“Nüfuzlu beynəlxalq maliyyə institutları Azərbaycanın iqtisadi inkişafını təsdiq edir”

Professor Fikrət Yusifov:

“Prezidentin son günlərdə imzaladığı yeni fərmanlar və qəbul etdiyi başqa qərarlar ölkədə sahibkarlığın inkişafına əngəl

ola biləcək hər bir məqama “yox” dedi”

Dünya Bankı bügünlərdə “Doing Business 2016: Tənzimləyici sahədə Keyfiyyət və Səmərəliliyin Qiymətləndirilməsi Hesabatı”nı açıqlayıb. Avropa və Mərkəzi Asiyada biznesin inkişafı sahəsində mühüm addımların atıldığının qeyd olunduğu hesabatda Azərbaycan öz göstəriciləri ilə bir çox ölkələri üstələyib.

Dünya Bankının qiymətləndirmələrinə görə, Azərbaycan ötən il olduğu kimi, 189 ölkə arasında 63-cü yerdə qərarlaşıb. Hesabatda islahat standartında Azərbaycanın mövqeyinin yaxşılaşması əsasən biznesə başlama, tikinti üçün icazələrin alınması və xırda investorların müdafiəsi kimi üç sahədə apardığı islahatlarla izah olunur. Başqa sözlə, Azərbaycan dünyada 3 və daha artıq islahatı həyata keçirmiş 26 ölkə arasında yer alır. Bu, dünya ölkələrinin yalnız 14 faizi deməkdir. Hesabatda vurğulanıb ki, biznesə başlama sahəsində islahatlarda Azərbaycan korporativ möhürlərin istifadəsi ilə bağlı tələbi ləğv etməklə biznesə başlamanı asanlaşdırıb. Nəticədə biznesə başlama müddəti ötən il Norveçlə müqayisədə daha az - 5 gündən 3 günə qədər azalıb. Azərbaycan layihə sənədlərinin ilkin təsdiqlənməsini həyata keçirmək üçün vahid pəncərə sistemini formalaşdırmaqla tikintiyə icazələrin verilməsini daha da asanlaşdırıb. Nəticədə, anbarların tikintisi üzrə prosedurların sayı 24-dən 18-ə qədər azaldılıb. Həmçinin əmlakın qeydiyyatı sahəsində Azərbaycanın 189 ölkə arasında 7-ci yerdə qərarlaşaraq qabaqcıl təcrübəni tətbiq etdiyi qeyd olunub. Ümumiyyətlə, son vaxtlar bir sıra beynəlxalq təşkilatların hesabatlarında Azərbaycanla bağlı yüksək göstəricilər öz əksini tapır. Bu göstəricilər həqiqətən də ölkəmizdə iqtisadi inkişafın göstəricisi kimi qiymətləndirilir.

Bugünlərdə Prezident İlham Əliyev öz çıxışında bunu bir daha qeyd edib: “Biz son illər ərzində apardığımız iqtisadi islahatlar, düşünülmüş siyasət nəticəsində iqtisadi imkanlarımızı böyük dərəcədə artıra bilmişik. Bu gün Azərbaycan iqtisadiyyatı dünya miqyasında bir nümunə kimi göstərilir, hətta böhranlı illərdə bizim iqtisadiyyatımız artır, bu il də artacaqdır. Son illər ərzində iqtisadi inkişaf templərinə görə dünyada bizə bərabər ikinci ölkə yoxdur. Vaxtilə paxıllar, bəzi dairələr, bizim işimizə kölgə salmaq istəyənlər uğurlarımızı neftlə bağlayırdılar. İndi neftin qiyməti iki dəfədən də aşağı düşüb, amma biz yenə də inkişaf edirik, yenə də nümunə göstəririk. Bu ilin 9 ayında Azərbaycanda qeyri-neft sənayesi 10 faizdən çox artıb. Ümumi daxili məhsul təxminən 4 faiz, qeyri-neft sektoru təxminən 6 faiz artıb”.

Mütəxəssislərimiz də bu göstəricilərin real olduğunu təsdiq edirlər. “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifov bildirdi ki, 184 dövlətin üzv olduğu və 100-dən artıq ölkədə rəsmi nümayəndəliyi olan Dünya Bankı kimi nüfuzlu bir beynəlxalq maliyyə institutu 189 ölkənin biznes mühitini qiymətləndirdiyi hesabatda Azərbaycanın mövqeyini 17 pillə yaxşılaşdıraraq 80-ci yerdən 63-cü yerə yüksəldib: “Bu o deməkdir ki, hökumət öz iqtisadi strategiyasını o qədər uğurla qura bilib ki, dünyanı iqtisadi, maliyyə təlatümləri ciddi şəkildə silkələdiyi bir dönəmdə neftdən gəlirlərinin 2 dəfəyə qədər azalmasına baxmayaraq Azərbaycan cari ilin 9 ayı ərzində 3,7 faiz iqtisadi artıma (Beynəlxalq Valyuta Fondunun hesablamalarına əsasən cari ilin yekunları üzrə Azərbaycanda iqtisadi artım 4 faiz gözlənilir) nail ola bilib. Bu artım bütövlükdə qeyri-neft sektorunun hesabına təmin edilmişdi. Çoxlarına möcüzə kimi görünsə də, bu reallıqdır və hər kəs onu olduğu kimi qəbul etmək məcburiyyətindədir. Nüfuzlu beynəlxalq maliyyə institutlarının da təsdiq etdiyi bu faktı Azərbaycanda hökumətin bütün pozitiv addımlarını qara rəngdə görənlər də heç bir formada inkar edə bilməyəcəklər. Onlara indi başqa rənglər axtarmaq lazımdır”.

Dünya Bankı tərəfindən hazırlanaraq 2015-ci ilin oktyabrın 27-də açıqlanan biznes mühitinin əlverişliliyi üzrə qiymətləndirməni özündə əks etdirən "Doing Business 2016" hesabatında Azərbaycanda əsasən biznesə başlama, tikinti üçün icazələrin alınması və kiçik investorların maraqlarının qorunması üzrə biznes mühitinin yaxşılaşdırılması sahəsində aparılan islahatlar xüsusi yer tutduğunu deyən mütəxəssisin sözlərinə görə, hesabatda ölkəmiz biznesə başlamaq yolunda biznesin qeydiyyatını sadələşdirmək sahəsində dünyanın ilk onluğuna daxil olaraq Almaniya və İsveç kimi ən yaxşı təcrübəyə malik olan ölkələrlə bir sırada dayanıb: “Prezidentin 3 mart 2014-cü il tarixdə qəbul etdiyi "Sahibkarlığın inkişafı ilə bağlı əlavə tədbirlər haqqında" Fərmanı belə uğurlu nəticənin əldə olunmasında xüsusi rol oynayıb. Həmin fərmanla sahibkarlıq subyektlərinin elektron qeydiyyatı, xarici ticarət əməliyyatlarının aparılması, daşınmaz əmlaka hüquqların qeydiyyatı, tikintiyə icazələrin verilməsi, korporativ idarəetmənin təkmilləşdirilməsi, investorların maraqlarının qorunması və müflisləşmə üzrə qanunvericiliyə müvafiq dəyişikliklərin edilməsi qərara alınmışdı. Azərbaycan hökuməti iqtisadi islahatlar kursunu cari 2015-ci ildə daha da intensivləsdirdi. Prezidentin son günlərdə imzaladığı yeni fərmanlar və qəbul etdiyi başqa qərarlar ölkədə sahibkarlığın inkişafına əngəl ola biləcək hər bir məqama “yox” dedi. Atılan bu addımlar daxildə iqtisadiyyatın şaxələndirilməsinə çox böyük təkan verməklə, beynəlxalq aləmdə Azərbaycanın nüfuzunun yüksəlməsinə və bundan sonra beynəlxalq təşkilatların müvafiq hesabatlarında onun daha yaxşı yerlər tutmasına gətirib çıxaracaq”.

Nigar Abdullayeva

Palitra.-2015.-30 oktyabr.-S.5.