Firəngiz Əlizadə: 10 il ardıcıl belə gözəl festival keçirmək yüksək təşkilatçılıq tələb edir

Şəki “İpək Yolu” X Beynəlxalq Musiqi Festivalının son akkordları çalındı və yubiley festivalı demək olar ki, tarixə qovuşdu. Festivalımız bu dəfə də yüksək səviyyədə keçdi. Yubiley festivalına dahi Üzeyir Hacıbəylinin “Leyli və Məcnun” muğam operası ilə başladıq və yekun konsertində TÜRKSOY-a daxil olan ölkələrin musiqiçiləri öz məharətlərini yüksək səviyyədə nümayiş etdirdilər. Onları Qazaxıstandan gələn estrada simfonik orkestri müşayiət etdi. Konsertdə mahnılar da səsləndi, solo ifalar və rəqslər də oldu. Konsert türk xalqlarının mədəniyyətinin zənginliyini bir daha nümayiş etdirdi.

AZƏRTAC-ın bölgə müxbiri xəbər verir ki, bu sözləri Şəki “İpək Yolu” X Beynəlxalq Musiqi Festivalının bədii rəhbəri, Azərbaycan Bəstəkarlar İttifaqının sədri, AMEA-nın müxbir üzvü, Xalq artisti, UNESKO-nun Sülh artisti Firəngiz Əlizadə festivalın bağlanış mərasimində jurnalistlərə müsahibəsində deyib.

Festivalın yüksək səviyyədə keçməsinə görə şəkililərə, bu işdə əməyi olan insanlara minnətdarlığını bildirən F.Əlizadə deyib: “10 il ardıcıl belə gözəl festivalı keçirmək yüksəksəviyyəli təşkilatçılıq tələb edir. Biz bunların hamısını - yüksək qonaqpərvərliyi, mədəniyyəti Şəkidə gördük. Bütün şəkililərə təşəkkür edirəm və ümidvaram ki, biz yenə görüşəcəyik”.

Palitra.- 2019.- 5 iyul.- S.13.