“Savadlı mühəndis olmaq üçün BANM-də hər cür imkan yaradılıb”

Prezident təqaüdçüsü Mədinə Şükürlü: “Hər zaman müasir texnologiyaların hazırlanması və onların idarə olunması mənim maraq dairəmdə olub. Elə məhz buna görə də bu ixtisası seçdim”

Müasir dövrdə ölkələrin inkişaf səviyyəsi iqtisadi meyarlarla yanaşı, həm də onun təhsil sistemindəki vəziyyət və mövcud kadr potensialı ilə də ölçülür. Hərtərəfli və davamlı inkişafın etibarlı yolu elm və təhsilə daha çox diqqət və qayğı göstərilməsindən və onun müasir dünya standartlarına uyğun təşkilindən keçir. Məhz buna görə də dünyanın qabaqcıl dövlətləri özlərinin inkişaf səviyyələrini qoruyub saxlamaq və yeni hədəflərə doğru irəliləmək məqsədilə bu sahəyə birinci dərəcəli əhəmiyyət verirlər.

Ölkəmizdə də bu istiqamət hər zaman prioritet olub. Respublikanın inkişaf perspektivləri ictimai-iqtisadi və elmi-mədəni sahələrdə fəaliyyət göstərəcək kadrlar qarşısında müxtəlif dövlət qurumlarında, beynəlxalq təşkilatlarda, eləcə də özəl sektorda çalışaraq Azərbaycanda idarəetmənin, sənayenin, mədəniyyətin, elmin, təhsilin və səhiyyənin müasir standartlara cavab verən yeni bir mərhələyə keçidini təmin etmək vəzifəsini qoyur. Bütün bunlar təhsil ocaqlarında ölkəmiz üçün mütəxəssis hazırlanması zərurətini meydana gətirib. Gənclərin mənəvi inkişafında təhsil mühüm amillərdən biridir. Ölkəmizdə gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər. 2014-cü ildə ölkəmizdə bakalavriat səviyyəsində 100 minə yaxın abituriyentin iştirak etdiyi qəbul imtahanlarında 1727 nəfər abituriyent yüksək nəticə göstərərək 600 və daha yuxarı bal toplayıb. Azərbaycanın ali məktəblərinə daxil olmuş tələbələrə Prezident təqaüdünün verilməsi haqqında Prezidentin 9 sentyabr 2014-cü il sərəncamı ilə qəbul imtahanlarında ən yüksək bal toplamış 102 nəfər Prezident təqaüdünə layiq görülüb. Bu tələbələr sırasında 16 nəfəiməhz Bakı Ali Neft Məktəbinin tələbəsidir. BANM-nın məqsədi müxtəlif enerji sektorları, o cümlədən neft-qaz, kimya və proseslərin avtomatlaşdırılması mühəndisliyi üzrə mühəndislik, texnologiya və dizayn kimi sahələrdə peşəkar ingilis dili biliklərinə və bacarıqlara malik yeni nəsil mühəndis kadrları yetişdirmək məqsədi ilə yüksək ixtisaslı mütəxəssislərin hazırlanmasıdır. Ali məktəbin perspektiv hədəfi isə mühəndislik sahəsində ixtisaslaşmış beynəlxalq səviyyədə tanınan ali təhsil müəssisələrindən birinə çevrilmək və istər yerli, istərsə də əcnəbi tələbələrə dünyanın aparıcı universitetləri ilə birgə əməkdaşlıq çərçivəsində təhsil verə bilməkdir. Layihə çərçivəsində müsahibimiz Bakı Ali Neft Məktəbinin “Proseslərin avtomatlaşdırılması mühəndisliyi`` ixtisasında təhsil alan, Prezident təqaüdçüsü Mədinə Şükürlüdür:

- Mədinə Şükürlü 1997-ci ildə Bərdə şəhərində anadan olub. 2014-cü ildə Bərdə şəhəri Akademik Zərifə Əliyeva adına texniki fənlər təmayüllü məktəb-liseyini bitirib. 2009-cu ildə rayonlararası “Riyaziyyat və məntiq”` olimpiadasında ikinci yerə layiq görülüb, 2010-cu və 2012-ci illərdə isə “Riyaziyyat” olimpiadalarının qalibi olub. 2011-ci ildə “Araz kursları” tərəfindən keçirilmiş bilik yarışında ikinci olub, 2012-ci ildə Qafqaz Universiteti və “Araz kursları”nın birgə təşkil etdiyi “Bilik yarışı”nda birinci dərəcəli diploma layiq görülüb. Mədinə Şükürlü 2014-cü ildə TQDK-nın keçirdiyi qəbul imtahanlarında 690 bal toplayaraq Bakı Ali Neft Məktəbinin “Proseslərin avtomatlaşdırılması mühəndisliyi`` ixtisasına qəbul olub. Prezident təqaüdçüsüdür.

- Mədinə, qəbul imtahanı necə keçmişdi? İmtahandan qabaq və imtahandan sonra hansı təəssüratlarla yadda qalıb?

- Qəbul imtahanından iki-üç gün qabaq və qəbul imtahanı günü bir az həyəcanım var idi. Amma qəbul imtahanında sual kitabçasındakı suallara baxandan sonra həyəcana heç bir səbəb olmadığını gördüm.

- Sınaq imtahanlarında nəticələrin yüksək olub? Qəbul imtahanında yüksək bal toplayacağına inanırdınmı?

- İlk dəfə sınaq imtahanında 9-cu sinifdə iştirak etdim və ilk topladığım bal 425 bal oldu. Bundan sonra qarşıma 600 -dən yuxarı bal toplamağı məqsəd qoydum və 10-cu sinifdə ilk sınaq imtahanında 621 bal topladım. On birinci sinifdə bir çox sınaq imtahanında 650-dən yüksək bal topladım və özümə inamım daha da artdı. Qəbul imtahanında mən də, yaxın ətrafım da imtahanın yaxşı olacağına inanırdıq.

- Səncə, imtahanda 600 baldan yüksək nəticəni göstərmək üçün abituriyent nə etməli və ixtisas seçimini necə etməlidir?

- Mən deyərdim ki, gərək abituriyentlər yaxşı bilmədikləri mövzuları müəyyənləşdirsin və həmin zəif bildikləri mövzuları daha dərindən öyrənməyə çalışsınlar. Bundan başqa, fikrimcə, sınaq imtahanlarında iştirak etmək hər bir abituriyentə öz imkanlarını obyektiv qiymətləndirməyə və məqsədə çatmaq üçün hər bir atılan addıma diqqət yetirməyə kömək olur.

- Niyə məhz bu ixtisası və Bakı Ali Neft Məktəbini seçdin?

- Hər zaman müasir texnologiyaların hazırlanması və onların idarə olunması mənim maraq dairəmdə olub. Elə məhz buna görə də bu ixtisası seçdim. Doqquzuncu sinifdə oxuyarkən ilk dəfə Bakı Ali Neft Məktəbi haqqında məlumat alanda burada tələbələr üçün yaradılan imkanlar, təhsilin ingilis dilində olması, bir il ərzində intensiv olaraq tələbələrə ingilis dili və informasiya-kommunikasiya texnologiyalarının (İKT) tədrisi, eləcə də, tələbələrin xaricə təhsil almaq üçün göndərilməsi mənim BANM-ə marağımı daha da artırdı. Məncə, bütün bunlar gələcəyin savadlı mühəndisi olmaq üçün ən vacib şərtlərdəndir və bunun üçün BANM - də hər cür imkan yaradılıb.

- Deyirlər ki, texniki sahə və mühəndislik peşəsi kişilərə aid sənətdir. Sən bu barədə nə düşünürsən?

- Mən öz ixtisasım haqqında belə fikirləşmirəm, çünki proseslərin avtomatlaşdırılması güc tələb edən sahə deyil, daha çox intellekt tələb edən bir ixtisasdır. Güclü intellekti olan hər bir kəs bu ixtisasın öhdəsindən gələ bilər. Məsələn, BANM-də təhsil alan tələbələrin 30 %-ni qızlar təşkil edir.

- BANM-də ali təhsil almaq arzusunda olan abituriyentlərə nə məsləhət görərdin? Burdakı təhsili necə dəyərləndirirsən?

-BANM tələbəsi olmaq çox çətindir və bura daxil olmaq arzusunda olan hər bir abituriyent çox ciddi hazırlaşmalı və bilməlidir ki, burda oxumaq bura daxil olmaqdan daha çətin və məsuliyyətlidir.

- Özünü gələcəkdə harada görürsən?

- Gələcəkdə yüksək ixtisaslı mütəxəssis olmaq və SOCAR-da çalışaraq, avtomatlaşdırılmış idarəetmə və nəzarət sistemləri vasitəsilə texnologiyaların təhlükəsizliyini təmin etmək arzusundayam.

- Boş vaxtlarında nə ilə məşğul olursan?

- Boş vaxtlarımda bədii kitab oxumağa və çox zaman pianoda ifa etməyə üstünlük verirəm. Çünki musiqi ilə məşğul olmaq dərsdən sonrakı yorğunluğu aradan qaldırmaq üçün ən yaxşı vasitədir.

Nigar Abdullayeva

Palitra.-2015.-11 mart.-S.7.