“Bu il də qeyri-neft
sektorunda artım olacaq”
“Azərbaycan iqtisadiyyatı neftin qiymətinin
azalmasına hazır idi”
Azərbaycan dövləti hər
zaman çalışır ki, dünyada baş verən
iqtisadi-siyasi problemlərdən özünü qorusun. Hazırda neft qiymətlərinin aşağı enməsi
fonunda Azərbaycan bu problemdən də qorunmağı
bacarır. Prezident İlham Əliyevin sədrliyi ilə
sentyabrın 8-də keçirilən müşavirədə
dövlət başçısı
çıxışında bu məsələyə də
toxunub: “Dünyada cərəyan edən son hadisələr Azərbaycanda
uğurlu və həyati qabiliyyətli siyasi və iqtisadi
modelin olduğunu göstərdi. Neft qiymətlərinin kəskin
şəkildə aşağı düşməsinə
baxmayaraq, Azərbaycan iqtisadiyyatında artım tendensiyası
dəyişməyib. Bu artım daha çox
qeyri-neft sektorunun hesabına təmin edilib”.
“Azərbaycan iqtisadiyyatın
böyümə tempinə görə MDB-də ilk yeri tutub”
İqtisadi
və Sosial İnkişaf Mərkəzinin sədri Vüqar
Bayramov qəzetimizə açıqlamasında bildirdi ki,
dövlət başçısının müşavirədəki
çıxışını neftin dünya bazar qiymətinin
aşağı olduğu dövrdə hökumət
üçün strategiya kimi də qiymətləndirilməlidir:
“ Azərbaycan Prezidentini qeyd etdiyi kimi, son illər Azərbaycan
iqtisadiyyatında aparılan uğurlu siyasət, dövlət
rezervlərinin həcminin qorunub saxlanılması hədəfləri
ölkəmizin neftin dünya bazar qiymətinin
aşağı olduğu və qlobal çətinliklərin
mövcud olduğu dövrə böhransız və heç
bir iqtisadi çətinlik olmadan daxil olmasına imkan verdi. Son müşavirədə qeyd olunduğu kimi, Azərbaycan
hətta neftin dünya bazar qiyməti aşağı olan
dövrdə də Ümumi Daxili Məhsulda (ÜDM) artım
dinamikasını qoruyub saxlaya bildi. Qeyd edək
ki, ÜDM son on ildə ölkə iqtisadiyatının 7 dəfədən
artıq böyüdüyünü göstərir. Bu müddət ərzində adambaşına
düşən ÜDM isə təxminən 6.7 dəfə
artıb. Yeri gəlmişkən, qeyd etmək
lazımdır ki, müqayisə dövrü ərzində Ermənistan
və Gürcüstan iqtisadiyatı oxşar olaraq 3.6 dəfə
artıb. MDB-nin ikinci güclü
iqtisadiyyatı hesab edilən Qazağıstanda isə
müvafiq göstərici 6 dəfəyə yaxın olub.
Göründüyü kimi, Azərbaycan
iqtisadiyyatı böyümə tempinə görə digər
Qafqaz ölkələrini təxminən iki dəfə
qabaqlayıb, həmçinin MDB-də ilk yeri tutub. Bundan başqa, bəhs etdiyimiz dövr ərzində
iqtisadi böyüməni şərtləndirən amillərin
də diversiyası baş verib. Belə ki,
əgər 2003-2008-ci illərdəki böyüməyə səbəb
neft sektorununda baş verən hasilat artımı idisə,
2008-2013-cü illərdə ÜDM-in artımında qeyri-neft
sektoru aparıcı rol oynayıb və 2010-cu ildən
başlayaraq neft sektorundakı kiçilməyə baxmayaraq,
ölkə iqtisadiyyatı artım tempini qoruyub. Buradan çıxarılan nəticə, Azərbaycanın,
neft gəlirlərindən səmərəli istifadə edərək
iqtisadiyyatın şaxələndirilməsi istiqamətində
apardığı işlərin uğurlu nəticə verməsidir.
Bir sözlə, ötən on il ərzində
iqtisadi artımın neft amilindən
asılılığı minimuma endirilib, daha cox bazar
konyunkturuna uyğunlaşdırılmış istehsal
mühiti formalaşdırılıb”.
Vüqar
Bayramova görə, neft gəlirləri əsasında
formalaşdırılan mövcud infrastruktur məhz neftsiz
iqtisadiyyatımız üçün iqtisadi zəmin
formalaşdıracaq: “Son müşavirədə qeyd edilən
fikirlər bir daha təsdiq edir ki, Azərbaycan
iqtisadiyyatının, o cümlədən qeyri-neft sektorunun
inkişafı ölkə Prezidentinin siyasi iradəsi nəticəsində
aparılan iqtisadi islahatların nəticəsidir. Həmçinin ölkənin iqtisadi gələcəyinin
qeyri-neft sektoruna bağlı olması prioritet
götürülərək bu sahədə ciddi infrastruktur
işləri həyata keçirilib, yüksək investisiya
mühiti formalaşdırılıb. Digər
tərəfdən isə qanunvericilik bazası zamanın tələbinə
uyğunlaşdırılıb, normal bazar münasibətlərinin
formalaşmasında və azad rəqabətin təmin edilməsində
ciddi nəticələr əldə edilib”.
“Azərbaycan vətəndaşları
qlobal böhranın təsirlərini hiss etmirlər”
Onun
fikrincə, Azərbaycan iqtisadiyyatı neftin dünya bazar qiymətinin
azalmasına hazır idi: “Qlobal və regional çətinliklərə
və neftin dünya bazar qiymətinin aşağı
düşməsinə baxmayaraq, Azərbaycan vətəndaşları
qlobal böhranın təsirlərini hiss etmirlər. İqtisadiyyatın maliyyə
dayanıqlığı və xarici sərmayənin ölkəyə
cəlb edilməsi baxımından dövlətin valyuta
ehtiyatlarının həcmi ciddi əhəmiyyətə
malikdir. Məhz bu səbəbdəndir ki,
Azərbaycan hökuməti valyuta ehtiyatlarının
artırılması siyasətinin davamlılığını
təmin edib. Nəticədə Azərbaycanın strateji
valyuta ehtiyatlarının həcmi 2003-cü ildə 1,6 milyard ABŞ dolları olduğu halda, ötən
illər ərzində təxminən 30 dəfə artıb. Hazırda ölkənin strateji valyuta ehtiyatları
ÜDM -in 70 faizinə bərabərdir. Halbuki
2003-cü ildə müvafiq göstərici cəmi 22 faiz idi.
Həmçinin qeyd etmək lazımdır ki,
ölkəmizin valyuta ehtiyatları onun xarici borcundan 8 dəfə
çoxdur. Bu isə Azərbaycanın
böhrana qarşı xüsusi resepti kimi də qiymətləndirilməlidir.
Sözügedən göstəricilər üzrə
MDB-də heç bir ölkə Azərbaycan ilə rəqabətə
girmir. Azərbaycanda xarici borcların ÜDM-də
payının az olması ölkənin
iqtisadi təhlükəsizliyi baxımından olduqca əhəmiyyətli
məqamdır. Aydındır ki, strateji valyuta
ehtiyatı nə qədər çox olarsa, əlbəttə,
ölkəmizin maliyyə dayanıqlığı və xarici
investisiyaların cəlb edilməsində etibarlı tərəfdaş
statusu güclənir. Həmçinin
ölkəmizin müharibə şəraitində olması
valyuta ehtiyatlarının əhəmiyyətini artırır.
Valyuta ehtiyatlarının artım dinamikasına
diqqət etdikdə görmək olar ki, 2011-2014-ci illərdə
neft hasilatının azalmasına baxmayaraq, bu sahədə
artım davam edib. Bu isə onu deməyə
əsas verir ki, Azərbaycan praktik olaraq hətta neftin dünya
bazar qiyməti yüksək olan illərdə belə postneft
dövrünə hazır olub. Məhz bu
baxımdan da nəinki regionda, hətta Avropa və
dünyanın ikinci ən böyük iqtisadiyyatına malik
olan Çində belə, böhranın müşahidə
edilməsinə baxmayaraq, vətəndaşlarımız bunu
hiss etmirlər”.
Vüqar
Bayramov bildirdi ki, ümumilikdə isə son on ildə hökumət
müəyyən etdiyi iqtisadi hədəflərə doğru
uğurlu yol qət edib: “ Ölkənin rəqabətliliyi
gücləndirilib, yoxsulluq 45 faizdən 5,2 faizədək
azaldılmış, faktiki işsizlik səviyyəsi 6 faizə
enmiş, əhalinin gəlirləri 6 dəfə, xarici ticarət
dövriyyəsi 6,4 dəfə, strateji valyuta ehtiyatları 30 dəfə,
dövlət büdcəsi 15 dəfə artmış,
iqtisadiyyata yönəldilən daxili və xarici
investisiyanın həcmi müstəqillik dönəmində
baş vermiş ümumi qoyuluşların 89 faizinə bərabər
olmuşdur. Neft sektorundan əldə edilən gəlirlərin
səmərəli və məqsədli istifadəsi təmin
edilib. Bir sözlə, ötən on il ərzində
ölkə iqtisadiyyatının inkişaf etdirilməsi məqsədilə
kompleks yanaşma ortaya qoyulmuş, Azərbaycan iqtisadiyyatı
uzunmüddətli depressiya dövründən sonra ciddi
inkişaf yolu keçərək neftin dünya bazar qiymətinin
azalmasına tam hazır olub”.
İqtisadi
diversifikasiyanın prioritet olduğunu deyən həmsöhbətimizin
sözlərinə görə, Azərbaycanda neftsiz
iqtisadiyyatın dəyərləndirilməsi ilə
bağlı bir sıra yerli və xarici ekspertlərin
yanlış və qərəzli fikirlərinə baxmayaraq,
son proseslər bir daha təsdiq etdi ki,
ölkəmiz neftin dünya bazar qiyməti aşağı
olduğu dövrdə də inkişaf tempini qoruyub saxlamaq
imkanlarına malikdir: “2015-ci ilin ötən dövründə
müşahidə edilən iqtisadi artım bunu bir daha təsdiq
edir. Əgər 2010-cu ildə Ümumi Daxili Məhsulda
(ÜDM) qeyri-neft sektorunun payı 49 faiz idisə, cəmi 4 il
sonra bu göstərici 68 faizədək yüksəldi. Bu onu göstərir ki, ölkəmizdə qeyri-neft
sektorunun inkişafı ilə bağlı nəinki
ölçülə bilən hədəflər müəyyənləşdirilib,
eyni zamanda iqtisadi diversifikasiya hər zaman dövlət
başçısının diqqətində olub”.
“Qeyri-neft
sektorunun büdcədəki payında əvvəlki ilə
nisbətən artım müşahidə ediləcək”
Ekspertin
proqnozuna görə, qeyri-neft sektorunda mövcud artım
tempinin qorunub saxlanması, aparılan iqtisadi islahatlar yaxın zamanlarda
Azərbaycanda neftsiz və dayanıqlı inkişaf edən
şaxələnmiş iqtisadiyyatın formalaşmasına
imkan verəcək: “Bu il də qeyri-neft sektorunun büdcədəki
payında əvvəlki ilə nisbətən artım
müşahidə ediləcək. Əgər 2013-cü ildə
qeyri-neft sektorunun payı 26, 2014-cü ildə 34 faiz olubsa, gələn
il 35 faizə çatdırılması
proqnozlaşdırılır. Bu, o deməkdir
ki, son 2 ildə dövlət büdcəsində qeyri-neft
sektorunun payı təxminən 10 faiz bənd artıb. İqtisadiyyatda və eləcə də büdcə
gəlirlərinin formalaşmasında enerji sektorundan
asıllılığın aradan qaldırılması
baxımından bu, kifayət qədər əhəmiyyətli
faktdır. 2015-ci ilin gəlirlərinin
strukturunda vergidaxilolmalarının həcmi də artacaq.
Vergidaxilomalarının 68 faizə yaxını
qeyri-neft sektorunun payına düşəcək. Bu da gəlirlərin strukturunun şaxələndirilməsi
baxımından əhəmiyyətlidir. Eyni
zamanda, 2015-ci ildə qeyri-neft daxilolmaların həcmi 512 milyon
manat və ya bu ilin proqnoz göstəriciləri ilə
müqayisədə 11.9 faiz artacaq. Bu,
ötən ilin müvafiq göstəricisi ilə müqayisədə
1 milyard 48 milyon manat və ya 27.8 faiz çoxdur. Büdcə gəlirlərinin diversifikasiyası, eyni
zamanda özünü Ümumi Daxili Məhsulda (ÜDM)
qeyri-neft sektorunun payının artmasında göstərir.
Belə ki, gələn il qeyri-neft sektorunun ÜDM-də
payı 65,1 faizədək yüksələcək
ki, bu da 2014-cü ilin göstəriciləri ilə müqayisədə
5.5 faiz-bənd, 2013-cü ilin faktiki göstəriciləri ilə
müqayisədə 8.5 faiz- bənd çoxdur. Buna
paralel olaraq, özəl sektorun ÜDM-də payı 83 faizədək
yüksələcək. ÜDM-in
strukturunda həm sənaye, həm də qeyri-neft sənayesinin
payında artımlar proqnozlaşdırılır”.
İSİM
sədri dedi ki, bir sıra xarici və yerli “qara piar”
qurumlarının qərəzli açıqlamalarına
baxmayaraq, neftsiz iqtisadiyyatımız kifayət
qədər potensiala malik olmasını rəqəmlər də
təsdiq edir: “Azərbaycanın qeyri-neft iqtisadiyyatının
həcmi 51.2 milyard dollardır. Belə ki, Dünya
Bankının məlumatına görə, 2014-cü ildə
Ümumi Daxili Məhsul (ÜDM) Azərbaycanda 75.2,
Gürcüstanda 16.5, Ermənistanda isə 10.8 milyard dollar
olub. Ölkəmizdə qeyri-neft sektorunun ÜDM-də
payının 68 faiz olduğunu nəzərə alsaq, o zaman Azərbaycanın
neftdən kənar iqtisadiyyatı Gürcüstan
iqtisadiyyatından 3.1 dəfə, Ermənistan
iqtisadiyyatından 5 dəfə çoxdur. Deməli,
Ermənistan iqtisadiyyatından 5 dəfə çox olan neftsiz
iqtisadiyyatımız eyni zamanda qonşu ölkələrdən
fərqli olaraq daha çox inkişaf etmiş infrastrukturun
formalaşdırılmasına şərait yaradıb. İnfrastrukturun inkişaf etməsi isə Davos
Dünya İqtisadi Forumunun son hesabatında Azərbaycanın
MDB-də ən rəqabətqabiliyyətli iqtisadiyyata malik olan
ölkəyə çevrilməsinə gətirib
çıxarıb. Ölkə Prezidentinin
neftdən kənar iqtisadiyyatın formalaşması ilə
bağlı bəyanatı isə sadəcə neftdən
asılılığı aradan qaldırmayacaq, eyni zamanda
ölkəmizin rəqabətqabiliyyətini yüksəlməsinə
səbəb olacaq. İqtisadiyyatın
mövcud vəziyyəti strelizasiya islahataların mərhələli
və səmərəli şəkildə aparılmasına
imkan yaradacaq. Deməli, iqtisadi diversifikasiya
ilə bağlı hədəflər artıq
reallaşdırılmaqdadır”.
Sosial Azərbaycan
modelinə gəldikdə, Vüqar Bayramov bildirdi ki, qlobal və
regional çətinliklərə baxmayaraq, Azərbaycanda
2015-ci ilin ötən aylarında əməkhaqqı və
pensiyaların verilməsi ilə bağlı hər hansı
yubanma və ya çətinliklər olmadı. ASAN
Azərbaycan modelindən danışan İSİM sədri
ölkə Prezidentinin strateji fikirlərinə uyğun olaraq
Azərbaycanın elektronlaşdırma prosesinin davam etdirilməsinin
olduqca vacibliyini vurğuladı.
Fuad Hüseynzadə
Palitra.-2015.-11 sentyabr.-S.7.