“Cocuq Mərcanlı kəndinin bərpası barədə sərəncam böyük qayıdışın başlanğıcıdır”

Ölkə başçısı bildirib ki, “Bizim siyasətimizin mərkəzində Azərbaycan vətəndaşıdır. Məcburi köçkünlər uzun illərdir ki, işğaldan əziyyət çəkir. Horadiz şəhəri vaxtilə qəsəbə idi, biz ona şəhər statusu verdik. Biz o torpaqlara qayıdacağıq, necə ki, Horadizə qayıtdıq, Lələtəpəyə qayıtdıq. Digər torpaqlara da qayıdacağıq. Ona görə işğaldan azad edilmiş ərazilərdə ən müasir şəraiti yaratmaq bizim siyasətimizi əks etdirir və gücümüzü göstərir”. Bu gün artıq Prezident İlham Əliyevin qeyd etdiyi sözlər özünü doğruldur, işğaldan azad olunmuş ərazilərdə yaşayış bərpa olunur. Belə ki, “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” Prezidentin sərəncamı bunun bariz nümunəsidir. Sərəncamda da qeyd edilir ki, ötən ilin aprel ayında Azərbaycan Ordusunun həyata keçirdiyi uğurlu əks-hücum hərbi əməliyyatı nəticəsində erməni işğalından azad edilmiş Cəbrayıl rayonunun Cocuq Mərcanlı kəndində insanların təhlükəsiz yaşaması mümkün olub. Bununla da, tarixən burada yaşamış dinc əhalinin öz doğma yurdlarına qayıtması üçün Azərbaycan Silahlı Qüvvələrinin tam nəzarətinə keçmiş həmin ərazilərdə əsaslı yenidənqurma işlərinin başlanmasına şərait yaranıb. Cəbrayıl rayonunun Cocuq Mərcanlı kəndinin bərpası ilə bağlı görüləcək işlər çərçivəsində birinci mərhələdə 50 fərdi yaşayış evinin, məktəb binasının və müvafiq infrastrukturun tikintisi üçün 2017-ci il dövlət büdcəsində nəzərdə tutulmuş Prezidentin ehtiyat fondundan Azərbaycan Respublikasının Qaçqınların və Məcburi Köçkünlərin İşləri üzrə Dövlət Komitəsinə ilkin olaraq 4 milyon manat ayrılıb.

Göründüyü kimi, bu sərəncam heç də təsadüfi deyil. Bu günlərdə Prezident, Silahlı Qüvvələrin Ali Baş Komandanı İlham Əliyev Müdafiə Nazirliyinin Abşeron rayonunun Pirəkəşkül qəsəbəsində “N” hərbi hissəsinin yeni inşa edilmiş hərbi şəhərciyinin açılışı zamanı bildirib ki, keçən ilin aprel ayında erməni silahlı təxribatının qarşısını alaraq, Azərbaycan Ordusu düşmənə sarsıdıcı zərbələr endirdi: “Füzuli, Cəbrayıl, Ağdərə rayonlarının bir hissəsi işğaldan azad edildi. O ərazilərdə Azərbaycan bayrağı dalğalanır. Minlərlə hektar torpaq işğaldan azad edildi. On minlərlə hektar torpağa bu gün Azərbaycan Ordusu nəzarət edir. O torpaqlarda təmizlik işləri aparılır və yaxın gələcəkdə məcburi köçkünlər o ərazilərə qayıdacaqlar”. Dağlıq Qarabağın əzəli Azərbaycan torpağı olduğunu deyən ölkə başçısının sözlərinə görə, əsrlər boyu Azərbaycan xalqı Dağlıq Qarabağda yaşayıb-yaradıb. Orada yerləşən tarixi, dini abidələrimiz bizim qədim mədəniyyətimizi əks etdirir.

“Bu, həmçinin işğal altındakı digər torpaqlarımızın da azad edilməsi istiqamətində mühüm bir addımdır”

Ölkə başçısının “İşğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında” sərəncamını ziyalılarımız, tarixçilərimiz çox müsbət qiymətləndirir, bunu məcburi köçkünlərimizin öz doğma yurdlarına dönməsi istiqamətində bir addım kimi dəyərləndirirlər. Milli Məclisin deputatı Musa Qasımlı bildirib ki, aprel döyüşləri zamanı Azərbaycan Ordusu tərəfindən Ermənistanın işğalından azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında Prezident İlham Əliyevin imzaladığı sərəncam işğal altındakı torpaqlarımızın azad olunması, bərpası və məcburi köçkünlərin öz doğma yurdlarına qayıtması istiqamətində böyük yolun, böyük qayıdışın başlanğıcıdır: “Cocuq Mərcanlı kəndinin bərpasından sonra insanların doğma torpaqlarına qayıdışı xalqımızda dövlətinə və rəhbərinə inam hissini daha da gücləndirəcək. Bu, həmçinin işğal altındakı digər torpaqlarımızın da azad edilməsi istiqamətində mühüm bir addımdır. Aprel döyüşləri Azərbaycan Ordusunun gücünü bir daha göstərdi, xalqımızda ordumuza olan inamı daha da artırdı”.

“Cocuq Mərcanlı kəndinin bərpası ilə bağlı tədbirlər haqqında sərəncam tarixi-siyasi əhəmiyyətə malikdir”

AMEA-nın vitse-prezidenti, akademik, millət vəkili İsa Həbibbəyli bildirib ki, Azərbaycan Prezidenti İlham Əliyevin işğaldan azad edilmiş Cəbrayıl rayonunun Cocuq Mərcanlı kəndinin bərpası ilə bağlı tədbirlər haqqında sərəncamı çox böyük siyasi əhəmiyyətə malikdir: “Azərbaycan təcavüzə məruz qalandan sonra ilk dəfə bir yaşayış məntəqəsi, bir kəndin tam bərpası istiqamətində addım atılır, dövlət sərəncamı imzalanır. Bu, bizim müstəqillik tariximizin əhəmiyyətli hadisələrindən biridir. Azərbaycan Prezidentinin imzaladığı sərəncam Azərbaycanın işğal olunmuş ərazilərini geri qaytarmağa böyük ümid yaradır. Eyni zamanda işğaldan azad olunmuş kəndin bərpası aprel döyüşləri zamanı qəhrəmanlıq göstərmiş Azərbaycan əsgərinin özünə inamını və ruh yüksəkliyini gücləndirir. Bu, həm də möhtərəm Prezidentin rəhbərliyi ilə Azərbaycanın apardığı siyasətin gücünü və reallıqları əks etdirir. Cocuq Mərcanlı kəndinin bərpası ilə bağlı tədbirlər haqqında sərəncam tarixi-siyasi əhəmiyyətə malikdir və böyük qələbənin başlanğıcıdır”.

Nigar Abdullayeva

Palitra.-2017.-26 yanvar.-S.4.