“Həzi ürəklərdə yaşayır bu gün”

Yanvarın 22-si 2 dəfə Sovet İttifaqı Qəhrəmanı, tank qoşunları general mayoru, əfsanəvi qəhrəman Həzi Aslanovun anadan olmasının 109 və yanvarın 24-ü isə həlak olmasının 74-cü ildönümüdür. Bu münasibətlə qəhrəmanın adını daşıyan Bakı şəhəri Yasamal rayonu 175 saylı məktəbdə “Həzi ürəklərdə yaşayır bu gün” adlı tədbir keçirilib. Böyük Vətən müharibəsi və Qarabağ döyüşlərində şəhid olan qəhrəmanlarımızın ruhu bir dəqiqəlik sükutla yad edildikdən sonra tədbirin aparıcıları 5 d sinif şagirdləri Həmdullayeva Gövhər, Alxasov Araz və Hüseynov Əli igid sərkərdənin mənalı həyat və şərəfli döyüş yolu haqqında geniş məlumat verdilər. Təhsil ocağının müəllim heyəti, valideynlər və qonaqlar Həzi Aslanovun həyat və döyüş yolundan bəhs edən videoçarxa baxdılar. Şagirdlərin hazırladıqları əfsanəvi qəhrəmanın mənalı həyat yolu və şərəfli döyüş yolunu əks etdirən “Həzi ürəklərdə yaşayır bu gün” adlı ədəbi-bədii kompozisiya təqdim olundu və böyük alqışlara səbəb oldu. Sonra 5 d sinif şagirdləri qəhrəmanın yeniyetməlik illərində, kursant olduğu vaxtlarda dosta münasibətilə bağlı bir səhnəcik təqdim etdilər. Həzi Aslanov rolunun ifaçısı Zeynallı Ömər, Həzinin kursant dostu Aslan rolunun ifaçısı Əliyev Əli, Həzinin anası Nuşu ana rolunun ifaçısı Hüseynova Səadət və tamaşada olan hadisələri nəql edən Şükürova Nurayın məharətlə ifa etdikləri səhnəcik böyük alqışlarla qarşılandı. Şagirdlər Zəhra Gülməmmədzadə və Aylin Quliyeva “Cənab leytenant” mahnısını məharətlə ifa etdilər. Şagirdlərin ifasında qəhrəmanlıq və vətənpərvərlik mövzusunda şeirlər söylənildi, igid sərkərdənin həyat və döyüş yolunu əks etdirən “Sizi dünyalar qədər sevirəm” filmindən fraqmentlər izlənildi. Tədbirdə şagirdlərdən Zeynallı Ömər, Əliyev Ülvi, Nəcəfli Ömər, İbrahimova Nuranə, Nəcəfli Səma, İsmayılzadə Nərgiz, Süleymanlı Nəsimi, Məmmədli Ayxan, Tahirzadə Sənubər fəal iştirak etdilər. Tədbirin sonunda məktəbin direktoru Tural Mirzəliyev çıxış edərək əfsanəvi qəhrəmanın mənalı həyat və şərəfli ömür yolundan danışıb qeyd etdi ki, Həzi Aslanov Azərbaycan xalqının yetirdiyi ən böyük sərkərdələrdəndir. Xalqımızın ümummilli lideri Heydər Əliyev Həzi Aslanovun hərb tarixində müstəsna rol oynadığını dəfələrlə qeyd edib və qəhrəmanın adının əbədiləşdirilməsi üçün bir çox sərəncamlar verib. Bu ənənə Azərbaycan Prezidenti, Silahlı Qüvvələrin Ali Baş Komandanı İlham Əliyev tərəfindən uğurla davam etdirilir. Tural Mirzəliyev tədbirin təşkilatçıları məktəbin hərbi rəhbəri Fizuli Əzizov və məktəbin ingilis dili müəllimi 5 d sinfinin rəhbəri Gülşən Şiriyevaya belə bir tədbir hazırladıqları üçün minnətdarlığını bildirdi və qeyd etdi ki, belə tədbirlərin keçirilməsi şagirdlərin vətənpərvərlik tərbiyəsində mühüm rol oynayır. Tural müəllim, həmçinin şagirdlərə də gözəl çıxış və ifalarına

görə təşəkkür etdi. Tədbirin sonunda məktəbin foyesində qoyulmuş əfsanəvi qəhrəmanın büstü önündə müəllim və şagird heyəti xatirə şəkli çəkdilər.

Nigar

Palitra.-2019.-25 yanvar.-S.13.