Ceyn Pirs: “İlk Avropa Oyunları yüksək səviyyədə keçdi”

“Dostluq” ordeni ilə təltif olunmağım mənə böyük sevinc və qürur hissi bəxş etdi”

“Bakı-2015” birinci Avropa Oyunları Əməliyyat Komitəsinin mətbuat əməliyyatları şöbəsinin direktoru xanım Ceyn Pirsin fikrincə, AZƏRTAC-ın əməkdaşları birinci Avropa Oyunlarını yüksək peşəkarlıqla işıqlandırıblar.

Prezident İlham Əliyevin sərəncamına əsasən Azərbaycanda Olimpiya hərəkatının inkişafında böyük xidmətlərinə və birinci Avropa Oyunlarının təşkilində səmərəli fəaliyyətinə görə “Bakı-2015” Avropa Oyunları Əməliyyat Komitəsinin bir qrup əməkdaşı “Dostluq” ordeni ilə təltif edilib. Bu yüksək mükafata layiq görülənlər arasında “Bakı-2015” birinci Avropa Oyunları Əməliyyat Komitəsinin mətbuat əməliyyatları şöbəsinin direktoru Ceyn Pirs-Makmenamin də var. Xanım Ceyn Pirs bununla bağlı təəssüratlarını AZƏRTAC-ın müxbiri ilə bölüşüb: “Dostluq” ordeni ilə təltif olunmağım məndə böyük sevinc və qürur hissləri doğurdu. Bu, doğrudan da mənim üçün çox gözlənilməz oldu. Azərbaycanın ali dövlət ordenini almaq çox qürurvericidir. Bu ölkədə yaşamaq və işləmək, yeni gözəl dostlar qazanmaq mənim üçün çox xoş oldu”. Bu gün Azərbaycanı tərk edəcək Pirs ölkəmizlə bağlı təəssüratlarını bölüşüb: “Təəssüratlarım çox zəngindir və onları məmnuniyyətlə bölüşərəm. Biz artıq aylardan bəri yaşadığımız Media Kəndindən, gözəl Bakıdan ayrılaraq ölkələrimizə qayıdırıq. Bu ayrılıq, təbii ki, bir qədər kədərlidir. Ancaq, eyni zamanda, biz özümüzü çox xoşbəxt hesab edirik, çünki bu mötəbər idman bayramı - ilk Avropa Oyunları yüksək səviyyədə keçdi. Yeddi yüzdən çox yerli media təmsilçisi üçün düşünürəm ki, lazım olan hər cür şərait yaradılmışdı və onlar öz işlərinin öhdəsindən uğurla gəldilər. Xüsusi qeyd etmək istəyirəm ki, “Bakı-2015”in rəsmi media tərəfdaşı olan AZƏRTAC Oyunları daha yüksək səviyyədə və peşəkarcasına işıqlandırdı. İnsanların səmimi münasibətini və burada qazandığım dostları heç vaxt unutmayacağam. Bundan başqa, sizin gənclərinizin, o cümlədən bizimlə birgə çalışan könüllülərin istedadını xüsusi qeyd etmək istəyirəm. Ümid edirəm ki, onlar öz karyeralarında böyük uğurlar qazanacaqlar. Mən özümü Bakıda doğma evimdəki kimi hiss etdim”.

Palitra.-2015.- 1 iyul.- S. 3.