“Yəhudilər də Azərbaycan torpaqları üçün canlarından keçməyə hər an hazırdırlar”

Səadət Şükürova: “Mənim üçün Vətənə xidmət edən hər vətəndaşa dəstək olmaq, arxa durmaq şərəfdir”

Azərbaycandan gedən yəhudilər İsraildə ölkəmizin tanınmasında əvəzsiz xidmətlər göstərirlər. Onlar iki ölkə arasında siyasi, iqtisadi, mədəni əlaqələrin inkişafında önəmli layihələr həyata keçirirlər. Azərbaycanı hər zaman İsraildə layiqincə təmsil edən istedadlı rejissor Səadət Şükürovanın da, bu baxımdan, fəaliyyəti diqqəti çəkir. Səadət Şükürova “Kanal 24” internet televiziyasında yeni yayımlanan “Qürbətdə vətən" verilişi ilə növbəti uğura imza atıb. Qeyd edək ki, “Kanal 24”-ə yeni baş redaktor təyin olunan Səadət Şükürovanın aparıcısı olduğu “Qürbətdə vətən" verilişi İsraildə yaşayan həmyerlilərimizə həsr olunur.

-Öncə, oxucularımıza özünüzü tanıtmağınızı istərdik.

-1970-ci il noyabr ayının 23-də Quba şəhərində anadan olmuşam. Atam azərbaycanlı, anam isə yəhudidir. 1978-ci ildən Bakı şəhər 8 nömrəli musiqi təmayüllü məktəbdə orta təhsillə bərabər, fortepiano və rəqs üzrə də oxumuşam. 1988-ci ildə “Azərnəşr”in binasında Rafiq Əzimovun rəhbərlik etdiyi "Damğa" özfəaliyyət dram dərnəyində həvəskar kimi fəaliyyət göstərmişəm. 1989-cu ildə Mədəniyyət və İncəsənət Universitetinin Teatr rejissorluğu fakültəsinə qəbul oldum. Diplom müdafiəm Əbdürrəhim bəy Haqverdiyevin “Kimdir müqəssir?” əsəri olub. 1994-cü ildə İncəsənət Gimnaziyasında bəstəkar Oqtay Rəcəbovun, rejissor Ələmdar Quluzadənin, Mədəniyyət və İncəsənət Universitetinin və İncəsənət Gimnaziyasının müəllim və tələbələri qarşısında keçirilən diplom tamaşası yüksək qiymətləndirildi. 1995 – 2009-cu illərdə İncəsənət Gimnaziyasında aktyor sənəti və səhnə danışığından dərs demişəm. Eyni zamanda jurnalist kimi də fəaliyyət göstərmişəm.

- İsrailə və vaxt köçdünüz?

-1999-cü ildən ailəmlə İsrailə yaşayıram. Bura gələn gündən özümün böyük missiyama başlamışam. Öz həyat və yaradıcılığımı bir amala – qədim dostluq ənənələrinə malik Azərbaycan və yəhudi xalqlarının daha da yaxınlaşmasına kökləmişəm.

-Azərbaycanla bağlı hansı işlər görürsüz?

- Mənim üçün Vətənə xidmət edən hər vətəndaşa dəstək olmaq, arxa durmaq şərəfdir . 2014-cü ildə İsraildə ilk olaraq "Odlar Yurdu " ailə teatrını yaratdım. İlk dəfə İsrailin Akko şəhərində 31 dekabr-Dünya Azərbaycanlılarının Həmrəyliyi Gününü qeyd etdim. 2015-ci ildən etibarən teatrın üzvlərinin sayı 14-ə çatıb. Sonra mütəmadi olaraq dövlət bayramlarımızı, ağrı-acılarımızı, Vətənin bütün tədbirlərini qeyd etməyə başladıq. “Xocalıya ədalət” və digər bu tipli aksiyalar keçirdik. 2015-ci il dekabrın 14-də Rəşid Behbudovun 100 illik yubileyini də İsraildə “Odlar yurdu” teatr truppası qeyd etdi.

- Hansısa klip və ya film çəkmisizmi?

-2016-cı ilin mart ayında iki dövlət arasındakı dostluğu tərənnüm edən (multikulturalizm, tolerantlıq mövzusunda) klip çəkdim. Bu, yəhudilərin müsəlmanla əbədi dostluğunun möhürüdür. Aprel ayının 15-də İsraildə klipin təqdimatı keçirildi. İştirakçılar tərəfindən klip yüksək səviyyədə qarşılandı. Bu klip hər iki dövlət tərəfindən də xoş qarşılandı. Klipin 23 minə yaxın baxış sayı var. 2016-cı il dekabrın 17-də isə Bakıda Beynəlxalq Mətbuat Mərkəzində klipin təqdimatı qeyd olundu.

2016-cı ilin dekabr ayında isə eyni mövzuda – multikulturalizm, tolerantlıq mövzusunda "Yaşadığım torpaq" bədii-sənədli filmini çəkdim. Bu film də hər iki dövlətdə xoş qarşılandı, yüksək səviyyədə qəbul olundu. Film 4 dildə - Azərbaycan, rus, ingilis və ivrit dillərində təqdim olunur.

2017-ci ilin yanvar ayında isə yeni layihəmi - "Qürbətdə Vətən " layihəsini Vətəndə “Kanal 24” internet televiziyasına təqdim etdim. Layihəm kanalın rəhbəri tərəfindən bəyənildi və yeni ildən yeni işə başladım. İsraildə yaşayan yəhudi əsilli azərbaycanlılarla bağlı silsilə verilişlərə (ayda 4 dəfə, 1 saat) efir vaxtı ayrıldı.

-Hazırda hansı layihələr üzərində çalışırsız?

-Bundan başqa, daha iki layihə üzərində işləmək fikrindəyəm. Hal-hazırda Prezidentimiz bu ili “İslam Həmrəyliyi İli” elan etdiyi üçün "İsrail torpağında Azan səsi!" sənədli filminin ssenarisi əsasında çəkiliş düşünürəm.

Bundan başqa, ən böyük istəyim itkinlər haqqında sənədli film çəkməkdir. Bu sənədli film ilə dünya miqyasında dərdlərimizi bir daha yaddaşlarda görüntü ilə əbədi olaraq tarixdə saxlamaqdır.

2- ci layihəm itkinlərə həsr olunacaq. Milliyyətcə yəhudi Vüqar Abdullayev itkin düşüb. Yenə də məqsədim eynidir. Dünyaya sözümüz ondan ibarətdir ki, torpaqları qorumaq üçün milliyət rol oynamır. Yəhudilər də Azərbaycan torpaqları üçün canlarından keçməyə hər an hazırdırlar.

Fuad Hüseynzadə

Palitra.-2017.-4 may.-S.7.