“Biz Azərbaycanın dünyaya açılan pəncərəsiyik”

Orxan Həsənli: “Həm yerli KİV-lərlə əməkdaşlıq edir, həm də sosial şəbəkələr vasitəsilə öz fəaliyyətimizi layiqincə yerinə yetirməyə çalışırıq”

Müsahibimiz Orxan Həsənli Türkiyənin Uşak Universitetinin İqtisadiyyat fakültəsində maliyyə ixtisasi üzrə təhsil alır. Eyni zamanda Uşak Universitetinin Azərbaycan Mədəniyyətini Tanıtma Klubunun sədridir. Lobbiçilik fəaliyyətləri ilə məşğuldur

-Uşak Universitetində tədrisdə nə dərəcədə inormasiya kommunikasiya texnologiyalarından (İKT) istifadə olunur?

-Ümumiyyətlə, Uşak Universiteti Türkiyədə yeni yaradılan Universitetlərdən biridir. 2006-cı ildə yaradılan və yaradıldığı tarixdən bu günədək Türkiyənin ən öndə gedən təhsil ocaqlarından biri olmağı hədəfləyən Uşak Universiteti həm təhsilinə, həm də xarici tələbələrinin sayına görə Türkiyənin digər universitetlərindən seçilir. Universitetdə keçirilən dərslərdə informasiya kommunikasiya texnologiyalarının əhəmiyyəti ön plandadır. Belə ki, internet xidmətinin təşkili nəticəsində yüksəksürətli qoşulma üsulundan istifadə etməklə internetə çıxış imkanı yaradılmışdır. Gənclərin yüksək intellektə sahib olması, dünyada baş verən yeniliklərə və elmə sahib olması, həmçinin perspektiv informasiya texnologiyaları vasitəsilə təhsilin keyfiyyətinin yüksəldilməsi üçün universitetdə hər cür şərait yaradılmışdır ki, biz tələbələr də keçirilən dərslərin əksəriyyətində müasir informasiya kommunikasiya texnologiyalarından (İKT) bacardığımız qədər yaxşı mənada bəhrələnməyə çalışırıq.

Uşak Universitetinin rektoru Sait Çelik bəy də universitetin yüksək səviyyədə fəaliyyət göstərməsi və digər universitetlərlə rəqabətdə geri qalmaması üçün əlindən gələn bütün səyləri göstərir.

-Ümumiyyətlə, bu universitet hansı keyfiyyəti ilə seçilir?

-Bir az əvvəl qeyd etdiyim kimi, Uşaq Universiteti Türkiyədə xarici tələbələrə ən çox üstünlük verən universitetlərdən biridir. Belə ki, universitet xarici tələbə sayına görə Türkiyədə 10-cu sıradadır. Universitet öz səviyyəsini istənilən sahədə beynəlxalq standartlara uyğunlaşdırmağa çalışır. Türkiyədə yaxın zamanda açıklanan yenilikçi universitetlər arasında bizim universitet də yer almaqdadır.Universitet ərazisi şəhərin yüksək bir nöqtəsində yaşıl əraziyə və gözəl bir gölə sahib çevrədə inşa edilmişdir. Ərazidə üzmə hovuzu, qapalı idman salonu, teatr və konfrans zalları və s. kimi, tələbələrə yararlı müxtəlif sahələr yer almaqdadır. Çox sayda kitablardan, qrup şəklində və ya şəxsi çalışmaların edilə biləcəyi otaqlardan və son model kompüterlərdən ibarət kitabxananı xüsusi qeyd etmək istərdim. Uşak Universiteti hər zaman websaytında yer alan anketlərlə öz tələbələrinə universitetə dair məsələlərdə qərar vermə fürsəti də verir. Bu anketlər, həmçinin tələbələrə keçirilən hər hansı təşkilati işlərdə istiqamət vermə, eləcə də müəllimlərlə bağlı müvafiq sorğu, minnətdarlıq və tövsiyələr bildirmə imkanı da yaradır. Universitetdə fəaliyyət göstərən laboratoriya binasında texniki fakültələrdə təhsil alan tələbələrin elmi işlər görməsi üçün olduqca gözəl şərait yaradılmışdır. Mənə elə gəlir ki, yuxarıda sadaladığım göstəricilər hər bir tələbənin arzusunda olduğu universitet üçün səciyyəvi göstəricilərdir.

-Yeni yaratdığınız klubun əsas hədəfləri nədir?

- Azərbaycan Mədəniyyətini Tanıtma Klubu (“Azerbaycan kültürünü tanıtma topluluğu”) adı altında fəaliyyət göstərən klubumuz 2014-cü ilin fevral ayında yaradılmış və bu gün də fəaliyyət göstərməkdədir. Klubumuzun əsas hədəfi həm universitet daxilində, həm də Uşak şəhərində Azərbaycan mədəniyyətini, onun milli-mənəvi dəyərlərini, tarixini, ədəbiyyatını, mədəni irsini yerli və xarici tələbələrə və Uşak əhalisinə çatdırmaq, tanıtmaq və sevdirməkdir.

Biz, əsasən, Qarabağ həqiqətlərini Uşak ictimaiyyətinə çatdırmaqla məşğul oluruq.

-Virtual dünyada təbliğat üçün hansı layihələr nəzərdə tutubsuz?

-Virtual dünyada təbliğat üçün nəzərdə tutduğumuz layihələr, əsasən, mədəni irsimizlə əlaqəlidir. Belə ki, gələcək günlərdə bu mövzuda qısametrajlı film çəkməyi planlaşdırırıq. Əlavə olaraq elektron jurnal dərc etdirməyi də nəzərdə tutmuşuq.

Hər zaman öz “Facebook” səhifələrimizdə Azərbaycan-Türkiyə qardaşlığı tarixi bağlılıqlarımız haqqında önəmli bilgilər paylaşırıq və bununla da sosial mediyada öz aktivliyimizi artırırıq.Yaxın zamanlarda mədəni irsimizlə bağlı çəkəcəyimiz qısametrajlı film üçün indidən hazırlıqlar görürük. Ssenarini hazırlamağa çalışırıq, əlavə materiallar toplayırıq. Bu filmi Azərbaycan türkcəsində deyil, Türkiyə türkcəsində çəkməyi düşünürük, ona görə ki, hədəf kütləmizin ortaq dili Türkiyə türkcəsidir.

Gələk e-jurnal məsələsinə. E-jurnalı 2 ayda bir dərc etməyi düşünürük. Jurnalımızın adını hələ tam dəqiqləşdirməmişik, ancaq hazırlıq işlərimiz gedir. Mövzularımız ümumi olacaq, yəni Azərbaycan-Türkiyə arasında olan strateji əlaqələrdən tutmuş bütün sahələrdə olan əməkdaşlıqlar, tarixi köklərimiz haqqında və s.

-Klubun tələbələri bir araya gətirməkdə nə kimi rolu olacaq?

-Klub azərbaycanlı tələbələr arasında birlik və bərabərliyi nümayiş etdirməklə, bir az əvvəl qeyd etdiyim kimi, Azərbaycanımızın mədəniyyətinin, milli-mənəvi dəyərlərinin, tarixinin, ədəbiyyatının, mədəni irsinin təbliğ edilməsində böyük rol oynayır. Əlavə olaraq qeyd edim ki, azərbaycanlı tələbələrin birlik nümayişi yerli və xarici tələbələr arasında yüksək qiymətləndirilir və bu da onlarda Azərbaycanı daha yaxından tanımaq üçün maraq oyadır.

Biz boş vaxtlarımızı səmərəli keçirmək üçün azərbaycanlı tələbələrlə ya kitabxanada, ya kafedə, ya da ki, bizim üçün uyğun olan yerlərdə toplaşıb istər öz doğma Azərbaycanımız, istərsə də dünya haqqında olan müxtəlif mövzular ətrafında diskussiyalar təşkil edirik. Əsas mövzumuz Qarabağımızın hələ də şovinist ermənilər tərəfindən işğal olunduğu və dünyanın bunu kor-koranə izləməsi olur. Bəzən mübahisəli mövzularımız da olur. Məsələn, “Azərbaycanlıların dünyaya inteqrasiya etməsi” mövzusu ətrafında biz çox danışırıq. Ümumiyyətlə, xaricə gedib təhsil alan tələbələrimiz ixsisaslaşmış kadr olduqdan sonra vətənə geri qayıtmırlar və biz bunun səbəblərini müzakirə edirik. Biz istəyirik ki, ilk növbədə işğal olunmuş ərazilərimiz qaytarılsın və doğma Azərbaycanımız dünyanın ən öndə gedən inkişaf etmiş ölkələrindən olsun. Təbii ki, bunun üçün də biz öz üzərimizdə çox çalışmalıyıq və vətənimizə layiqli bir övlad olmaq üçün yaşamalıyıq. Biz hər zaman getdiyimiz yerlərdə Azərbaycanın başını uca tutmuşuq və belə də davam edəcəyik. Ümummilli liderimiz Heydər Əliyevin dediyi “Mən fəxr edirəm ki, azərbaycanlıyam!” kəlməsini biz də özümüzə rəhbər alaraq deyirik “Biz fəxr edirik ki, azərbaycanlıyıq! Burada mən, sən, o, yox, burada biz varıq!” deyirik və Azərbaycanımızı yüksək səviyyədə təmsil etməyə çalışırıq.

-Bu vaxta kimi hər hansı tədbiriniz olubmu?

-2014-cü ildən 2016-cı ilin yaz aylarına qədər olan təhsil dövründə biz bir çox tədbirlər həyata keçirmişik. Bunlardan, müharibə şəraitində olan Azərbaycanımızın başına gətirilən XX əsrin faciəsi sayılan Xocalı soyqırımı, qəhrəmanlıq tariximizin 20 Yanvar səhifəsi, 9 Noyabr – Azərbaycan Respublikasının Dövlət Bayrağı Günü, Türkiyə-Azərbaycan arasındakı münasibətlər, həmçinin milli-mənəvi dəyərlərimizin əbədiyaşar rəmzi sayılan Novruz bayramı tədbirlərini misal gətirə bilərəm. Bundan əlavə, Türkiyədə hər il təşkil olunan “Beynəlxalq tələbələrin görüşü” adlı tədbirdə də fəal iştirak etmişik. Tədbirlərimizə Uşak şəhər icra başçısı, Bələdiyyə sədri, universitet rektorumuz və bir sıra rəsmilər qatılıb iştirak ediblər. Bundan əlavə, azərbaycanlı tələbələrimiz də tədbirlərimizdə fəal iştirak edir, əllərindən gələn bütün səyləri göstərirlər və aktiv iştirak edirlər.

-Univetsitet rəhbərliyi sizə nə kimi dəstək göstərir?

-Maddi olaraq rəhbərlik təşkilati işlərdə fəaliyyətimizi həyata keçirmək üçün bizi tədbir salonu ilə təmin edib. Ümumiyyətlə isə universitet rəhbərliyi bizə, əsasən, mənəvi olaraq dəstək verir və fəaliyyətimizi hər zaman tədqirəlayiq hesab edərək yüksək qiymətləndirir. Amma biz universitet rəhbərliyi ilə görüşlər keçirəndə bizə hər zaman maddi və mənəvi dəstək verəcəklərini əminliklə qeyd edirlər. Universitet ərazisində klubların daha yaxşı işləməsi üçün yeni bina tikilir. Orada klubların fəaliyyəti üçün hər bir şərait yaradılacaq...

-Lobbiçilik işində İKT-dən hansı formada yararlanmaq olar?

-Biz – xaricdə təhsil alan tələbələr Azərbaycanın xaricə açılan pəncərəsi rolunu oynayırıq. Azərbaycan həqiqətlərinin dünya ictimaiyyətinə çatdırılmasında diaspor təşkilatları ilə yanaşı, xarici ölkələrdə təhsil alan biz gənclərin də xüsusi rolu olmalıdır. Çünki biz tələbələr təhsil aldığımız ölkələrdə vətənimizin qeyri-rəsmi səfirləri missiyasını daşıyırıq. Biz bunun fərqindəyik və buna görə də, sadəcə, tədbirlər keçirməklə kifayətlənmirik. Biz texnologiya əsrində yaşayırıq. Biz həm yerli kütləvi informasiya vasitələri ilə əməkdaşlıq edir, həm də sosial şəbəkələr vasitəsilə öz fəaliyyətimizi layiqincə yerinə yetirməyə çalışırıq və əsas məqsədlərimizdən biri olan Qarabağ həqiqətlərini, şovinist ermənilərin bizim əzəli düşmənimiz olduqlarını və işğal olunmuş ərazilərimizin, həqiqətən, bizim ərazilər olduğunu Uşak əhalisinə çatdırmaqdır.

-Oradakı qeyri-azərbaycanlı tələbələrlə görüşləriniz olurmu?

-Əlbəttə ki, olur. Biz qeyri-azərbaycanlı tələbələrlə tez-tez görüşlər keçirir, istər Azərbaycanla bağlı bütün reallıqları çatdırmaq, istər Dağlıq Qarabağ problemi barədə obyektiv rəyin formalaşdırılması, istərsə də zəngin tarixi-mədəni irsimizin təbliğ olunmasında fəal iştirak edərək ölkəmizin həqiqət carçısına çevrilmiş oluruq. Xarici tələbələri təşkil etdiyimiz tədbirlərimizə də dəvət edirik və onlar da bu tədbirlərdə yaxından iştirak edirlər. Bundan əlavə, biz Uşakta Beynəlxalq tələbələr dərnəyi ilə də əməkdaşlıq edirik. Onlar da bizi öz tədbirlərinə dəvət edirlər və bizdə sevə-sevə gedib iştirak edirik. Həm onlar bizim mədəni irsimizlə, tariximizlə tanış olur, həm də biz onların hansı mədəniyyətə sahib olduqlarını öyrənirik... Sonda müsahibə üçün sizə həm öz klubumuz, həm də öz adımdan dərin minnətdarlığımı bildirirəm.

Fuad Hüseynzadə

Palitra.-2016.-28 sentyabr.-S.11.