“Türkiyədəki azərbaycanlı tələbələr
çox bacarıqlıdırlar”
Cavid Mövsümlü:
“Sadəcə, çox zaman
onlar öz potensiallarını
səmərəli istifadə etmirlər”
Müsahibimiz Türkiyədə ali təhsilini davam etdirən
Cavid Mövsümlüdür.
Fəxrimiz olan bu aktiv gənclə olan
müsahibəni oxuculara təqdim edirik:
-Özünüz
barədə məlumat verərdiniz.
- Mən, Cavid Mövsümlü Elşad oğlu 19 yanvar 1989-cu il Bakıda ziyalı ailəsində anadan olmuşam. Atam hərbçi, anam isə müəllimədir. Təhsilimə 1995-ci ildə 221 saylı orta məktəbdə başladım, 2006-cı ildə isə 116 saylı orta məktəbdən məzun oldum. Məktəb illərində yaxşı oxumaqla yanaşı, musiqi, idman, rəsmlə də məşğul olmuşam. Uşaqlıqdan tarix elminə marağım olduğundan, məktəbi bitirəndə də bu istiqamət üzrə imtahan verdim. 2006-cı ildə Bakı Dövlət Universitetinin Tarix fakültəsinin bakalavriat pilləsinə qəbul oldum. Deyə bilərəm ki, tələbəlik illərim çox fəal keçib. Müxtəlif ictimai tədbirlərdə iştirak etməklə yanaşı özüm də tədbir təşkilatçılarından olurdum. 2009-cu ildə Bakı Dövlət Universitetində Tarix fakültəsi tərəfindən ilin tələbəsi də seçildim. Tələbəlik illərində, hətta, arxeoloji fəaliyyətim də olub. Yay tətillərində Ordubad, Şəmkir kimi tarixi diyarlarımızda arxeoloji ekspedisiyalarda iştirak edirdim. 2010-cu ildə Tarix fakültəsindən fərqlənmə diplomu ilə məzun oldum və eyni ildə Bakı Dövlət Universitetinin Tarix fakültəsinin “Asiya və Afrika ölkələri tarixi” ixtisası üzrə magistratura pilləsinə qəbul oldum. Fəqət akademik möhlət alaraq hərbi xidmətə getdim. 2010-2011-ci illərdə Azərbaycan Dövlət Sərhəd Xidmətində sərhədçi adı ilə xidmət etmək mənə qismət olub. Əsgərlik dönəmində aktiv olmuşam və hərbi xidmətdə fərqləndiyimə görə mənə “Sərhədçi Döş Nişanı” da təqdim olunub. Hərbi xidmətdən döndükdən sonra təhsilimə davam etdim və bu illər ərzində Azərbaycan, Rusiya Federasiyası, Gürcüstan və Türkiyədə gerçəkləşən bir sıra beynəlxalq elmi konfranslarda məruzəçi olaraq çıxış etdim, beynəlxalq dərgilərdə elmi məqalələr yazırdım. 2012-ci ildən Tarix fakültəsində pedaqoji fəaliyyətə də başlayaraq tarixşünaslıq və mənbəşünaslıq fənlərindən Azərbaycan və rus dilində mühazirələr oxumuşam. 2014-cü ildə magistratura pilləsini də fərqlənmə diplomu ilə bitirərək, eyni ildə Türkiyənin paytaxt Ankarada yerləşən Hacettepe Universitetinin Tarix bölümünə doktorantura pilləsinə daxil oldum. Hazırda uğurla təhsilimi davam etdirirəm. Ailəliyəm, bir övladım var.
- Yəqin
Türkiyəni bizə yaxın olan
ölkə kimi sevdiyiniz
üçün burada
təhsilinizi davam etdirməyi seçdiniz?
-Doğrusu, əvvəllər də dəfələrlə xarici ölkələrin nüfuzlu universitetlərində oxumaq üçün fürsətim olub. Amma vətənim Azərbaycanımıza bağlılığım məni xaricdə təhsil almaq fikrindən daşındırmışdı. Xaraktercə elə bir insanam ki, bizim mədəniyyətdən olmayan bir yerdə daimi yaşaya bilmərəm. Magistratura pilləsində oxuduğum dönəmlərdə dəfələrlə qardaş Türkiyə Cümhuriyyətinin elmi konfranslarla bağlı fərqli şəhərlərinə səfərim olurdu, bu ölkənin mədəniyyət, adət-ənənə, din, dil baxımdan Azərbaycandan o qədər də fərqlənmədiyini gördüm və burada yaşaya biləcəyimi anladım. Türkiyədə təhsilimi davam etməyimi bu ölkədə tanış olduğum alim və müəllim dostlarım təkid və dəvət edirdilər. Daha sonra bu dəvəti dəyərləndirərək Türkiyənin xarici vətəndaşlara təqdim etdiyi təqaüd proqramlarından birinə baş vurdum. Elmi göstəricilərim, müsahibəm onları qane etdiyi üçün məni Türkiyənin bir nömrəli universitetlərindən olan Hacettepeyə doktorantura pilləsinə qəbul etdilər. Bu xəbərə ailəm də çox sevinərək mənə dəstək oldu. Zənnimcə, övladlarımızın yaxşı bir vətəndaş kimi yetişmələri üçün valideynlər əllərindən gələni etməlidirlər. Bu sarıdan mən çox şanslıyam. Çünki mən həyatımda bu qədər uğurlara görə atamla anama borcluyam.
Buradakı universitetlər kompyüterləşdirilmiş
zəngin elmi kitabxanaya, laboratoriyalara malikdirlər. Tələbələrin hər sahədə
səmərəli vaxt
keçirmələri üçün
hər cür şərait yaradılıb.
Universitetlər bütöv bir
tələbə şəhərciyini
təşkil edərək
tələbələrini özünə
bağlaya bilib. Burada universitetlər nəzdində
müxtəlif dərnəklər
fəaliyyət göstərir
ki, tələbələr
də özlərinin
seçimi ilə bu dərnəklərə
qatılırlar. Dərnəklərin geniş fəaliyyət göstərməsində universitet
rəhbərlikləri də
maraqlı olduqları
üçün onların
layihələrini dəyərləndirərək,
həyata keçməsinə
imkan daxilində dəstək verir. Gənclərə dəstəyi təkcə
universitetlər tərəfindən
deyil, bələdiyyələr,
bakanlıqlar, dövlət
və qeyri-dövlət
təşkilatları tərəfindən
də verildiyini görə bilərik.
İnsanların yaşam tərzinə
gəldikdə isə
Ankaranın paytaxt olmasından dolayı buranın bir siyasi-elmi elita şəhəri olduğunu
görə bilərik.
Ona görə də bu şəhər
başqa şəhərlərdən
fərqli olaraq iş adamlarının, məmurların və tələbələrin şəhəridir.
-Bir qədər də bu ölkədəki
fəaliyyətiniz, ictimai
aktivliyiniz barədə
danışardınız.
-Nəzərə alsaq ki, mən tam olaraq il
yarımdır ki, Türkiyədə yaşayıram
və bu qısa dönəm olsa da, Azərbaycanımız
adına fəaliyyət
göstərməyə çalışmışam.
Burada fərqli jurnallarda Azərbaycanın tarixini, şəxsiyyətlərini tanıdan
yazılar yayır, fərqli elmi və ictimai tədbirlərə qatılaraq
məruzələrlə çıxış
edirəm. Son dönəmlərdə Türkiyədəki
rəsmilərlə əlaqələrimi
daha da genişləndirməyim
sayəsində yerli dərnəklərlə ortaq
tədbirlər düzənləyirəm.
Təkcə bu son aylarda
bir neçə tədbirlərə imza atmışıq. Məsələn
“Türk dünyasına
yön verən aydınlar” tədbirimizdə
mən Azərbaycan adına Əli
bəy Hüseynzadənin
həyat və fəaliyyətini əks etdirən poster hazırlayaraq
əcnəbi tələbələrə
sözlü olaraq anlatdım. Bundan əlavə “Könüllər
Türkiyə” adlı
başqa bir proqramımızda fərqli
ölkələrdən gəlib,
Ankarada təhsil alan tələbələrlə
Gölbaşı bələdiyyə
başqanının dəvəti
ilə səhər yeməyinə və Mogan gölü ətrafı gəzintiyə
qatıldıq. Bundan başqa
yaxınlarda Türkiyənin
Kültür və Turizm bakanı Yalçın Topçu ilə də xarici tələbələrin
görüşmə proqramına
Azərbaycanı təmsil
etmək üçün
dəvət olunmuşdum.
Oraya milli geyimimizlə qatılaraq geniş bir məruzə ilə çıxış
etdim. Çıxışım zamanı Ankarada
yaxın zamanlarda “Azərbaycan Kültür Gecəsinin” keçirilməsi
üçün təşkilati
dəstək istədim
və bakanlıq tərəfindən istəyim
qəbul edildi. Bu tədbiri də
çox yaxın zamanlarda yüksək səviyyədə keçirməyi
planlaşdırıram. Bir həftə öncə isə Türkiyədə fəaliyyət
göstərən “Yerli
düşüncə” dərnəyində
“Azərbaycan çay
süfrəsi” adlı
bir tədbir düzənləmişəm. Bu
tədbirə Türkiyə
mədəniyyət və
turizm naziri, TBMM-nin millət vəkili, başqa rəsmilər, fərqli ölkələrdən olan
tələbələr və
eləcə də azərbaycanlı tələbələr
qonaq gəlmişdilər.
Tədbirdə valideynlərimin göndərdiyi
Azərbaycan çayı
və şirniyyatları
qonaqlara təqdim edildi. Bundan başqa tədbirdə slayd görüntülərlə
Azərbaycanın tarixi,
mədəniyyəti, coğrafiyası,
tanınmış şəxsiyyətləri
və s. haqqında çıxış edərək
qonaqlara tanıtmışdım.
Hər sahədə Azərbaycanı
tanıtdırmağa çalışdığım
üçün bu həftə sonu Çubuk bələdiyyəsində
gerçəkləşəcək futbol çempionatında azərbaycanlı tələbələrdən
ibarət bir komanda quraraq bu yarışmaya da qatılmışıq.
Güman
edirəm ki, qəzetinizin növbəti
sayında qələbə
xəbəri ilə təkrarən yer alacayıq. Ümumilikdə
irəlidə planlaşdırdığım
bir sıra layihələr var. Bunlara Ankarada gerçəkləşəcək
kitab sərgisinə Azərbaycan guşəsi olaraq qatılmaq, Hacettepe Universitetinin Tarix bölümündə
Azərbaycanın tanıtım
gününü keçirmək,
Xocalı və 20 yanvar faciələrinin anım gününü düzənləmək də
daxildir. Zamanla bunları uğurlu
təşkil etməyə
çalışacağam. Təbii ki, bu kimi işlərdə
yardıma ehtiyacımız
olur və bu işdə Azərbaycanın Türkiyədəki
səfirliyi, eyni zamanda Ankaradakı Azərbaycan dərnəkləri
yaxından kömək
etsələr, daha da keyfiyyətli iş görə bilərik. Amma hər çətinliyə
rəğmən Azərbaycan
adına gördüyüm işlərdən
sadəcə zövq alır və işimə davam edirəm.
- Azərbaycanlı tələbələr
aktivdirlərmi? Ümumiyyətlə, soydaşlarımızın oradakı
fəaliyyəti barədə
də söz açardınız.
- Ankarada say etibarilə,
azərbaycanlı tələbələr
çoxdur. Amma bu o demək
deyil ki, hamı burada Azərbaycanı hər sahədə təbliğ
etməyə çalışır.
Çox
zaman gənclərin passiv həyat tərzi sürdüklərinin
də şahidi oluram. Təbii ki, bu yaxşı hal deyil. Onları ictimai-elmi işlərdə
aktiv olmağa dəvət edirəm.
Çünki aktiv fəaliyyətdə
olmaq onların özlərinə bir şəxsiyyət kimi formalaşmalarında, həyat
təcrübəsi qazanmaqda
böyük köməyi
olur. Dediyim kimi, sayca çox
olsaq da, çox zaman iş görmək üçün bir araya gələ bilmirik. Ən böyük qüsurumuz
da elə budur. Tələbələrdən
başqa Ankarada fəaliyyət göstərən
iş adamları soydaşlarımız da
var. Çox sayda həkim, müəllim, incəsənət xadimi,
elm adamı və s. azərbaycanlılar var. Təbii
ki, onların hər birinin uğuru bizim baş ucalığımızdır.
Ümumilikdə götürdükdə, azərbaycanlı tələbələr
çox bacarıqlıdırlar,
sadəcə, çox
zaman onlar öz potensiallarını
düzgün və ya səmərəli istifadə etmirlər.
- Oradakı gənclərimizin bir qədər passiv olduğunu dediniz. Bəs Azərbaycan gəncliyinin hazırkı durumunu necə xarakterizə edərdiniz?
- Az da olsa, pedaqoji fəaliyyətim zamanı bizim tələbələrin psixologiyasına diqqət yetirməyə çalışırdım. Təbii ki, hər kəs eyni deyil və hər kəs fərqli ailədən fərqli psixika ilə sinfə gəlir. Hər zaman tələbələrimlə müəllim– tələbə münasibətini qorumaq şərti ilə dost da olmağa çalışırdım. Zənnimcə, pis alınmırdı. Amma bəzən elə tələbələr olurdu ki, onlar heç bir şeyə məhəl qoymadan nəinki müəllimə, hətta tələbə yoldaşlarına qarşı belə hörmətsizlik edirdilər. Bu kimi hallar başqa tələbələrin də psixologiyasına mənfi təsir göstərirdi. Təbii ki, mənim dərs verdiyim siniflərdə belə hallara yol verilmirdi. Çünki mənim də bu kimi halların qarşısını almaq üçün öz psixoloji metodlarım var idi, hansılar ki, işə yarayırdı. Ümumilikdə mən hər zaman söyləmişəm ki, Azərbaycan gəncliyi çox zəkalı olur, sadəcə bu gəncliyi düzgün istiqamətləndirmək lazımdır. Əgər ata evdə oğluna “universitetə qəbul olsan sənə maşın alacam” deyirsə, bu psixologiya ilə Azərbaycan gənci ancaq və ancaq uçuruma yuvarlanacaq. Nikbin ruhlu bir insan olduğum üçün Azərbaycanda aparılan islahatlar nəticəsində təhsilimizin də yüksələcəyinə və gənclərimizin daha yaxşı təhsil alma imkanına malik olacaqlarına inanıram. Diqqətiniz üçün təşəkkür edirəm.
Tural TAĞIYEV
Palitra.-2015.-27 noyabr.-S.6.