BANM-in tədqiqat mərkəzinə ən gənc alim rəhbər təyin olundu

Sənan Eminov, həmçinin Kimya mühəndisliyi kafedrasında baş müəllim vəzifəsinə seçilib

Müasir dövrdə ölkələrin inkişaf səviyyəsi iqtisadi meyarlarla yanaşı, həm də onun təhsil sistemindəki vəziyyət və mövcud kadr potensialı ilə də ölçülür. Hərtərəfli və davamlı inkişafın etibarlı yolu elm və təhsilə daha çox diqqət və qayğı göstərilməsindən və onun müasir dünya standartlarına uyğun təşkilindən keçir. Məhz buna görə də dünyanın qabaqcıl dövlətləri özlərinin inkişaf səviyyələrini qoruyub saxlamaq və yeni hədəflərə doğru irəliləmək məqsədilə bu sahəyə birinci dərəcəli əhəmiyyət verirlər.

Gənclərimizin öz bilik və bacarıqlarını üzə çıxarmalarına münbit şərait yaradılıb

Ölkəmizdə də bu istiqamət hər zaman prioritet olub. Respublikanın inkişaf perspektivləri ictimai-iqtisadi və elmi-mədəni sahələrdə fəaliyyət göstərəcək kadrlar qarşısında müxtəlif dövlət qurumlarında, beynəlxalq təşkilatlarda, eləcə də özəl sektorda çalışaraq Azərbaycanda idarəetmənin, sənayenin, mədəniyyətin, elmin, təhsilin və səhiyyənin müasir standartlara cavab verən yeni bir mərhələyə keçidini təmin etmək vəzifəsini qoyur. Bütün bunlar təhsil ocaqlarında ölkəmiz üçün mütəxəssis hazırlanması zərurətini meydana gətirib. Gənclərin mənəvi inkişafında təhsil mühüm amillərdən biridir. Ölkəmizdə gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər. Bu gün gənclərimiz ölkə daxilində təhsil almaqla kifayətlənməyib, eyni zamanda təhsillərini xarici ölkələrdə davam etdirirlər. "2007-2015-ci illərdə Azərbaycan gənclərinin xarici ölkələrdə təhsil almasına dair Dövlət Proqramı" üzrə cari ildə 373 nəfər, ümumilikdə isə Proqramın qüvvədə olduğu 8 il ərzində 3558 nəfər Azərbaycan vətəndaşı dünyanın aparıcı təhsil müəssisələrində təhsil almaq hüququ qazanıb. Bu günədək 1000-ə yaxın tələbə artıq məzun olub. Sonuncu Dövlət Proqramı təqaüdçülərinin 2021-ci ildə məzun olması gözlənilir, onlar da tibb təhsili alan gənclərdir. Hazırda məzunların 60 faizi özəl, 40 faizi isə dövlət sektorunda fəaliyyət göstərir. Məzunların işlə təminatı sahəsində təcrübə və karyera layihəsi icra olunur. Layihə çərçivəsində məzunlar bir neçə dövlət və özəl qurumlarda təcrübə keçməyə başlayıblar. Bütün bunlar bir daha onu göstərir ki, gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər. Bu gün xaricdə təhsil alan bir çox azərbaycanlı gənclər var ki, onların yüksəkixtisaslı gənc kadr kimi Vətənə dönməsi və burada müvafiq qurumlarda çalışması ölkəmizin həm təhsil, həm də iqtisadi gücünün artmasına təkan verir. Onlardan bir qismi məhz müəllim ali təhsil ocaqlarında çalışmağa üstünlük verir. Hətta təhsil naziri Mikayıl Cabbarov da çıxışında bildirib ki, heç bir təhsil sisteminin gücü onun tərkibində fəaliyyət göstərən müəllimlərin gücündən üstün ola bilməz. Yüksək ictimai status daha bilikli və hazırlıqlı insanların bu peşəni seçməsinə stimul yaradır. Ölkəmizdə müəllim peşəsinə savadlı abituriyentlərin marağını artırmaq üçün yüksək bal toplayan tələbələr üçün xüsusi layihə həyata keçirilir və bu tədbirlər qısa zaman kəsiyində öz müsbət nəticələrini verib. Bu il müəllimlik ixtisasını seçən abituriyentlərin orta balı 16 bal artaraq 364, onların arasında 500 və daha yuxarı bal toplayan abituriyentlərin sayı əvvəlki ildən 37 faiz çox olub. Əgər bir il bundan əvvəl Azərbaycan Dövlət Pedaqoji Universitetinə qəbul olan tələbələrdən cəmi 19 nəfəri 500-dən artıq bal toplamışdısa, bu il onların sayı 10 dəfə artaraq 188 nəfərə çatıb. Bu il müəllimlərin tam şəffaf və elektronlaşdırılmış qaydada keçirilən işə qəbulu müsabiqəsində 3068 nəfər işlə təmin olunub.

Gənc alimin Biokütlənin bioyanacaqlara çevrilməsi ilə bağlı elmi məqaləsi dünyanın ən nüfuzlu jurnalında

Ölkəmizin tanınmış ali təhsil ocaqlarından biri də Bakı Ali Neft Məktəbidir (BANM). Bugünlərdə Bakı Ali Neft Məktəbində müasir ixtisaslar üzrə mütəxəssis hazırlığını və aktual mövzular üzrə elmi tədqiqatların aparılmasını təmin etmək məqsədilə yaradılan Bərpaolunan enerji mühəndisliyi üzrə tədris və tədqiqat mərkəzinə Böyük Britaniyanın London İmperial Kollecinin məzunu Sənan Eminov müdir təyin olunub. O, bu yaxınlarda London İmperial Kollecində doktorantura pilləsini uğurla başa vuraraq Bərpaolunan enerji və ətraf mühit mühəndisliyi üzrə doktorluq dissertasiyasını müdafiə edib və alimlik (PhD) dərəcəsinə yüksəlib. Sənan Eminov 1987-ci ildə Bərdə rayonunda anadan olub. Orta məktəbə Bərdə şəhəri 3 saylı orta məktəbdə başlayıb, sonra təhsilini Mingəçevir Özəl Türk Liseyində davam etdirib. Hələ məktəbdə oxuyarkən Kimya fənninə olan həvəsi onu bu elmin sirlərinə dərindən yiyələnməyə sövq edib. Elə bu həvəs də onun beynəlxalq olimpiadalarda uğur qazanmasına stimul verib. Təhsil aldığı müddətdə Kimya fənni üzrə respublika fənn olimpiadalarında 3 qızıl medal qazanıb. O, 2003-cü ildə Yunanıstanda keçirilən 35-ci Beynəlxalq Kimya Olimpiadasında bürünc medal, 2004-cü ildə Almaniyada keçirilən 36-cı Beynəlxalq Kimya Olimpiadasında qızıl medal qazanıb, 2005-ci ildə Tayvanda keçirilən 37-ci Beynəlxalq Kimya Olimpiadasında ölkəmizi layiqincə təmsil edərək qızıl medala sahib çıxıb. “Kimya” beynəlxalq fənn olimpiadaları tarixində ilk dəfə olaraq Tayvanda keçirilən Beynəlxalq Kimya Olimpiadasında imtahanın nəzəriyyə bölməsində ən yüksək balı (229 mütləq baldan 228 bal) topladığı üçün mütləq birinciliyə layiq görülüb və xüsusi mükafatla təltif olunub. Olimpiadalardakı uğurlarından sonra Türkiyənin Orta Doğu Texniki Universitetinə qəbul olan Sənan Eminov I kursu bitirdikdən sonra təhsilini Almaniyanın Beynəlxalq Bremen Universitetində davam etdirib. Almaniyada təhsil aldığı müddətdə ilk elmi işi "Qallotanninlərin yaşıl çayın tərkibindən ekstraksiyası" mövzusunda olub. Sonra o, 2010-2011-ci illərdə SOCAR-ın təqaüd proqramı ilə Böyük Britaniyanın London İmperial Kollecində magistraturada təhsil alıb. Magistratura pilləsini bitirdikdən sonra Sənan Eminov Azərbaycan Respublikasının Prezidenti İlham Əliyevin sərəncamı ilə təsdiq edilmiş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” xətti ilə 2011-2015-ci illərdə London İmperial Kollecində doktorantura pilləsinə qəbul olub və orada Gələcək üçün enerji (Energy Future’s Lab) və professor Tom Veltonun rəhbərlik etdiyi Üzvi kimya və ekologiya laboratoriyalarında bərpaolunan enerji sahəsi üzrə elmi tədqiqatlar aparıb. Elmi-tədqiqat sahəsi ion mayelərdən istifadə edərək biokütlənin parçalanması və alternativ enerji mənbəyi olan platforma kimyəvi maddələrinə çevrilməsidir. Bu elmi tədqiqat işi yeni nəsil bioenerjinin alınması və tətbiqini əhatə edir. Biokütlənin bioyanacaqlara çevrilməsi hal-hazırda tükənməkdə olan və bərpa oluna bilməyən nefti əvəz etməsi üçün ideal variant hesab olunur. Onun bu sahədə elmi məqalələri dünyanın ən nüfuzlu jurnallarından biri olan ACS (American Chemical Society) Sustainable Chemistry and Engineering-ə təqdim olunub. Elmi məqalələrindən biri 2014-cü ildə çap olunub, redaktorlar tərəfindən ən yaxşı məqalə seçilib (Editors’ Choice Article) və həmçinin bu elmi məqalə jurnalın üz qabığında öz əksini tapıb. Sənan Eminov bir çox beynəlxalq elmi konfrans və simpoziumlarda əsas məruzəçilərdən biri kimi iştirak edib. Həmçinin onun məruzələri və tezisləri beynəlxalq konfransların elmi məqalələr toplularında yer alıb. Beləliklə, onun fəaliyyətini nəzərə alaraq Bakı Ali Neft Məktəbinin rektoru Elmar Qasımovun dəvəti ilə ali məktəbin Kimya mühəndisliyi kafedrasında baş müəllim vəzifəsinə təyinat alan Sənan Eminov, həmçinin sözügedən mərkəzə rəhbər təyin olunub.

Nigar Abdullayeva

Palitra.-2016.-10 fevral.-S.11.