ADNSU-nun məzunu Cəlal Şirəlizadə: “ADNSU tez bir zamanda dünya səviyyəli universitetə çevriləcək”

“Son dönəmdə digər sahələrin də inkişaf etdirilməsi və iqtisadiyyatın şaxələndirilməsi üçün böyük addımlar atılsa da, istər tarixi, istərsə də müasir dövrdə dünya bazarında iştirak baxımından neft bizim üçün çox önəmlidir. Təbii ki, belə olan halda, böyük ənənələrə, tarixi keçmişə malik olan, adı birbaşa neftlə bağlı olan bir universitetdə təhsil almaqla çox şeylər əldə etmək olar”.

Layihə çərçivəsində müsahibimiz Azərbaycan Dövlət Neft və Sənaye Universitetinin (ADNSU) İqtisadiyyat və menecment fakültəsinin (İMF) 2012-2016-cı illər üzrə təhsil alan və bu il məzun olacaq tələbələrdən biri Cəlal Şirəlizadədir. O, təhsil aldığı müddət ərzində verdiyi bütün imtahanlardan (44 imtahan) A qiyməti alaraq təkrarlanması mümkünsüzə yaxın olan bir uğura imza atıb.

-Səni köhnə adı ilə seçib daxil olduğun Azərbaycan Dövlət Neft Akademiyasına (ADNA), yeni adı ilə bitirdiyin Azərbaycan Dövlət Neft və Sənaye Universitetinə gətirən səbəblər nə idi?

- Mən təhsilin önəmini dərk edən və bunu kiçik yaşlarımdan etibarən mənə aşılayan həkim və mühəndis oğluyam. Məktəb vaxtından lap aşağı siniflərdən sona qədər hər zaman oxuduğum təhsil müəssisələrinin ən seçilən tələbələrindən biri olmuşam və daim birincisi olmağa çalışmışam. Hesab edirəm ki, bu günə qədər əldə etdiyim nəticələr də məhz bu birincilik arzusunun və onun uğrunda apardığım mübarizənin məhsuludur. Universitet seçimi ilə bağlı 11-ci sinfin əvvəllərindən etibarən düşünməyə başlamışam və təhsil aldığım “Araz” hazırlıq kurslarının təsiri ilə bir az Qafqaz Universitetinə, bir az da həmin dönəmin ən populyar universiteti hesab edilən Prezident yanında İdarəçilik Akademiyasına meyilli olmuşam. Xaricdə təhsil almaq arzum isə müəyyən obyektiv və subyektiv səbəblərdən baş tutmayıb. Hazırlıq dönəmində əldə etdiyim uğurlu nəticələri ən zəruri olan vaxt - abituriyentlərin dili ilə desək “həyatımızı dəyişəcək 3 saat” boyunca qazana bilmədim və hədəflədiyim nəticədən 127 bal az bal topladım (573). Bu həmin dönəmə qədər başıma gələn, bəlkə də, ən pis hadisə idi, amma zamanla anladım ki, hər işdə bir xeyir var və bu balın önəmi, sadəcə I kursun ilk gününə qədərdir, sonrası yeni başlanğıc, yeni mübarizələr və onlarla başqa 3 saatlardır. Təbii ki, topladığım bala əsasən ödənişsiz təhsil ala biləcəyim yeni alternativlər ortaya çıxdı. BDU, İqtisad Universiteti və ADNA-ADNSU. Birinci alternativi beynimdə, dərhal sildim, çünki çoxlu sayda qohum, tanış orda oxuyurdu və bilirdim ki, istədiklərimi əldə edə biləcəyim bir yer deyildi. Yerdə qalan iki variant arasında seçimdə valideynlərimin məsləhəti həlledici rol oynadı və mən ADNA tələbəsi oldum.

- İlk təəssüratların necə oldu və bunlar zamanla necə dəyişdi?

- Düzünü desəm, ilk təəssüratlarım heç də xoş deyildi. İlk dəfə qeydiyyat üçün gəldiyim zaman əsas binada deyil, İqtisadiyyat fakültəsi üçün ayrılmış binada təhsil alacağımı öyrəndim. Qarşıma çıxan bir neçə nəfərdən bu binanın yerini öyrənməyə çalışsam da, tanıyan olmadı, axırda küçənin ünvanı ilə gəlib çıxdım. Binanın xarici görünüşü çox pis vəziyyətdə idi. Mən məhz görünüş baxımından bəyənmədiyim bu binada 4 il boyunca necə təhsil alacağımı düşünə-düşünə qeydiyyat üçün ora daxil oldum. Daxili görünüşün daha qənaətbəxş olması, qeydiyyat prosesinin səmimi bir şəraitdə keçməsi, daha sonralar baş verən onlarla gözəl hadisələr bu binanı çox sevməyimə gətirib çıxardı və mən bunun sayəsində ilk dəfədən mühakimə etməməyi öyrəndim. Həmin bina Nizami küçəsində yerləşir və III korpus adlanırdı və keçmiş dekanımız Azad Əliyevin təşəbbüsü və səyləri nəticəsində daha sonra yüksək səviyyədə təmir edildi. Artıq gələn ildən həmin bina Fransız - Azərbaycan Universitetinin binası olacaq.

- ADNSU həm təhsil, həm ənənələr baxımından bir gənc üçün nə verir?

- Azərbaycan neft ölkəsidir. Son dönəmdə digər sahələrin də inkişaf etdirilməsi və iqtisadiyyatın şaxələndirilməsi üçün böyük addımlar atılsa da, istər tarixi, istərsə də müasir dövrdə dünya bazarında iştirak baxımından neft bizim üçün çox önəmlidir. Təbii ki, belə olan halda, böyük ənənələrə, tarixi keçmişə malik olan, adı birbaşa neftlə bağlı olan bir universitetdə təhsil almaqla çox şeylər əldə etmək olar. Hazırda burada təhsil almaq üçün çox yaxşı şərait var və günü-gündən daha da yaxşılaşır. ADNSU mükəmməldirmi? Xeyr! Səhvsiz insan olmadığı kimi, qüsursuz universitet də ola bilməz. Lakin hesab edirəm ki, yüksək səviyyədə təhsil almaq, özünü istər ixtisaslı kadr, istərsə də cəmiyyətə yararlı bir vətəndaş kimi yetişdirmək istəyən gənclərimiz ADNSU-ya qəbul olub, bu şəraiti və imkanları öz gözləri ilə görə bilərlər.

-Son ildə, IV kursda universitetdə hansı dəyişiklikləri müşahidə etdin və gələcək üçün nə düşünürsən?

- İlk öncə, təbii ki, ad dəyişdi. ADNA-dan ADNSU-ya keçid elədik və hesab edirəm ki, bu dəyişimlə birlikdə universitetimiz yenidən canlandı. Yəqin ki, illər sonra ADNSU haqqında bir kitab yazılacağı halda, tarixi professor Mustafa Babanlıdan əvvəl və sonra olaraq ikiyə ayırmaq olar. Tələbələrin birbaşa şahid olduğu və onların sayəsində ictimaiyyətə də məlum olduğu kimi, cənab rektor, həqiqətən də, böyük işlər görüb və görməyə də davam edir. Qeyri-adi bir şey edirmi? Yox, sadəcə, lazım olanı edir. Lakin Mustafa Babanlını fərqləndirən əsas cəhət odur ki, o, çox qısa zamanda düzgün və qəti addımlarla uğurlu nəticələr əldə etdi. Hesab edirəm ki, onun yaratdığı və uzun illər davam edəcək bu irsə görə hələ uzun müddət bu şəxsə minnətdar olacağıq. Əminliklə deyirəm ki, o, artıq indidən ona etibar edən Prezidentin və 6 ay boyunca yeni rektor gözləyən tələbələrin ümidlərini artıqlaması ilə doğruldub. Mən rektorumuzun yeniliklərini aşağıdakı kimi sıralamaq istərdim:

İlk olaraq ədalətli və şəffaf mühit yaratdı. Təhsilin ən böyük düşməninə çevrilən rüşvət və tapşırıq kimi uzun illər təhsilimizin “boğazından” yapışan iki məfhumu birdəfəlik söküb atdı. Təbii ki, əziyyəti qarşılığında qiymətləndiriləcəyindən əmin olan tələbəyə oxumaq və özünü inkişaf etdirmək üçün bundan gözəl şərait ola bilməz.

Həmçinin bariyerləri aradan qaldırdı. Əvvəlki illərdə universitetin yüksəkvəzifəli şəxsləri ilə danışmaq, nədənsə şikayət etmək, yaxud hər hansı bir problemi çatdırmaq müşkül məsələ idi. Lakin Mustafa müəllim həftəlik qəbul, “açıq mikrofon” günləri həyata keçirir, gənclərin ən aktiv olduğu yerdə, sosial mediada belə, bir sıra hallarda sualları və problemləri dinləyib onlara aydınlıq gətirir və həlli üçün tapşırıqlar verir. Hər zaman bizdən biri kimi davranan bu insana hörmət etməmək və sevməmək mümkün deyil.

Eləcə də tələbəyə ən yüksək səviyyədə hörmət qoyuldu. Əvvəlki illərdə qeyd etdiyim boşluqlardan sui-istifadə edərək bəzi müəllimlər tələbələrin haqqını tapdalayır, onlar üçün problem yaradırdılar. Lakin sistemin tamamilə şəffaflaşdırılması ilə bərabər müəllim-tələbə münasibətləri də yeni bir fazaya keçdi. Qarşılıqlı hörmət üzərində olan bu münasibətlər tələbələrə daha sərbəst olmaq, istər yaxşı məsələlər, istərsə də problemlər barədə daha rahat danışıb fikir mübadiləsi etməyə imkanı verdi.

Təhsilin səviyyəsinin artırılması və işində peşəkar olacaq ixtisaslı kadrların hazırlanması üçün böyük addımlar atdı. Dərslərin daha yüksək səviyyədə həyata keçirilməsi üçün çalışan rektor nəinki ölkə daxilində, eyni zamanda beynəlxalq səviyyədə universitetimizin nüfuzunun artırılması üçün fəaliyyət göstərir. Növbəti ildən açılacaq bir sıra ingilisdilli fakültələr, Fransız-Azərbaycan məktəbi təhsilin keyfiyyətinin artırılması və beynəlxalq standartlara uyğunlaşdırılmasında mühüm addımlar olacaq. Ümumiləşdirsək, Mustafa Babanlı universiteti, bəlkə, də adının dəyişməsi ilə birlikdə 0-dan yaradıb. Ümid edirəm ki, növbəti illərdə onun başçılığı altında daha böyük uğurlar əldə edərik.

Nigar Abdullayeva

Palitra.-2016.-4 iyun.-S.11.