“İstərəm
bir övladım
ABŞ-ın prezidenti,
biri diplomat, biri də vəkil olsun”
Ülkər Qidner: “Biz qəriblikdə
yaşayırıq və
hər zaman bir-birimizə yardım etməliyik”
Xaricdəki vətənsevər və
istedadlı soydaşlarımızı
tanımaq, eləcə
də tanıtmaq hər zaman bizim üçün prioritet olub. Onların qürbət
həyatı, qarşılaşdıqları
çətinliklərə necə sinə gərmələri, əldə
etdikləri uğurlar,
diaspor sahəsində
gördükləri işlər
digərləri üçün
örnəkdir. Ayrıca diaspor
üzvlərinin də
bir-birlərini tanıması
və həmrəylik
nümayiş etdirmələri
vacib amildir. Bütün bunları nəzərə
alaraq “Uzaqdakı yaxınlar” adlı yeni rubrikaya başlayırıq. Məqsədimiz uzun illər Vətəndən kənarda
yaşayan, ürəyi
hər zaman Vətən eşqi ilə döyünən, qəlbində bir Azərbaycan yaşadan və heç kimin tanımadığı
həmvətənlərimizi sizə tanıtmaqdır.
Bu rubrika Azərbaycan
diasporunun sıralarını
daha da genişləndirəcək,
haqqında yazılar gedən insanlar daha fəal olmağa çalışacaqlar.
Rubrikanın özəlliyi budur
ki, xaricdəki soydaşlarımızı sizə
elə diaspor üzvlərinin dili ilə tanıdacağıq.
İlk olaraq Azərbaycan-Amerika Qadınlar
Cəmiyyətinin və
Nyu-York Azərbaycan Evinin rəhbəri Minəvvər Vahabovanın
ABŞ-da yaşayan soydaşımız Ülkər
Qidnerlə müsahibəsini
təqdim edirik:
Mən belə
qərara gəldim ki, Azərbaycandan uzaqda yaşayan, vətəni canından artıq sevən və çoxlarının
tanımadığı həmvətənlərimizi
vaxtaşırı sizə
təqdim edim. İlk müsahibim
ABŞ-ın Ohayo ştatının
Sinsinati şəhərinin
Vest Çester bölgəsində
yaşayan Ülkər
Qidnerdir. Mən Ülkər
xanımı üç
ilə yaxındır
tanıyıram. O, Nyu-Yorka
gələndə və
mən Ohayoya gedəndə görüşürük.
Bu dəfə mən Ülkər xanımın qonağı
oldum. Bu xanım elə bir insandır ki, söhbət etdikcə maraqları, gözəl xüsusiyyətləri,
insani keyfiyyətləri
kəşf olunur.
O qədər fəlsəfi
fikirlər söyləyir
ki, söhbətdən
doya bilmirsən. Əvvəlcə ondan başlayım
ki, yaşadığı
evdə iki otağı məxsusi olaraq elə dizayn olunub ki,
Azərbaycan eksponatları
ilə zəngin bir muzeyi xatırladır.
Üç övlad anası
olan Ülkər xanım deyir ki, ailəsi beynəlmiləl ailədir.
Özü azərbaycanlı, həyat yoldaşı İsveçrə əsilli
amerikalı, övladları
isə amerikalıdırlar.
Bir qızı, iki oğlu olan Ülkər xanım uşaqlarına iki ad verib Frenk-Fəxri, Bianka-Banu və Albert-Şahlar. Ülkər
xanım gözəl şeirlər yazır, artıq 3 şeir kitabının müəllifidir
(“Anama 101 şeirim”, “Qərib xatirələr sorağında”, “Həyatımın
solmaz hekayələri”).
Şeirlərinin sözlərinə musiqi qoşulur və çoxunu da özü ifa edir. Rəssamlıq və dizayner
kimi də bacarığı var. Ülkər
xanım həm də idmanın karate növü ilə məşğul olub.
Qara kəmərə qədər
yüksəlib. Amerikada yaşadığı
müddətdə də
müxtəlif yarışlarda
iştirak edib. İndiki Şabran rayonunda anadan olan Ülkər
xanım Vətənini
çox sevir. Artıq 15 ildən artıqdır ki, Amerikada yaşasa
da, nəinki özü azərbaycanca təmiz danışır,
hətta uşaqlarına
belə, Azərbaycan dilini unutmağa imkan vermir. Hər zaman övladları ilə azərbaycanca danışır. “Övladlarınıza
nə arzu edirsiniz?” sualıma Ülkər xanımın
cavabı: “İstərəm
bir övladım
ABŞ-ın prezidenti,
biri diplomat, biri də vəkil olsun” oldu. Buyurun, müsahibəni
sizə təqdim edirəm.
-Poeziyaya marağınız
nə vaxtdan yarandı?
-Mən məktəbə çox erkən yaşımda getmişəm
və özümdən
böyük uşaqlarla
oxumuşam. Rəhmətlik anam təhsilə
qarşı çox tələbkar idi. Ev tapşırıqlarımıza şəxsən nəzarət
edərdi. Mən də
dərslərimi yaxşı
oxumaqla yanaşı,
“ümumi” dəftərlərə
şeirlər yazardım.
Heç
bir məqsədim yox idi, əslində,
sadəcə, ağlıma
gələn qafiyələri
həmin dəftərlərə
köçürərdim. Oxuduğum şeirlərin mövzusu məni çox düşündürərdi. Hər bir şeirdə bir mövzu, fəlsəfi düşüncə
axtarardım.
Od tutub qırmızı atəşlə
yenə yandı üfüq,
Şəfəqin qırmızı rəngilə
işıqlandı üfüq.
Bir qədər çaydan uzaq, od
qalamış dağda
çoban,
Oyadır öz sürüsün otlaya yaylaqda çoban.
Baxın, Abbas Səhhətin “Yay səhəri” adlı bu şeirini
6-7-ci siniflərdə öyrənmişdik,
ancaq hələ də yadımda qalıb. Nə qədər gözəl
məna var hər bəndində.
Öyrəndiyimiz bu şeirlərdən
ilham alaraq mən də yeni-yeni “əsərlər”
yaradırdım. Anam deyərdi
ki, qızım bu şeirləri bir kitab şəklində
çap elə.
Mən də anamın arzusunu həyata keçirdim. Təəssüf ki, anam bunu
görmədi. Çox istərdim
ki, mənim şeir kitablarımı azərbaycanlı gənclər
oxusunlar.
-Uşaqlarınız özlərini
hansı dinə aid hesab edirlər?
-Mən əsl müsəlmanam, yoldaşım
xristian olsa da, dinə o qədər də meyil etmir. Uşaqlarıma isə başa salıram ki, ananız müsəlman, atanız xristiandır.
Siz də din seçimində
azadsınız. Onları həm
məscidə, həm
də kilsəyə aparmışam. Böyük
oğlumun 13 yaşı
var və bu il
ilk dəfə Ramazan ayında oruc tutdu.
-Bir ana olaraq
Amerikada uşaq böyütmək çətindirmi?
-Məncə, çətin
deyil. Allahıma çox şükür
edirəm ki, mənə üç mələk verib. Çalışıram ki, onları
layiqli övlad kimi böyüdüm.
Dərslərinə daim nəzarət
edirəm, onlar çox yaxşı oxuyurlar, idmanla məşğuldurlar. İstəyirəm övladlarım Allahı sevsinlər, ətraflarındakı
insanlara hörmət etsinlər. Ana, ilk növbədə səbirli
olmalıdır. Övladımızı həmişə dinləməliyik,
onlarla gülməli, ağlamalı və lazım gəldikdə oynamalıdır. Ev işlərini
də, yemək bişirməyi də öyrətmişəm uşaqlarıma.
-Bildiyimizə görə yaşadığınız şəhərdə
azərbaycanlı, türk
və digər millətlərin nümayəndələrinə
hər zaman yardım edirsiniz. ABŞ-da yaşayan
həmvətənlərimiz haqda nə düşünürsünüz?
-Mən Vətəndən
kənarda yaşayan həmvətənlərimə birlik
arzu edirəm. Biz gözəl, yardımsevər,
mərhəmətli xalqıq.
Biz qəriblikdə yaşayırıq və hər zaman bir-birimizə yardım etməliyik.
-Sizcə, Azərbaycanı
tanıtmaq üçün
nə etmək lazımdır?
-Şəxsən mən
Azərbaycanı tanıtmaq
üçün hər
zaman əlimdən gələni edirəm. Burada azərbaycanlılar az olduğundan mənim dostlarımın əksəriyyəti digər
xalqların nümayəndələridir.
Mən çalışıram
ki, bu insanlar
Azərbaycanın bayramları,
tarixi, adət-ənənələri
və musiqisi ilə tanış
olsunlar. Məsələn, Novruz süfrəmiz
çoxlarının marağına
səbəb olur.
Mən çox istərdim ki, bizim-azərbaycanlı ailələrin övladları
oxuduqları məktəblərdə
Azərbaycanı tanıtmağa
çalışsınlar. Müxtəlif tematik təqdimatlarda
Azərbaycan haqqında
məlumat versinlər.
Bir də çox istərdim ki, Azərbaycanımızın tarixinə
aid olan kitablar ingilis dilinə tərcümə olunaraq Amerikada kitabxanalara, məktəb kitabxanalarına,
tələbələrə çatdırılsın. Mən “Qurani-Kərim”i ingilis dilində almışam ki, övladlarım onu oxusunlar. Sonda balalarımıza tövsiyə
edirəm ki, hər verilən ruziyə şükür etsinlər, hər zaman valideynlərindən də irəli getməyə çalışsınlar,
daima inkişaf etsinlər. Valideynlərinə hörmət etsinlər.
Heç
zaman ruhdan düşməsinlər. Hazırda elm və texnologiya dövründə yaşayırıq
və yeni biliklər toplamaq daha asandır, ancaq bu texnologiyadan
da ağılla istifadə etsinlər.
Maraqlı müsahibə üçün
sizə təşəkkür
edirəm. Sonda sizin yazdığınız
“Azərbaycan” şeirindən
bir bənd söyləməyinizi xahiş
edirəm.
Ey Vətənim, nə gözəlsən,
İgid oğlun, qızın sənin.
Damarımda axan qanım
Torpağına qurban sənin.
Unudulmaz
keçmişimiz,
Nizamimiz,
Füzulimiz
Unudulmaz
bir nəslimiz,
Salatınım, Çingizimiz.
Minəvvər Vahabova
Azərbaycan-Amerika
Qadınlar Cəmiyyətinin və Nyu-York
Azərbaycan Evinin rəhbəri
Palitra 2018.- 29 avqust.- S.12.