Ermənistanın növbəti yalanları BMT-nin saytında ifşa olunub

“Ermənistan Respublikası öz hesabatının Azərbaycan Respublikası ilə münasibətlərə aid hissələrində tarixi faktları saxtalaşdırıb”

Xəbər verildiyi kimi, 24 aprel - 12 may 2017-ci il tarixlərində BMT-nin İrqi ayrı-seçkiliyin bütün formalarının ləğvi Komitəsində Ermənistanın 2010-2015-ci illər üçün dövri hesabatı müzakirə ediləcək. Ermənistan dövləti bu hesabatında İrqi ayrı-seçkiliyin bütün formalarının ləğv edilməsi haqqında BMT Konvensiyasının tələblərinin təmin edilməsi vəziyyəti – qaçqınlar, milli azlıqlara qarşı ayrı-seçkilik, dini tolerantlıq və sair barədə məlumat verib. Lakin, həmişə olduğu kimi, bu hesabatda da Ermənistan öz yalanları ilə mövcud duruma müsbət don geyindirməklə beynəlxalq ictimaiyyəti aldatmağa çalışır. AVCİYA Ermənistanın adıçəkilən hesabatına alternativ hesabat hazırlayaraq 6 (ingilis, rus, ispan, italyan, ərəb, fransız) dildə BMT-yə təqdim edib. Bu haqda AVCİYA-nın mətbuat xidmətidən “Palitra”ya məlumat verilib.

AVCİYA-nın bu hesabatında Ermənistanın növbəti yalanları, saxtakarlıqları tam ifşa edilib. Alternativ hesabat artıq BMT-nin rəsmi internet resursunda (tbinternet.ohchr.org) yerləşdirilib.

Hesabatda bildirilir: “Ermənistan Respublikası öz hesabatının Azərbaycan Respublikası ilə münasibətlərə aid hissələrində tarixi faktları saxtalaşdırıb. Avropa Şurası Parlament Assambleyasının 2016-cı ilin yanvar sessiyasında qəbul etdiyi «Azərbaycanın sərhədyanı rayonlarının sakinləri qəsdən sudan məhrum edilir» adlı 2085 (2016) saylı qətnamə Ermənistan dövlətinin Azərbaycanın Dağlıq Qarabağ və digər ərazilərini işğal etməsi faktını təsdiq edir. Ermənistan Respublikası işğal edilmiş ərazilərdə etnik təmizləmə, mülki əhalinin kütləvi qətliamı, digər beynəlxalq cinayətlərə və məsul şəxsləri hüquqi məsuliyyətə cəlb etməməyə görə birbaşa cavabdehlik daşıyır. Ermənistan Respublikası 2085 saylı qətnamədə vurğulanan, işğal altındakı Sərsəng su anbarı vasitəsilə Azərbaycana “ekoloji təcavüz”, digər etnik qrupa - azərbaycanlılara qarşı edilən humanitar, mənəvi, iqtisadi, ekoloji və bioloji təhdidlər edir”.

“Ermənistan azərbaycanlılara məxsus dini ocaqları və tarixi abidələri dağıdır, mənşəyini saxtalaşdırır”

Sənəddə qeyd olunur ki, Ermənistan Respublikası qonşu ölkənin ərazisində apardığı hərbi əməliyyatlara və insanların etnik əsaslarla öldürülməsinə, bu qəbildən olan şəxsləri əsirlikdə saxlamaqla, onlar barədə məlumat verməməklə, onlara qarşı zorakılıq, qeyri-insani rəftar tətbiq edilməsinə görə məsuliyyət daşıyır: “Azərbaycanın Dağlıq Qarabağ və digər işğal edilmiş ərazisində Suriya, İraq, Livan və digər yerlərdən olan qaçqınların qanunsuz olaraq yerləşdirilməsi siyasəti və tədbirləri BMT-nin İrqi ayrı-seçkiliyin bütün formalarının ləğvi Konvensiyanın tələblərinin birbaşa pozulmasıdır. Daimi yaşayış yerlərindən məcburi köçürülmüş (deportasiya olmuş) azərbaycanlıların və digər etnik qrupların Azərbaycanın Dağlıq Qarabağ və digər işğal edilmiş ərazilərinə və Ermənistan Respublikasının ərazisinə qayıtmasının qarşısının alınmasına görə Ermənistanın siyasi hakimiyəti məsuliyyət daşıyır. Ermənistan Respublikası azərbaycanlılara məxsus dini ocaqları və tarixi abidələri dağıdır, mənşəyini saxtalaşdırır: “Ermənistan Respublikasının ərazisində irqi ayrı-seçkiliyi təşviq edən siyasi təşkilat fəaliyyət göstərir, 2011-ci ildə BMT-nin həmin təşkilatın qanuni yolla kənarlaşdırılması barədə çağırışına da Ermənistan dövləti tərəfindən məhəl qoyulmamışdır”.

AVCİYA-nın təqdim etdiyi hesabatda bu kimi mühüm faktlar yer alır, eyni zamanda sadalanan məsələlərlə bağlı BMT Komitəsinə Ermənistan dövləti tərəfindən izahat verilməsi tələb edilir. Bildirilir ki, BMT-nin İrqi ayrı-seçkiliyin bütün formalarının ləğvi Komitəsi Ermənistan Respublikasından azərbaycanlılara və etnik mənsubiyyəti fərqli olan digər qruplara irqə görə ayrı-seçkiliyi ləğv etməsini, irqə görə nifrət siyasətinə son qoymasını və buna aparan istənilən ictimai təşəbbüsün pislənməsini və qarşısının alənmasını tələb etməlidir.

Xatırladaq ki, Ermənistan tərəfindən bu səpkidə bir neçə dəfə BMT-yə hesabatlar verilib. Lakin onların bu yalanları tez bir zamanda Azərbaycan hökuməti tərəfindən göndərilən cavab hesabatları ilə ifşa olunub. Məsələn, 2012-ci ildə İsveçrə-Ermənistan Assosiasiyası BMT-nin İqtisadi, Sosial və Mədəni Hüquqlar üzrə Komitəsinə Azərbaycan hökumətinin 3-cü dövri hesabatı ilə əlaqədar əks-hesabat təqdim edib.

Hesabat BMT-nin İnsan Hüquqları üzrə Ali Baş Komissarının rəsmi veb səhifəsində yerləşdirilib.

Əks-hesabatda Azərbaycan tərəfindən İqtisadi, Sosial və Mədəni hüquqlara dair Paktın 13 və 15-ci maddələrinin pozulmasından bəhs olunur. Erməni təşkilatı, guya, Naxçıvan Muxtar Respublikasının Culfa rayonunda erməni xaçkarlarının (abidələrinin) məhv edilərək həmin ərazidə hərbi poliqon tikilməsindən bəhs edir. Ermənilər hesabata Azərbaycana qarşı böhtan və həqiqətləri təhrif edən digər məlumatlar da daxil ediblər.

BMT-nin İqtisadi, Sosial və Mədəni hüquqlara dair Komitəsinin 49-cu sessiyaqabağı qapalı toplantısında Vətəndaşların Əmək Hüquqlarını Müdafiə Liqasının sədri Sahib Məmmədov və VƏHML tərəfindən Komitəyə hazırlanmış hesabat üzrə ekspert - “Konstitusiya” Araşdırmalar Fondunun Prezidenti Əliməmməd Nuriyev də iştirak edib. Azərbaycanla bağlı dinləmələr zamanı Sahib Məmmədov sessiyada iştirak edən azərbaycanlı qrupun adından bəyanatla çıxış edib. Bəyanatda bildirilir ki, BMT təsisatlarının etimadından sui-istifadə edərək “İsveçrə-Ermənistan Assosiasiyası” adlanan təşkilat Azərbaycanla bağlı yalan və böhtandan ibarət hesabat təqdim edib: “Təşkilat, guya, Naxçıvan ərazisində erməni abidələrinin (xaçkarların) məhv edilməsi barədə yalan məlumatlar yazmaqla yanaşı, Azərbaycanın coğrafi və inzibati ərazi adlarını məqsədyönlü şəkildə təhrif edib. Bildiririk ki, xaçkarlarla bağlı erməni uydurması bir neçə il əvvəl dövriyyəyə buraxılıb, lakin Azərbaycan beynəlxalq qurumların nümayəndələrinin iştirakı ilə həmin ərazilərdə araşdırmalar apararaq erməni yalanını ifşa edib”.

BMT baş katibinə Ermənistan tərəfindən Azərbaycanın ətraf mühitinə vurulan ziyanla bağlı məktub göndərilib

Ötən il isə Azərbaycan Respublikasının BMT yanında daimi nümayəndəsi Yaşar Əliyevin BMT-nin Baş katibinə ünvanlanmış məktubu BMT Baş Məclisinin və Təhlükəsizlik Şurasının rəsmi sənədi kimi dərc edilib və yayılıb. Məktubda xatırladılır ki, BMT Baş Məclisinin 5 noyabr 2001-ci il tarixli 56/4 nömrəli, həmmüəlliflərindən birinin Azərbaycan olduğu qətnaməsinə müvafiq olaraq, hər il noyabrın 6-da Beynəlxalq Müharibələr və hərbi münaqişələr dövründə ətraf mühitin istismarının qarşısının alınması günü qeyd edilir.

Azərbaycan səfiri qeyd edib ki, adıçəkilən qətnamədə, habelə BMT Baş Məclisi tərəfindən daha əvvəl qəbul edilmiş “Hərbi münaqişələr dövründə ətraf mühitin mühafizəsi” adlı qətnamədə, 2030-cu ilə qədər olan dövrdə Davamlı İnkişaf Sahəsində Gündəlikdə və “Silahlı münaqişələrin baş verdiyi rayonlarda ətraf mühitin qorunması haqqında” 2016-cı ilin mayında BMT Baş Məclisi tərəfindən bəyənilmiş qətnamədə dövlətlərin, o cümlədən ətraf mühitin qorunması sahəsində, beynəlxalq hüquqa riayət etməsi və beynəlxalq münasibətlərdə hər hansı dövlətin ərazi toxunulmazlığına qarşı güc tətbiq edilməsi ilə hədələməkdən və ya güc tətbiq etməkdən çəkinməsi tələbi xüsusi vurğulanır.

Azərbaycanlı diplomat bildirib ki, Ermənistanın Azərbaycana qarşı təcavüzü nəticəsində suveren Azərbaycan ərazisinin təxminən 20 faizi işğal edilib, on minlərlə insan həlak olub, bir milyondan çox azərbaycanlı öz evlərindən zorla qovulub və əmlakından məhrum edilib. Bu təcavüz həm də ətraf mühitə meşələrin məhv olunmasında, torpaqların yandırılmasında, münbit torpaqların deqradasiyasında, su resurslarının çirkləndirilməsində və heyvanların tələf olmasında təzahür edən dağıdıcı təsir göstərib.

Bununla əlaqədar BMT Baş katibinin diqqəti ona cəlb edilir ki, Azərbaycanda xüsusi ekoloji mühafizə altında olan ərazilərin ümumi sahəsi 890.000 hektardır. Hazırda bu ərazilərin 42.997 hektarı, o cümlədən 152 təbii abidə, 5 geoloji obyekt, 2 təbii qoruq, 4 qoruq zonası və 7 göl ermənilərin hərbi işğalı altındadır. Bundan əlavə, 247.352 hektar meşə, o cümlədən yüzlərlə nadir ağac cinsinin, məsələn, çinar, qoz ağacı, palıd, həmişəyaşıl şümşad, Eldar şamı, xurma və digər ağac növlərinin təmsil olunduğu 13.197 hektar qiymətli meşə işğal altındadır.

Məktubda vurğulanır ki, münaqişənin lap əvvəlindən Ermənistan silahlı qüvvələri Azərbaycanın ətraf mühitinə, o cümlədən onun işğal olunmuş ərazilərində bilərəkdən genişmiqyaslı uzunmüddətli və ciddi ziyan vurublar.

Yuxarıda deyilənlərlə əlaqədar Azərbaycan tərəfi bəyan edir ki, Ermənistan beynəlxalq hüququ pozmağa görə, o cümlədən Azərbaycanın işğal edilmiş ərazilərində ətraf mühitə vurulmuş ziyan nəticəsində təbii resursların tükənməsinə görə beynəlxalq məsuliyyət daşıyır. Azərbaycanın daimi nümayəndəsinin məktubunda deyilir: “Bütün bunlar bir daha təsdiq edir ki, təcavüzkarın cəzasızlığına son qoymaq, Dağlıq Qarabağın və Azərbaycanın işğal altında olan digər ərazilərinin erməni işğalından azad olunmasını təmin etmək məqsədilə beynəlxalq birlik tərəfindən təcili və təsirli tədbirlər görmək üçün ardıcıl səy göstərilməsi zəruridir”.

Azərbaycanlı diplomat daha sonra yazır ki, əgər insanların mövcudluq vəsaitlərinin mənbələrini təmin edən ətraf mühit məhv edilir, çirkləndirilir və vəhşicəsinə istismar edilirsə, möhkəm sülh ola bilməz. Sonda BMT Baş katibinin 2016-cı il noyabrın 6-da Beynəlxalq Müharibələr və hərbi münaqişələr dövründə ətraf mühitin istismarının qarşısının alınması günü münasibətilə müraciətindən sitat gətirilir: “Biz həm dinc dövrdə, həm də müharibə dövründə ətraf mühitin qayğısına qalmalı, ekoloji cinayətlərə qarşı mübarizədə və təbii resursların qanunsuz istismarının qarşısının alınması məsələsində əlbir fəaliyyət göstərməliyik”.

Fuad Hüseynzadə

Palitra.-2017.-11 aprel.-S.11.