Vyanada azərbaycanlı rəssamın sərgisi

Vyanadakı Azərbaycan Mədəniyyət Mərkəzində Əməkdar rəssam Əsmər Nərimanbəyovanın əsərlərindən ibarət “Rənglərin poeziyası” adlı sərgi açılıb. Tədbirdə Vyanada akkreditə olmuş diplomatik korpusun və beynəlxalq təşkilatların nümayəndələri, avstriyalı incəsənət həvəskarları, soydaşlarımız iştirak ediblər.

Mədəniyyət Mərkəzinin rəhbəri Leyla Qasımova tədbirdə çıxış edərək Əsmər Nərimanbəyovanın müasir Azərbaycan rəngkarlıq sənətinin tanınmış nümayəndələrindən biri olduğunu bildirib. O qeyd edib ki, Ə. Nərimanbəyovanın yaradıcılığına qiymət verərkən öncə onun böyüyüb boya-başa çatdığı və incəsənət xadimi kimi yetişdiyi mühitə nəzər salmaq lazımdır. Görkəmli azərbaycanlı rəssam, SSRİ-nin və Azərbaycanın dövlət mükafatları laureatı, Xalq rəssamı Toğrul Nərimanbəyov və istedadlı heykəltəraş, Azərbaycanın Əməkdar rəssamı Elmira Hüseynovanın ailəsində dünyaya göz açan Ə. Nərimanbəyovanın hələ uşaq yaşlarından rənglər dünyası ilə tanış olduğu, bu yaradıcı mühitin onun əsərlərinə təsirsiz ötüşmədiyi qeyd edilib. Azərbaycanlı rəssamın əsərləri dünyanın müxtəlif ölkələrində sərgilənib və bir sıra məşhur qalereyalarda saxlanılır. Əsərlərinin musiqi və incəsənət şəhəri olan Vyanada nümayiş etdirilməsindən məmnunluğunu bildirən Ə. Nərimanbəyova sərginin təşkil olunmasında göstərdiyi təşəbbüsə və dəstəyə görə Azərbaycan Mədəniyyət Mərkəzinin rəhbəri Leyla Qasımovaya təşəkkürünü bildirib. Sonra Vyanada yaşayan gənc azərbaycanlı musiqiçilər Təhminə Abdullayeva (skripka) və Müşfiq Quliyev (fortepiano) Azərbaycan və Avropa bəstəkarlarının əsərlərindən ibarət musiqi proqramı ilə çıxış ediblər. Sərgi mart ayının sonunadək sənətsevərlər üçün açıq olacaq.

Palitra.-2016.-19 fevral.-S.13.