Ədəbiyyat İnstitutunda Hindistan günü keçirilib

AMEA-nın Nizami Gəncəvi adına Ədəbiyyat İnstitutunda Hindistan günü keçirilib. Bu barədə AZƏRTAC-a institutdan məlumat verilib.

Tədbiri AMEA-nın vitse-prezidenti, institutun direktoru, akademik İsa Həbibbəyli açaraq Azərbaycan-Hindistan əlaqələrinin inkişafından danışıb. Akademik bildirib ki, Azərbaycan Milli Elmlər Akademiyasının əksər institutlarının Hindistanla özünəməxsus elmi əlaqələri var. Həmçinin Ədəbiyyat İnstitutu da Hindistanla əlaqələrini qurub və inkişaf etdirir. “Azərbaycanla Hindistan əlaqələrinin qurulmasında səfirlərin çox böyük rolu var. Bizim institutda Hindistan tədqiqat mərkəzi yaradılıb. Eyni zamanda, institutumuzda bir neçə ildir ki, hind dili tədris olunur. Bu işdə böyük əməyi keçən Hindistanlı müəllimin işindən çox razıyıq. İnstitutumuzun əməkdaşı Şəhla Qurbanova Hindistanla bağlı elmi tədqiqat işi yazır. İnstitutumuzun alimləri Hindistanlı həmkarları ilə birgə böyük Azərbaycan şairi Nizami Gəncəviyə həsr olunmuş kitab üzərində çalışırlar”, - deyə akademik bildirib.

O, həmçinin qeyd edib ki, dünyanın yeddi möcüzəsindən biri olan Tac-Mahal abidəsi türk-müsəlman sivilizasiyasının böyük nümunəsi kimi Hindistanda qorunur və ora çoxlu turistlər cəlb olunur. Mən Tac-Mahal abidəsini ziyarətdən böyük təəssüratla qayıtdım. Hindistan Dövlət Universitetində Türk dili və ədəbiyyatı bölməsi yaradılıb. Həmin bölümün rəhbəri Oğuz Xan bizim institutda qonağımız oldu. Bu il martın 23-də mən həmin universitetdə Azərbaycan ədəbiyyatından dərs dedim. Biz istərdik ki, institutumuzda nümayiş etdirmək üçün bizə Rabindranat Taqor haqqında film bağışlayasınız”, - deyə İ.Həbibbəyli əlavə edib.

Hindistanın ölkəmizdəki səfirliyinin Təhsil və Mədəniyyət üzrə ikinci katibi Sujesh Chandra Sinha çıxış edərək tədbir üçün təşəkkürünü bildirib və Rabindranat Taqorla bağlı filmlərin instituta təhvil verilməsinə yardım edəcəyini deyib.

Azərbaycan-Asiya ədəbi əlaqələri şöbəsinin müdiri, professor Bədirxan Əhmədli 2016-cı ildən fəaliyyət göstərən şöbənin bu istiqamətdə artıq bir sıra uğurlara imza atdığını qeyd edib. O, Hindistan ədəbiyyatı ilə bağlı dissertasiyalar yazıldığını nəzərə çatdırıb.

Daha sonra institutun əməkdaşlarından Leyli Əliyeva, Leyla Həsənzadə və Leyla Primova hind dilində şeir söyləyiblər. Eyni zamanda, tədbirdə hind mahnısı səsləndirilib.

Nigar

Palitra.-2019.-24 sentyabr.-S.6.