“Tələbələrimiz lazımi anlarda birgə olub, bir-birinə sahib çıxmağı bacarırlar”

Tural Qəribov: “Ötən illərlə müqayisədə indi Osmanqazi Universitetində daha çox azərbaycanlı tələbə var”

Müsahibimiz Tural Qəribov 1993-cü ildə Bakıda anadan olub. İlk təhsilinə 1999-cu ildə Xətai rayonunda 55 saylı orta məktəbdə başlayıb. 2010-cu ildə Xətai rayonu Heydər Əliyev adına liseydən məzun olub. Elə həmin il Türkiyənin Eskişehir şəhərində Osmanqazi Universitetinin İqtisad bölümünə qəbul olub. Hazırda bu universitetin sonuncu kurs tələbəsidir. Eyni zamanda Eskişehir Anadolu Universitetinin Açıköğrətim fakültəsinin (distant təhsil) Beynəlxalq əlaqələr bölümündən 2015-ci ildə məzun olub.

-Xaricdə təhsilin hansı üstünlükləri var?

- Təbii ki, təhsil daha çox tətbiqə yönəlik oduğundan öyrəndiklərimizi daha da təkmilləşdirməkdə üstünlüyümüz olur.Bundan əlavə, xaricdəki universitetlər tələbələrə daha çox sosial fəaliyyət imkanı yaratmaqdadır.Yəni dərslərin daha da maraqlı bir hala gəlməsi üçün müəllimlərin əllərindən gələni etdiklərini çox rahat deyə bilərəm.Dərsə hazırlıq mövzusunda əlinin altında xeyli mənbələr olur və əslində, araşdırma etdiyiniz hər hansısa mövzu haqqında məlumatlar əldə etmək elə də çətin olmur.Hansı xarici ölkə olursa olsun, fərqi yoxdur, amma o ölkənin dilini daha dərindən öyrənmək fürsətimiz olur.Yəni, sadəcə, Türkiyə üçün bu, bir az asan bir iş kimi gələ bilər, amma bu dəqiqə dünyanın bir çox ölkəsində təhsil alan azərbaycanlılar var ki, bir neçə dildə rahat şəkildə danışa bilirlər.Dərslərdən əlavə olaraq belə bir şeyi də deyə bilərəm ki, təhsili bir kənara qoysaq, dünyagörüşünün dəyişməsi və öz-özünü idarəetməni insan daha yaxşı öyrənir.Çətinliklərlə qarşı-qarşıya gələndə ən doğru qərarı verə bilmək, ya da hər hansısa səhv qərarın acı nəticələri insanı həyatla bağlı daha da təcrübələndirə bilir.

-Universitetinizdə azərbaycanlı tələbələr hansı keyfiyyəti ilə seçilirlər?

-Əvvəlcə bunu qeyd edim ki, ötən illərlə müqayisədə indi Osmanqazi Universitetində daha çox azərbaycanlı tələbə var. Təəssüf ki, kəmiyyət çoxaldıqca keyfiyyətdə bir irəliləmə olmayıb, hətta mən deyərdim ki, keyfiyyət səviyyəsi düşüb.Çünki insanların sayı çoxaldıqca ortaya atılan fikir sayı da istər-istəməz artır və heç də arzulamadığınız mühit yaranır. Amma ümumi bir dəyərləndirmə lazım olsa, sadəcə, lazımi anlarda birgə olub, bir-birinə sahib çıxmağı bacarırlar. Əslində, hədəfləri təhsildən başqa hər şey olan gənclərimiz də, təəssüf ki, az deyil.Amma ən azından bizim universitetdə düşüncəli, ölkəmizlə bağlı hər hansısa bir tədbirdə dediyim kimi əllərindən gələni etməyə hər zaman hazırdılar.

-Universitetdaxili tədbirlərdə aktivlik göstərə bilirsizmi?

-Qeyd etdiyim kimi, xaricdə təhsilin ən üstün cəhətlərindən biri də sosial fəaliyyətlə bağlıdır.Bizim də universitetimizdə bir çox tələbə təşkilatları, klubları var. Hər fakültədə bir neçə birliyin olduğunu deyə bilərəm.Mən də əlimdən gəldiyi qədər universitetdə fəal bir tələbə olmağa çalışıram.Hətta arxada qalan 2 il ərzində universitetdaxili klub olan Karyera və İnkişaf Klubunda idarə heyətində fəaliyyət göstərmişəm.Bu dövr ərzində bir sıra tədbirlər təşkil etmişik ki, idarə heyəti olaraq da hər zaman öndə yer almışam.Bundan əlavə, universitetimizdə artıq ənənənə halına gələn və hər il mart ayında keçirilən Karyera günləri proqramı da var ki, bizim universitetdən məzun olan və hazırda yüksək vəzifələrdə çalışan, eləcə də Türkiyənin öndə gedən önəmli şirkətlərinin nümayəndələri həm seminarlar hazırlayır, həm də bizim gələcəkdə necə bacarıqlı ola biləcəyimiz mövzusunda əllərindən gələn yardımı edirlər.Bu tip tədbirlərdə də hər zaman aktiv olmuşam.Amma indi məzuniyyət səbəbi və magistr hazırlıqlarına görə, təbii ki, bu fəaliyyətlərdən bir az geri çəkilmişəm.

-Ümumiyyətlə, azərbaycanlı tələbələrin ictimai fəallığı hansı səviyyədədir?

- Ümumi dəyərləndirəndə “hamı fəaldır” deyə bilməsək də, çoxunda ən azından nəsə bir fəaliyyətdə olmaq istəkləri var. Eskişehirdə missiyası Azərbaycanı daha da yaxından tanıtmaq olan Eskişehir Azərbaycanlılar Dərnəyi fəaliyyət göstərir və müntəzəm olaraq biz bu dərnəyin toplantılarında iştirak edirik. Burada əlamətdar günlərlə bağlı nələr edə biləcəyimizə dair fikir mübadiləsi aparırıq.Bu toplantılarda tələbələr yenilikçi fikirlər irəli sürürlər və istər-istəməz hiss olunur ki, əllərində fürsət olsa, daha yaxşı işlər görə bilərlər.Mənə görə ən böyük problem özünəinamın yetərli səviyyədə olmamasıdır. Əslində, bizim tələbələrimiz var ki, Eskişehirdəki bir çox qeyri-hökumət təşkilatları ilə bağlantı içindədir və əllərindən gəldiyi qədər bu birliklərin yardımı ilə də Azərbaycan adına daha çox işlər görməyə çalışırlar. 20 yanvar, 26 fevral, 28 may kimi günlərdə həmin birliklərin də bizə dəstək olmasına kömək olurlar.

-Orada oxuyan, digər xalqlardan olan tələbələrin Azərbaycanla bağlı məlumatları varmı?

-Şəxsən mən öz adımdan deyə bilərəm ki, bunu qarşıma bir hədəf qoymuşam və orada tanış olub söhbət etdiyimiz xarici tələbələr olsun və ya elə türk tələbələr olsun, Azərbaycan haqqında məlumatlar verirəm.Bundan əlavə, hər il may ayında Eskişehirdəki bütün xarici ölkələrin tanıtımı olur ki, bu günlərdə də ölkəmizi lazımınca tanıtdığımıza inanıram.Məsələn, belə bir şey deyə bilərəm ki, 2014-cü ilin yay aylarında Azərbaycan-Ermənistan sərhədi boyunca atəşkəsin pozulması və bir neçə əsgərimizin şəhid olmasından sonra Eskişehirdə yaşayan bir azərbaycanlı tələbə dostumuz öz evindən “Çarşı” dediyimiz şəhər mərkəzinə qədər əlində plakat və şüarlarla tək yürüşə başladı.Təbii ki, insanların diqqətini çəkən bu hadisə, əslində, həm orada ona yaxınlaşıb məqsədinin nə olduğunu soruşanlara, həm də qıraqdan onu izləyənlərə əlindən gəldiyi qədəri ilə öz fikrini çatdırdı və bu yolla Ermənistanın keçmişdən bu günə qədər davam edən təcavüzünü həm qınamış oldu, həm də insanları məlumatlandırdı.

-Ölkəmizin təbliği istiqamətində hansı işlər görürsüz?

-Yuxarıda da qeyd etdiyim kimi, bu fəaliyyətləri çox vaxt Eskişehir Azərbaycanlılar Dərnəyi olaraq etməyi daha uyğun görürük.Çünki istər 20 yanvar və ya 26 fevral tarixlərində yürüşlər olsun, istərsə də hər hansısa bayramlarda olsun, insanları bəlli bir məqsəd uğrunda birləşdirməkdə, bəlli bir qurumun rolu böyükdür.Bundan əlavə, yürüşlər üçün icazələrin alınması, yaxud məlumatların Eskişehir mediasında yer almasında dərnəyin rolu çox böyükdür.Azərbaycanla bağlı hər önəmli gündə ən azından müəyyən toplantılar və seminarlar hazırlanır. Sadəcə, keçdiyimiz bir il ərzində öncəliklə Xocalıda şəhid olan 613 həmvətənimiz üçün 613 ağac əkərək Xocalı şəhidlər adına Xatirə Meşəsi yaratdıq. Bundan əlavə, 28 May-Respublika Günü çox böyük təntənə ilə qeyd olundu. Bu tədbirdə həm də məzun olacaq tələbələr də unudulmadı.Həmçinin Dünya Azərbaycanlılarının Həmrəyliyi Günündə Türkiyədə yaşayan bütün soydaşlarımız və buradakı tələbələr toplanaraq bu bayramı qeyd etdik. Ən son olaraq dərnəklə bağlı fəaliyyətlərimizdən 20 Yanvar günü Eskişehirdə Vahid Mustafayevin “Qanlı Yanvar” filmini nümayiş etdirdik və o gecə yaşanan hadisələrlə bağlı insanlara məlumatlar verildi.

-Siz, eyni zamanda distant təhsil alıbsız. Bu təhsilin hansı özəlliyi var?

-Əslində, Beynəlxalq əlaqələr fakültəsini oxumaq hədəflərimdən biri idi.Amma mən bunu iqtisad bölümünü bitirdikdən sonra oxumağı düşünürdüm. Lakin ora gedəndə Eskişehirdə belə bir fürsətin olduğunu öyrəndim və başvurdum. Öncə 4 ildə 2 diplomun olması özü, məncə, ən böyük üstünlükdür.İki diplomun olması insana gələcəkdə hansı sektorda özünü daha rahat hiss edirsə, o sektorda var olmağa imkan verir.Bunun bir üstünlüyü də budur ki, insanın ikinci bir şansı olur, ya da cıxdığı yolu dəstəkləyəcək bir bölümdə ikinci diploma sahib olaraq da yolunda daha inamla irəliləyə bilir.

Fuad Hüseynzadə

Palitra.-2016.-30 yanvar.-S.11.