“Latviyada 120 nəfərdən çox azərbaycanlı təhsil alır”

Azər Abbasov: “Azərbaycanlı tələbələrin xarici tələbələr ilə bir yerdə təhsil alması daha çox intellektual səviyyəni yüksəldə bilər”

Müsahibimiz Azər Abbasov 4 ildir ki, Latviyada təhsil alır. Bununla yanaşı, Azərbaycanlı Tələbələr Birliyinin sədri olaraq Latviyada ölkəmizin təbliğini aparır. Qeyd edək ki, A.Abbasov 1990-cı ildə Azərbaycanın qədim və tarixi Şuşa şəhərində anadan olub. Orta məktəbi Bakı şəhərində bitirib, Azərbaycan Respublikasının Silahlı Qüvvələri sıralarına qatılaraq hərbi xidməti başa vurduqdan sonra Latviyaya ali təhsil almaq məqsədi ilə gedib.

-Latviyada təhsil almağa sizi vadar edən nə oldu?

-Bu maraq öncə məndə ailədən irəli gəlib. Daha təfərruatlı desəm, mənim ilk müəllimim Şuşa şəhər Mədəniyyət və Turizm Şöbəsinin müdiri, atam Zahid Abbasovdur. Atam məhz bu sahədə uzun illərdir fəaliyyət göstərdiyinə görə məndə də böyük maraq oyatdı. O da tələbə olarkən ümummilli lider Heydər Əliyevin təhsil siyasəti olan azərbaycanlı gənclərin Sovetlər Birliyinin ən aparıcı ali təhsil ocaqlarında təhsil almaq üçün göndərilənlər sırasında olub. Daha sonra Şuşa şəhərinə qayıdaraq yiyələndiyi ixtisas üzrə yüksək peşəkarlıqla keçmiş Dağlıq Qarabağ Muxtar Vilayətində Vilayət komsomol komitəsində sədr qismində fəaliyyətini davam etdirib. Mən də bir növ ailə ənənəsini davam etdirərək Latviyada təhsil almağa gəlmişəm. Hazırda Baltik Beynəlxalq Akademiyasının Biznesin qurulması və idarə olunması fakültəsində təhsil alıram. Qeyd edim ki, bu ölkədə yaşayan nüfuzlu və Latviya cəmiyyətində kifayət qədər tanınmış soydaşlarımız var. Bizim ailəvi dostlarımızın Riqa şəhərində yaşamasını nəzərə alaraq mənim 4 il ərzində yerli cəmiyyətə alışmam daha asan oldu.

-Rəhbəri olduğunuz Azərbaycanlı Tələbələr Birliyinin fəaliyyət istiqamətləri hansılardı?

- Ən yüksək dərəcədə Azərbaycanı Latviyaya, eləcə də digər Baltikyanı ölkələrə tanıtmaqdır. Fəaliyyət istiqamətimiz bu ölkədə olan universitetlərdə və beynəlxalq dərəcəli festivallarda, idman oyunlarında ölkəmizi layiqincə və dolğun məlumatlarla təbliğ etməkdir. Başlıca məqsədimiz bu ölkədə yaşayan gənc azərbaycanlıların əlaqə şəbəkəsini gücləndirmək və həm yerli, həm də bu ölkədə yaşayan digər dost xalqların gəncləri ilə ünsiyyəti düzgün saxlamaqdır. Biz onların, onlar isə öz növbələrində Azərbaycan tədbirlərində yüksək səviyyədə iştirak edirlər. Xüsusilə vurğulamaq istərdim ki, 2014-cü ilin fevral tarixində Riqa şəhərində “Xocalıya ədalət” beynəlxalq kampaniyası çərçivəsində keçirdiyimiz icazəli aksiya yürüşündə Latviyada yaşayan müxtəlif dost xalqların gəncləri də fəal şəkildə iştirak edib.

- Elm və təhsilin inkişafı ölkənin ümumi inkişafının təmin olunması baxımdan nə dərəcədə əhəmiyyətlidir?

-Mən ziyalı ailəsində anadan olmuşam. Azərbaycan tarixində daim şanlı hərflərlə yazılan Şuşa şəhərində çox alimlər və elm xadimləri yetişib. Məhz bu amildən yola çıxaraq təhsilimin inkişafına daim önəm vermişəm. Düşünürəm ki, elm və təhsil Azərbaycanın gələcəyidir. Azərbaycan dünən də elmli insanları ilə ad çıxarıb, əminəm ki, sabah da bu ənənə layiqincə davam ediləcək. Prezident İlham Əliyevin ölkədə təhsilin inkişafı üçün gördüyü işlər və bu sahədə daim yeni reformların nəticəsi olaraq təhsilimiz də müasir dünya praktikası ilə paralel getməkdədir.

-Bu günlərdə Prezidentin sərəncamı ilə müəllimlərin maaşı artırıldı. Bu məsələ ilə bağlı fikrinizi bildirmənizi istərdik.

-Prezident İlham Əliyevin rəhbərliyi zamanı, ümumiyyətlə, müəllimlər, polislər, həkimlər ve s. maaşı dəfələrlə artırılıb. İndi müəllimlərin maaşının 2 dəfə artması məni heç təəccübləndirmədi. “Müəllim” sözü asan, işi çox çətin olan vəzifədir. Azərbaycanın təhsil ocaqlarından dəyərli və nümunəli tələbələr çıxır. Bu da bizim müəllimlərin layiqincə verdiyi təhsildən irəli gəlir. Gələcək nəsillər müəllimlərimizin əmin əllərindədir.

-Xaricdə təhsil insana hansı əlavə imkanlar qazandırır?

- Öncə bu mənim şəxsi hobbimdən irəli gəlir. Mən məktəb illərindən arzulamışam ki, əcnəbi millətlərin həyat tərzini anlayım, onların dilini və mənəvi dəyərlərini öyrənim. Dünyagörüşünü genişləndirib xarici ölkələrdə Vətənimizi layiqincə təmsil etmək həyəcanı ilə qarşılaşmaq uşaqlıq çağlarından arzum olub. Düşünürəm ki, xarici ölkələrdə təhsil alan hər bir gənc soydaşımızın əsas amalı gələcəkdə bu ölkələrdə yiyələndiyimiz elmi incəlikləri öz Vətənimizdə praktikada tətbiq etməkdir.

-Azərbaycanlı tələbələr Latviyada, əsasən, hansı sahələrdə təhsil alırlar?

-Latviyanın müxtəlif universitetlərində 120-dən çox azərbaycanlı tələbə təhsil almaqdadır. Ümumiyyətlə, tələbələr ayrı-ayrı ixtisaslar üzrə təhsil alırlar, amma daha çox tələbə turizm sahəsinə üstünlük verir. Burada bizim kimi bu ixtisasa yiyələnmək üçün bir çox ölkələrin tələbələri təşrif buyurmaqdadır.

-Azərbaycanın Latviyada tanıtımı üçün hansı işlər görürsüz?

- Həm Latviyada, o cümlədən Avropada keçirilən tədbirlərdə çalışırıq iştirak edək. Latviyada ayda bir dəfə radio vasitəsilə Azərbaycan xəbərləri və diaspor xəbərləri ilə paylaşırıq. Azərbaycan və latış dilində muğam oxuyan ifaçılarımız var. Belə tədbirlər ilə Latviya sakinlərinə öz mədəniyyətimizi tanıtmağa çalışırıq. Məsələn, Dünya Azərbaycanlılarının Həmrəyliyi Günü, Novruz bayramı və s. tədbirlər keçiririk. Həmçinin milli mətbəximizi həm xarici vətəndaşlara, həm də xarici tələbələrə təhsil idarələrində təqdim etdiririk. Xüsusilə qeyd etmək istərdim ki, Azərbaycan Respublikasının Latviyadakı səfiri Elman Zeynalov bu ölkədə təhsil alan gənclərimizlə dəfələrlə müxtəlif formatlı görüşlər keçirir və bu görüşlərdə hər bir tələbənin fikirləri dinlənir. Səfirliyin dəstəyi ilə də tədbirlər və universitetlərdə Azərbaycanın reallıqları və İlk Avropa Oyunları ilə bağlı təbliğat xarakterli işlər görülməkdədir. Qeyd etmək istərdim ki, Diasporla İş üzrə Dövlət Komitəsi ilə də gələcəkdə ortaq layihələrdə iştirak etməyə hazırıq. Bu il komitənin əməkdaşlarının Latviyaya səfəri zamanı azərbaycanlı tələbələrlə də görüşü keçirilib. Görüşdə ümummilli lider Heydər Əliyevin diaspor və lobbiçilik fəaliyyətinə verdiyi əhəmiyyət və günümüzdə Azərbaycan diasporunun yayılma coğrafiyası barədə fikir mübadiləsi bizlərə gələcək işlərimizdə daha güclü motivasiya verdi.

-Bu işlərin həyata keçirilməsində yerli təşkilatlarla əməkdaşlıq edirsizmi?

-Universitetlərdə qurulan digər əcnəbi gənclərin birlikləri və bu ölkədə fəaliyyət göstərən Azərbaycan diaspor təşkilatları ilə fəal əməkdaşlığımız var.

-Sizcə, tələbə və gənclərin intellektual səviyyəsinin yüksəldilməsi üçün nələr edilməlidir?

-Ümumiyyətlə, intellektual səviyyəni artırmağın müxtəlif yolları var. Lakin, fikrimcə, azərbaycanlı tələbələrin xarici tələbələr ilə bir yerdə təhsil alması daha çox intellektual səviyyəni yüksəldə bilər. Müxtəlif ölkələrdən gələn tələbələrlə təhsil rəqabətinin olması, bizi də bir azərbaycanlı kimi fərqlənməyə sövq etməkdədir. Biz həm ingilis, həm latış dilini mükəmməl öyrənərək yerli cəmiyyətə inteqrasiya prosesində daha sürətliyik. Beləcə, bu ölkədə təşkil olunan elmi konfranslarda, beynəlxalq festivallarda iştirak edir və çıxışlar etməkdəyik.

-Yeni hansı layihələriniz gözlənilir?

- Biz yerli medianı da aktiv şəkildə izləyirik. Latviya-Azərbaycan əlaqələri hər zaman yaxşı olub. Hər iki ölkə səfirliklər səviyyəsində ildən-ilə bu dostluq prosesini daha da möhkəmlədir. Azərbaycan haqqında yerli ictimaiyyətdə yaxşı mövqe formalaşıb. Bu baxımdan ölkədə yaşayan Azərbaycan diasporunun da rolu böyükdür. Dəfələrlə yerli mediada ölkəmiz haqqında müsbət fikirli xəbərlər dərc olunub. Biz də gənclər olaraq bu il Xocalı soyqırımı haqqında bir neçə dildə mətn hazırlayaraq yerli KİV-ə ünvanlayacağıq. Daha sonra İlk Avropa Oyunlarının Azərbaycan guşələri təşkil olunacaq. Azərbaycanda fəaliyyət göstərən vətəndaş cəmiyyəti üzvləri ilə birgə Qarabağ layihəmiz müzakirə olunmaqdadır. Bu layihənin Riqada təşkil edilməsi gözlənilir. Və təbii ki, Diaspor Jurnalistləri Birliyi kollektivi ilə gördüyümüz işlərin məlumatlarının Vətənimizdə də dərc olunması istiqamətində sıx əməkdaşlığımız olacaq.

Fuad Hüseynzadə

Palitra.-2015.-23 yanvar.-S.7.