“Azərbaycan universitetlərinin texniki bazası çox güclüdür”

Adil Rəhimli: “Tələbələrə asan şəkildə xaricdə təcrübə almaları üçün daha çox şərait yaradılmalıdır”

Layihə çərçivəsində Gürcüstan Tibb Universitetinin tələbəsi Adil Rəhimli ilə müsahibəni təqdim edirik.

-Öncə özünüz haqda məlumat vermənizi istərdik.

- 1987-ci ildə Ağdam şəhərində həkim ailəsində doğulmuşam. Tərtər şəhəri, 6 saylı orta məktəbi bitirib 4-cü ixtisas qrupuna imtahan verdim, lakin istədiyim ixtisasa qəbul ola bilmədim. Atamın istəyi isə məni həkim görməkdir. Öncə hərbi xidmətə yollandım. Vətənə olan borcumu başa vurub Gürcüstan Tibb Universitetinə sənəd verdim. Universitetin nəzdində yenidən hazırlıq qrupuna yazıldım. Hazırda diş həkimi ixtisası üzrə 5-ci kurs tələbəsiyəm.

- “Azərbaycan gənclərinin xarici ölkələrdə təhsil almasına dair Dövlət Proqramı”nın rolunu necə qiymətləndirirsiniz?

-Təhsil millətin gələcəyidir. Azərbaycan Respublikası gənclərimizin inkişafında və xaricdə təhsil proqramları çox uğurla yerinə yetirilir. Bildiyimə görə, dünyanın 60-dan çox ölkəsində tələbələrimiz təhsil alır, bu ölkələrdən biri də Gürcüstan Respublikasıdır. Dövlətimiz bir çox ölkələr üçün dövlət proqramları hazırlasa da lakin Gürcüstan üçün bu proqram hələ ki mövcud deyil. Yəqin ki, yaxın gələcəkdə bu məsələ də öz həllini tapar. Gürcüstanda minlərcə azərbaycanlı tələbələr təhsil alır və Azərbaycan Respublikası Dövlət Neft Şirkəti (SOCAR) tərəfindən təhsil ödənişləri edilir. Lakin bu, Gürcüstan vətəndaşları üçün şamildir.

-Gürcüstan tibbi təhsili hansı cəhəti ilə seçilir?

-Gürcüstan tibb universitetlərinin hazırkı vəziyyəti ilə Azərbaycan təhsil sistemi arasında elə də böyük fərq yoxdur. Hər iki dövlətlərin, imtahan-keçid balları 51 xalla hesablanır. Dərs aktivliyi imtahankeçmə balları 31-dir. Dərsliklər arasında amma fərqlər mövcuddur. Məsələn, Azərbaycan dərsliklərində müəlliflərin hamısı həmin universitetin müəllimləridir. Lakin Gürcüstanda xarici ədəbiyyatlara çox üstünlük verilir.

Anatomiya, Biokimya, Fiziologiya, Histologiya, Fizika və s. bunların hamısının müəllifləri xaricilərdir. Azərbaycan tibb kitablarından da istifadə edirəm, lakin nədənsə bizim kitablarda cümlələr çox qəliz qurulur və təəssüf ki, kitablar xarici ədəbiyyatlar kimi tam dolğun deyil.

-Elm və təhsilin inkişafı üçün hansı addımların atılmasına ehtiyac var?

- Tələbələrə asan şəkildə xaricdə təcrübə almaları üçün daha çox şərait yaradılmalıdır. Savadlı müəllimlər dəvət edib təcrübələrinə yiyələnmək lazımdır. Eyni ilə Gürcüstanda Almaniya, ABŞ, Çindən alimlər gəlib dərslər keçirlər. Gürcüstanla müqayisədə Azərbaycanda əcnəbi tələbələr də çox azdır.

-Xaricdə təhsil alan gənclərimizin ölkəmizin müasir tələblərə cavab verən kadr bazasının gücləndirilməsi baxımdan hansı rolu var?

-Xaricdə təhsil alan gənclər dünyəvi bilikləri öyrənməklə yanaşı, beynəlxalq təcrübəyə də yiyələnirlər. Onların ölkəmizə qayıtdıqdan sonra bu öyrəndiklərini praktikada tətbiq etməsi ölkəmizin inkişafına xidmət edəcək. Onlar Azərbaycanın gələcəyi və inkişafı üçün potensial ixtisaslı kadrlardır.

- Sizin ictimai fəaliyyətiniz də varmı?

- Burada Azərbaycanın əlamətdar günləri ilə bağlı tədbirlər keçiririk. Mənim təhsil aldığım universitetdə, eləcə də Gürcüstandakı digər ali təhsil ocaqlarında çoxlu həmyerlilərimiz təhsil alırlar. Bu tələblərlə birgə bir sıra görüş və tədbirlər təşkil edirik. Gürcüstan bizə nə qədər yaxın və qonşu ölkə olsa da yenə də ölkəmizin burda təbliğinin aparılması vacibdir. Gürcüstanda digər xalqların da nümayəndələri də təhsil alır. Biz mütəmadi olaraq onlarla da görüşüb, ölkəmiz haqqında məlumatlar veririk. 25 apreldə Cavaxaşvili Universitetinin 1- ci korpusunda Ağırlıqqaldırma üzrə yarış keçirildi. Azərbaycandan da idmançılar gəlmişdilər. Biz də orada iştirak edib idmançılarımıza mənəvi dəstək olduq.

Bu gün əsasən İlk Avropa Oyunları ilə bağlı təbliğat aparırıq. İstər gürcülərə, istərsə də digər əcnəbi xalqların nümayəndələrinə “Bakı2015”lə bağlı məlumatlar veririk.

-Xaricdəki gənclərə milli özünüdərk hissinin aşılanmasında təhsilin nə kimi rolu var?

-Qloballaşma, informasiya cəmiyyətinin qurulması, mədəniyyətlərarası dialoq prosesləri hər bir xalqın intellektual potensialının artırılmasını zərurətə çevirməkdədir. Eyni zamanda, milli mədəniyyətin qorunması, xaricdə yaşayan və təhsil alan gənc soydaşlarımız arasında milli özünüdərk hissinin aşılanması istiqamətində ən səmərəli yollardan biri elm, təhsil və mədəniyyətə diqqətin artırılmasıdır. Gənc nəslin müasir elmlərə yiyələnməsi, ümumbəşəri dəyərlərə hörmət, eyni zamanda milli-mənəvi dəyərlərə sədaqət ruhunda tərbiyə edilməsi xarici ölkələrdə Azərbaycanın intellektual potensialının yüksəldilməsinə xidmət edir. Gənc nəslin milli kökə, milli-mənəvi dəyərlərə bağlılığının möhkəmləndirilməli, tarixi Vətənlə əlaqələri genişləndirilməlidir. Xaricdəki gənclərimizin təhsil aldıqları və ya yaşadıqları dövlətlərin qanunvericiliyinə, eləcə də beynəlxalq hüquq normalarına uyğun olaraq Azərbaycan tarixinin, mədəniyyətinin, incəsənətinin öyrədilməsi, yerli əhali arasında təbliği istiqamətində səyləri birləşdirilməlidir. Onların bu istiqamətdə qarşılaşdıqları problemlər və vermək istədikləri təkliflər bir toplum halına salınmalıdır.

-Xaricdəki gənclərin vətənlə əlaqələrinin möhkəmləndirilməsi üçün hansı işlər görülməlidir?

-Bu gün Azərbaycan gəncliyi vətənpərvərliyi, dövlətə və xalqa hədsiz sədaqəti, öz fəallığı, intellekti, müasirliyi ilə seçilir. Ümummilli məsələlərin həllində gənclər ön sırada Azərbaycanın maraqlarını müdafiə edir, var qüvvələri ilə ölkəmizin çiçəklənməsinə, tərəqqisinə öz dəyərli töhfələrini verirlər. Dövlətin gənclər siyasətinin başlıca məqsədləri gənclərin hərtərəfli inkişafını təmin etmək, onların sosial problemlərinin həlli və cəmiyyətdə layiqli yer tutması üçün əlverişli şəraiti yaratmaqdır. Bu gün xaricdə təhsil alan və yaşayan gənclərin ictimai-siyasi fəaliyyətini davamlı etmək lazımdır. Xaricdə oxuyan gənclərin potensialları düzgün yönəldilməli, həqiqətlərimizi lazımi formada çatdırmağa təşviq edilməlidir. Elə olmalıdır ki, xaricdə təhsil almağa gedən hər bir gəncimiz bizi bizdən itirməsin. Bu baxımdan gənclərin vətənlə əlaqələri daha da möhkəmləndirilməlidir. Xaricdəki gənclərin öz doğma torpaqlarına bağlanması, onların xaricdə Azərbaycan həqiqətlərini yayma işini daha aktivləşdirməsi üçün layihələr keçirilməlidir.

-Kənardan Azərbaycan təhsilinin inkişafı necə görünür?

-Bu gün Azərbaycan universitetlərinin texniki bazası çox güclüdür. Savadlı kadrlarımız, gənclərimiz çoxdur. Vaqif Şadlinski kimi tibdə öz sözün demiş alimlərimiz Gürcüstan universitetlərində dillər əzbəridir. Tibbi konfranslarda Azərbaycandan doktorlarımız iştirak edir, onların savadlı ilə qürur duyuruq. Savadlı müzakirələr aparılır. Hətta təcrübələrindən belə, yararlanmağa çalışırlar.

-Perspektivdə hansı işləriniz gözlənilir?

- Bu il ali təhsilimi başa vururam. Qarşıda isə məni dövlət imtahanı gözləyir. İmtahanı verib, həkim kimi dövlətimə xidmət göstərəcəm. Sonda fürsətdən istifadə edib Gürcüstanda təhsil almağa gələn gənclərə səslənirəm. Gürcüstanda qiyabi təhsil yoxdur. Çox insan deyə bilər ki, hansısa tanışı burada qiyabi təhsil alır, onlar qeyri-qanuni universitetlərdir. “MİMİ” və “MAUP” Ukrayna filialları adı altında fəaliyyət göstərən bu universitetlərin verdikləri diplomlar da adi kağız parçasından başqa bir şey deyil. Valideynlərin bu məsələdən xəbərdar olmaları vacibdir.

Fuad Hüseynzadə

Palitra.-2015.-2 may.-S.11.