“Mənə səs verən, dəstək olan hər kəsə minnətdarlığımı bildirirəm”

Final konsertində Azərbaycan birinci hissədə çıxış edəcək

Azərbaycanın “Eurovision-2016” mahnı müsabiqəsində təmsilçisi Səmra Rəhimli Avropanın nüfuzlu yarışmasının finalına vəsiqə qazanıb. Müsabiqədə ölkəmizin təmsilçisi Səmra Rəhimli Amir Ali, Jeyk Erikson, Henrik Vikstromun müəllifi olduqları “Miracle” mahnısını ifa edib.

Səhnə tərtibatının müəllifi Royn Söderluntdur. O, həmçinin Azərbaycanın 2009-cu ildəki səhnə tərtibatının da rejissoru olub. Təmsilçimizin ifası 4 bek vokalçı rəqqasın çıxışı ilə müşayiət olunub. Builki səhnə tərtibatı “Alisa möcüzələr ölkəsində” süjeti üzərində qurulub. Təmsilçimizə yardımçı olan arxadakı ifaçılar Cesika Marberqen, Vera Prada 2011-ci ildə “Eurovision” mahnı müsabiqəsinin qalibləri Eldar Qasımov və Nigar Camalla eyni səhnəni bölüşüblər. Təmsilçimizin şousunda sevgidə baş verən dəyişikliklər səhnə performansında təcəssüm olunur. Musiqinin sözləri nağılı xatırlatsa da sonda dramatik ayrılıq müşahidə olunur. Mahnının bəstəkarı Amir Ali “Eurovision”da iştirak edən Aleksandr Ribak, yunanıstanlı Helena Paparizu və digərlərinə qələbə qazandıran musiqilərin də müəllifidir. Azərbaycan təmsilçisi geyimindən tutmuş səhnə tərtibatına qədər mükəmməl performans nümayiş etdirib. Həzin səsi, gözəl ifa tərzi ilə seçilən Səmra Rəhimli “Eurovision-2016” mahnı müsabiqəsinin favoritlərindən hesab olunur. Jurnalistlər və bu müsabiqəni izləmək üçün Avropanın müxtəlif ölkələrindən gəlmiş fanlar təmsilçimizin finalda şansını yüksək qiymətləndirirlər. Səmra Rəhimli yarımfinaldan sonra keçirilən mətbuat konfransında bunları deyib: “Mən çox xoşbəxtəm, yəqin ki, qələbə sevincini sabah anlayacağam. Mənə səs verən, dəstək olan hər kəsə minnətdarlığımı bildirirəm. Finalda qələbə qazanmaq üçün əlimdən gələni əsirgəməyəcəyəm”. Səmra Rəhimli jurnalistlərin “Daha öncəki Azərbaycan təmsilçiləri finala vəsiqə qazanıb. Siz bununla bağlı təzyiq yaşadınızmı?” sualını cavablandırarkən deyib: “Mən ölkəmi bu mötəbər müsabiqədə təmsil etdiyim üçün qürur duyuram. Burada olduğum üçün çox sevincliyəm. İnanmıram ki, nə zamansa bu qədər xoşbəxt ola bilərəm. Mən hər hansı bir təzyiq hiss etmirəm. Mən yalnız tamaşaçıların dəstəyini hiss etdim. Çıxışım zamanı yalnız ifa və performansım haqqında düşünürəm. Mən çox şadam. Hisslərimi izah edə bilmirəm. Möhtəşəm şou göstərmək arzusundayam. Komandamızın üzərində çalışdığı performans alındı”. Mətbuat konfransında hər bir təmsilçinin çıxışından sonra onların finalda hansı hissədə çıxış edəcəkləri müəyyənləşdirilib. Məlum olub ki, mayın 14-də keçiriləcək final konsertində Azərbaycan, Niderland Krallığı, Macarıstan birinci, Malta, Avstriya, Kipr, Çexiya, Rusiya, Ermənistan və Avstriya isə ikinci hissədə çıxış edəcək.

Palitra.-2016.-12 may.-S.13.