“BANM beynəlxalq səviyyəli ali təhsil müəssisəsi olaraq inkişaf etmək hədəfini seçib”

BANM-in Beynəlxalq əlaqələr şöbəsinin əməkdaşı Rövşən Budaqov: “Burada çalışmaqla mənim də bu istiqamətdə kifayət qədər töhfəm olacağına əminəm”

Müasir dövrdə ölkələrin inkişaf səviyyəsi iqtisadi meyarlarla yanaşı, həm də onun təhsil sistemindəki vəziyyət və mövcud kadr potensialı ilə də ölçülür. Hərtərəfli və davamlı inkişafın etibarlı yolu elm və təhsilə daha çox diqqət və qayğı göstərilməsindən və onun müasir dünya standartlarına uyğun təşkilindən keçir. Məhz buna görə də dünyanın qabaqcıl dövlətləri özlərinin inkişaf səviyyələrini qoruyub saxlamaq və yeni hədəflərə doğru irəliləmək məqsədilə bu sahəyə birinci dərəcəli əhəmiyyət verirlər.

Ölkəmizdə də bu istiqamət hər zaman prioritet olub. Respublikanın inkişaf perspektivləri ictimai-iqtisadi və elmi-mədəni sahələrdə fəaliyyət göstərəcək kadrlar qarşısında müxtəlif dövlət qurumlarında, beynəlxalq təşkilatlarda, eləcə də özəl sektorda çalışaraq Azərbaycanda idarəetmənin, sənayenin, mədəniyyətin, elmin, təhsilin və səhiyyənin müasir standartlara cavab verən yeni bir mərhələyə keçidini təmin etmək vəzifəsini qoyur. Bütün bunlar təhsil ocaqlarında ölkəmiz üçün mütəxəssis hazırlanması zərurətini meydana gətirib. Gənclərin mənəvi inkişafında təhsil mühüm amillərdən biridir. Ölkəmizdə gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər. Bu gün gənclərimiz ölkə daxilində təhsil almaqla kifayətlənməyib, eyni zamanda təhsillərini xarici ölkələrdə davam etdirirlər. "2007-2015-ci illərdə Azərbaycan gənclərinin xarici ölkələrdə təhsil almasına dair Dövlət Proqramı" üzrə 2015-ci ildə 373 nəfər, ümumilikdə isə Proqramın qüvvədə olduğu 8 il ərzində 3558 nəfər Azərbaycan vətəndaşı dünyanın aparıcı təhsil müəssisələrində təhsil almaq hüququ qazanıb. Bu günədək 1000-ə yaxın tələbə artıq məzun olub. Sonuncu Dövlət Proqramı təqaüdçülərinin 2021-ci ildə məzun olması gözlənilir, onlar da tibb təhsili alan gənclərdir. Hazırda məzunların 60 faizi özəl, 40 faizi isə dövlət sektorunda fəaliyyət göstərir. Məzunların işlə təminatı sahəsində təcrübə və karyera layihəsi icra olunur. Layihə çərçivəsində məzunlar bir neçə dövlət və özəl qurumlarda təcrübə keçməyə başlayıblar. Bütün bunlar bir daha onu göstərir ki, gənclərimizin öz bilik və bacarıqlarını üzə çıxarmalarına, potensiallarını effektli reallaşdırmalarına, cəmiyyətdə layiqli yer tutmalarına münbit şərait yaradılıb. Təbii ki, gənclərimiz bu etimadı layiqincə dəyərləndirməli və yaradılmış şəraitdən səmərəli istifadə etməlidirlər. Bu gün xaricdə təhsil alan bir çox azərbaycanlı gənclər var ki, onların yüksəkixtisaslı gənc kadr kimi Vətənə dönməsi və burada müvafiq qurumlarda çalışması ölkəmizin həm təhsil, həm də iqtisadi gücünün artmasına təkan verir. Müsahibimiz Rövşən Budaqov hazırda Bakı Ali Neft Məktəbinin Beynəlxalq əlaqələr şöbəsində çalışır.

Rövşən Tahir oğlu Budaqov 1992-ci ildə Naxçıvan şəhərində anadan olub. 2009-cu ildə Bakı şəhəri 43 saylı orta məktəbi bitirdikdən sonra Azərbaycan Respublikası Təhsil Nazirliyinin xətti ilə Çexiyanın Çarlz Universitetinin hazırlıq kursunda təhsilini davam etdirib. 2010-cu ildə həmin kursu müvəffəqiyyətlə başa vuraraq ali məktəbə daxil olub və 2014-cü ildə Praqa Anglo-Amerikan Universitetində “Biznesin təşkili” ixtisası üzrə bakalavr dərəcəsinə yiyələnib. O, Azərbaycan Dövlət İqtisad Universitetində də təhsil alıb və həmin universiteti fərqlənmə diplomu ilə bitirərək “İqtisadiyyat” ixtisası üzrə bakalavr ali peşə-ixtisas dərəcəsini alıb. Ali təhsilini bitirdikdən sonra həqiqi hərbi xidmətə çağırılan Rövşən Budaqov 1 oktyabr 2015-ci il tarixdə xidmətini başa vuraraq tərxis edilib. 2015-ci ilin noyabr ayından etibarən o, Bakı Ali Neft Məktəbinin Beynəlxalq əlaqələr şöbəsində çalışır.

- Sizin iqtisadiyyata marağınız necə yaranıb?

- Mənim iqtisadiyyata həmişə marağım olub və Azərbaycan iqtisadiyyatının inkişafı mənim bu ixtisasa marağımın bir növ səbəbi olub. Çexiyadakı təhsilimin ilk ili hazırlıq kursu olduğundan, müvafiq ixtisası seçmək imkanımız var idi. Yəni, mən müxtəlif sahələrə aid fənləri öyrənirdim və bir il sonra öz seçdiyim ixtisas üzrə imtahan verib təhsilimi davam etdirdim. Çexiyanın iqtisadiyyat üzrə fənlərini öyrəndikdə anladım ki, bu ölkənin iqtisadiyyat sisteminin bəzi prinsipləri Azərbaycanda tətbiq olunarsa, ölkəmiz üçün faydalı ola bilər. Bu səbəbdən də, mən bu sahəyə üstünlük verdim.

- Sizin fikrinizcə, xaricdəki təhsilin Azərbaycandakı təhsildən hansı üstün və mənfi cəhətləri və ya fərqləri var?

- Ən əsas fərqlərdən biri odur ki, xaricdə təhsil alarkən təcrübəyə böyük diqqət yetirilir. Əldə etdiyimiz nəzəri biliklərlə yanaşı, biz praktiki biliklərə də malik oluruq. Ən əsası, təhsil kompüterləşdirilmiş sistem üzərindən qurulmuşdur. Bu tələbələrin işini daha da asanlaşdırır. Misal üçün, həmin ölkədə olmadan belə universitetin bütün onlayn resurslarından istifadə edə bilirik. Kitabxana sistemi yüksək şəkildə təşkil olunmuşdur. Tələbələrə universitet tərəfindən böyük və tanınmış məlumat bazalarına və digər onlayn resurslara geniş çıxış təqdim olunur. Beləliklə, kitablardan öyrəndiklərimizlə yanaşı, digər fərqli resurslardan əldə etdiyimiz biliklərə də malik oluruq. Orada oxuyarkən müxtəlif ölkələrin fərqli mədəniyyətləri ilə tanış olub, dünyagörüşümüzü daha da zənginləşdirə bilirik. Fərqli mədəniyyətlər haqqında biliklər xüsusilə xarici iş əlaqələri qurularkən gələcək iş karyeramıza da müsbət təsirini göstərir. Bundan əlavə, uzun müddət digər bir ölkədə yaşayaraq özümüzü tamamilə fərqli və yeni həyat tərzində sınamış oluruq, çətinliklərlə üzləşirik və sərbəst şəkildə onların öhdəsindən gəlirik, beləliklə, təkmilləşirik və əvəzolunmaz həyat təcrübəsi qazanırıq. Fərqli mədəniyyətləri öyrənməklə yanaşı, bizim də Azərbaycan mədəniyyətini xaricdə təmsiletmə imkanımız yaranır.

- Çexiyada təhsil aldığınız vaxt tələbə təşkilatındakı fəaliyyətiniz də olub...

- 2009-2014-cü illərdə Çexiyada olduğum müddətdə Azərbaycan gənclər təşkilatının üzvü olaraq bir çox tədbirlərin təşkilində fəal iştirak etmişəm. Novruz bayramı ilə bağlı, həmçinin 20 Yanvar faciəsi və Xocalı soyqırımına həsr olunmuş tədbirlərin təşkili, Azərbaycan həqiqətlərinin çatdırılması, eyni zamanda, Azərbaycanın milli-mənəvi, mədəni dəyərlərini və ənənələrini tanıtmaq, tariximizi başqa xalqların nümayəndələrinə çatdırmaq üçün yaranmış imkandan bir gənc olaraq ölkəmizin təbliğatı üçün çalışmışam.

- Bir gənc olaraq ali təhsil ocağında işləməyin məsuliyyəti nədən ibarətdir?

- Mən Bakı Ali Neft Məktəbinin Beynəlxalq əlaqələr şöbəsində çalışıram. Bu şöbənin əsas fəaliyyət istiqamətlərindən biri də ölkəmizdə neft-qaz, kimya və avtomatika sahəsində çalışan bir çox yerli və beynəlxalq şirkətlərlə tərəfdaşlıqların yaradılmasıdır. Bu tərəfdaşlıq öz növbəsində geniş əməkdaşlıq sahələri ilə yanaşı, tələbələrimiz üçün potensial təcrübə imkanlarını da əhatə edir. Daha dəqiq desək, bizim qurduğumuz əlaqələr sayəsində tələbələrimiz bu şirkətlərin təklif etdiyi təcrübə proqramlarına cəlb olunur və bu da onlara yuxarıda qeyd etdiyim zəngin praktik səriştə qazanmaq şansları yaradır. Bakı Ali Neft Məktəbi beynəlxalq səviyyəli ali təhsil müəssisəsi olaraq inkişaf etmək hədəfini seçib. Burada çalışmaqla mənim də bu istiqamətdə kifayət qədər töhfəm olacağına əminəm. Ümummilli liderimiz Heydər Əliyev hər zaman elmə, təhsilə yüksək qiymət verərək deyib: “Təhsil millətin gələcəyidir”. Fikrimcə, biz də onun gənc davamçıları kimi bu işə tam məsuliyyətlə yanaşmalıyıq.

Nigar Abdullayeva

Palitra.-2016.-12 yanvar.-S.11.