“Praktik dərslərə daha geniş yer
verilməlidir”
“Humanitar, ictimai və fundamental elm sahələrinin
inkişafı üçün də sosial sifarişə
ehtiyac var”
Layihə çərçivəsində
müsahibimiz Naxçıvan Dövlət Universitetinin elmi
işlər üzrə prorektoru, fizika üzrə fəlsəfə
doktoru, dosent Mübariz Nuriyevdir:
-1990-cı ildən
Naxçıvan Dövlət Universitetində işləyirəm.
Universitetimizin fəaliyyəti
uğurla davam edir. Belə ki, keçən il
Universitetimizdə 21 elmi istiqamətdə elmi-tədqiqat
işləri yerinə yetirilir, bu elmi istiqamətlər üzrə
35 kafedrada və “Regionun inkişafı problemləri” elmi-tədqiqat
laboratoriyasında 22 problem üzrə 262 əməkdaş 257
mövzu üzrə elmi-tədqiqatlar aparıb. 2014-cü ilin
nəticələrinə görə Naxçıvan Dövlət
Universiteti əməkdaşlarının 122 kitabı, o
cümlədən 30 monoqrafiyası 2 dərsliyi, 52 dərs vəsaiti,
38 metodik vəsait və proqramı, 802 elmi məqaləsi
çap olunub ki, bunlardan 115-i xaricdə nəşr olunub. Xaricdə nəşr olunan məqalələrin 10-u
Tomson Royter İnstitutu tərəfindən qəbul edilən
Science Citation İndex seriyasına daxil olan jurnallarda dərc
olunub. Həmçinin əməkdaşların 83 tezisi
nəşr olunub və məruzə edilib ki, bunların da
40-ı xarici ölkələrin payına düşür.
Əməkdaşlardan 1 nəfəri elmlər doktoru
proqramı, 7 nəfəri isə fəlsəfə doktoru
proqramı üzrə müdafiə edib, 1 nəfər
professor, 9 nəfər isə dosent elmi adı alıb.
- Elmin inkişaf səviyyəsini necə
qiymətləndirirsiniz?
- Azərbaycanda
elmin bütün sahələri dinamik inkişaf etməkdədir.
Elmin elə sahələri var ki, nisbətən
daha intensiv inkişaf edir bu da həmin sahələrə olan tələbatla
bağlıdır. Elm geniş məfhumdur
və onun çoxlu müxtəlif sahələri var. Texniki
elmlər, fundamental elmlər, humanitar və ictimai elm sahələrinin
hər birinin inkişafı özünəməxsus
yanaşma tələb edir.
“Ölkə
sənayesinin, iqtisadiyyatın inkişafı elə
qurulmalıdır ki, onlarda elmə, yeni innovasiyaların tətbiqinə
tələbat yaransın”
Yəni bütün elm sahələrinin
inkişafının eyni üsulla getməsi mümkün
deyil. Məsələn, tətbiqi elmlər
üçün elmin hədəfi təklif səviyyəsində
deyil, tələb şəklində olmalıdır. Belə ki, əvvəl tələb olmalıdır,
yəni hər hansı bir sahənin inkişafı
üçün sifariş olmalıdır, sonra elm sahəsi
inkişaf etməlidir. Humanitar, ictimai və
fundamental elm sahələrinin inkişafı üçün
də sosial sifarişə ehtiyac var.
- Son zamanlar texniki sahələrdə
durğunluq olduğu bildirilir. Sizin buna münasibətiniz necədir?
- Mən
də hesab edirəm ki, bu sahədə gözə çarpan
durğunluq kadr hazırlığı sahəsində, sadəcə,
tələbələrin universitetlərdə ixtisas
seçimi ilə əlaqədardır. Ancaq əslində
bu durğunluq texniki sahədə əməyin
stimullaşdırılması ilə bağlıdır.
Bu problemin həlli üçün bir sıra
problemlər həll edilməlidir. Bunlar
iqtisadiyyatla, sənayenin inkişafı ilə bağlı
problemlərdir. Belə ki, ölkə sənayesinin,
iqtisadiyyatın inkişafı elə qurulmalıdır ki,
onlarda elmə, yeni innovasiyaların tətbiqinə tələbat
yaransın. Bu tələbatla da elm
adamlarının qarşısına çıxılsın,
ondan sonra elm adamları başlasınlar o sahələri
inkişaf etdirməyə. Belə olanda elm
daha mütəşəkkil şəkildə inkişaf edər.
Alimlərin I Qurultayında rabitə və
yüksək texnologiyalar naziri hörmətli Əli Abbasovun
çıxışında bu məsələlərə
geniş yer verildi. Mən onun fikirlərini
dəstəkləyirəm. Hesab edirəm
ki, bu cür yanaşma ilə elmimizin gələcək
inkişafına nail olmaq mümkündür. - Qurultayda təhsil
naziri bu istiqamətdə qarşılıqlı əlaqələrin
qurulmasının vacibliyini bildirdi. Sizcə bu,
hansı imkanları yarada bilər?
- Bəli.
Təhsil naziri hörmətli Mikayıl Cabbarov
da bu məsələlərə aydınlıq gətirdi.
Elm adamlarının məktəblərə
inteqrasiyası, elmlə universitet arasında əlaqələrin
sıxlaşması kimi fikirlər səsləndi. İndi AMEA-nın alimlərinin, universitetlərdə
çalışan alimlərlə apardıqları birgə tədqiqat
işləri o qədər də çox deyil.
Düzdür, elmi-tədqiqat işlərinin vahid
koordinasiyası mövcuddur, ancaq bunların daha sıx əlaqəli
şəkildə işləməsi, müştərək
elmi işlərə müəllimlərin cəlb olunması,
yəni tək tədris deyil, elmi sahələrə də
alimləri cəlb etməklə bu sahəni daha da inkişaf
etdirmək olar. Digər tərəfdən
akademiyanın elmi-tədqiqat institutlarında maddi-texniki baza
yaranıb. Uyğun elm sahələri
bir-birinə inteqrasiya etsə daha yaxşı nəticələr
almaq olar. Həmçinin elmi istiqamətlərin
qloballaşması, xarici ölkələrin aparıcı sahələri
ilə bizim alimlərin məşğul olduğu elm sahələri
arasında əlaqələrin gücləndirilməsi,
müxtəlif proqramlar çərçivəsində bu sahələrdə
işlərin aparılması, elmi işçilərin əməkdaşlıq
etməsi bu sahənin daha da güclənməsinə,
perspektivli sahələrin meydana çıxmasına gətirib
çıxarar ki, bu da elmin inkişafına yüksək təsir
göstərər.
- Ümumiyyətlə, son dövrlərdə
elmə marağın azalması fikri var. Siz bu fikirlə
razılaşırsınızmı?
- Bu məsələ
də qurultayda müzakirə olundu. Mən yenə
o fikrimə qayıdıram ki, elmin hədəfi sifariş olsa
və istehsal sahəsi, özəl sektor öz
inkişafını təmin etmək üçün elmə
vəsait ayırsa, o zaman bu məsələ də və təbii
ki, elmin maliyyələşdirilməsi məsələsi də
həll olunacaq. Digər tərəfdən
dövlətimiz buna geniş yer verir, gündən-günə
alimlərimizin maddi vəziyyətinin
yaxşılaşdırılması üçün işlər
görülür, büdcədən elmə ayrılan vəsaitlərin
artırılmasının şahidi oluruq. Digər tərəfdən magistraturaya qəbul olunan
tələbələrə hərbi xidmətdən möhlət
hüququnun verilməsi bu işlərin daha da inkişafına
gətirib çıxara bilər. Çünki tələbə
oxuyur, universiteti bitirdikdən sonra magistraturaya daxil olur, sonra
gedir hərbi xidmətə, gəldikdən sonra onun elmə
qayıtması, yenidən o sahəni inkişaf etdirməsi
haqqında onda müəyyən əlavə fikirlər
yaranır, müxtəlif dünyagörüşü
formalaşır, bu da təbii ki, elmdən uzaqlaşmasına
gətirib çıxarır. Bu gün belə
bir reallıq var ki, qızlar daha çox elmə maraq göstərir,
ancaq bu məsələ həm də, məhz magistraturaya daxil
olan oğlanların əsgərlik məsələsi ilə
bağlıdır.
- Bu il AMEA
institutlarının magistratura pilləsinə qəbul
imtahanı keçirilməsi nəzərdə tutulur. Siz bunu necə qiymətləndirirsiniz?
-
AMEA-nın müxtəlif institutlarına qəbulun
keçirilməsi mütərəqqi haldır. Çünki magistrlar eyni zamanda elmi-tədqiqat
işləri aparırlar. Bunu elmi-tədqiqat
institutlarında aparsalar daha yaxşı nəticələr
verər. Çünki elmi-tədqiqat
institutlarında müxtəlif sahələr üzrə
laboratoriyalar və tədqiqat metodları formalaşıb ki,
bu da magistrlərin həmin sahələr üzrə püxtələşməsinə
müsbət təsir edə bilər. Hansı
elmi-tədqiqat institutunun magistraturasına daxil olubsa o sahəni
daha yaxşı mənimsəməsi, onun gələcəkdə
yaxşı elmi işçi kimi formalaşmasında, tədqiqat
metodlarının öyrənilməsində, o sahə ilə
tanışlığında böyük rol oynayacaq. Yoxsa, belə çıxır ki, kadr
hazırlanır, nəzəri biliklərə yiyələnir,
ancaq praktiki təcrübəsi yoxdur. AMEA
institutlarında magistraturanın açılması bu sahənin
inkişafına gətirib çıxaracaq.
- Prezident Administrasiyasının rəhbəri,
akademik Ramiz Mehdiyev bildirib ki, dövlət idarəçiliyinin
müxtəlif sahələrində ən yeni metodlara yiyələnmiş
yüksək hazırlıqlı kadrların yetişdirilməsi
zərurəti var. Yüksək tələblərə
uyğun kadr tapmaqda çətinlik çəkirik. Siz bu barədə necə
düşünürsünüz?
- Dünyanın inkişaf etmiş ölkələrində
universitetlər müxtəlif istiqamətlərdə
qurulublar. Sırf
ixtisaslaşmış universitetlər var. Məsələn,
bir metallurgiya zavodunun universiteti var. Bu universitetdə ancaq
metallurgiya sahəsi üzrə kadrlar hazırlanır. Burada söhbət onlara ali təhsil verilməsindən getmir, təhsil
2 və ya 4 illik də ola bilər. Ancaq məqsəd
kadrların sırf bu sahədə ixtisaslaşmasından ibarətdir.
Onlar bir və ya bir neçə cihazın idarəetmə
sistemini bilən kadrlar hazırlayırlar. Bunun
üçün ancaq o cihazı bilmək kifayət edir.
Onlara həmin müəssisələrdə
praktika keçirlər, 2 illik kursları bitirmələri
haqqında diplom verilir. Bundan başqa,
xarici universitetlərdə təkcə bakalavr, magistr,
doktorantura səviyyəsi deyil, eyni zamanda onlarda peşə təhsili
istiqamətində kurslar keçirlər. Bu
yaxınlarda biz Cənubi Koreyanın Çinq-Çonq
Universitetində olduq. Orada stüardessa, tibb
bacısı, ali təhsilli müəllim,
diş həkimi ixtisasları var. Yəni universitet ancaq ali təhsil
üçün nəzərdə tutulmur. Eyni
zamanda təhsilin bütün pillələri üçün
lazım olan kadr hazırlanmasında iştirak edir. Belə olduqda həm universitetin reytinqlərinin
yüksəlməsi imkanı yaranır, həm də
onların hazırladığı kadrlar tələbata
uyğun seçilir. Məsələn,
Koreyada stüardessaya olan tələbatı ödəmək
üçün o universitet stüardessa hazırlayır.
O da 2 il ərzində bu sahədə nələri
bilməlidirsə, onu öyrədir. Yaxud barlarda
çalışmaq üçün barmen hazırlayırlar,
ümumiyyətlə, xidmət sahələrinin bütün
növləri üzrə onlar mütəxəssislər
hazırlayırlar. Belə olanda həm
universitetin bütün göstəriciləri yüksəlir,
həm say tərkibi çoxalır. Reytinq
cədvəllərinin ölçülməsində bu
ixtisasların göstərilməsi, ixtisas çoxluğu,
kadrların nə səviyyədə hazırlanması, praktik
vərdişlərə yiyələnməsi böyük rol
oynayır. Praktik vərdişlər
üçün olan maddi-texniki baza, eyni zamanda nəzəri
hissədə bakalavr təhsili alanlar üçün praktik vərdişlərinin
yaranmasına gətirib çıxarır. Bu da akademik Ramiz Mehdiyevin dediyi fikirlərlə
uzlaşır ki, praktik vərdişlərə, dərslərə
daha geniş yer verilməlidir. Ancaq praktik dərslərin
də keçilməsi üçün platforma
olmalıdır. Bəs harada keçilməlidir?
Bunun üçün istehsalata gedilməlidir, ya
da universitetin özündə qurulmalıdır. Belə halda təbii ki, praktikanı keçmək
üçün heç bir çətinlik yaranmayacaq.
Nigar Abdullayeva
Palitra.-2015.-15 yanvar.-S.11.