“Bakı məktəblərində müəllimlərin əməkhaqqı 35 faiz artıb”

Bakı şəhəri təhsil işçilərinin “Sentyabr konfransı” keçirilib. Layihə çərçivəsində təqdim etdiyimiz yazıda konfransda təhsillə bağlı müzakirə olunan məsələlərə toxunacağıq. Qeyd edək ki, əvvəlcə tədbir iştirakçıları Fəxri xiyabana gələrək müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin xatirəsini dərin ehtiramla yad edib, abidəsi önünə əklil qoyublar. Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə tər çiçəklər düzülüb. Konfransda təhsil nazirinin müavini, Bakı Şəhəri üzrə Təhsil İdarəsinin müdir səlahiyyətlərini müvəqqəti icra edən Ceyhun Bayramovun hesabat məruzəsi dinlənilib.

1546 müəllim kompüterlə

mükafatlandırılıb

Bir sıra məsələlərə toxunan C.Bayramov bildirib ki, Bakı Şəhəri üzrə Təhsil İdarəsinin tabeliyindəki məktəblərdə çalışan müəllimlərin əməkhaqqı orta hesabla 35 faiz artıb. 7760 müəllimin əməkhaqqı 500-1000 manat, 466 müəllimin əməkhaqqı isə 1000 manatdan yuxarıdır. O bildirib ki, Bakı müəllimlərinin orta aylıq əməkhaqqı ilə ölkə üzrə orta aylıq əməkhaqqı arasındakı uyğunsuzluq aradan qaldırılıb: “Hazırda bu fərq 6 faiz təşkil edir”. C. Bayramovun sözlərinə görə, ilboyu keçirilən təlimlərin qiymətləndirilməsi nəticəsində 2200 nəfər arasından 853 nəfər ibtidai sinif müəllimi “Promethean” lövhəsi, 1546 nəfər isə kompüterlə mükafatlandırılıb.

“Son iki ildə müsabiqə yolu ilə

79 nəfər yeni direktor müavini təyin edilib”

Bildirilib ki, “Bu günün və sabahın direktorları” layihəsi çərçivəsində 2014-cü ildə 15 nəfər ümumi təhsil müəssisəsinin direktoru vəzifəsinə təyinat alıb”. O qeyd edib ki, 2015-ci tədris ilində təlimlərdə 162 nəfər iştirak edib və çoxmərhələli seçim əsasında 24 nəfər ümumi təhsil müəssisəsinin direktoru vəzifəsinə təyinat alıb: “Son iki ildə müsabiqə yolu ilə 79 nəfər yeni direktor müavini təyin edilib”. Nazir müavini elektron informasiya sisteminə əmək müqavilələrinin bağlanmasına dair 39775 ədəd bildiriş daxil edildiyini söyləyib: “46 min 105 nəfər təhsil işçisinin elektron kadr uçotu yenidən aparılıb və bununla da tam şəffaf bir məlumat bazası yaradılıb. Təhsil alan 300 mindən artıq şagird elektron üsulla proqrama daxil edilib, sağlamlıq imkanları məhdud 4276 nəfər uşağın elektron uçotu aparılıb”. C. Bayramov qeyd edib ki, BŞTİ-yə tabe olan 319 təhsil müəssisəsinin saytı fəaliyyət göstərir: “87 məktəbdə 3006 uşaq məktəbə hazırlıq kurslarını uğurla bitirib”.

"Müsabiqə nəticəsində

427 nəfər müəllim işə qəbul edilib"

C.Bayramovun sözlərinə görə, hesabat dövründə Bakı şəhəri üzrə Təhsil İdarəsi tərəfindən Təhsil Nazirliyinin müəllimlərin işə qəbulu və yerdəyişməsi ilə bağlı keçirdiyi müsabiqəyə ümumilikdə 644 vakant yer çıxarılıb. C. Bayramov bildirib ki, vakant yerlərin 375-i ibtidai sinif müəllimi ixtisası üzrə olub: “ Təhsil Nazirliyinin keçirdiyi yerdəyişmə müsabiqəsi nəticəsində digər rayonlar, şəhərlər üzrə 51 nəfər müəllimin iş yeri Bakı şəhərinə dəyişdirilib. Müəllimlərin işə qəbulu üzrə mərkəzləşdirilmiş müsabiqənin I, II və III turları nəticəsində 427 nəfər müəllim işə qəbul edilib”. Nazir müavininin sözlərinə görə, məktəbdənkənar təhsil müəssisələrində 2 862 dərnəkdə 34 776 uşaq məşğul olub: “Məktəblilərin asudə vaxtının səmərəli təşkili, onların yaradıcılıq mərkəzləri və idman məktəblərində dərnək, klub və studiyalara cəlb edilməsi həyata keçirilib”.

C. Bayramov qeyd edib ki, “Dahi şəxsiyyət barədə dərslər” layihəsi üzrə 2014 - 2015-ci tədris ilinin noyabr-may ayları ərzində Heydər Əliyev irsinin gənc nəslə öyrədilməsi məqsədi ilə lektoriyalar təşkil edilib. Onun sözlərinə görə, mühazirə-dərslərdə Bakıda fəaliyyət göstərən 470 ümumtəhsil məktəbinin 22 453 XI sinif şagirdi iştirak edib”.

Bakı şəhəri üzrə Təhsil İdarəsi Bakının müxtəlif yaşayış massivlərində qeyri-bərabər məskunlaşma nəticəsində şagird qəbulu ilə bağlı yaranan problemin həlli üçün təkliflərini müvafiq qurumlara təqdim edəcək.

Bunu təhsil nazirinin müavini, Bakı Şəhəri üzrə Təhsil İdarəsinin rəisi səlahiyyətlərini icra edən Ceyhun Bayramov Bakı şəhəri təhsil işçilərinin sentyabr konfransında çıxışı zamanı deyib.

Son illərdə ölkədə baş verən müsbət demoqrafik dəyişikliklər nəticəsində şagirdlərin sayının əhəmiyyətli dərəcədə artdığını deyən C.Bayramaov qeyd edib k, şəhərin müxtəlif yaşayış massivlərində qeyri-bərabər məskunlaşma nəticəsində Binə, Binəqədi və Sulutəpə kimi yaşayış qəsəbələrində şəbəkədə həddən artıq sıxlıq yaranıb.

Nazir müavini qeyd edib ki, bu il elektron vasitələrlə I sinfə qəbul prosesi Bakıda problemli ərazilərin müəyyənləşdirilməsinə imkan yaratdı: "Təhlil göstərir ki, məktəbə qəbulla əlaqədar Bakı Şəhəri üzrə Təhsil İdarəsi və Təhsil Nazirliyinə müraciətlərin böyük əksəriyyəti məhz həmin ərazilərlə bağlıdır. Yaxın günlərdə məktəbə qəbul kampaniyası başa çatdıqda bu istiqamətdə müvafiq təkliflər təqdim ediləcək”.

Nazir müavini qeyd edib ki, bu günlərdə 133№-li məktəb “Elitar” Gimnaziyaya, 150№-li məktəb isə 6№-li məktəb-liseylə birləşdirilib, 28 nömrəli məktəbin şagird-müəllim kontingenti 44 nömrəli məktəbə köçürülüb: "Düşünürəm ki, şəbəkənin rasionallaşdırılması işi qarşıdakı illərdə də davam etdirilməlidir”.

Mikayıl Cabbarov: “Korrupsiya və rüşvətxorluğa qarşı iki istiqamətdə mübarizə aparırıq”

Təhsil naziri Mikayıl Cabbarov da çıxışında bir məsələlərə aydınlıq gətirib. Nazir qeyd edib ki, hazırda Bakının iki keçmiş məktəb direktoru haqda qanunvericiliyə uyğun olaraq cinayət işi aparılır: “Təhsil Nazirliyi olaraq korrupsiya və rüşvətxorluğa qarşı iki istiqamətdə mübarizə aparırıq”. Nazir bildirib ki, birinci istiqamət üzrə istər vətəndaşların müraciətlərinə əsasən, istərsə də nazirliyin aidiyyəti qurumları tərəfindən işlər həyata keçirilir: “Son tədris ilində təhsil sahəsində çalışan bir neçə işçimizi cəzalandırmışıq. İkinci istiqamət üzrə isə biz təhsil alanla təhsil verən arasında kontaktları minimuma endirmişik. Bakı şəhərində ilk dəfə tətbiq etdiyimiz I sinfə elektron qəbulu nümunə göstərmək olar”.

M. Cabbarov yeni tədris ilinə hazırlığın tam həcmdə həyata keçirildiyini söyləyib: “Ölkə ərazisində onlarla məktəb, o cümlədən Bakıda bir sıra yeni məktəblər tikilib və yaxud da əsaslı şəkildə təmir olunub”.

Nazirin sözlərinə görə, son illər Azərbaycanda müsbət demoqrafik nəticələr olduğuna görə ildən-ilə I sinfə gedən uşaqların sayı artır: “İbtidai siniflərdə həmin uşaqların təhsil alması üçün zəruri şərait yaradılıb. Dərsliklərin təminatı ilə də bağlı hər hansı çətinlik gözlənilmir. Yeni tədris ilinin ilk bir həftəsində monitorinq qrupu yaradılır. Dərslik təminatında problem yaranarsa, bu problem operativ şəkildə həllini tapacaq. Bu il 2000-dən çox yeni müəllim işə qəbul olunub. 50 yeni məktəb direktoru təyin edilib. Onlardan 28-i Bakı şəhərində çalışacaq”.

Nazir qeyd edib ki, 2012-ci illə müqayisədə, yəni son üç ildə Azərbaycanın ümumi təhsil müəssisələrində 9-cu sinfin məzunları arasında müsbət qiymət alan şagirdlərin sayı 14 faiz artıb. Hər il bu göstərici yüksəlir. O, hazırda ölkədəki ümumi təhsil qiymətləndirilməsində yalnız 9-cu sinfi bitirmiş şagirdlərin iştirak etdiyini deyib: “Biz onların akademik nəticələrini əldə etdikdən sonra hər hansı müdaxilə üçün məktəblərdə demək olar ki, vaxt qalmır. Bu mövzu ictimaiyyət üçün yeni mövzu olsa da, həmkarlarımızla fevral ayında bunu müzakirə etmişik. Düşünürəm ki, şagirdlərin daha erkən siniflərdə akademik nailiyyətlərinin qiymətləndirilməsi prosedurunu tətbiq etdiyimiz təqdirdə təhsil göstəricilərinin yaxşılaşdırılması üçün əlavə imkan qazanacağıq. Biz aydın şəkildə hansı şagirdin, hansı məktəbin, hansı bölgənin hansı istiqamətdə çatışmazlığı olduğunu biləcəyik. Düşünürəm ki, 6-sı sinfin, yaxud da ibtidai sinfin sonunda erkən qiymətləndirmənin tətbiqi ilə təhsil sistemi göstəricilərinin yüksəldilməsinə nail olacağıq”.

“Dərsliklə bağlı vəziyyət

bizi qane edə bilməz”

“Dərsliklə bağlı irəliləyiş olsa da, indiki vəziyyət bizi qane edə bilməz”. Nazirin sözlərinə görə, iki il öncə Azərbaycanda ilk dəfə olaraq bir il qabağa praktikası başlayıb: “Əsas məqsəd ondan ibarət idi ki, pilot məktəblərdə, valideynlərdə dərslikləri sınaqdan keçirək. Bu işi hələ də başa çatdırmamışıq. Müvafiq şöbəmiz, Təhsil Problemləri İnstitutu bu işdə daha fəal olmalıdır”.

Nazir bildirib ki, hazırda ölkə şagirdlərinin biliyinin qiymətləndirilməsi yalnız icbari təhsil müddəti başa çatdıqdan sonra həyata keçirilir: “IX sinif məzunları buraxılış imtahanı verirlər. Lakin təhsil işçiləri razılaşa bilərlər ki, eyni bilgi 6-cı sinfi, yaxud ibtidai sinfi bitirən şagirdlər üçün olsaydı, bu, bizə təhsil prosesində, metodikasında müşahidə etdiyimiz boşluqları özümüz üçün daha tez müəyyənləşdirməyə daha çox imkan verər və lazım olan müdaxilələri məhz onların təhsil müddətində edərdik”.

M. Cabbarov Təhsil Nazirliyinin müvafiq şöbələrinin bununla bağlı layihə hazırlayıb təqdim etməli olduğunu da qeyd edib.

“Uzun illərdən sonra bu il

ali məktəblərə qəbulda balların

endirilməsinə getmədik"

Nazir onu da bildirib ki, uzun illərdən sonra bu il ilk dəfə ali məktəblərə qəbulda elan olunmuş balların endirilməsinə getmədik: “Bu prinsipial şəkildə verilən qərardır. Bilik səviyyəsi danışıqlar mövzusu ola bilməz. Bilik ya var, ya da yoxdur”. Nazirin sözlərinə görə, bu il ali məktəblərə qəbul planı 85 faizdən çox yerinə yetirilib. O da vurğulanıb ki, valideynlər övladının qəbul imtahanlarında daha yaxşı nəticə əldə etməsi üçün çıxış yolunu onun 10-11-ci siniflərdə məktəbə getməməsində görürlər: “Həm valideyn, həm də şagirdlər icbari təhsildən sonra keçirilən əlavə fənləri lazımsız hesab edirlər. Düşünürəm ki, təmayülləşmə tətbiq edilən məktəblərin sayı bu halı aradan qaldırmağa kömək edəcək”.

Nigar Abdullayeva

Palitra.-2015.-15 sentyabr.-s.11.