“Elm və təhsil inkişaf etdikdə savadlı insan kapitalı yetişir”

Kənan Rzayev: “Azərbaycanlıların qonaqpərvərliyi “Bakı-2015”-ə baxmağa gələn əcnəbiləri heyran edəcək”

-İstədiyiniz təhsilə tam yiyələnə bilibsinizmi?

- Təhsili tam başa vurmadan ona yiyələnmək mümkün deyil. Buna nail olmaq üçün çalışıram.

-Xaricdə təhsil sizə əlavə nə verib?

- Xarici ölkədə təhsil almaq şərəfli olduğu qədər də məsuliyyətlidir. Çünki bu müddət ərzində həm ölkəmi, həm də özümü lazımi səviyyədə tanıtmalıyam. Xaricdə təhsil almaqla mən dünyagörüşümü genişləndirib və bilik səviyyəmi artırmışam. Əlavə olaraq yeni dostlar tapmışam. Dünyanın tanınmış alimlərindən birbaşa dərs almaq böyük dividenddir. Xarici təcrübəyə yiyələnmək gələcək üçün əvəzedilməz qazancdır.

Mən də hər bir tələbə kimi seçdiyim ixtisas üzrə təhsilimi uğurla başa vurub, gərəkli mütəxəssis olmaq uğrunda var gücümlə çalışacam. Əldə etdiyim bilik və bacarıqlarımı öz ölkəmdə tətbiq edəcəm.

-Gənclərimiz İngiltərədə, əsasən hansı sahələrdə təhsil alırlar?

- Hal-hazırda tələbat çox olduğundan kompüter texnologiyalarını göstərmək olar və məncə, bu tək İngiltərəyə aid deyil.

-Universiteti bitirdikdən sonra təhsilinizi davam etdirmək fikriniz varmı?

- Təbii ki, elmdə son yoxdur. İnsan nə qədər yaşayırsa, daim arayıb axtarmalıdır. Mən də təhsilimi davam etdirmək fikrindəyəm.

-Gənclərin xaricdə təhsil alması ölkəmiz üçün hansı perspektivi vəd edir?

- Bildiyimiz kimi, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” təsdiqlənib. Bu proqram çərçivəsində 3 mindən artıq gənc xaricdə təhsil alır. Həmin gənclər həyatın müxtəlif sahələri üzrə xaricdə təhsillərini davam etdirirlər. Onların təhsillərini bitirdikdən sonra Vətənə qayıdıb öz biliklərini praktikada tətbiq etməsi ölkənin inkişafında böyük rolu olacaq. Bu gənclər gələcək kadr potensialıdır. Bununla onlar istənilən sahəyə bir yenilik gətirəcəklər. Bütün bunlar isə ümumi götürəndə dinamik inkişaf deməkdir. Azərbaycan dövləti məhz bunu nəzərə alaraq gənclərin xaricdə təhsilinə üstünlük verir. Bu, yeni inkişaf strategiyasıdır. Bu strategiya az bir zamanda öz bəhrəsini verəcək. Ona görə də biz gənclər ölkəmizin inkişafı və gələcəkdə daha da güclü olması üçün çox çalışmalıyıq. Bu, bizim həm də vətəndaşlıq borcumuzdur. Dövlətin etimadını doğrultmaq bizim qarşımızda duran birinci vəzifədir.

-Azərbaycan gəncləri xaricdə kifayət qədər həmrəydirmi?

- Gənclərimiz ölkəmizi dünyada bacardıqları qədər tanıdırlar. Ötən illərlə müqayisədə indi xaricdəki gənclər daha da aktivdirlər. Hər halda bu, ölkəmizin həm siyasi-iqtisadi gücünün, həm də xaricdə təhsil alan gənclərin sayının artması ilə bağlıdır. Eyni zamanda gənclərdə Vətən sevgisi onları ictimai fəal olmağa sövq edir. Gənclərimiz xalqımızın əlamətdar günlərində müxtəlif səpkili tədbirlər keçirirlər.

Elm və təhsilin inkişafı dövlətimizin prioritetidir. Bu yolda yetişən gəncliyin üzərinə böyük məsuliyyət düşür. Xüsusən xaricdə oxuyan gənclərimiz bu sahənin aparıcı qüvvəsidir. Onların əldə etdikləri yeni biliklər elm və təhsilin inkişafına təkan verəcək. Dövlət başçısı “biz neft kapitalını insan kapitalı ilə əvəz edəcəyik” deyərkən məhz bugünkü gəncliyi nəzərdə tutub. Bu baxımdan gənclikdən gözləntilər böyükdür. Elə müsahibimiz Kənan Rzayev də bu amal uğrunda xaricdə təhsilini davam etdirir. Qeyd edək ki, Kənan Rzayev Bakı şəhərində anadan olub. 11 illik təhsilini Yasamal rayonu 175 saylı orta məktəbdə bitirib. Orta məktəbi bitirdikdən sonra xarici ölkədə təhsilini davam etdirmək qərarına gəlib. Hazırda Böyük Britaniyanın Solent Universitetinin Beynəlxalq biznesin idarəetməsi fakültəsində təhsil alır.

Bu, xaricdəki gənclərimizin həmrəyliyinin bariz nümunəsidir. Bir çox hallarda gənclərimiz öz ictimai fəallıqları ilə diaspor rolunu oynayırlar. Onlar öz əcnəbi tələbə yoldaşları ilə yanaşı, təhsil aldıqları ölkənin yerli xalqı ilə də təmaslar qururlar və bununla da təbliğat aparırlar. Burada diqqətçəkən bir məqam da var ki, yeni gəncliyin layihələri çox kreativ olur. Yəni bu layihələr yerli xalqın ölkəmizi tanımasına yüzdəyüz təsir edir. Belə effektiv işlər Azərbaycanın xaricdə tanınması üçün böyük addımdır. Xaricdəki gənclərimizin sayı artdıqca bu kimi layihələrin sayı daha da artacaq.

-Kənardan Azərbaycan təhsilinin vəziyyəti necə görünür?

- Azərbaycan yenidən müstəqilliyini bərpa etdikdən sonra hər sahədə olduğu kimi, təhsil sahəsində də islahatlar aparıldı. Təhsilimiz müstəqil dövlətin qayda-qanunlarına uyğun olaraq formalaşdırıldı. Bu gün Azərbaycan dünya təhsil sisteminə inteqrasiya olunur. Beynəlxalq təhsil sistemi ölkəmizdə tətbiq olunur. Yəni bütün bunlar təhsildə aparılan islahatlar deməkdir. Amma təhsil daima yenilənmə tələb edən sahədir. Bu sahədə davamlı islahatlar aparılmalıdır. İstənilən sahədə islahatların aparılması inkişafa aparan bir yoldur.

-Elm və təhsilin inkişafı ölkənin ümumi inkişafının təmin olunması baxımından nə dərəcədə əhəmiyyətlidir?

- Bir çox ölkələr var ki, yüksəkkeyfiyyətli təhsil sisteminə görə dünyada brendə çevriliblər. O ölkələrin alimlərinin elmi ixtiraları bu gün dünyəvi problemlərin həllinə vəsilə olub. Bu kimi əldə olunan uğurlar ümumilikdə istənilən ölkənin inkişafına yol açır. Elm və təhsil inkişaf etdikdə ölkənin gələcəyi üçün əsas sərmayə olan savadlı insan kapitalı yetişir. Elmli, təhsilli və savadlı insanlar isə ölkənin inkişafına öz töhfəsini verir. Bir sıra inkişaf etmiş ölkələrdə biz ölkənin inkişafında elm və təhsilin əhəmiyyətli rolunu görürük.

-Öyrəndiyiniz sahə ilə bağlı Azərbaycanda hansı yeniliklər etmək istərdiniz?

- Ölkəmiz günü-gündən inkişaf etdiyi üçün bu haqda danışmaq tez olar. Təhsilimi tam başa vurduqdan sonra nəsə deyə bilərəm.

-Hər halda “Bakı-2015” sevincini siz də yaşayırsız...

-“Bakı-2015” bütün dünya azərbaycanlılarının sevinci və fəxrdir. Bu, bir ümumxalq işidir. Hər birimiz bu Oyunların yüksək səviyyədə keçirilməsi üçün töhfəmizi verməliyik. Biz bu sevinci azərbaycanlı tələbələrlə birgə görüşərkən qürur hissi keçirərək paylaşırıq.

-İngiltərədə ilk Avropa Oyunlarının təbliğatını apara bilirsizmi?

-Təhsil aldığım Solent Universitetində tələbələr arasında bu Oyunlarla bağlı görüşlər keçirirəm. Əcnəbi tələbələrə Azərbaycan haqqında məlumatlar verirəm. Eyni zamanda Oyunların mahiyyətindən danışıram. Onları ölkəmizə dəvət edirəm.

Bundan da qürur duyuram. Çünki əminəm ki, əcnəbilər Azərbaycanda çox xoş qarşılanacaq. Azərbaycanlıların qonaqpərvərliyi əcnəbiləri heyran edəcək.

Mən, həmçinin “Bakı-2015”-lə bağlı “ArtBakers” şirkəti ilə birlikdə videoçarx hazırlamışam. Həmin videogörüntüdə dünyanın müxtəlif ölkələrindən olan gənclər Avropanı “Bakı-2015”-i izləməyə çağırış edir. İlk Avropa Oyunlarına dəstək üçün hazırlanan videoçarxda 13 nəfər əcnəbi gənc öz ölkələrindəki insanları “Bakı-2015”-ə dəvət edirlər.

-Perspektivdə hansı işləriniz gözlənilir?

- Bu günə qədər imkan daxilində bir neçə layihənin müəllifiyəm və hazırda da işlərimi davam edirəm. Baku-eto www.baku-eto.az. (Onlayn jurnal), Azerbaijan Around the World, ALOF (www.alof.co.uk), Charity Azerbaijan və s. Gələcəkdə də çalışacağam ki, doğma Azərbaycanımın adını öz layihələrimin köməkliyi ilə daha geniş miqyasda tanıdım.

Fuad Hüseynzadə

Palitra.-2015.-5 iyun.-S.11.