“Made in Azerbaijan” brendi olan şərablarımız Yaponiya bazarında

Şərabçılıq Azərbaycanın ənənəvi istehsal sahələrindən biridir. Hazırda ölkədə üzümçülük və şərabçılıq özünün yeni inkişaf mərhələsindədir. Ölkəmizin ayrı-ayrı bölgələrində üzümçülük sahələri genişləndirilir, yeni emal müəssisələri açılır, şərab istehsalının çeşidi isə artırılır.

Eyni zamanda, şərablarımız xarici bazarlarda öz müştərilərini tapmağa başlayıb. Ötən il şərab ixracı 3,5 milyon dollar təşkil edib. Ölkə başçısı tərəfindən 2016-cı ildə təsdiq edilmiş ixracatçılara dəstək mexanizmləri və “Made in Azərbaycan” brendinin təşviqi tədbirləri şərab ixracatçılarına böyük stimul yaradıb. Ötən ilin noyabr ayından başlayar şərab və konyak məhsullarının ixracına görə 440 min manat məbləğində ixrac təşviqinin sahibkarlara ödənilməsinə dair müvafiq qərarlar qəbul edilib. Şərabçılarımız Çinə və Almaniyaya təşkil olunmuş ixrac missiyalarında, Belarusda işgüzar görüşlərdə, çoxsaylı biznes-forumlarda iştirak edib, məhsullarını təşviq etmək imkanı qazanıb və uğurlu nəticələr əldə ediblər. Nazirlər Kabinetinin 2017-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı ölkə başçısı bildirib ki, önəmli məsələlərdən biri qeyri-neft sektorunun istehsal etdiyi malların ixracı ilə bağlıdır və bu da indi uğurla inkişaf edən bir istiqamətdir: “Həm islahatlar aparıldı, həm institusional tədbirlər görüldü, “Azexport” portalı yaradıldı. Azərbaycan brendi indi dünyada təbliğ edilir. Biz bir çox sərgilərdə iştirak etmişik və yenə də iştirak etməliyik. Müxtəlif ölkələrdə ticarət evləri yaradılır, ticarət-ixrac missiyaları həyata keçirilir. Müvafiq sərəncamlar verildi, vəsait ayrıldı. Xarici media vasitələrində reklam kampaniyaları aparılmalıdır ki, biz “Made in Azerbaijan” brendini tanıtdıraq.

Biz yeni ixrac bazarlarına çıxışı təmin etməliyik. Ənənəvi olan ixrac bazarlarına daha geniş çeşiddə məhsulla çıxmalıyıq. Eyni zamanda, yeni ixrac bazarlarını axtarmalıyıq”.

Ölkə başçısı qeyd edib ki, üç milyon yarım dollar dəyərində məhsul ixracı Azərbaycan kimi ölkə üçün çox aşağı səviyyədir. Biz bunu 10 dəfə, bəlkə də 20 dəfə artırmalıyıq və buna imkan var: “Çünki indi bizdə yeni üzüm bağları salınır, kifayət qədər üzüm emalı, şərab zavodlarımız var, onlar tam gücü ilə işləmir. Yəni, burada çox ciddi dövlət siyasəti aparılmalıdır. Üzümçülük, şərabçılıq çox gəlirli sahədir və biz artıq kontraktlar imzalamışıq. Dost, tərəfdaş ölkələrlə indi danışıqlar aparılır ki, onlar öz bazarlarında Azərbaycan şərabı üçün müəyyən bir yer ayırsınlar. Bu proses artıq keçən il başlayıb, bu il daha da geniş vüsət alacaq”.

Qeyd edək ki, ötən ilin noyabrından etibarən bir sıra məhsullarla yanaşı, şərab məhsullarının da Rusiya, ABŞ, Çin, Almaniya, Türkiyə, Belarus və sair ölkələrə ixracı ilə əlaqədar ixrac təşviqinin ödənilməsinə dair qərarlar qəbul edilib.

“Xəzər dalğaları” şərabı Tokioda birinci yerə layiq görülüb

Bu gün yeni ixrac bazarları tapmaq, məhsullarımızı tanıtmaq istiqamətində tədbirlər davam edir. Bu günlərdə Tokionun “Okura” otelində Yaponiya Xarici İşlər Nazirliyinin təşkilatçılığı ilə Cənubi Qafqaz (Azərbaycan, Gürcüstan), Sərgi Avropa (Moldova) və Məğrib (Tunis) ölkələrinin iştirakı ilə “Şərab Dostluğu Möhkəmləndirir - Azərbaycan, Gürcüstan, Moldova və Tunis şərablarını kəşf et” adlı festival keçirilib. Azərbaycan tədbirdə yüksək səviyyədə təmsil olunub.

Tədbirdə Yaponiyanın yüksək səviyyəli dövlət rəsmiləri, ictimai-siyasi dairələrin, diplomatik korpusun, kütləvi informasiya vasitələrinin nümayəndələri, şərab sənayesinin təmsilçiləri iştirak ediblər.

Festivalda Yaponiyanın xarici işlər nazirinin müavini Motome Takezava ölkəsində ilk dəfə belə tədbirin təşkil olunduğunu bildirib, bu cür festivalların xalqlar və dövlətlər arasında əməkdaşlıq əlaqələrinin daha da möhkəmlənməsində mühüm rol oynayacağını vurğulayıb. Nazir müavini təşəbbüsü dəstəkləyən ölkələrə minnətdarlığını bildirib və qeyd edib ki, bu tədbir həmin ölkələrin şərablarını Yaponiyada tanıtmaq baxımından da əhəmiyyətli olacaq.

Azərbaycanın Yaponiyadakı səfiri Gürsel İsmayılzadə ölkəmizdə şərabçılığın inkişafından danışıb. Diplomat Azərbaycanın yalnız neft və qaz ixracatçısı deyil, həm də artıq gözəl şərab istehsalçısı kimi də dünya bazarlarına çıxdığını vurğulayıb. Qeyd edib ki, Azərbaycan şərablarının bu festivalda təqdim edilməsi cari ildə qeyd olunan Azərbaycan-Yaponiya diplomatik münasibətlərinin 25-ci ildönümünə ən yaxşı töhfədir.

Azərbaycan şərabları barədə xarici işlər nazirinin müavini Motome Takezava, Yaponiya Turizm Assosiasiyasının prezidenti Tadaşi Şimura, “Pavone” jurnalının baş redaktoru Akira Matsuda ölkəmizin məhsullarının keyfiyyəti ilə diqqəti cəlb etdiyini vurğulayıblar. Qeyd ediblər ki, “Made in Azerbaijan” brendi olan şərablarımız artıq Yaponiya bazarında mövqeyini möhkəmləndirməkdədir. Bu, iki ölkə arasında iqtisadi əlaqələrin artması ilə yanaşı, dost xalqlarımızın bir-birinə daha da yaxınlaşmasına mühüm təsir göstərəcək.

Tədbir zamanı peşəkar somelyelər tərəfindən keçirilən müsabiqədə Azərbaycanın “Xəzər dalğaları” ağ şərabı birinci yerə layiq görülüb.

Festivalda təqdim edilən şərablar Azərbaycan Nazirlər Kabinetinin, Xarici İşlər və İqtisadiyyat nazirliklərinin, AzPromo və “Silkway” şirkətlərinin dəstəyi ilə Yaponiyaya çatdırılıb.

Nigar Abdullayeva

Palitra.-2017.-15 aprel.-S.5.