“Builki abituriyentlərin bilik səviyyəsi əvvəlki illərin abituriyentləri ilə eynidir”

İki qrup üzrə müsabiqədə iştirak etmək hüququ olan abituriyentlər də elektron ərizələrində digər abituriyentlər kimi eyni sayda ixtisas adı qeyd edə biləcəklər”

Layihə çərçivəsində növbəti mövzumuzda cari ilin tələbə qəbulu ilə bağlı məsələlər öz əksini tapıb. Qeyd edək ki, bu il Azərbaycanda ali məktəblərə qəbul olmaq üçün I- IV ixtisas qrupları üzrə 87932 nəfər abituriyent sənəd verib.

Tələbə Qəbulu üzrə Dövlət Komissiyasının (TQDK) sədri Məleykə Abbaszadə mətbuat konfransında bildirdi ki, onlardan 54 475-i bu ilin, 33457 nəfər əvvəlki illərin məzunlarıdır. TQDK sədrinin sözlərinə görə, imtahanlarda iştirak edəcək qızların və oğlanların sayı da fərqlidir. Ali məktəblərə sənəd verənlərin 38 810-i qız, 41 552 nəfəri isə oğlan abituriyentlərdir. Cari ilin məzunları arasında oğlanlar Azərbaycan bölməsi üzrə 25 871 nəfər, rus bölməsi üzrə 2 901 nəfərdir. Əvvəlki illərin məzunları arasında Azərbaycan bölməsi üzrə oğlanların sayı 15 681 nəfər, rus bölməsi üzrə 679 nəfərdir. M.Abbaszadə əlavə etdi ki, bu il rus bölməsi üzrə sənəd verən abituriyentlərin sayı 7 570 nəfər təşkil edib. Onlardan 5 669-u bu ilin, 1901-i isə əvvəlki illərin məzunlarıdır. M.Abbaszadə qeyd etdi ki, əvvəlki illərin məzunlarının attestatlarının olub - olmaması barədə TQDK-da məlumat yoxdur: “Onlar da hərbi xidmətə çağırış məsələlərinə görə Sənəd Qəbulu Komissiyalarına müraciət ediblər. Lakin bu il bu sahədə yenilik edilib. Belə ki, Səfərbərlik və Hərbi Xidmətə Çağırış üzrə Dövlət Xidməti tərəfindən elektron baza yaradılıb və TQDK da bu bazaya inteqrasiya olunub”. Onun sözlərinə görə, hərbi xidmətdən möhlət alanların və bunun əsasında ərizələrini özləri təsdiqləmək imkanı olan abituriyentlərin sayı 765 nəfər olub: "Onlardan 501-i elektron formatda bunu təsdiqləyib. İldən-ilə bu say artacaq. Hərbi qulluqdan qayıdanlar barədə məlumat bu bazaya daxil olandan sonra gələcəkdə bu işlər tam avtomatik qaydada həyata keçiriləcək".

"Abituriyent ali məktəblərə 4 qrupdan birinə ərizə veribsə, V qrupa da sənəd vermək hüququ var"

TQDK sədri bildirdi ki, V qrupda cari ilin məzunları buraxılış imtahanlarının nəticələri və qabiliyyət imtahanının nəticəsi əsasında müsabiqəyə buraxılırlar: “Beləliklə, bu ilin məzunları və əvvəlki ilin məzunları da 4 qrupdan birinə ərizə veribsə, V qrupa da ərizə vermək hüququ var. Təbii ki, bu məcburi deyil. Zəruri deyil ki, hamı belə etsin”. Onun sözlərinə görə, orta ixtisas məktəblərinə 11 illik təhsil bazasından qəbul olmaq istəyən cari ilin məzunları imtahan vermədən, buraxılış imtahanlarının nəticələri əsasında bu müsabiqədə iştirak etmək üçün qeydiyyatdan keçməlidirlər. M.Abbaszadə əlavə etdi ki, əvvəlki ilin məzunları isə 3 fəndən- Azərbaycan dili, riyaziyyat və xarici dildən imtahan verəcəklər. Təbii ki, orta ixtisas məktəblərindən başqa, ali məktəblərin qabiliyyət tələb edən ixtisaslarını seçənlər əlavə olaraq, qabiliyyət imtahanı verəcəklər. Bu proses də mayın 5-dən 18-dək aparılacaq: “Onlar hansı qrup üzrə müsabiqədə iştirak edəcəklərinə özləri qərar verəcəklər. İxtisas seçimi vaxtı onlar elektron ərizələrində ixtisaslarını qeyd edəcəklər. Biz abituriyentlərin imkanlarını genişləndirmişik. İki qrup üzrə müsabiqədə iştirak etmək hüququ olan abituriyentlər də elektron ərizələrində digər abituriyentlər kimi eyni sayda ixtisas adı qeyd edə biləcəklər”.

Magistratura pilləsi üzrə 20 yer AMEA-ya veriləcək

Bu il Azərbaycanda ali məktəblərin bakalavr və magistratura pillələri üzrə qəbul planı Azərbaycan Prezidenti yanında Təhsil Komissiyası tərəfindən Tələbə Qəbulu üzrə Dövlət Komissiyasına təqdim olunub. Komissiya sədri ötən həftənin cümə günü onlara təqdim olunan qəbul planı ilə əlaqədar təkliflər haqda müəyyən fikirlərin 1 ay öncə ictimaiyyətə anonslar şəklində çatdırıldığını açıqladı: “Bizim müəyyən təkliflər qəbul olunub. Təkliflər verilərkən qəbul planının ötən illərdə dolma səviyyəsi və ixtisaslara olan maraq nəzərə alınıb. Bəzi ixtisaslar üzrə isə müsabiqənin birgə aparılmasının tərəfdarıyıq. Magistratura və bakalavr pilləsi üzrə müəyyən ixtisaslarda bu təkliflər nəzərə alınıb”. M.Abbaszadə qeyd etdi ki, bu yaxınlarda “Magistr” jurnalının növbəti sayı dərc olunacaq və burada magistraturaya qəbul planında olan dəyişiklər əks olunacaq. Onun sözlərinə görə, artıq 1 ay öncə olan anonslar təkliflərdə öz əksini tapıb: “Belə ki, magistratura pilləsi üzrə 20 yerin AMEA-ya verilməsi qüvvədə qalıb. Bakalavr pilləsi üzrə qəbul planı üzərində iş aparılır. Bu yaxınlarda keçənilki planla müqayisəli təklif təqdim ediləcək”.

Ali məktəblərin V ixtisas qrupu üzrə və 11 illik bazadan orta ixtisas təhsili müəssisələrinə ərizə qəbulu başlanır

Bu gündən Tələbə Qəbulu üzrə Dövlət Komissiyası Azərbaycan Respublikasının ali təhsil müəssisələrinə (V ixtisas qrupu üzrə) və tam orta təhsil bazasında orta ixtisas təhsili müəssisələrinə tələbə qəbulu başlayır. TQDK sədri bildirdi ki, ərizələrin qəbulu mayın 5-dən 18-dək aparılır. Onun sözlərinə görə, ali təhsil müəssisələrinə (V ixtisas qrupu üzrə) və tam orta təhsil bazasında orta ixtisas təhsili müəssisələrinə qəbul olmaq üçün müraciət edən abituriyentlər TQDK-nın müvafiq internet səhifəsinə daxil olub, şəxsiyyəti təsdiq edən sənəddən və TQDK-nın virtual ödəmə kartından istifadə etməklə "Abituriyentin elektron ərizəsi" formasını doldururlar. Virtual ödəmə kartını internet ödəmə xidmətləri vasitəsi ilə və ya 7725 nömrəsinə boş SMS göndərməklə əldə etmək olar.

TQDK sədri qeyd etdi ki, I-IV ixtisas qruplarından hər hansı biri üzrə ərizə verən abituriyentlər, həmçinin V ixtisas qrupuna və ya tam orta təhsil bazasında orta ixtisas təhsili müəssisələrinə ikinci ödəmə kartı almadan elektron ərizə təqdim etməlidirlər: “Tam orta təhsil müəssisələrini cari ildə bitirib V ixtisas qrupu üzrə ali təhsil müəssisələrinə və ya tam orta təhsil bazasında orta ixtisas təhsili müəssisələrinə qəbul olmaq istəyən abituriyentlər müvafiq qəbul imtahanı vermirlər, müsabiqədə buraxılış imtahanındakı nəticələri əsasında iştirak edirlər”.

Ümumi təhsil müəssisələrini (orta məktəbi) 2015-ci ildə bitirən abituriyentlər, orta məktəbi 2012-ci, 2013-cü və 2014-cü illərdə bitirən qız abituriyentlər, ilk-peşə ixtisas təhsili müəssisələrini (peşə məktəblərini) 2013-cü və ondan sonrakı illərdə bitirən qız abituriyentlər, 2012-ci və ondan sonrakı illərdə ali məktəblərə və tam orta təhsil bazasında (11 illik) kolleclərə qəbul olmaq üçün ərizə verib onu təsdiq etdirmiş qız abituriyentlər, I-IV ixtisas qruplarının hər hansı biri üzrə ərizələrinin təsdiqini təmin edib V ixtisas qrupu üzrə və ya tam orta təhsil bazasında (11 illik) kolleclərə də ərizə verən abituriyentlər elektron ərizələrini Sənəd Qəbulu Komissiyalarına (SQK) müraciət etmədən özləri təsdiq edirlər. Digər abituriyentlər tələb olunan sənədləri təqdim etməklə elektron ərizələrini müvafiq SQK-da təsdiqlətdirirlər. SQK-lar mayın 5-dən 18-dək (şənbə, bazar və bayram günləri istisna olmaqla) saat 9-dan 17-dək fəaliyyət göstərir.

Əcnəbilər və vətəndaşlığı olmayan şəxslər (yuxarıda göstərilən kateqoriyalara daxil olan abituriyentlər istisna olmaqla), həmçinin xaricdə təhsil almış Azərbaycan vətəndaşları ərizələrini TQDK-da və onun regional bölmələrində yaradılmış SQK-larda, Gürcüstanda yaşayan azərbaycanlılar ərizələrini Azərbaycan Müəllimlər İnstitutunun Qazax filialında yaradılmış SQK-da təsdiq etdirə bilərlər. Ali və orta ixtisas təhsili müəssisələrinin xüsusi qabiliyyət tələb edən ixtisaslarında təhsil almaq istəyən abituriyentlər elektron ərizələrinin təsdiqini təmin etdikdən sonra mayın 6-dan 19-dək TQDK tərəfindən yaradılmış müvafiq Qabiliyyət İmtahanı Komissiyalarına (QİK) tələb olunan sənədləri və yaradıcılıq fəaliyyətinə dair işləri təqdim etməklə seçmə turda iştirak edirlər. V ixtisas qrupu üzrə ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanında abituriyentlər ana dili (Azərbaycan bölməsinin abituriyentləri Azərbaycan dili, rus bölməsinin abituriyentləri isə rus dili), riyaziyyat və xarici dil fənlərindən test imtahanı verirlər.

TQDK səyyar Sənəd Qəbulu Komissiyaları yaradacaq

Tələbə Qəbulu üzrə Dövlət Komissiyası (TQDK) ümumi orta təhsil bazasında ( 9 illik) orta ixtisas təhsili müəssisələrinə elektron ərizə təqdim edən və həmin ərizələrini Sənəd Qəbulu Komissiyalarında (SQK) təsdiq etdirməli olan abituriyentlərin rahatlığını təmin etmək, onların vaxtlarına və vəsaitlərinə qənaət olunması üçün səyyar SQK-lar yaradacaq. TQDK sədri bildirdi ki, komissiyanın respublikanın müxtəlif bölgələrində yerləşən regional bölmələrinin - (Gəncə, Xaçmaz, Şəki, Lənkəran, Şirvan, Göyçay, Ağcabədi və Naxçıvan) əhatə etdiyi rayonların hər birində bir gün olmaqla səyyar SQK-ları fəaliyyət göstərəcək. Bunun nəticəsində ərizələrini SQK-larda təsdiq etdirməli olan abituriyentlər öz ərizələrini yaşadıqları rayonda yaradılacaq səyyar SQK-da təsdiq etdirə biləcəklər.Səyyar sənəd qəbulu komissiyaları ümumilikdə mayın 5-dən 18-dək fəaliyyət göstərəcək.

“Builki abituriyentlərin bilik səviyyəsi əvvəlki illərin abituriyentləri ilə eynidir”

TQDK sədri bildirdi ki, bu il ali məktəblərə qəbul imtahanlarında iştirak edən şəxslər sınaq imtahanlarında iştirak ediblər: “İndiyədək təxminən 200 minə yaxın şəxs sınaq imtahanlarına qatılıb. İmtahanlar 57 regionda keçirilib". Onun sözlərinə görə, bu il 2074 nəfər virtual sınaq imtahanlarına qatılıb.

TQDK sədri əlavə etdi ki, sınaq imtahanlarında iştirak edənlərdən 42 291-i bu ilin məzunu, 8 mini isə əvvəlki illərin məzunudur: "3 sınaq imtahanının nəticəsinə əsasən, deyə bilərik ki, builki abituriyentlərin bilik səviyyələri əvvəlki illərin abituriyentləri ilə eynidir. Hazırda Azərbaycanda keçirilən sınaq imtahanlarının ümumi nəticələri araşdırılır və işlər yekunlaşdıqdan sonra bu barədə ətraflı məlumat veriləcək”.

Nigar Abdullayeva

Palitra.-2015.-5 may.-S.11.