyyətin
harmoniyasının qorunub
saxlanılmasına xidmət etməlidir. Digər bir alimimiz Fərman
İsmayılov belə bildirir: “Müdriklik fəlsəfə üçün
söz deyil, ilahiləşmə
məktəbidir. Müdrikliyin itirilməsi
cəmiyyətin sivilizasiyadan
barbarlığa doğru dönüşüdür.
Ona görə də biz
fəlsəfəyə biganə münasibətin təhlükəli
nəticələr verə biləcəyi qənaətindəyik”.
Bu baxımdan milli fəlsəfi
düşüncə tərzimizi elə
formalaşdırmalıyıq ki, o ülvi, milli-mənəvi
dəyərlərin qorunub
saxlanılmasına, həm də yeni, intellektual cəmiyyətin qurulmasına
yardım etmiş olsun.
İlkin AĞAYEV
Palitra.-2015.-21 fevral.-S.11.