“Naxçıvan” Universiteti qabaqcıl universitetlərlə rəqabətə hazırdır

Təhsilin inkişafını ölkəmizin, xalqımızın gələcəyi hesab edən ümummilli liderimizin bu sahədə müəyyənləşdiridiyi strategiya Naxçıvan Muxtar Respublikasında da uğurla davam etdirilməkdədir. Muxtar Respublikada təhsil sisteminin maddi-texniki bazasının gücləndirilməsi, o cümlədən yeni müasirtipli məktəb binalarının inşa edilməsi, mövcud təhsil ocaqlarının yenidən qurulub əsaslı təmir olunması regionda təhsilin inkişafına öz təsirini göstərir. “Naxçıvan” Universiteti üçün yeni universitet şəhərciyinin salınması da təhsilin inkişafına göstərilən qayğının bariz nümunəsidir.

Layihə çərçivəsində təqdim etdiyimiz yazıda bu məqamlara toxunacağıq. “Naxçıvan” Universitetinin Mətbuat xidmətinin əməkdaşı Nuray Əsgərova universitetin bir qrup müəllim və tələbə heyəti ilə həmsöhbət olaraq, onların sevinclərinə şərik olub.

“Distant təhsilə keçidlə əlaqədar bütün maddi-texniki baza quraşdırılıb”

Anar Abuzərli - Tədris şöbəsinin müdiri: “Dünyada yeniləşmə prosesinin genişləndiyi bir dövrdə təhsilə qayğı xüsusi əhəmiyyət kəsb edir. “Naxçıvan” Universiteti şəhərciyinin professor- müəllim və tələbə heyətinin istifadəsinə verilməsi təhsilə, biz gənclərə göstərilən qayğıdan qaynaqlandı. Bu gün burada tədris sistemində elektron təhsil üçün hər cürə şəraitin yaradılması, xüsusilə distant təhsilə keçidlə əlaqədar demək olar ki, bütün maddi-texniki bazanın quraşdırılması və onların istiqamətləndirilməsi ilə bağlı təlimlərin keçirilməsi gələcəkdə Naxçıvan ali təhsil mühitinin dünya təhsil sistemində özünə layiqli yer tutmasına şərait yaradacaq. Yaradılan şərait, göstərilən dövlət qayğısı biz müəllimlərdən böyük məsuliyyət tələb edir. Çünki bizim hazırladığımız tələbələr, müstəqil Azərbaycanın gələcəyidirlər. Naxçıvan Muxtar Respublikası Ali Məclisi Sədrinin də dediyi kimi: “Müəllimlər gələcəyimiz olan gənclərin təhsil almasında, tərbiyə olunmasında xüsusi rol oynayır. Gələcəyimizin təməli müəllimlərimiz tərəfindən qoyulur. Bu təməl nə qədər möhkəm qoyulsa, gələcəyimiz bir o qədər möhkəm qurulacaq, uğurlu olacaqdır.Gənclərimiz gələcəyin qurucuları olduqlarını bilməli, bu məsuliyyəti daim öz üzərində hiss etməlidirlər”. Ali Məclis Sədrinin qeyd edilən fikri biz müəllimlərin üzərinə çox ciddi öhdəlik qoyur ki, biz də öz işimizdə daha məsuliyyətli olmağı, səylə çalışmağı özümüzə borc bilirik”.

“Yeni istifadəyə verilən 302 yerlik yataqxana binasında otaqlar zəruri mebel avadanlıqları ilə təchiz olunub”

Fəridə Tağıyeva-Xarici dillər fakültəsinin Xarici dil (ingilis) müəllimliyi ixtisasının I kurs tələbəsi: “Azərbaycan gənclər ölkəsidir. Şübhəsiz ki, belə gəncliyi olan bir ölkə daim inkişaf yolunda irəliləməlidir. “Naxçıvan” Universitetində təhsil almaq mənim çoxdankı arzum idi. Bu arzuma nail oldum Xarici dillər fakültəsinin Xarici dil (ingilis) müəllimliyi ixtisasına qəbul olundum. Qeyd edim ki, universitetdə qəbul edilmiş müvafiq qaydalara uyğun olan Xarici dil ixtisasına qəbul olunmuş tələbələr dil səviyyə imtahanında iştirak edirlər. Bu imtahanda müvəffəqiyyət qazanaraq təhsilimə birbaşa hazırlıq qrupundan deyil, I kursdan başladım. Bu gün ölkəmizdə, eləcə də muxtar respublikamızda hər bir gənc böyük dövlət qayğısı ilə əhatə olunub. Elə götürək “Naxçıvan” Universitetini. Ali təhsil ocağında biz tələbələrin yüksək savada, biliyə malik olmalarına, intellektli yetişməsinə, asudə vaxtlarımızın səmərəli təşkili üçün hər cür şərait yaradılıb. 6 mərtəbəli tədris korpusunda 34 auditoriya, hər birində 66 kompyuter olan 2 imtahan mərkəzi, proyektor və elektron lövhə quraşdırılan 11 mühazirə zalı, Heydər Əliyev Dövlətçilik Mərkəzi, Coğrafiya, Azərbaycan tarixi, Turizm-informasiya kabinetləri tələbələrin istifadəsinə verilib. Biz tələbələr üçün yaradılanlar sevincimizə səbəb oldu və digər bir şərait isə universitetin kompüter səviyyə ölçmə mərkəzində tələbələr üçün komüuter kursları təşkil olunacaq və kursu uğurla bitirən tələbələrə sertifikatlar veriləcək. Onu da qeyd edim ki, bu sertifikatlar dünyanın 150 ölkəsində tanınır. Ali təhsil ocağında tələbələrin sosial-məişət şəraiti də yaxşılaşdırılıb. Yeni istifadəyə verilən 302 yerlik yataqxana binasında otaqlar zəruri mebel avadanlıqları ilə təchiz olunub. İki girişi olan 6 mərtəbəli binada tələbələr üçün ən müasir yaşayış şəraiti yaradılıb, otaqların hər biri internetlə təmin olunub, məişət otağı, camaşırxana, mətbəx və istirahət otaqları tələbələrin istifadəsindədir. Naxçıvan Muxtar Respublikası Ali Məclisi Sədrinin qayğısı ilə həyata keçirilən bu tədbirlər, hər şeydən əvvəl, biz gənclərin savadlı, bilikli, intellektli, müasir dünyagörüşə malik vətəndaşlar kimi yetişəcəyimizə imkan yaradır. Əlbəttə ki, biz gənclər bu qayğıya, yaradılan şəraitə layiq olmalı, vətənimizin xoş gələcəyi naminə çalışmalıyıq.

“4 mərtəbəli kitabxanada 15 minə yaxın elmi və bədii ədəbiyyat yer alıb”

Nubar Salmanova-Kitabxana əməkdaşı: “Böyük fransız yazıçısı Vüqtor Hüqonun “Bəşəriyyətin ən dəyərli kəşfi məhz kitablardır”-fikri bu gün qloballaşma dediyimiz bir dövrdə öz aktuallığını itirmir. Çünki cəmiyyətin inkişafında, insanlanların düzgün formalaşmasında, dünyagörüşünün artmasında, dogma yurdumuza mənsub olduğu xalqa, onun tarixi keçmişinə məhəbbət ruhunda tərbiyə olunmasında əsas rol oynayan amillərdən başlıcası kitablardır. Danılmaz bir faktdır ki, istər muxtar respublikamızda, istərsə də onun ayrı-ayrı bölgələrində kitabxanalar yetərincə dövlət qayğısı əhatəsindədir. Sevindirici haldır ki, biz də bu qayğıdan nəsibimizi aldıq, “Naxçıvan” Universitetinin yeni universitet şəhərciyində rektorluq binası, 2 tədris korpusu, sosial xidmət mərkəzi, yataqxana, idman zalı və konfrans zalları ilə bərabər, müasir standartlara cavab verən 4 mərtəbəli kitabxana binası da istifadəyə verildi. 15 minə yaxın elmi və bədii ədəbiyyatın yer aldığı kitabxanada kitabxanaçılıq işi müasir tələblər əsasında qurulub elektron dərslik ədəbiyyatlar verilib. 6 bölmə, disertasiya və avtorefaratlar zalının fəaliyyət göstərdiyi binada hər bölmənin ayrıca fondu, oxu və informasiya zallarının olması uyğun materialların qısa zamanda oxucuya çatdırılmasına imkan verəcək. Biz də, öz növbəmizdə yaradılan şəraitə, göstərilən dövlət qayğısına görə Naxçıvan Muxtar Respublikası Ali Məclisin Sədrinə dərin minnətdarlığımızı bildirir, bundan sonra işimizi günün tələbləri səviyyəsində qurmağı özümüzə borc bilirik”.

“Universitet mətbəəsi də ən müasir çap avadanlıqları

ilə təchiz olunub”

Səadət Əkbərova -Nəşriyyat şöbəsinin müdiri: “Mən deyərdim ki, bu gün “Naxçıvan” Universiteti sözün əsl mənasında inkişaf dövrünü yaşayır. Dünya standartlarına cavab verən “Naxçıvan” Universiteti üçün yeni universitet şəhərciyinin istifadəyə verilməsi hər birimizin sevincinə səbəb oldu. Ali təhsil ocağında yaradılan universitet mətbəəsi də ən müasir çap avadanlıqları ilə təchiz olunub. Burada elmi praktik konfransların proqram və materialları, fənn proqramları, monoqrafiyalar, qabaqcıl iş təcrübələri və digər dərs vəsaitləri çap olunacaq. Bir sözlə, inanırıq ki, “Naxçıvan” Universiteti yaradılmış şəraitdən bəhrələnəcək, burada ali təhsil alan tələbələr vətənimizə yararlı, layiqli vətəndaş kimi yetişəcək, müstəqil Azərbaycanın düşünən, əsl yaradıcı gəncləri kimi formalaşacaq. Ali Məclis Sədrinin də dediyi kimi : “Yaxşı təhsil almaq, peşə, sənət sahibi olmaq hər bir gəncin arzusudur. Ali təhsil almaq yalnız müxtəlif elm sahələri üzrə bilikləri mənimsəməkdən, yaxud da diplom sahibi olmadan ibarət deyil. Ali təhsil gənclərin ölkə və xalq üçün layiqli vətəndaş və mütəxəssis kimi yetişməsi yolunda mühüm mərhələdir. Hər bir gənc çalışıb ona nail olmalıdır ki, gələcəkdə təhsil aldığı sahələr üzrə ixtisaslı kadr kimi yetişsin. Bu işdə ali və orta ixtisas təhsili müəsissələrinin müəllim heyətinin də üzərinə mühüm vəzifələr düşür. Müəllimlər təhsil verməklə yanaşı, həm də vətənpərvər gənclər yetişdirməlidirlər. Tələbə gənclər də Azərbaycan xalqının tarixinə, dilinə, adət-ənənələrinə və milli dəyərlərinə sahiblik hissi aşılanmalı, onlar gələcək həyata ailə, cəmiyyət və dövlət qarşısında öz məsuliyyətini dərk edən müstəqil və yaradıcı düşünən vətəndaşlar kimi hazırlanmalıdırlar”.

“İmtahanların gedişini internet üzərindən izləmək və onların video arxivini yaratmaq mümkün olacaq”

Rəşad Abbasov -İKT və texniki nəzarət şöbəsinin müdiri: “İlk dəfə olaraq belə kompleks şəkildə bir universitet şəhərciyinin istifadəyə verilməsi yaddaşlardan uzun müddət silinməyəcək. Burada o qədər incə memarlıq üslubu, tədris standartları tətbiq olunub ki, bu gün biz çəkinmədən deyə bilərik ki, “Naxçıvan” Universiteti Avropanın qabaqcıl universitetləri ilə rəqabətə girə biləcək səviyyədədir. Ali təhsil ocağında 4 yeni yüksək həcmdə mərkəzi server quraşdırılıb, universitet şəhərciyindəki bütün binalara fiber-optik kabel xətti çəkilib. Yüksək güvənlikli şəbəkə, kamera sistemləri, bundan başqa, Xarici dillər fakültəsində 2 linqafon otağı quraşdırılıb. 13 ixtisas üzrə mütəxəssis hazırlığı aparılacaq universitetdə elektron təhsilin tətbiqi üçün müasir infrastruktur yaradılıb. İmtahan mərkəzlərinin müasir texnoloji sistemi eyni vaxtda bir neçə sistem üzrə imtahanların çevik və şəffaf formada aparılmasına, imtahanların gedişini internet üzərindən izləməyə, eləcə də onların videoarxivini yaratmağa imkan verəcək. Sonda onu demək istərdim ki, yaradılanlar, qurulanlar üçün Naxçıvan Muxtar Respublikası Ali Məclisinin Sədrinə minnətdarıq”.

A.Miriyev

Palitra.-2015.-24 sentyabr.-S.11.