Ermənilər beynəlxalq aləmdən dəstək ala bilmirlər

Vaşinqton və Los-Ancelesdəki türk və Azərbaycan icmalarından ermənilərə cavab aksiyası

Hər il olduğu kimi, bu il də aprel ayında dünyanın dörd bir yanında yaşayan ermənilər daha da aktivləşərək öz çirkin niyyətlərini həyata keçirmək- uydurma genosidlərini tanıtmaq üçün siyasi oyunlar təşkil edirlər. Bu il də erməni lobbisinin güclü olduğu ABŞ-da erməni icması bir qədər fəallıq nümayiş etdirməyə çalışıb. Lakin türk və Azərbaycan icmaları onlara adekvat cavablar verib.

Belə ki, aprelin 24-də Vaşinqtonda və Los-Ancelesdə ermənilər özlərinin “erməni soyqırımı”-nın 102-ci ildönümü ilə əlaqədar nümayişlər keçiriblər. ABŞ prezidentinin 1915-ci il hadisələri haqqında danışarkən “soyqırımı” sözü işlətməsinə və ABŞ Konqresində bu haqda qətnamə qəbul edilməsinə nail ola bilməmiş erməni lobbisi Türkiyənin Vaşinqtondakı səfirliyi və Los-Ancelesdəki konsulluğu qarşısında növbəti kütləvi şou təşkil edib. Türkiyənin Vaşinqtondakı səfirliyinin qarşısında təxminən yüz nəfər - Vaşinqtonun erməni icmasının üzvləri, erməni lobbistləri və Ermənistan səfirliyinin nümayəndələri, Türkiyənin Los-Ancelesdəki konsulluğunun qarşısında isə Kaliforniyanın erməni icmasının bir neçə min nümayəndəsi toplaşıb. Məlum olduğu kimi, Kaliforniyada təxminən 800 min erməni yaşayır, onların əksəriyyəti Los-Ancelesdə məskunlaşıb.

Hər iki şəhərdə, ermənilərin toplaşdığı yerdən bir küçə aralıda türk, məshəti türkləri və Azərbaycan icmaların nümayəndələri ermənilərə cavab olaraq etiraz nümayişləri keçiriblər. Bu nümayişlərin məqsədi ermənilərin yalan təbliğatını ifşa etmək və Birinci Dünya müharibəsi zamanı erməni silahlı dəstələri tərəfindən Türkiyənin dinc sakinlərinə qarşı, həmçinin Azərbaycanın Dağlıq Qarabağ regionunun işğalı zamanı Azərbaycan vətəndaşlarına qarşı törədilmiş vəhşiliklər haqqında Amerika ictimaiyyətini məlumatlandırmaq olub.

Nümayişin gedişində, ermənilər bir neçə dəfə provokasiya törətməyə cəhd ediblər. Yerli KİV-lərdə yayılan məlumatlara görə, Los-Ancelesdə Türkiyə konsulluğunun qarşısında etiraz edən türklərə tərəf müxtəlif əşyalar, o cümlədən butulkalar atmış üç erməni həbs edilib. Vaşinqtonda ermənilərə cavab olaraq keçirilən etiraz nümayişi zamanı türk və Azərbaycan dillərində vətənpərvərlik mahnıları səslənib. Bu etiraz nümayişi Türk-Amerika milli rəhbər komitə tərəfindən təşkil edilib.

Xatırladaq ki, ABŞ Prezidenti Donald Tramp da erməniləri məyus edib. O, Osmanlı İmperiyasında 1915-ci il hadisələrinin ildönümü ilə əlaqədar aprelin 24-də bəyanat verərkən genosid sözünü işlətməyib. Prezident D.Tramp ABŞ-ın erməni icmasına başsağlığında bu hadisələri soyqırımı adlandırmayıb, halbuki erməni lobbisi bu il buna nail olmaq üçün xeyli səy göstərib. Bəyanatda deyilir: “Bu gün biz metts yeqern zamanı zərər çəkənləri yada salırıq və onların xatirəsini anırıq”. Sonra D.Tramp ölkə həyatına töhfələrinə görə ABŞ ermənilərinə təşəkkür edərək bildirib ki, türklərin və ermənilərin “daha ədalətli və tolerant gələcəyə zəmin yaratmaq yolunda əhəmiyyətli addım olan bu ağrılı hadisəni nəzərə almaq” səylərini alqışlayır. Erməni dilindən “böyük qırğın” kimi tərcümə olunan “metts yeqern” sözlərini ilk dəfə prezident Barak Obama 1915-ci il hadisələri ilə bağlı ənənəvi bəyanatında istifadə edib. Amma bu sözlər son onilliklər ərzində ABŞ administrasiyası üzvlərinin, o cümlədən ABŞ Prezidentinin dilindən “erməni soyqırımı” sözlərini qoparmaq üçün böyük səylər göstərən və vəsait xərcləyən erməni lobbisini bir o qədər də sevindirməyib. Bununla belə, erməni lobbisi 1915-ci ildə 2 milyondan çox türkün, 1918-1920-ci və 1988-1994-cü illərdə on minlərlə azərbaycanlının erməni quldur dəstələri tərəfindən qətlə yetirilməsi, o cümlədən Malıbəyli, Quşçular, Qaradağlı, Ağdaban və Xocalıda dinc sakinlərin kütləvi qırğını ilə bağlı diskussiyalardan uzaq qaçır.

“Reallıq ondan ibarətdir ki, Ermənistan gücdən istifadə edərək Azərbaycanın suveren ərazilərini işğal edib və bu ərazilərdə qondarma rejim yaradıb”

Bu arada qeyd edək ki, ermənilərin təkcə yalançı soyqırımı iddialarına deyil, Dağlıq Qarabağla bağlı fəaliyyətlərinə qarşı da xarici mətbuatda gedən yazılara tez reaksiya verilərək onların yalanları ifşa edilir. Buna misal olaraq Xarici İşlər Nazirliyinin mətbuat xidmətinin rəhbəri Hikmət Hacıyevin “Independent” qəzetində dərc edilən məqaləsini göstərmək olar. Hikmət Hacıyevin məqaləsi aprelin 20-də “Independent”də dərc edilmiş “Dağlıq Qarabağ respublikasında futbol və ümid - unudulmuş region FIFA-nın sanksiyalarına qarşı” adlı məqaləyə cavabdır. XİN-in mətbuat xidmətinin rəhbəri sözügedən məqalədə regiondakı real vəziyyətin təhrif olunduğunu bildirərək idman və futbolun siyasətdən kənar tutulmalı olduğunu vurğulayib. O bildirib ki, məqalədə Azərbaycanın işğal olunmuş ərazilərinə “Dağlıq Qarabağ respublikası” kimi müraciət edilməsi beynəlxalq hüququn norma və prinsiplərinə ziddir və bu məsələdə yalnız Ermənistan tərəfinin mövqeyinin işıqlandırılması ədalətli və obyektiv jurnalistikanın prinsiplərinə uyğun gəlmir.

XİN rəsmisi yazır: “Reallıq ondan ibarətdir ki, Ermənistan gücdən istifadə edərək Azərbaycanın suveren ərazilərini işğal edib və bu ərazilərdə qondarma rejim yaradıb. BMT Təhlükəsizlik Şurasının qəbul etdiyi dörd qətnamədə Azərbaycanın ərazi bütövlüyü və suverenliyi bir daha təsdiq olunur, Ermənistanın işğalı pislənilir və işğalçı qüvvələrin işğal olunmuş bütün ərazilərdən dərhal, tam və qeyd-şərtsiz çıxarılması tələb edilir”.

Bildirilir ki, Ermənistanın işğalçılıq siyasəti nəticəsində Qarabağ klubu, bəlkə də, dünyada yeganə futbol klubudur ki, öz doğma şəhərindən kənarda sığınacaq tapıb. Məqalənin müəllifinin sözlərinə görə, Qarabağ futbol klubunu Azərbaycan üçün “siyasi şahmat” adlandırması yanlışdır.

“Biz ümid edirik ki, regionda sülh yenidən bərqərar olacaq və Azərbaycanın suverenliyi, ərazi bütövlüyü çərçivəsində Dağlıq Qarabağ bölgəsinin azərbaycanlı və erməni icmaları Qarabağ futbol klubunun oyunlarını izləyəcəklər”, - deyə məqalədə qeyd edilir.

“Azərbaycanın beynəlxalq səviyyədə tanınmış sərhədlərinə hörmət və dəstəyimi ifadə edirəm”

Son illərdə Ermənistanın işğalçı siyasətini davam etdirməsinə qarşı olan fəaliyyətlərdən biri də Ermənistan-Azərbaycan Sülh Platformasının yaradılmasını göstərmək olar. Dünyanın dörd bir tərəfindən bu quruma qoşulan tanınmış şəxslər, ziyalılar münaqişənin həllinin Azərbaycanın ərazi bütövlüyü çərçivəsində həllinin tərəfdarı olduqlarını bəyan edirlər. Sonuncu belə addım atan şəxs isə Birləşmiş Ərəb Əmirliklərinin Gənclər və İdman İnkişafının Baş İdarəsinin beynəlxalq proqramlar üzrə koordinatoru Moataz Salih olub. O bununla bağlı yaydığı bəyanatda qeyd edib ki, “Azərbaycanın ərazi bütövlüyü və beynəlxalq səviyyədə tanınmış sərhədlərinə hörmət və dəstəyimi ifadə edirəm”.

Sülh Platformasının mətbuat xidmətindən verilən məlumata görə, bəyanatda deyilir:

“Ermənistan-Azərbaycan, Dağlıq Qarabağ münaqişəsinin sülh yolu ilə həllini tam dəstəkləyirəm. Azərbaycan və Ermənistan Respublikalarının ərazi bütövlüyü və suverenliyinə, və hər iki dövlətin beynəlxalq səviyyədə tanınmış sərhədlərinə hörmət və dəstəyimi ifadə edirəm. Həmçinin, BMT Təhlükəsizlik Şurasının qəbul etdiyi müvafiq qətnamələrin, digər beynəlxalq təşkilatların qətnamə və qərarlarının icrasının çox vacib olduğunu vurğulayıram. Eləcə də münaqişənin sülh yolu ilə həllində ATƏT -in Minsk qrupunun fəaliyyətinin vacibliyini qeyd etmək istəyirəm. Ermənilər və azərbaycanlılar əsrlər boyu sülh içində yaşayıblar. Böyük təəssüf hissi ilə qeyd etmək istəyirəm ki, münaqişənin həll olunmaması nəticəsində iki xalqın bir-biri haqqında təsəvvürləri yalnız müharibə kontekstində formalaşıb. İnsanların sülh şəklində birgə yaşayışını və uzun müddət davam edən münaqişənin həllini tam dəstəkləyirəm. Qeyd etdiyim səbəblərə görə, mən bu təşəbbüsə öz dəstəyimi ifadə edirəm və əsas məqsədi Ermənistan-Azərbaycan, Dağlıq Qarabağ münaqişəsinin həllinə töhfə vermək olan Ermənistan-Azərbaycan Sülh Platformasına qoşulmağımı bəyan edirəm”.

Tural Tağıyev

Palitra.-2017.-26 aprel.-S.11.