Nəsimi rayonunda Müəllim Günü qeyd olunub

Hər il oktyabrın 5-i bütün dünyada Müəllim Günü kimi qeyd olunur. Bu gün müəllimlər öz peşə bayramlarını keçirirlər. Beynəlxalq müəllimlər günü, 5 oktyabr – bu tarixin qeyd edilməsinə dair qərarı ilk dəfə 1966-cı il oktyabrın 5-də YUNESKO verib. Bu təşkilat tərəfindən müəllimlərin statusunun artırılması ilə bağlı tövsiyə xarakterli sənəd qəbul edilib. İndi dünyanın 100-dən çox ölkəsində oktyabrın 5-də müəllimlər peşə bayramını qeyd edir.

"Müəllim - geniş ictimai mənada mütəfəkkir, ictimai xadim, insanların dünyagörüşünü və inamını formalaşdıran, onlara həyatda öz yolunu tapmaqda kömək edən" insandır. Müəllim - ilk növbədə insandır, bilikli, savadlı, tərbiyəli, uşaqları və peşəsini sevən insandır, uşaqları, gəncləri xalqın, vətənin gələcəyi üçün hazırlayan vətənpərvər insandır, vətəndaşdır...Müəllimlik çox şərəfli peşədir - vəzifədir, şərəfli olduğu qədər də mürəkkəb, məsuliyyətli vəzifədir. Səriştəli, peşəkar müəllim olmaq üçün müntəzəm axtarışda olmaq, oxumaq, öyrənmək lazımdır. Müqəddəs kitabımız “Qurani - Kərim”in buyurduğu kimi, "insan beşikdən qəbir evinə qədər öyrənməlidir".

Müəllim əməyinin nəticəsində cəmiyyət formalaşır, savadlı, bilikli, geniş dünyagörüşlü, nümunəvi əxlaqa malik insanlar yetişir. Bu insanlar isə cəmiyyəti daha da inkişaf etdirir. Hazırda dövlətimizin müstəqilliyinin möhkəmlənməsində fəal iştirak edən insanlar məhz müəllim əməyinin yetirmələridir. Müəllimlər yeni cəmiyyət quruculuğunun memarlarıdır. Hər birimizin layiqli vətəndaş kimi yetişməyində müəllimlərimizin əvəzsiz xidmətləri olub.

Nəsimi rayonunda 9 ali, 1 Təhsil Problemləri İnstitutu, 1 kollec, 26 orta, 1 peşə məktəbi, 2 musiqi məktəbi, 2 xüsusi məktəb, 33 məktəbəqədər tərbiyə müəssisəsi, 7 məktəbdənkənar tərbiyə müəssisəsi fəaliyyət göstərir.

Bu tədris ilindən Neft və Sənaye Universitetində Azərbaycan- Fransa Universiteti fəaliyyətə başlayıb.

Rayonun orta məktəblərində 2356 nəfər müəllim fəaliyyət göstərir. Məktəblərdə 7 nəfər müəllim “Tərəqqi” medalı ilə təltif edilib, 19 nəfər Əməkdar müəllim adına layiq görülüblər. Son vaxtlar Nəsimi rayonunda təhsil müəssisələrinin müasir tələblərə cavab verən təhsil ocaqları səviyyəsinə çatdırılması prosesi uğurla həyata keçirilir. Məktəblərimizdə təhsilin səviyyəsi, burada şagirdlərin biliklərə yiyələnməsi üçün yaradılan şərait hər zaman rayon İcra Hakimiyyətinin diqqət mərkəzində olub və onların yaxşılandırılması istiqamətində mütəmadi olaraq işlər görülür. Görülən işlərin nəticəsidir ki, rayon təhsil müəssisələrinin uğurları artır, məzunlarımızın ali məktəblərə daxil olma göstəriciləri ilbəil çoxalır.

Sentyabr ayının 6-da Nəsimi Rayon İcra Hakimiyyətinin rəhbərliyi, təhsil işçiləri, ictimaiyyətin və gənclərin nümayəndələrinin iştirakı ilə keçirilən toplantıda keçən tədris ilinə yekun vurulub, əldə olunan nailiyyətlər və qarşıda duran vəzifələr müzakirə olunub. Bu tədris ilində 1 nəfər məzun qızıl medal qazanıb, 3 nəfər məzun isə Azərbaycan Respublikası Prezidentinin təqaüdünə layiq görülüb.

Qeyd etmək lazımdır ki, ölkə başçısının imzaladığı sərəncam və Dövlət Proqramlarına əsasən rayondakı orta və məktəbəqədər təhsil müəssisələrinin böyük əksəriyyəti əsaslı təmir olunub. Dövlət Proqramına uyğun olaraq rayonumuzda 247 saylı tam orta məktəb əsaslı təmir olunub. 2016-cı il sentyabrın 7-də Prezident İlham Əliyev 247 saylı məktəbdə olub və burada aparılan təmir işləri ilə yaxından tanış olub.

Nəsimi Rayon İcra Hakimiyyətinin təşkilatçılığı ilə Beynəlxalq Müəllim Günü münasibəti ilə rayon rəhbərliyi və ictimaiyyəti, təhsil işçilərinin iştirakı ilə bayram tədbiri keçirilib.

Tədbirdə çıxış edən Nəsimi Rayon İcra Hakimiyyətinin başçısı Asif Əsgərov ulu öndərimiz Heydər Əliyevin Azərbaycan təhsilinə olan diqqət və qayğısından danışıb, Prezident İlham Əliyevin səyləri nəticəsində son illər ərzində respublikamızda tikilən və əsaslı təmir olunan təhsil müəssisələri, təhsil işçilərinin sosial müdafiəsinin möhkəmləndirilməsi istiqamətində atılan addımlar, Azərbaycan təhsilinin inkişafında böyük rolu olan Heydər Əliyev Fondunun prezidenti, millət vəkili Mehriban Əliyevanın gördüyü işlər və keçən təhsil ilində rayonun təhsil müəssisələrinin uğurları barədə məlumat verib. Asif Əsgərov bildirib ki, ümummilli liderimiz Heydər Əliyev həmişə müəllim əməyini yüksək qiymətləndirib, müəllim haqqında xoş sözlər söyləyib. O, öz müəllimlərini minnətdarlıqla xatırlayar, onların xidmətləri haqqında ürəkdolusu danışardı. Heydər Əliyev ölkəmizə rəhbərlik etdiyi bütün dövrlərdə həmişə müəllimə hörmət və ehtiramla yanaşmış, onların maddi vəziyyətinin, rifah halının yaxşılaşdırılması qayğısına qalıb. Ulu öndərimiz öz çıxışlarında hər zaman qeyd edib ki, «Təhsil millətin gələcəyidir», « Hər bir xalqın səviyyəsini onun bilik səviyyəsi müəyyən edir». Onun siyasətini uğurla dava etdirən Prezident İlham Əliyev tərəfindən ölkəmizdə təhsilə olan diqqət və qayğı göz qabağındadır. Hər il xeyli təhsil işçisinə Əməkdar müəllim adı, Prezident təqaüdü və bir sıra dövlət təltiflərinin verilməsi buna əyani sübutdur. Son illərdə ölkədə yeni məktəb binalarının tikintisi və köhnələrinin əsaslı təmiri böyük vüsət alıb. Heydər Əliyev Fondu və onun prezidenti, millət vəkili Mehriban Əliyevanın səyləri nəticəsində nəinki respublikamızda, eləcə də onun sərhədlərindən kənarda yeni məktəblərin tikintisi və köhnələrinin təmiri istiqamətində böyük işlər görülüb.

Tədbirdə çıxış edənlər təhsilə və təhsil işçilərinə göstərilən diqqət və qayğıya görə, Prezident İlham Əliyevə öz dərin minnətdarlıqlarını və ehtiramlarını bildiriblər.

Tədbirdə iştirak edən təhsil işçisinə rayon İcra Hakimiyyəti tərəfindən hədiyyələr və gül dəstələri təqdim olunub.

Nigar

Palitra.-2016.-5 oktyabr.-S.12.