Azərbaycandan Türkiyəyə turizm çağırışı

Səyahət və Turizm Peşəkarları Beynəlxalq Assosiasiyasının ("Skal İnternational") Bakı klubunun Azərbaycan üzrə nümayəndəsi, “Park İnn” hotelinin meneceri Ahməd Can Yeşildağın təşkilatçılığı ilə keçirilən tədbirdə çıxışı zamanı o, Bakının 17-19 iyun 2016-cı il tarixləri arasında “Formula 1” yarışlarına ev sahibliyi edəcəyini bildirib: “Bu mənada bütün hazırlıqlar tamamlanır.

Azərbaycan dövləti çox ciddi investisiyalarla şəhərdə turizmi də inkişaf etdirmək üçün əhəmiyyətli addımlar atır. Biz də turizm elçiləri olaraq belə əhəmiyyətli tədbirlərə özümüzü hazırladıq. Türkiyədə Azərbaycanın daha yaxşı tanıdılması məqsədilə türk xalqını buranı görməyə dəvət edirik. Müvafiq qiymətlər və yaxşı bir imiclə Azərbaycan turizmini ayağa qaldıracağıq. Türkiyəli qardaşlarımızı Azərbaycanda gözləyirik və onlara qapımız və könlümüz açıqdır”. Azərbaycan Sağlamlıq və Termal Turizminə Dəstək Assosiasiyasının sədri Ruslan Quliyev, Baku City Circult-un səlahiyyətli nümayəndələri Bülent Özedim və Nigar Apradarai də “Formula 1” yarışlarının bütün infrastruktur işlərinin başa çatdırıldığını bildiriblər: “Formula” yarışları çox çətindir. Bunun üçün qüsursuz bir xidmət təqdim etməyə çalışırıq. 40 min insanın Azərbaycanda “Formula 1” yarışlarını izləməsi üçün hazırlıq görülüb. Xaricdən 15 min nəfərin gəlməsini gözləyirik. Azərbaycanda ölkənin səlahiyyətli şəxsləri turizmin inkişafı üçün əhəmiyyətli səylər göstərir”. Azərbaycandakı Türkiyə səfirliyinin müşaviri Meral Barlas isə Türkiyənin Azərbaycan ilə əlaqələrinin çox mükəmməl bir şəkildə davam etdiyini və iki ölkənin bir-birinə olan yaxınlığını hər insanın yaşayaraq gördüyünü ifadə edib və türkləri Bakını və Azərbaycanı görməyə dəvət edib.

Nigar

Palitra.-2016.-2 iyun S.4.