Avropa Parlamenti: Ermənistan ilə Azərbaycanın Dağlıq Qarabağ bölgəsi arasında əlaqə yaradacaq magistral yolun tikintisi beynəlxalq hüququn pozulmasıdır

Avropa Parlamentinin Azərbaycan, Gürcüstan və Ermənistan üzrə Parlament Əməkdaşlıq Komitəsinin həmsədri Mariya Kalyurand, Azərbaycan üzrə məruzəçisi Jelena Zavko, Ermənistan üzrə məruzəçisi Trayan Basesku Ermənistan ilə Azərbaycanın işğal altında olan Dağlıq Qarabağ bölgəsi arasında əlaqə yaradacaq magistral yolun tikintisi ilə bağlı birgə bəyanat yayıblar. AZƏRTAC Avropa Parlamentinin saytına istinadla xəbər verir ki, bəyanatda bu qərarın Azərbaycanın müvafiq orqanları ilə razılaşdırılmadan verildiyi və bunun beynəlxalq hüququn pozulması olduğu qeyd edilir. “Biz ATƏT-in Minsk qrupu həmsədrlərinin səylərinə və onların 2009-cu ildə təsdiqlənən Əsas Prinsiplərinə dəstəyimizi bir daha bəyan edirik. Bu vasitəçiliyin uğur qazanması üçün biz Ermənistan və Azərbaycan hakimiyyətlərini Azərbaycanın beynəlxalq səviyyədə tanınan sərhədləri çərçivəsində münaqişənin sülh yolu ilə həllinə dair danışıqlara öz öhdəliklərini gücləndirməyə çağırırıq”, - deyə bəyanatda vurğulanır.

Deputat: “Avropa Parlamentinin bəyanatı qurumun Dağlıq Qarabağla bağlı ciddi mövqeyini göstərir”

“Avropa Parlamentinin 2020-ci il 10 iyun tarixli bəyanatı Dağlıq Qarabağ və ətraf rayonlarının Ermənistan tərəfindən qanunsuz işğalını bir daha təsdiq etdi”.

Bunu APA-ya açıqlamasında Avropa Parlamenti ilə Əməkdaşlıq Komitəsinin üzvü, millət vəkili Kamal Cəfərov deyib. O bildirib ki, bəyanatın əsas məqsədi Ermənistan və Dağlıq Qarabağı birləşdirən üçüncü avtomobil yolunun inşasının beynəlxalq hüquqa zidd olmasını bildirmək idi: “Avropa Parlamenti qeyd edib ki, bu magistral yolun inşası Azərbaycan səlahiyyətli orqanının razılığı olmadan həyata keçirildiyi üçün beynəlxalq hüquqa ziddir. Bu addım Ermənistanın işğalçı siyasətini əhatə edir. Eyni zamanda Avropa Parlamenti təəssüf hissi ilə qeyd edir ki, Ermənistan bu cür fəaliyyəti ilə sülh və barışıq üçün tələb olunan mühiti pozur. Yekun olaraq, bəyanatda Dağlıq Qarabağ münaqişəsinin məhz Azərbaycanın beynəlxalq tanınmış sərhədləri çərçivəsində həllinə çağırış edilir. Bu bəyanatın Avropa Parlamentinin Azərbaycan üzrə məruzəçisi Jelena Zavko, Ermənistan üzrə məruzəçisi Traian Basesku və AP-nin Azərbaycan, Gürcüstan və Ermənistan üzrə Parlament Əməkdaşlıq Komitəsinin həmsədri Mariya Kalyurand tərəfindən imzalanması çox vacibdir. Bu, onu göstərir ki, Dağlıq Qarabağla bağlı Avropa Parlamentinin ciddi və vahid mövqeyi var”.

Deputat hesab edir ki, Ermənistan işğal siyasəti və fəaliyyəti ilə özünü bir daha ifşa edib və Avropa Parlamenti də buna həm hüquqi həm də siyasi rəy verib: “Eyni zamanda birgə bəyanat göstərdi ki, bu münaqişənin yalnız iki tərəfi var: Ermənistan və Azərbaycan. Bütün dünya bir daha yaddaşını təkrarladı ki, Dağlıq Qarabağ həm beynəlxalq hüquq normalarına, həm də tarixi nöqteyi-nəzərdən Azərbaycanın tərkib hissəsidir. Dağlıq Qarabağ Azərbaycandır”.

İlk dəfə Milli Məclisdə beynəlxalq parlament təşkilatları üzrə nümayəndə heyətlərinin rəhbərləri ilə videokonfrans formatında görüş keçirilib

Azərbaycan Respublikası Milli Məclisinin Sədri Sahibə Qafarova ilk dəfə beynəlxalq parlament təşkilatları üzrə nümayəndə heyətlərinin rəhbərləri ilə videokonfrans formatında görüşüb. Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib. Bildirilib ki, görüşdə beynəlxalq fəaliyyətin daha səmərəli həyata keçirilməsi və heyətlər arasında əlaqələndirmənin daha yaxşı qurulması istiqamətində geniş fikir mübadiləsi aparılıb. Videokonfransda çıxış edən Milli Məclisin Sədri Sahibə Qafarova deyib ki, görüşün məqsədi nümayəndə heyətlərimiz qarşısında qoyulan hədəflər, gözləntilərimiz və beynəlxalq təşkilatlar üzrə heyətlərin iş prinsipləri haqda fikir mübadiləsi aparmaqdır. O bildirib ki, VI çağırış Milli Məclisdə beynəlxalq təşkilatlar üzrə 12 nümayəndə heyəti və bir ikitərəfli komitə fəaliyyət göstərir. “Əminəm ki, işimizi doğru və əlaqələndirilmiş şəkildə quracağımız təqdirdə bütün bu platformalar bizə parlament diplomatiyamızı uğurla həyata keçirmək imkanı verəcəkdir”, - deyə Sahibə Qafarova qeyd edib.

Altıncı çağırış Milli Məclisin ilk iclasında Azərbaycan Prezidenti İlham Əliyevin nitqində əksini tapan konseptual məsələlərin parlamentin beynəlxalq fəaliyyətinin həyata keçirilməsində də “yol xəritəsi” kimi çıxış etdiyini deyən Milli Məclisin Sədri bildirib: “Parlamentin Sədri olaraq mənim məsuliyyətim dövlətimizin başçısının tövsiyələri əsasında beynəlxalq fəaliyyətimizin daha səmərəli qurulmasını təmin etməkdir”. Sahibə Qafarova deyib ki, Prezident İlham Əliyevin də ifadə etdiyi kimi, beynəlxalq təşkilatlar üzrə nümayəndə heyətlərimizin fəaliyyəti Azərbaycanın milli maraqlarını qorumağa, fərqli gündəlikləri ilə ölkəmizə təzyiq etməyə çalışan qrupların bu cəhdlərinin qarşısının alınmasına yönəlməlidir. O deyib: “Çünki Azərbaycan Prezidentinin də hər zaman dediyi kimi, həqiqət bizim tərəfimizdədir, doğru olan bizik! Hər bir fürsətdən istifadə edib, Dağlıq Qarabağ mövzusunu diqqətdə saxlamalıyıq”.

Videokonfransda çıxış edən nümayəndə heyətlərinin rəhbərləri Milli Məclisdə ilk dəfə belə bir görüşün keçirilməsinə görə minnətdarlıqlarını bildirib, gələcək fəaliyyətləri ilə bağlı fikirlərini ifadə ediblər.

"Amerika ənənəvi olaraq Azərbaycanın ərazi bütövlüyünü dəstəkləyir"

"Amerika Birləşmiş Ştatlarının prezident seçkilərinin nəticələrindən asılı olmayaraq Dağlıq Qarabağ münaqişəsi ilə bağlı ənənəvi yanaşması dəyişməyəcək. Düşünürəm ki, bütün hallarda ənənəvi kurs davam etdiriləcək". Bu sözləri SİA-ya açıqlamasında siyasi məsələlər üzrə ekspert İlqar Vəlizadə Amerika Birləşmiş Ştatlarında keçiriləcək 2020-ci il prezident seçkilərinin nəticəsinin Dağlıq Qarabağ münaqişəsinin həllində oynaya biləcəyi roldan danışarkən deyib.

Onun sözlərinə görə, ABŞ-da prezident seçkilərinin nəticələrindən asılı olmayaraq, bu nəticələrin Dağlıq Qarabağ münaqişəsinin həllində əsaslı təsirlərə gətirib çıxarmır: "Amerika Birləşmiş Ştatlarında həyata keçirilən seçkilər prosesini neçə illərdir ki, müşahidə edirik. Onların nəticələrini izləyirik. Eyni zamanda, Dağlıq Qarabağ münaqişəsinin tənzimlənməsinə təsiri ilə bağlı prosesləri izləyirik. Təəssüflər olsun ki, bu nəticələrin əsaslı təsirləri olmur. Sadəcə olaraq hər yeni administrasiya çalışır ki, bizim məsələmizlə bağlı müəyyən dəsti-xətt seçsin. Bu dəsti-xətt Amerikanın xarici siyasətinə uyğun seçilir. Amerika xarici siyasətində ənənəvi olaraq Azərbaycanın ərazi bütövlüyünü dəstəkləyir. Münaqişənin Azərbaycanın ərazi bütövlüyü çərçivəsində həllinə köməklik göstərir və yaxud buna çalışır. Hər halda Amerikanın ATƏT-in Minsk qrupundakı təmsilçiləri də dəfələrlə onu vurğulayıb ki, işğal olunmuş ərazilər boşaldılmalıdır və Azərbaycana qaytarılmalıdır. Xüsusilə də, ilk növbədə Dağlıq Qarabağ ətrafında yerləşən 7 rayon nəzərdə tutulur".

Siyasi ekspertin fikrincə, Amerika Birləşmiş Ştatlarının prezident seçkilərinin nəticələrindən asılı olmayaraq bu ənənəvi yanaşma dəyişməyəcək: "Növbəti seçkilərin nəticələrindən asılı olmayaraq bu yanaşma tərzi dəyişilməyəcək. Əlbəttə ki, burada qalib gələn tərəflərin fəallığından biz danışa bilmərik, çünki, Amerikanın indi başı bir çox məsələlərə qarışıb. Hazırda, həm regionda, həm də dünyada prioritet olaraq Dağlıq Qarabağ münaqişəsi, təəssüflər olsun ki, ön planda deyil. Ona görə də, düşünürəm ki, bütün hallarda ənənəvi kurs davam etdiriləcək. Hansısa sıçrayışlar, hansısa real dəyişiklikləri gözləmək isə düzgün olmazdı".

N.Abdullayeva

Palitra.- 2020.- 12 iyun. S. 11.