“Ən yaxşı təqdimat” müsabiqəsinin qalibləri mükafatlandırılıb

Ümummilli lider Heydər Əliyevin anadan olmasının 93-cü ildönümü münasibətilə təşkil olunmuş “Ən yaxşı təqdimat” müsabiqəsi qaliblərinin mükafatlandırılması mərasimi keçirilib. Tədbirdən öncə iştirakçılar Fəxri xiyabanda Heydər Əliyevin məzarını ziyarət edib, abidəsi önünə gül dəstələri qoyublar. Ümumi təhsil məktəblərinin IX-XI sinif şagirdləri arasında keçirilən təqdimat müsabiqəsi Təhsil Nazirliyi, Heydər Əliyev Fondu, Yeni Azərbaycan Partiyası, Rabitə və Yüksək Texnologiyalar Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi tərəfindən təşkil olunub. Tədbirdə baş nazirin müavini, Yeni Azərbaycan Partiyasının sədr müavini-icra katibi Əli Əhmədov, baş nazirin müavini Elçin Əfəndiyev, təhsil naziri Mikayıl Cabbarov, Heydər Əliyev Fondunun icraçı direktoru Anar Ələkbərov, Dövlət İmtahan Mərkəzinin Direktorlar Şurasının sədri Məleykə Abbaszadə, Müəllif Hüquqları Agentliyinin sədri Kamran İmanov, rabitə və yüksək texnologiyalar nazirinin müavini İltimas Məmmədov, Azərbaycan Təhsil İşçiləri Azad Həmkarlar İttifaqı Respublika Komitəsinin sədri Səttar Mehbalıyev, millət vəkilləri, təhsil müəssisələrinin rəhbərləri, tanınmış ziyalılar, müəllimlər və şagirdlər iştirak ediblər.

Əli Əhmədov: “Prezident İlham Əliyevin islahat strategiyasının

ən mühüm istiqaməti

təhsildir”

Tədbirdə çıxış edən baş nazirin müavini Əli Əhmədov bildirib ki, Azərbaycan Prezidenti İlham Əliyevin islahatlar strategiyasının ən mühüm istiqaməti təhsilin üzərinə düşür. O bildirib ki, təhsil sahəsində əhəmiyyətli addımlar atılır: “Azərbaycanın gələcəyini parlaq görmək istəyiriksə, Azərbaycan təhsilini və elmini inkişaf etdirməliyik. Təhsil işçiləri də bu sahədə öz üzərinə düşən məsuliyyəti yaxşı dərk edirlər. Məqsədlərə nail olmaq üçün lazımi addımlar atılır. Şagirdlərin müasir düşüncəli vətəndaşlar kimi yetişməsi üçün təhsil işçiləri əllərindən gələni əsirgəmirlər”. Ə. Əhmədov qeyd edib ki, bu gün YAP tərəfindən 40 ali məktəb tələbəsinə 50 manat məbləğində təqaüd verilir və gələcəkdə bu sıraya daxil olan tələbələr daha da artacaq.

Nazir:

“Ötən dövrdə kurikuluma əsaslanan 276 adda yeni dərslik və müəllim üçün metodik vəsait hazırlanıb”

Təhsil naziri Mikayıl Cabbarov “Ən yaxşı təqdimat” müsabiqəsinin Heydər Əliyevin zəngin siyasi irsinin, həyat və fəaliyyətinin gənc nəsil tərəfindən öyrənilməsi işini daha da gücləndirmək baxımından mühüm rol oynadığını bildirib. Nazir bildirib ki, təhsildə aparılan islahatlar içərisində əsas yeri ümumtəhsil pilləsi üzrə dərsliklərin hazırlanması təşkil edir: “Doğrudur, bu istiqamətdə işlərimiz istədiyimiz sürətlə getməsə də, son 3 ildə müəyyən uğurlarımız olub. Bu dövrdə kurikuluma əsaslanan 276 adda yeni dərslik və müəllim üçün metodik vəsait hazırlanıb”. O bildirib ki, dərslik hazırlığı sahəsində Təhsil Nazirliyi tərəfindən bir sıra işlər görülüb, qiymətləndirmədə şəffaflığı təmin etmək üçün dərslik layihələri bir-birindən asılı olmayaraq müxtəlif ekspertizalara göndərilib. Nazir qeyd edib ki, dərslikləri məmurlar yox, bu sahənin mütəxəssisləri, alimləri yazır: “Təəssüf ki, dərslik hazırlığında müəllim qıtlığı hiss edilir. Aydındır ki, dərslik hazırlığına ən yaxşı mütəxəssislər cəlb olunmalıdır. Amma hazırkı sosial-iqtisadi şəraitdə onları yalnız çağırışlarla həvəsləndirmək mümkün deyil. Nazirlik sifariş əsasında ehtiyat dərsliklərin hazırlanması, bu işə ən yaxşı mütəxəssislərin qoşulması təşəbbüsü ilə çıxış edərək müvafiq normativ sənədlərin layihələrini hökumətə və digər aidiyyəti qurumlara təqdim edir. Nazirlik dərslik hazırlığı sahəsində bu il bir yenilik də edib. Belə ki, yeni hazırlanan dərslik layihələrini çapa vermədən öncə nazirliyin internet portalında yerləşdirməklə ictimai müzakirəyə çıxarıb”.

“Bəzi məktəblərdə müəyyən fənlər üzrə

dərs saatları azalıb”

Nazir onu da qeyd edib ki, Azərbaycanda məktəbəqədər hazırlıq pilləsinin 2016-2017-ci ildən dövlət büdcəsindən maliyyələşməsi və hamı üçün əlçatan olması istiqamətində işlər davam etdirilir. Məqsəd 2020-ci ilədək ölkədə uşaqların məktəbəqədər təhsil səviyyəsinin əhatəsini 70%-ə çatdırmaqdır. Nazir bildirib ki, ölkədə təlim texnologiyalarını çatdırmağa imkan verən mexanizmlər tətbiq olunmağa başlanıb: "Bu məqsədlə Bakı Pedaqoji Kadrların İxtisasartırma və Yenidən Hazırlanma İnstitutunun bazasında Təhsil İşçilərinin Peşəkar İnkişafı İnstitutu yaradılıb. Bu qurum modul kredit sisteminə əsaslanaraq, bütün kateqoriyadan olan təhsil işçilərinin peşəkar inkişafı ilə əlaqədar olan siyasətin müəyyənləşdirilməsi, təlimlərin təşkili və koordinasiya ilə məşğul olacaq".

M. Cabbarov əlavə edib ki, hazırda təhsilin əsas trendlərini öyrənmək, təhlil etmək və tətbiqi imkanlarını müəyyən etmək, yeni düşüncə və idarəetmə keyfiyyətlərini tələb edir. Onun sözlərinə görə, təhsil sistemində tətbiq edilən yeniliklərdən biri də pilot olaraq seçilmiş 58 məktəbdə 176 təmayül sinfin açılmasıdır. Həmin məktəblərdə ixtisas seçmiş şagirdlərə qeyri-profil fənlərin dərs saatlarının azalması hesabına seçdikləri istiqamət üzrə daha dərin biliklər verilir: "Bu islahatın məqsədi ümumi təhsilin keyfiyyətini yüksəltməkdir. Bununla əlaqədar tədris resurslarının hazırlanması və təmayüllər üzrə təhsilin əhatə dairəsinin genişləndirilməsi qarşıda duran vəzifələrdəndir".

Müəllimlər üçün yeni əməkhaqqı sisteminə

keçiləcək

Nazir bildirib ki, müəllimlərin diaqnostik qiymətləndirilməsi ölkənin digər şəhər və rayonlarında da aparılacaq: “Bundan sonra Təhsilin İnkişafı üzrə Dövlət Strategiyasına uyğun olaraq əməkhaqqı islahatının ikinci mərhələsinə - diferensial, yəni peşəkarlıq səviyyəsindən və əməyin nəticələrindən asılı olan əməkhaqqı sisteminə keçməyi planlaşdırırıq”. O bildirib ki, müəllim əməyinin stimullaşdırılması ilə bağlı son 2 ildə atılan addımlar bu peşənin nüfuzunun yüksəldilməsində dönüş nöqtəsi olub. Nazir qeyd edib ki, 2014-cü ildə Bakı şəhərində 30 min, 2015-ci ildə ölkənin 3 şəhər və 9 rayonunda 26 min müəllimin bilik və bacarıqlarının diaqnostik qiymətləndirilməsi aparılıb: “Beləliklə, ölkə üzrə müəllimlərin 40%-nin dərs yükü 1,5 dəfə, vəzifə maaşı isə 2 dəfə artıb. Nəticədə müəllimlərin ortaq aylıq əməkhaqqı ölkə üzrə müvafiq göstəriciyə yaxınlaşıb”.

M. Cabbarov əlavə edib ki, ölkədə müəllim-şagird nisbətində əsaslı irəliləyişlərə nail olunub. Onun sözlərinə görə, bu göstərici 2012-2013-cü tədris ili müqayisədə 2015-2016-cı ildə 1:10-dan, 1:12 nisbətinə yüksəlib.

Nazir bildirib ki, Azərbaycanda yüksək nəticə göstərən və daha yüksək biliklərə malik olan müəllimlər daha yüksək əməkhaqqı almalıdır. Müəllimlərin əmək haqqında diferensiallaşdırmanın tətbiqi ilə bağlı konsepsiyanın hələ hazırlandığını deyən nazirin sözlərinə görə, bununla bağlı meyarlar ekspertlərin təklifləri aidiyyəti dövlət orqanları ilə birlikdə qiymətləndiriləndən sonra müəyyənləşəcək. Təhsil naziri yeni yaradılan Regional Maliyyələşmə İdarələri Regional Təhsil İdarələrinin yaradılmasına keçidə təkan ola bilməsi barədə məsələyə də münasibət bildirib: "Regional maliyyələşmə idarələri 2016-cı ilin dövlət büdcəsi haqqında qanunun tətbiqinə dair onların üzərinə qoyulan vəzifələri həyata keçirir. Bütün bu işlərin əsas məqsədi ondan ibarətdir ki, ümumi təhsil sistemimizin maddi təminatı-təchizatı, cari təmiri mümkün qədər optimallaşdırılmış formada həyata keçirilsin”.

"Yaxın 5 ildə Azərbaycanda

şagirdlərin sayı 30 faiz artacaq"

Nazir onu da bildirib ki, Azərbaycanda yüksək demoqrafik vəziyyət nəticəsində son illər I sinfə gələn şagirdlərin sayında əhəmiyyətli artım müşahidə olunur. 2013-cü ildə I sinif şagirdlərinin sayı 138 min olmuşdusa , 2014-cü ildə bu göstərici 152 min, 2015-ci ildə 157 mindən çox olub. Onun sözlərinə görə, 2016-cı ildə I sinfə gedəcək şagirdlərin sayının 165 mindən çox olacağı proqnozlaşdırılır: “Bütövlükdə qarşıdakı 5 ildə ölkə məktəblərində təhsil alan şagirdlərin sayı 30% artacaq. Bu isə öz növbəsində təhsilin dayanıqlı fəaliyyətinin təmin edilməsi üçün yeni yanaşmaların tətbiqini zəruri edir. Ümumi təhsilin müəyyən mərhələsində şagirdlərin təhsildəki göstəricilərinə görə müxtəlif kateqoriyalara ayrılmasını tələb edir. Bu baxımdan ilk peşə ixtisas təhsilinin əhəmiyyəti daha da artır. Bir sıra beynəlxalq və yerli təşkilatlarla memorandumlar imzalanıb, birgə əməkdaşlıq çərçivəsində biznes qurumları ilə tərəfdaşlıq əlaqələrinin genişləndirilməəsi, məzunların işlə təminatına dəstəyin verilməsi, kurikulumların hazırlanması işlərinə başlanıb. Bununla yanaşı, Təhsil Nazirliyi peşə təhsil sisteminin yenidən qurulması, bu sahədə çevik idarəetmənin təmin edilməsi, əmək bazarında çevik və adekvat təklif verməyə qadir olan ilk peşə-ixtisas təhsil proqramlarının işlənib hazırlanması məqsədilə yeni qurumun yaradılması barədə çıxış edib. Bu günlərdə dövlət başçısı Təhsil Nazirliyi yanında Peşə təhsili üzrə Dövlət Agentliyinin yaradılması haqqında fərman imzalayıb. Yeni qurum ölkədə ilk peşə-ixtisas təhsili sahəsində yeni idarəetmə modelinin hazırlanmasına, peşə hazırlığının səmərəliliyin artırılmasına, rəqabətqabiliyyətli yüksəkixtisaslı kadrların hazırlanmasına öz töhfəsini verəcək, bu sahədə əsaslı dönüşə imkan yaradacaq”.

Tədbirin sonunda “Ən yaxşı təqdimat” müsabiqəsinin nəticələrinə əsasən 5 nəfər I, 11 nəfər II, 16 nəfər III dərəcəli diplomla, 18 nəfər isə tərifnamə ilə təltif olunub. Müsabiqə qaliblərinə müxtəlif qiymətli hədiyyələr təqdim edilib.

Nigar Abdullayeva

Palitra.-2016.-6 may.-S.7.