UNEC-in 28 tələbəsi 6 ölkənin aparıcı universitetində təhsillərini davam etdirəcək

Türkiyənin müxtəlif universitetlərinin tələbələri UNEC-in müasir tədris prosesi və İKT-nin imkanlarından istifadə ilə tanış olacaqlar

Ölkəmizdə həyata keçirilən davamlı və dayanıqlı inkişaf siyasətinin prioritet istiqamətlərindən elan olunan informasiya kommunikasiya texnologiyaları (İKT) sosial-iqtisadi sistemin bütün sahələrinə və insanların gündəlik fəaliyyətinə sürətlə nüfuz edərək, ictimai-iqtisadi münasibətlərin ayrılmaz tərkib hissəsinə çevrilib. Son illərdə ölkədə informasiya cəmiyyətinin bərqərar olması və bunun tərkib hissəsi kimi İKT-nin geniş tətbiq edilməsi istiqamətində sistemli fəaliyyət aparılır.

Bu baxımdan, Prezidentin müvafiq sərəncamı ilə təsdiq edilmiş “Azərbaycan Respublikasının inkişafı naminə informasiya kommunikasiya texnologiyaları üzrə Milli strategiya (2003-2012-ci illər)”, bu strategiyanın icrasının ilkin mərhələsini nəzərdə tutan Prezidentin 2005-ci il sərəncamı ilə təsdiq edilmiş “Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı” (Elektron Azərbaycan)” və həyata keçirilən genişmiqyaslı işlər qeyd edilə bilər. Respublika əhalisinin İKT-dən istifadə səviyyəsinin artırılması, sahə üçün yüksəkixtisaslı kadrların hazırlanması və digər istiqamətlərdə müəyyən işlər görülüb. Azərbaycan üçün təhsil sahəsi İKT-nin tətbiq istiqamətləri içərisində ən yüksək prioritetə malik istiqamətlərdən biri sayılır. Azərbaycanda təhsilin modernləşdirilməsi, təhsildə informasiya texnologiyalarının tətbiqi istiqamətində bir sıra addımlar atılıb. İKT-nin geniş tətbiq edilidiyi ali təhsil ocaqlarından biri də Azərbaycan Dövlət İqtisad Universitetidir (UNEC). İKT-nin imkanlarından geniş şəkildə istifadənin nəticəsidir ki, UNEC xarici təhsil ocaqları ilə fəal əməkdaşlıq edir.

Sakarya Universiteti ilə əməkdaşlıq

UNEC və Türkiyənin Sakarya Universitetinin birgə hazırladığı “Soy ağacının Genç Dalları” adlı layihə Türkiyə Respublikasının Başbakanlık Yurtdışı Türkler ve Akraba Topluluklar Başkanlığı tərəfindan qəbul edilib. Layihə çərçivəsində UNEC-in Türk Dünyası İşlətmə fakültəsinin iki müəllim və dörd tələbəsindən ibarət nümayəndə heyəti iyulun 18-də Sakarya Universitetinə səfər edib. Dörd gün davam edən səfər müddətində UNEC nümayəndə heyəti Sakarya Universitetinin rektoru, professor Muzaffar Elmas, professor müəllim-heyəti və yerli bələdiyyə rəhbərliyi ilə görüşlər keçirib, eləcə də İstanbulda Türk Dünyası Araşdırmaları Vəqfini və Türkiyə prezidenti Rəcəb Tayyib Ərdoğanın Kısıklıdakı evini ziyarət ediblər. Layihənin davamı olaraq, Sakarya Universitetinin iki müəllim və dörd tələbəsindən ibarət nümayəndə heyəti avqustun 15-də UNEC-ə səfər edib. Sakarya Universitetinin “Erasmus+”, “Farabi” və “Mevlanə” proqramları koordinatoru Nesrin Kenarın rəhbərlik etdiyi nümayəndə heyəti UNEC-in Beynəlxalq əlaqələr və proqramlar üzrə prorektoru Ş.Bayramov və dekan Fərrux Tuzcuoğlu ilə görüşüb. Görüşdə universitetlər arasında mövcud əməkdaşlığın genişləndirilməsi, xüsusilə də “Erasmus+” və “Mevlanə” proqramları çərçivəsində ikitərəfli və çoxtərəfli əlaqələrin inkişaf etdirilməsi məsələləri müzakirə olunub, qeyd olunan proqramlar üzrə birgə layihələrin hazırlanması barədə razılıq əldə edilib.

Yeni tədris ili üçün professor-müəllim

və tələbə mübadiləsi

Eyni zamanda UNEC ilə Türkiyə Respublikasının universitetləri arasında imzalanan proqram protokolları əsasında həyata keçirilən “Mevlana Mübadilə Proqramı” çərçivəsində 2016-2017-ci tədris ilində professor-müəllim və tələbə mübadiləsi üçün nəticələr elan edilib. Nəticələrə əsasən, bu il UNEC-in 22 tələbəsi bu proqram çərçivəsində Türkiyənin nüfuzlu ali təhsil müəssisələrindən olan Yıldız Texnik Universiteti, Səlcuk Universiteti, Anadolu Universiteti, İzmir Katip Çelebi Universiteti, Gazi Universiteti, Sakarya Universiteti, Kastamonu universitetlərində təhsil almaq hüququ qazanıb. Həmçinin bu il ötən illərə nisbətən Türkiyənin müxtəlif universitetlərindən proqram çərçivəsində UNEC-ə gələcək tələbələrin sayında da artım olub. Belə ki, bu il 11 tələbə UNEC-in tədris prosesində iştirak edərək, müasir tədris prosesi, İKT-nin imkanlarından istifadə ilə tanış olacaqlar. Eyni zamanda proqram çərçivəsində UNEC-in 6 müəllimi uğurlu nəticə göstərərək təcrübə keçmək üçün İstanbul Universiteti, Səlcuk Universiteti, Akdeniz Universiteti və Sakarya Universitetindən dəvət alıb. Mübadilə proqramında iştirak edən müəllim və tələbələrin bütün xərcləri Türkiyə Yüksek Öğretim Kurulu tərəfindən ödəniləcək. Proqramı uğurla başa vuran müəllim və tələbələrə sonda “Mevlana Mübadilə Proqramının” sertifikatları təqdim ediləcək. Tələbələrin əldə etdikləri kreditlər UNEC tərəfindən müvafiq qaydada tanınacaq. Qeyd edək ki, Türkiyə Respublikası tərəfindən maliyyələşdirilən və türkdilli ölkələrin ali təhsil müəssisələri arasında professor-müəllim və tələbə mübadiləsinin həyata keçirilməsini nəzərdə tutan “Mevlana Mübadilə Proqramın” da UNEC son iki ildə fəal iştirak edir. “Mevlana Mübadilə Proqramı” UNEC tələbələri və professor-müəllim heyəti üçün Türkiyənin qabaqcıl universitetlərində təhsil almaq və təcrübə keçmək imkanı təqdim edir. UNEC rektoru, professor Ədalət Muradov “Erasmus+”, “Mövlanə” və ikili diplom mübadilə proqramları çərçivəsində Avropa və Türkiyə universitetlərində təhsillərini davam etdirəcək UNEC tələbələri ilə görüşüb. Rektor tələbələri təbrik edərək, onlara təhsillərində uğurlar arzulayıb və tövsiyələrini verib. Mübadilə proqramlarının əhəmiyyətindən danışan rektor bildirib ki, burada əsas məqsəd yüksəkkeyfiyyətli təhsilin və beynəlxalq təcrübənin öyrənilməsidir. Tələbələrin Azərbaycanı təhsil alacaqları ölkədə layiqincə təmsil edəcəklərinə əmin olduğunu bildirən rektor, onlara həmin ölkələrin tarixini, mədəniyyətini öyrənməyi də tövsiyə edib. Eləcə də sosial tədbirlərdə aktiv iştirak etməyə çağırıb. Tələbələr xaricdə təhsil üçün onlara yaradılan şəraitə görə minnətdarlıqlarını bildiriblər. Qeyd edək ki, 2016-2017-ci tədris ilinin payız semestrində beynəlxalq mübadilə proqramları çərçivəsində UNEC-in 28 tələbəsi Fransa, Türkiyə, Rumıniya, Niderland, Cənubi Koreya və Polşanın aparıcı universitetlərində təhsillərini davam etdirəcək. Universitetdə müasir İKT-nin tətbiqinə daha bir nümunə Azərbaycan Dövlət İqtisad Universitetinin “UNEC Biznes Məktəbi” ilə İsveçrənin Cenevrə şəhərində fəaliyyət göstərən Biznes və Beynəlxalq Tədqiqatlar Universitetinin (UBIS) birgə ikili magistr dərəcə proqramları həyata keçirməsidir. Proqramlar “UNEC biznes məktəbi”nin MBA layihəsi çərçivəsində tətbiq olunur. İkili magistr dərəcə proqramları çərçivəsində diplomların verilməsi nəzərdə tutulur. UBIS tərəfindən biznesin idarə edilməsi (BBTU MBA), beynəlxalq əlaqələr (MA-IR), bank işi və maliyyə ixtisasları üzrə təhsil alan tələbələr magistr (MSBF) dərəcəsi alırlar. UNEC-UBIS ikili magistr dərəcə proqramı üzrə ümumilikdə 15 fənn (48 ABŞ kreditinə ekvivalent), o cümlədən UNEC-də 10 fənn (30 ABŞ kreditinə ekvivalent), UBIS tərəfindən 5 fənn (15 ABŞ kreditinə ekvivalent) tədris olunur və bir tədqiqat işi (3 ABŞ kreditinə ekvivalent) hazırlanır. UBIS tərəfindən keçiriləcək beş fənnin dördü Bakıda (hər fənn 1-2 həftəlik formatda), biri isə Cenevrədə (1 həftəlik intensiv formatda) təşkil edilir.

Anar Miriyev

Palitra.-2016.-27 avqust.-S.11.