Təhsildə İKT-nin tətbiqini dəstəkləyən layihə - “Elektron təhsil” müsabiqəsi başlayır

Məqsəd tədris prosesində İKT-dən fəal istifadə edən müəllimləri həvəsləndirmək, ən yaxşı elektron tədris vəsaitlərini geniş istifadəçi auditoriyasına tanıtmaq, internetin imkanlarından istifadə yolu ilə həyata keçirilən yeni tədris üsulları barədə təhsil ictimaiyyətini məlumatlandırmaqdır

Sentyabrın 19-da “Elektron təhsil” respublika müsabiqəsi keçiriləcək. Təhsil Nazirliyindən bildiriblər ki, müsabiqənin keçirilməsinin əsas məqsədi tədris prosesində informasiya texnologiyalarından fəal istifadə edən müəllimləri həvəsləndirmək və fəaliyyətlərini dəstəkləmək, ən yaxşı elektron tədris vəsaitlərini geniş istifadəçi auditoriyasına tanıtmaq, internetin imkanlarından (bloqlar, saytlar, sosial şəbəkələr və s.) istifadə yolu ilə həyata keçirilən yeni tədris üsulları barədə ölkənin təhsil ictimaiyyətini məlumatlandırmaqdır. Layihə çərçivəsində təqdim etdiyimiz yazıda qeyd edilən məqamlara toxunacağıq.

Tədris məqsədləri üçün İKT-nin tətbiqinin yeni formaları

Qeyd edək ki, “Elektron təhsil” respublika müsabiqəsinin məqsədləri sırasında müəllimləri tədris prosesində informasiya kommunikasiya texnologiyalarından (İKT) fəal istifadəyə cəlb etmək, tədris məqsədləri üçün İKT-nin tətbiqinin yeni formalarını axtarmaq, təhsil müəssisələrində elektron resurslardan istifadəni genişləndirmək, müəllim və şagirdləri elektron resurslar yaratmağa və hazır resurslardan istifadəyə həvəsləndirməkdir. Üç istiqamət (müəllim, şagird və məktəb ) olmaqla, altı nominasiya üzrə keçiriləcək müsabiqə “Dr. Web”, “AZEDUNET”, “Ultra”, “Edumediya Azərbaycan”, “Nar” mobil operatoru və “Təhsildə İnnovativ Texnologiyalar” Əlavə Təhsil Mərkəzi tərəfindən dəstəklənir. Müsabiqənin qaliblərinə noutbuklar, planşetlər, printerlər və digər xüsusi mükafatlar təqdim olunacaq.

“Elektron lövhələr”in istifadəsi ilə yaradılan ən yaxşı resurs

“Müəllim” istiqaməti üzrə “elektron lövhələr”in istifadəsi ilə yaradılan ən yaxşı resurs seçiləcək. Bu nominasiya üzrə müsabiqəyə “elektron lövhələr”in proqramları ilə qurulan resurslar təqdim edilə bilər. Eyni zamanda, bu nominasiya üzrə müvafiq proqram təminatını “www.edu.az” və “www.e-resurs.edu.az” portalında yerləşdirilmiş resurslardan istifadə etməklə təqdim etmək olar. Təhsildə ən yaxşı internet resursları nominasiya üzrə müsabiqəyə coğrafiya, kimya, fizika, biologiya, riyaziyyat, Azərbaycan dili və tarix fənləri üzrə işlər təqdim edilə bilər. Təqdim olunan işlərdə yerləşdirilən məlumatlar ümumtəhsil müəssisələrində təlim prosesinə dəstək məqsədi daşımalıdır. Resurslara giriş sərbəst və ödənişsiz olmalıdır. Onlara baxış üçün əlavə qeydiyyat tələb olunmamalıdır. Tədris üçün ən yaxşı elektron metodiki tövsiyə/sənəd nominasiya üzrə müsabiqədə əlavə təhsil ilə məşğul olan qurumların metodist mütəxəssisləri və ümumtəhsil məktəb müəllimləri iştirak edə bilər. Nominasiyaya bütün fənlər üzrə istənilən mövzuda resurs təqdim edilə bilər. Təqdim edilən işlər Azərbaycan, rus və ingilis dillərində ola bilər. Resurslar istənilən proqram təminatından istifadə edilməklə hazırlana bilər. Məsafədən (distant) keçirilən ən uğurlu dərs metodikası nominasiya üzrə müsabiqəyə müəllimlər tərəfindən məsafədən keçirilən dərs metodikası təqdim edilə bilər. Müsabiqədə ümumtəhsil məktəb müəllimləri iştirak edə bilər. Müsabiqəyə məsafədən keçirilən dərs metodikasının yazılı təsviri və bu metodika əsasında keçirilən dərsin videoyazısı təqdim olunmalıdır. Məsafədən keçirilən dərsdə müəllim və fərqli məkanda olan ən azı 3 şagirdin iştirakı şərtdir. Keçirilən dərs zamanı müəllimin ekranında gedən prosesin videoçəkilişi aparılmalıdır.

Ən zəngin məzmunlu məktəb saytı seçiləcək

Şagird istiqaməti üzrə tədrisdə istifadə üçün ən yaxşı elektron resurs nominasiya üzrə müsabiqəyə təhsil məzmunlu elektron resurslar təqdim edilə bilər. Təqdim edilən işdə müəllifin yaş səviyyəsinə uyğunluq gözlənilməlidir. Məktəb istiqaməti üzrə ən zəngin məzmunlu məktəb saytı seçiləcək. Bu nominasiya üzrə müsabiqəyə ümumtəhsil müəssisələri üçün hazırlanmış saytlar təqdim edilə bilər. Təqdim edilən saytlarda məktəb barədə ümumi məlumatlar, məktəbin İKT və digər sahələr üzrə nailiyyətləri, yeniliklər və tədbirlər barədə informasiya, məktəbəsaslı tədqiqatların statistik icmalı yerləşdirilməli, məktəb icması üçün maarifləndirmə, təşkilatlanma, cəlbetmə funksiyaları qabarıq olmalı, məlumatların dərc edilməsi davamlı xarakter daşımalıdır.

İKT infrastrukturunun

inkişaf etdirilməsi

Ümumiyyətlə, təhsil haqqında, “Azərbaycan 2020: gələcəyə baxış” İnkişaf Konsepsiyasının və “Azərbaycan Respublikasında təhsilin inkişafı üzrə Dövlət Strategiyası”nın müvafiq müddəalarına uyğun olaraq təhsil sisteminin informasiyalaşdırılması sahəsinin başlıca fəaliyyət istiqamətləri təhsil sistemində İKT infrastrukturunun inkişaf etdirilməsi, elektron təhsil texnologiyalarının tətbiqinin genişləndirilməsi, təhsil sistemində idarəetmənin informasiyalaşdırılması və kadr potensialının gücləndirilməsidir. Təhsil sisteminin informasiyalaşdırılması üzrə işin başlıca təşkili vəzifələri respublikanın təhsil sisteminin informasiyalaşdırılmasına dair fəaliyyətinin ümumi əlaqələndirilməsi, təşkili və nəzarət, təhsil sisteminin informasiyalaşdırılması sahəsində yeni texnologiyaların və həllərin axtarışı, seçilməsi, uyğunlaşdırılması və tətbiqin təşkili, təhsil sistemində informasiya komunikasiya texnologiyalarının səmərəli tətbiq metodların və yanaşmaların axtarışı və həyata keçirilməsi, pedaqoji, inzibati-idarəetmə və texniki işçilərin yeni informasiya komunikasiya texnologiyalarından öz fəaliyyət sahələrində istifadə bacarıqlarının öyrədilməsinin təmin edilməsi üzrə işlərin təşkili və beynəlxalq təşkilatlar və maliyyə qrumlarından vəsaitin cəlb edilməsi və onun təhsil sahəsində İKT-nin inkişafına yönəldilməsinin təşkilidir. Bu vəzifələrin icra edilməsi üçün bir çox işlərin görülməsi vacibdir. Təhsil sisteminin informasiyalaşdırılması sahəsi üzrə təhsil müəssisələrinin informasiya kommunikasiya üzrə maddi-texniki bazasının təkmilləşdirilməsi, kompüter avadanlığı və digər zəruri rəqəmsal avadanlıqla təminat işinin yaxşılaşdırılması, təhsil müəssisələrində İKT avadanlığına texniki nəzarət və dəstək sisteminin təkmilləşdirilməsi, intrenet xidmətlərinin işlənilməsi və İnternet şəbəkəsinə çıxışının təmin olunması, bütün fənlər üzrə müasir elektron elmi-metodiki vəsaitlər kompleksinin işlənilməsi və yayılması, elektron təhsil resursları bazasının yaradılması və tədris prosesinə inteqrasiyası, ölkə daxilində distant təhsilin inkişaf etdirilməsi üzrə tədbirlərin həyata keçirilməsi, vahid təhsil portalının yaradılması və mütəmadi dəstəklənməsinin təmin olunması həyata keçirilir. Eyni zamanda təhsildə dünya informasiya resurslarından səmərəli istifadənin təşkili və interaktiv tədris imkanlarından daha geniş istifadə olunmasının dəstəklənməsi, təhsil sahəsinin idarə olunmasında və tənzimlənməsində vahid informasiya infrastrukturunun yaradılması, təhsilin idarə olunmasının məlumat sistemlərinin inkişaf etdirilməsi və "elektron hökumət" prinsiplərinin tətbiqinin genişləndirilməsi, təhsil sisteminin pedaqoji və inzibati-idarəetmə heyətinin İKT üzrə savadlılığının artırılmasına yönəldilmiş kompleks tədbirlərin həyata keçirilməsi, yeni metod, texnologiyalar vasitəsilə pedaqoji heyətin hazırlanma və ixtisasartırma sisteminin təkmilləşdirilməsi və yaradıcı, innovativ müəllimlərin obyektiv qiymətləndirilməsi və səmərəli motivasiyası sisteminin yaradılması işləri reallaşdırılır.

A.Miriyev

Palitra.-2016.-17 sentyabr.-S.11.