“Peşə təhsilinin gələcəyi
işəgötürənlərlə sıx əlaqədən
asılıdır”
Təhsil Nazirliyinin 5 nömrəli Bakı Peşə
Liseyində otelçilik üzrə
kursları başa vuran
205 nəfərə sertifikatlar təqdim olunub
Layihə
çərçivəsində növbəti mövzumuz
peşə təhsili ilə bağlıdır. Ölkənin
sosial- iqtisadi
inkişafı ilə bağlı müxtəlif sahələrdə
bacarıqlı kadrlara ehtiyac
yaranıb. İnkişaf etmiş
dünya ölkələrinin təcrübəsi
də göstərir ki, peşəsini bilən,
bacarıqlı kadrlar olmadan
iqtisadiyyatın dayanıqlı inkişafını təmin
etmək mümkün deyil.
Azərbaycanda da belə peşəkar kadrların
yetişməsi üçün müxtəlif
sahələr üzrə peşə təhsili müəssisələri
fəaliyyət göstərir.
Son illər bu istiqamətdə atılan addımlardan biri kimi ölkə başçısı tərəfindən “Azərbaycanda Texniki peşə təhsilinin inkişafı üzrə Dövlət Proqramı” təsdiq edilib. Həmçinin Prezident tərəfindən imzalanan “Azərbaycan Respublikasında təhsilin inkişafı üzrə Dövlət Strategiyası” ilə bağlı sərəncamda peşə təhsili ilə bağlı məqam da öz əksini tapıb. Burada göstərilir ki, son illərdə ilk peşə-ixtisas təhsili müəssisələrinin infrastrukturunun inkişafı sahəsində işlər görülüb, özəl sektor, işəgötürənlər və beynəlxalq təşkilatlarla əməkdaşlıq əlaqələri qurulub. Qeyd olunanlara baxmayaraq, bu sahədə həlli vacib olan ciddi problemlər hələ də qalmaqdadır.
İlk peşə-ixtisas təhsili müəssisələrini bitirən şəxslərin sayı iqtisadiyyatın tələbatı ilə üst-üstə düşmür. Son illər ümumi təhsil müəssisələrini bitirən məzunların yalnız 11 faizinin ilk peşə-ixtisas təhsili müəssisələrini seçməsi, ümumilikdə həmin pillədə təhsil alanların cəmi 25-27 min nəfər təşkil etməsi əhalidə ilk peşə-ixtisas təhsilinə marağın aşağı olduğunu göstərir. Məhz bunları nəzərə alaraq strateji hədəflər və tədbirlərdən biri kimi müasir təminatlı peşə-tədris mərkəzlərinin və komplekslərinin yaradılması göstərilir.
Dünən Təhsil Nazirliyinin 5 nömrəli Bakı Peşə Liseyində otelçilik üzrə kursları başa vuran 205 nəfərə sertifikatlar təqdim olunması mərasimi keçirilib. Tədbiri giriş sözü ilə açan təhsil naziri Mikayıl Cabbarov çıxışında bildirib ki, peşə təhsilinin inkişafı prioritet sahələrdən biridir: “Təhsilin inkişafı üzrə Dövlət Strategiyasında peşə təhsilinin inkişafı, bu sahəyə sahibkarların, işəgötürənlərin cəlb olunması nəzərdə tutulub. Bu məsələ ilə əlaqədar olaraq Təhsil Nazirliyi tərəfindən ardıcıl iş aparılır”. M. Cabbarov qeyd edib ki, I Avropa Oyunları Azərbaycanın turizm zonası kimi nüfuzunun artmasına səbəb olacaq: “Xidmət sektorunda beynəlxalq standartlara cavab verən kadrların hazırlanmasına, mövcud heyətin peşəkarlıq səviyyəsinin artırılmasına ehtiyac yaranıb”.
O da vurğulanıb ki, peşə təhsili bütün təhsil sistemində mühüm rola malikdir və onun inkişafı üçün qarşıda bir çox mühüm vəzifələr dayanır: “Bu gün ölkəmiz sürətlə inkişaf edir. Ancaq biz görürük ki, iqtisadiyyatın bəzi sahələri üçün yerli əmək bazarında mütəxəssislər tapmaq mümkün olmur. Həmin sahələr üzrə xarici ölkələrdən peşəkarları dəvət edirik və bununla da ölkədə müvafiq sahələri xarici işçi qüvvəsi tutur. Bütün bu və ya digər məsələlər peşə təhsilinin qarşısında imkan, fürsət və çağırışdır”. Nazir qeyd edib ki, peşə təhsilinin gələcəyi işəgötürənlərlə sıx əlaqədən asılıdır. Onun sözlərinə görə, bu əlaqə olmadan həyata keçirilən iş istənilən səviyyədə səmərəli ola bilməz.
Nazir bildirib ki, peşə təhsili bizim üçün ən vacib prioritetlərdən biridir.
“Abşeron Hotel Group” MMC-nin rəhbəri Mark Harald Ehler isə çıxışında bildirib ki, Təhsil Nazirliyi ilə əldə edilmiş razılaşmaya əsasən, 5 nömrəli Bakı Peşə Liseyində ekspertlər tərəfindən 430 nəfər şagirdə beynəlxalq standartlara uyğun təlimlər keçirilməsi nəzərdə tutulub: “İlkin mərhələdə 220 nəfər təlimlərdə iştirak edib. Tədbirdə qeyd olunub ki, peşə təhsili üzrə ilk dəfə keçirilən bu təlimlərin məqsədi I Avropa Oyunlarının keçirilməsi ərəfəsində Bakıda istifadəyə verilmiş yeni beşulduzlu “Bulvar Hotel” və “İnturist Hotel” mehmanxanaları üçün kadr ehtiyatı yaratmaqdır. Təlim keçənlər həm Avropa Oyunları ərəfəsində istifadəyə verilmiş mehmanxanalarda, həm də “Absheron Hotel Group” MMC-nin tərkibinə daxil olan restoranlar şəbəkəsində işlə təmin olunmaq imkanı əldə edəcəklər”.
Sonda kursu bitirənlərə sertifikatlar
təqdim olunub.
“Özəl sektor da bu
prosesə qoşulmalıdır”
Azərbaycan Turizm və Menecment Universitetinin prorektoru Eldar Aslanov isə bildirdi ki, hətta
sovet dövründə
belə peşə təhsilinin maddi-texniki bazası çox aktual olub: “Aparılan
tədqiqatlara görə,
1970-80-ci illərdə Azərbaycanda
peşə təhsili
elə bir səviyyəyə çatmışdı
ki, ölkənin bütün rayonlarında
peşə məktəbləri
mövcud idi və onların çox yüksək səviyyədə həm
texnoloji parkları, həm də təcrübə bazaları
geniş inkişaf etmişdi. Lakin Sovet İttifaqının
dağılması, sonra
ölkəmizdə baş
verən hadisələr
peşə təhsilinə
dövlətin qayğısını,
diqqətini azaltdı.
Azərbaycan peşə təhsili
arzuolunmaz səviyyəyə
gəlib düşdü.
Bu gün də
ökədə peşə
təhsili və onun maddi- texniki
bazası, xüsusilə
istehsalat-təcrübə bazaları,
məktəblərin özündə
mövcud vəziyyəti
ürəkaçan deyil.
Bu sahədə ölkə
başçısının təsdiq etdiyi Dövlət Proqramı var və bu
proqram çərçivəsində
artıq nümunəvi
işlər var. Məsələn,
bu baxımdan Bakı Turizm Peşə Məktəbi,
eləcə də İsmayıllı, Qəbələ,
Binə qəsəbəsində
istifadəyə verilən
peşə məktəbləri
var ki, bunlar
nümunəvi, pilot peşə
məktəbləridir. Ümid edirəm
ki, bunların sayı ildən-ilə daha da genişlənəcək”.
Prorektorun sözlərinə
görə, ümumiyyətlə
nəinki peşə məktəbində, təhsilin
bütün növlərində
də ixtisas peşə vərdişlərini
formalaşdırmaq çox
vacibdir :
“İxtisas üzrə
hazırlanan kadr müvafiq peşə vərdişlərinə təhsil
aldığı dövrdə
yiyələnmiş olmalıdır.
E.Aslanov deyir ki, həm ATMU, həm də Bakı Turizm Peşə Məktəbinin
qarşısında duran
əsas vəzifələrdən
biri tədrisin keyfiyyətinin artırılmasıdır
və bunun əsas yollarından biri də praktiki
cəhətdən, istehsalat-təcrübi
baxımdan gücləndirilmiş
bir tədris prosesi formalaşdırmaqdır:
“ATMU-nun nəzdində olan
peşə məktəbində
BMT-nin İnkişaf Proqramı ilə birlikdə Mədəniyyət
və Turizm Nazirliyinin dəstəyi ilə Təlim Mərkəzi yaratdıq. Burada turizm üzrə müxtəlif bacarıqları
formalaşdırmaq üçün
təchizat otaqları,
otel otağı, bar, restoran, mətbəx var ki, bunlar
vasitəsilə buradakı
şagirdlər peşə
vərdişlərini mənimsəməyə
başlayırlar. 6 aylıq dərslərin nəzəri hissəsində
bir xidmət zamanı lazım olan peşə vərdişlərini öyrənməyə
başlayırlar”.
Ödənişli peşə təhsili
prosesi ilə bağlı məsələyə
toxunan prorektor deyir ki, peşə
məktəblərində təhsil
haqqı ali
məktəblərə nisbətən
çox azdır: “Bu,
Təhsil Nazirliyi tərəfindən müəyyənləşdirilmiş
vahid cədvəl əsasında aparılır.
Məsələn, Bakı Turizm
Peşə Məktəbində
illik təhsil haqqı 400 manatdır.
Bu şagirdin, onların praktika, istehsalat təcrübəsi
dövründə hazırlanacaq
müxtəlif məhsulların
xərcini ödəmir.
Ancaq dövlət hesabına oxuyan şagirdlər də var, onların
da sayı kifayət qədərdir”.
Bildirildi ki, hər il
orta məktəbi 130 minə yaxın şagird bitirir və onlardan cəmi 25 mini ali təhsilə yönəlir,
yerdə qalan şagirdlərin təhsili
çox düşündürücüdür.
Ölkəmizin inkişafının əsas göstəricilərindən
biri də peşə məktəblərinə
yönələn gənclərin
sayı ilə xarakterizə olunacaq.
Nə qədər peşə təhsilli, peşəkar kadrlar olacaq, o zaman müxtəlif sahələrdə işlər
daha yaxşı gedəcək. Bu mənada görüləcək
işlər çoxdur
və dövlət də əlindən gələni edir. E.Aslanov bildirdi ki, bu prosesdə
görülməsi vacib
olan işlərdən
biri də özəl sektorun bu prosesə qoşulmasıdır: “ Hansılar ki, bu işdə maraqlı olmalıdırlar.
Məsələn, ARDNŞ-nin Peşə
Təhsil Mərkəzi
ki var, o çox gözəl nümunədir. Digər müəssisələr
öz həcmlərinə
uyğun peşə məktəbləri ilə
əməkdaşlıq etməlidirlər.
Əvvəlki dövrdə peşə
məktəblərində oxuyanlar
diplomları ilə zavodda, fabrikdə, kolxozda, sovxozda iş tapırdı. Amma bu peşə məktəblərinin məzunlarının
işlə təmini ilə bağlı proqnoz deyə bilmərəm. Bu yaxınlarda
məşğulluqla bağlı
bir konfransda Baş Məşğulluq
İdarəsinin, TN-in nümayəndələri
orada idi və ortaq rəy
ondan ibarətdi ki, peşə kadrlarının hazırlanmasında
ciddi problemlər də var. Peşə məktəblərinin işçiləri
orta məktəblərə
gedir və çalışırlar ki,
dərsə gəlməyən,
oxumayan uşaqları
peşə məktəblərinə
yönəltsinlər. Motivasiya kimi
də göstərirlər
ki, 20-30 manat təqaüd veriləcək.
Məqsəd plan yerlərini
doldurmaqdır. Belə uşaqlar
da peşə məktəblərinə vaxt
itirməyə gəlir.
Axırda peşə təhsili
nüfuzdan düşür”.
Prorektorun fikrincə, ona görə də bu sahədə
kompleks iş getməlidir. Peşə məktəblərinin cəmiyyətdə keçmiş
nüfuzu onlara qaytarılmalıdır. Bunun üçün
peşə məktəblərindən
də, cəmiyyətdən
də, müvafiq orqanlardan da çox şey asılıdır. Peşə məktəblərinin
inkişafı hamımız-
dövlət, özəl
sektor, vətəndaşlar
üçün də
maraqlıdır.
Nigar Abdullayeva
Palitra.-2015.-10 iyun.-S.11.