“Güclü təhsil almamız və Vətənə ixtisaslı kadr kimi dönməmiz vacib şərtdir”

Layihə çərçivəsində növbəti mövzumuz xaricdə təhsillə bağlıdır. Bu gün dünyanın aparıcı universitetlərində yüzlərlə gəncimiz təhsil alır. Bütün bunlar bir daha onu göstərir ki, gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər.

Son 8 ildə Dövlət Proqramı çərçivəsində 3184 azərbaycanlı gənc xaricdə təhsil alıb

“2007-2015-ci illərdə Azərbaycan gənclərinin xaricdə təhsili üzrə” Dövlət Proqramı çərçivəsində bu günə kimi 3184 nəfər xaricdə təhsil alıb.

Proqram çərçivəsində son 2 ildə seçilmiş 572 tələbədən 330 nəfər magistratura, 45 nəfər doktorantura, 65 nəfər dissertantura pilləsində təhsil almaq hüququ qazanıb. Hazırda “2016-2020-ci illərdə Azərbaycan gənclərinin xaricdə təhsil üzrə” yeni Dövlət Proqramının hazırlanması istiqamətində işlər aparılır. Bu layihədə ali təhsil müəssisələri üçün elmi kadrların yetişdirilməsi, ali məktəb müəllimlərinin təcrübə keçmə və ixtisasartırma, professor-müəllim heyətinin mübadiləsinə mühüm yer verilib. Onu da qeyd edək ki, 2014/2015-ci tədris ilinin əvvəlinə xarici ölkələrdə dövlət xətti ilə təhsil alan tələbələrin sayı 2911 nəfər təşkil edib. Xaricdə təhsil alan gənclərin 63,9 faizi Bakı, 36,1 faizi isə Azərbaycanın müxtəlif regionlarında yerləşən məktəblərin məzunlarıdır. Tələbələrin əksəriyyəti Türkiyə, Birləşmiş Krallıq, Almaniya və Rusiyanın ali təhsil müəssisələrində təhsil alır.

Hazırda 2015-2016-cı tədris ili üçün “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”na qəbul üzrə sənəd qəbulu davam edir. Təhsil Nazirliyinin məlumatına görə, 15 aprel tarixindən başlayan sənədlərin qəbulu 15 iyul tarixləri ərzində elektron ərizə vasitəsilə həyata keçiriləcək. Müsabiqədə iştirak üçün müraciətlər şəxsən Təhsil Nazirliyinə gəlməklə və ya sənədləri poçt vasitəsilə nazirliyə göndərməklə deyil, məhz elanın tələblərinə uyğun olaraq elektron qaydada qəbul edilir. Dövlət Proqramı təqaüdçüləri bakalavr pilləsi üzrə 29, magistratura, doktorantura və rezidentura pillələri üzrə 35 yaşınadək olan Azərbaycan vətəndaşları sırasından seçilir. Onu da qeyd edək ki, müsabiqədə əsas üstünlük bakalavrdan sonrakı təhsil səviyyələri üçün I dərəcəli prioritet ixtisas istiqamətləri üzrə müraciət edən iddiaçılara veriləcək. Bakalavr səviyyəsi üzrə müraciət edən iddiaçıların müraciətlərinin qəbulu və seçimi müvafiq qaydalarda nəzərdə tutulmuş tələb əsasında həyata keçiriləcək. Müsabiqənin nəticəsində namizədlikləri müsbət qiymətləndirilən iddiaçıların siyahısı təsdiqlənmək məqsədilə Təhsil üzrə Komissiyaya göndəriləcək, nəticələr Təhsil Nazirliyinə daxil olduqdan sonra “Dövlət Proqramı təqaüdçüsü” adına layiq görülmüş şəxslər dərhal əlaqə vasitələri və eyni zamanda elektron ərizə vasitəsilə məlumatlandırılacaqlar. Sənəd qəbulunun iyulun 15-də başa çatacağını nəzərə alaraq, TQDK-nın bakalavr səviyyəsi üzrə qəbul imtahanlarında (14-25 iyul 2015) iştirak edəcək namizədlər yalnız elektron ərizələrini son sənəd qəbulu tarixinə qədər təsdiqlətdikləri və sözügedən imtahanlarda tələb olunan balı (texniki sahələr üzrə 550-dən, digər sahələr üzrə 600-dən yuxarı) topladıqları təqdirdə, müvafiq bala dair arayışı avqustun 1-dək elektron ərizələrinə əlavə etdikləri halda, qısa zamanda müsahibəyə dəvət ediləcəklər. Qeyd edək ki, prioritet ixtisas istiqamətləri I və II dərəcəli olmaqla müəyyən edilib. Bu il keçiriləcək müsabiqədə əsas üstünlük I dərəcəli ixtisas istiqamətlərinə veriləcək. 2015-2016-cı tədris ili üçün gənclər Dövlət Proqramına yalnız müəyyən olunmuş prioritet ixtisas istiqamətləri üzrə müraciət edə biləcəklər. Eyni zamanda, 2015-2016-cı tədris ili üçün Dövlət Proqramına namizədlərin seçimi prosesində təhsillərini xarici ali təhsil müəssisələrinin magistratura və doktorantura səviyyələrində davam etdirmək istəyən gənclər üstünlüyə malik olacaqlar.

“Hər hansı xarici ölkəyə gedən bir tələbə üçün böyük şanslar yaranır”

Bu gün xaricdə təhsil alan gənclərimiz bu təhsil formasını necə dəyərləndirirlər?

Mersin Universitetinin tələbəsi Nəzakət Eminova bildirdi ki, xaricdə gənclərin təhsilə münasibəti haqqında çox şey demək mümkündür: “Xaricdə oxumağa gedən bir çox tələbə xarici ölkəyə nə üçün gəldiyinin fərqindədir və o tələbə oxumaq, biliyə yiyələnmək üçün əlindən gələni edir. Xüsusilə də yaşadığımız bu zamanda gənclər, tələbələr arasında böyük bir rəqabət mövcuddur. Əvvəllər hər kəs sadəcə Rusiyaya oxumağa gedirdisə, indi artıq gənclərimiz Amerikaya, Avropaya təhsil almağa gedə bilirlər. Bu həqiqəti bilən hər bir tələbə, rəqibləri ilə yarışa bilmək üçün daima çalışmağa, özünü inkişaf etdirməyə çalışır. Hər hansı xarici ölkəyə gedən bir tələbə üçün böyük şanslar yaranır. Tələbələr Avropanın və digər ölkələrin tanınmış şirkətlərində, dövlət orqanlarında staj keçə, müxtəlif ölkələrdə gənclər üçün yaradılmış layihələrdə iştirak etməklə özlərini inkişaf etdirib təcrübə qazana bilərlər. Bu zaman Avropaya və Amerikaya çıxmağa böyük fürsətlər var”. Tələbəlik dövründə çox sayda tədbirdə, layihədə iştirak etdiyini deyən N.Eminova deyir ki, bu tədbirlərdə məsul şəxs olaraq iştirak edib ki, bu da ona böyük təcrübələr qazandırıb: “Mən tələbəlik dövrümdə, hətta Amerikaya getmək fürsəti də tapdım və bu mənə həm gözəl xatirələr, gözəl dostluqlar, həm də çoxlu təcrübəyə sahib olmağa şərait yaratdı”.

“Avropa təhsil sistemini öyrənmək tələbələrimizin analitik düşüncə qabiliyyətini artırır”

Mehmet Akif Ersoy Universitetinin tələbəsi Samir Orucov isə bildirdi ki, ölkə başçısının uğurlu gənclər siyasəti onun məhz daim gənclərin yanında olduğunun bariz nümunəsidir: “Ulu öndər Heydər Əliyev “Təhsil ölkənin gələcəyidir”- deyib. Ümumiyyətlə, xaricdə təhsilə olan ümummilli lider qayğısı bu gün də ölkə başçısı tərəfindən davam etdirilir. Belə ki, azərbaycanlı gənclərin ölkə üçün zəruri ixtisaslar üzrə xaricdə təhsil almalarını və ölkənin inkişafının mühüm amilinə çevrilmələrini təmin etmək məqsədilə “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın təsdiq edilməsi barədə” ölkə başçısı tərəfindən sərəncam imzalanıb. Xarici ölkələrdəki gənclərimiz təhsil almaqla yanaşı, həm də Azərbaycan xalqının təmsilçisi, onun qədim mədəniyyətinin, adət və ənənələrinin təbliğatçılarıdırlar. Biz gənclər də daim ölkəmizin inkişafı naminə çalışmalıyıq və bizim təhsilimizə qoyulan sərmayəni, əziyyəti, ən əsası da inamı boşa çıxarmamalıyıq. Daim ölkəmizin adını dünya səviyyəsində tanıtdırmalıyıq. Ölkəmizdə həm Təhsil Nazirliyinin, həm özəl şirkətlərin, həm də beynəlxalq humanitar təşkilatların xətti ilə xarici ölkələrin aparıcı universitetlərində təhsil alıb ixtisaslı mütəxəssis kimi yetişmək imkanı yaranıb. Ölkə başçımızın gənclərimizə göstərdiyi diqqət, qayğısını və ümumiyyətlə, bu istiqamətdə həyata keçirilən tədbirləri yüksək qiymətləndirirəm. Xaricdə təhsil alan hər bir gənc həmin ölkənin xaricdəki nümayəndəsidir və diasporun məncə, ən əsas aparıcı qüvvəsidir”. S.Orucovun fikrincə, təhsilli bir gənc təhsilsiz və yalnızca o ölkəyə maddi qazanc üçün gedənlərdən daha çox ölkəsini tanıda bilər: “Bu gün ölkəmiz inkişaf edib, sürətli iqtisadi inkişafı göz qabağındadır və yetərincə büdcəsi var. Bu baxımdan ümid edirəm ki, ölkəmizin xaricdəki tələbələrə dəstək olmaq imkanı da var. Ulu öndərimizin dediyi kimi, biz gənclər ölkənin gələcəyiyik. Təbii ki, buna müvafiq olaraq güclü təhsil almamız və Vətənə ixtisaslı bir kadr kimi dönməmiz vacib şərtdir. Azərbaycan təhsili ilə yanaşı, Avropa təhsil sistemini öyrənmək tələbələrimizin analitik düşüncə qabiliyyətini artırır. Müxtəlif mədəniyyətləri öyrənərək onlarla iş birliyində effektiv nailiyyətlər əldə etmək üçün xaricdə təhsil almaq önəmli məsələdir. Məhz bu kimi yollarla dövlətimizi iqtisadi və sosial yöndən daha da güclü edə bilərik. Bu kimi fəaliyyətimizdə bizə yardım göstərdiyi üçün dövlətimizə və şəxsən Prezidentə öz dərin minnətdarlığımı bildirirəm”.

Nigar Abdullayeva

Palitra.-2015.-28 may.-S.13.